नबिल बैंकमा काम गर्न अवसर, माग्यो ८९ जना कर्मचारी
काठमाडौं। नबिल बैंक लिमिटेडले एकैेपटक ठूलो मात्रामा कर्मचारीको माग गरेका छ । बैंकले एक सूचना प्रकाशन गर्दै विभिन्न पदमा ८९ जना कर्मचारीको माग गरेको हो । बैंकले खुला प्रतिस्पर्धाबाट म्यानेजमेन्ट ट्रेनी, ट्रेनी असिस्टेन्ट र सूचना प्रविधिमा कर्मचारीको माग गरेको हो । जसमा म्यानेजमेन्ट ट्रेनीमा १५ जना, ट्रेनी असिस्टेन्ट भनेर ७० जना र माग सूचना प्रविधि (आइटी) मा ४ जना कर्मचारी मागिएको छ । बैंकले सार्वजनिक गरेको सूचना अनुसार म्यानेजमेन्ट ट्रेनीका लागि एक वर्षको परीक्षण अवधि सकिएपछि अधिकृत तहमा पदस्थापन गरिनेछ । उक्त पदका लागि २८ वर्षभन्दा बढी उमेर भएका व्यवस्थापन, अर्थशास्त्र, कम्प्युटर साइन्स, इन्जिनियरिङ मा स्नातकोत्तर पास गरेका उम्मेद्वारले आवेदन दिन सक्नेछन् । यसैगरी, ट्रेनी असिस्टेन्टमा २५ वर्ष पूरा भएको तथा स्नातक पास गरेकाहरुले आवेदन दिन सक्नेछन । सूचना प्रविधि क्षेत्रमा आवेदन दिन आइटी/इन्जिनियरिङमा स्नातक पास गरेको हुनुपर्नेछ । सबै पदका लागि आवेदन गर्ने अन्तिम समय २३ मार्च अर्थात चैत १० सम्म रहेको छ । बैंककाे अनुसार नयाँ माग गरिएका कर्मचारी सातै प्रदेशका लागि रहनेछन् ।
सामुदायिक लघुवित्तको डीसीईओ वेलुमाया मगरले पाइन् कामु सीईओको जिम्मेवारी
काठमाडौं । सामुदायिक लघुवित्त वित्तीय संस्थाको निमित्त प्रमुख कार्यकारी अधिकृत (कामु सीईओ) को जिम्मेवारी वेलुमाया मगरले पाएकी छिन् । संस्थाले चैत १ गतेदेखि लागू हुने गरी नायव प्रमुख कार्यकारी अधिकृत (डीसीईओ) मगरलाई कम्पनीको कामु सीईओको जिम्मेवारी दिइएको हो । कम्पनीको प्रमुख कार्यकारी अधिकृत (सीईओ) बाट शिवहरि श्रेष्ठले राजीनामा दिएसँगै संस्थाले मगरलाई कामु सीईओको जिम्मेवारी दिएको हो । श्रेष्ठको राजीनामा २०७८ बैशाख १ गतेदेखि लागू हुने कम्पनीले जानकारी गराएको छ ।
नेको इन्सुरेन्सको सञ्चालकमा विनयरमण पौडेल, राष्ट्रिय वाणिज्य बैंकबाट प्रतिनिधित्व गर्ने
काठमाडौं । नेको इन्सुरेन्सको सञ्चालकमा विनयरमण पौडेल नियुक्त भएका छन् । नवनियुक्त सञ्चालक पौडेलले कम्पनीको फागुन २८ गते बसेको सञ्चालक समितिको बैठकबाट पदबहाली गरेका हुन् । पौडेललाई राष्ट्रिय वाणिज्य बैंकले प्रतिनिधि मनोनित गरि नेको इन्स्योरेन्समा पठाएको हो । यससँगै, नवनियुक्त सञ्चालक पौडेलले कम्पनीका संस्थापक सेयरधनी राष्ट्रिय वाणिज्य बैंकको तर्फबाट प्रतिनिधित्व गर्नेछन् ।
