मेरोमाइक्रोफाइनान्सका अध्यक्ष मानन्धरले लिए शपथ
काठमाडौं । मेरोमाइक्रोफाइनान्स लघुवित्त वित्तीय संस्थाका अध्यक्ष सन्जिब मानन्धरले शपथ ग्रहण गरेका छन् । संस्थाको नवौं वार्षिक साधारण सभाबाट अध्यक्षमा पुनःनिर्वाचित मानन्धरले नेपाल राष्ट्र बैंकका कार्यकारी निर्देशक देब कुमार ढकाल समक्ष शपथ ग्रहण गरेका हुन् । उनलाई गत शुक्रबार सम्पन्न भएको साधारण सभाबाट संचालक पदमा निर्वाचित भइ संचालक समितिबाट अध्यक्ष पदमा मनोनित गरिएको हो । साथै, सभाले अध्यक्ष सहित आगामी चार वर्षका लागि ४ सदस्यीय नयाँ सञ्चालक समिति चयन गरेको थियो ।
राष्ट्रिय बीमा कम्पनीको सीईओ बन्न एक महिलासहित ११ जना इच्छुक
काठमाडौं । राष्ट्रिय बीमा कम्पनीको प्रमुख कार्यकारी अधिकृत (सीईओ) बन्न ११ जनाले आवेदन दिएका छन् । सीईओको लागि आव्हान भएको दरखास्तमा एक महिलासहित ११ जनाले आवेदन बुझाएका कम्पनीका प्रवक्ता निरञ्जन आचार्यले जानकारी दिएका हुन् । प्रवक्ता आचार्यका अनुसार आवेदन दिनेमध्ये महिला आवेदक बरिस्मा साउद आचार्य रहेकी छिन् । त्यस्तै, बुद्धकाजी श्रेष्ठ, सुरेन्द्र थापा, शेरजंग कार्की, शेखर बराल, तोयराज अधिकारी, कृष्णबहादुर कार्की, सुकल्याण पराजुली, रमेश लम्साल, मनोजसिंह भण्डारी र रामबहादुर खड्काले कम्पनीको सीईओ बन्नका लागि आवेदन दिएका छन्। यससँगै, अब कम्पनीको सीईओ छनोटको लागि बनेको उपसमितिले सबै प्रकृया पुरा गरेर मात्रै यी ११ जना आवेदकमध्ये एक जनालाई कम्पनीको सीईओमा नियुक्त गर्ने छ । कम्पनीले रिक्त रहेको सीईओ पदमा खुला प्रतिस्पर्धाका आधार पदपूर्ति गर्नका लागि मंसिर १२ गते दरखास्त आव्हान गरेको थियो । उक्त पदको लागि योग्यता पुगेका इच्छुक नेपाली नागरिकले सूचना प्रकाशित भएको मितिले १५ दिनभित्र आवेदन दिइसक्नु पर्ने प्रावधान थियो । सोही अनुसार उक्त ११ जनाले मंसिर २६ गतेसम्ममा आवेदन दिएका हुन् ।
सिद्धार्थ बैंकका कामु सीईओ कडेलले पाए प्रमुखको जिम्मेवारी
काठमाडौं । सिद्धार्थ बैंकका कायम मुकायम प्रमुख कार्यकारी अधिकृत (कामु सीईओ) सुन्दरप्रसाद कडेलले प्रमुख कार्यकारी अधिकृतको जिम्मेवारी पाएका छन् । मंसिर २७ गते बसेको सञ्चालक समितिको बैठकले कडेललाई प्रमुखको जिम्मेवारी दिने निर्णय गरेको हो । यससँगै नवनियुक्त सीईओ कडेलले आगामी ४ वर्षसम्म बैंकको सीईओ पदको कार्यभार सम्हाल्ने छन् । उनले २०७८ मंसिर २७ गतेदेखि नै उक्त पदको जिम्मेवारी सम्हालेका हुन् । यसअघि बैंकका तत्कालिन प्रमुख कार्यकारी अधिकृत शम्भुनाथ गौतमले आफ्नो ४ वर्षे कार्यकाल सम्पन्न गरी बैंकको सेवाबाट अवकाश लिने निर्णय गरे पश्चात् कडेल कामु सीईओको रुपमा कार्यरत थिए । बैंकिङ्ग क्षेत्रको सेवामा नवनियुक्त प्रमुख कार्यकारी अधिकृत कडेलको तीन दशकभन्दा लामो कार्य अनुभव रहेको छ । व्यवस्थापनमा स्नातकोत्तर हासिल गरेका कडेल सिद्धार्थ बैंकमा विगत १६ वर्षदेखि विभिन्न उच्च व्यवस्थापकीय पदमा रहेर कार्य गरी विगत ४ वर्षदेखि बैंकको नायब प्रमुख कार्यकारी अधिकृतको जिम्मेवारी वहन गर्दै आएका थिए । बैंक सञ्चालनमा विशेष दखल राख्ने कडेलले सिद्धार्थ बैंकमा सेवा प्रारम्भ गर्नु अगाडि नबिल बैंकमा समेत करिब १७ वर्षको कार्य अनुभव समेत सँगालेका छन् । प्रमुख कार्यकारी अधिकृत कडेलको नियुक्तिबाट सिद्धार्थ बैंकलाई अझै उचाईमा लैजान मद्दत पुग्ने विश्वास बैंकले लिएको छ ।
