एनआईसी एशिया बैंकका नवनिर्वाचित अध्यक्ष अग्रवालले लिए शपथ
काठमाडौं । एनआईसी एशिया बैंकका नवनिर्वाचित अध्यक्ष तुलसीराम अग्रवालले शपथ लिएका छन् । अध्यक्ष अग्रवालले नेपाल राष्ट्र बैंकका गर्भनर महाप्रसाद अधिकारी समक्ष पद तथा गोपनीयताको शपथ लिएका हुन् । चैत २० गते सम्पन्न बैंकको २४औं साधारण सभाले अग्रवाललाई अध्यक्षमा निर्वाचित गरेको थियो । सभाले उनीसहित ६ जना सञ्चालक लाई समितिमा निर्वाचित गरेको थियो । जसअनुसार समितिमा संस्थापक शेयरधनीहरूको तर्फबाट प्रतिनिधित्व गर्ने र सर्वसाधारण शेयरधनीहरूको तर्फबाट प्रतिनिधित्व गर्ने ३/३ जना गरी ६ जना सञ्चालक निर्विरोध निर्वाचित भएका छन् । संस्थापक सेयरधनीहरूको तर्फबाट तुलसीराम अग्रवाल, त्रिलोक चन्द अग्रवाल र रामचन्द्र संघईनिर्विरोध निर्वाचित भएका छन् । सर्वसाधारण सेयरधनीहरूको तर्फबाट निकुञ्ज अग्रवाल, गणेशमान श्रेष्ठ र आदित्यकुमार अग्रवाल निर्वाचित भएका हुन् ।
राष्ट्रिय बीमा कम्पनीले पायो सीईओ, सरकारका उपसचिव ओझा नियुक्त
काठमाडौं । राष्ट्रिय बीमा कम्पनीले साढे ४ महिनापछि प्रमुख कार्यकारी अधिकृत (सीईओ) पाएको छ । २०७८ मंसिरदेखि नेतृत्वविहीन बनेको कम्पनीले नेपाल सरकारका उपसचिव ज्ञानेन्द्रराज ओझालाई कम्पनीको सीईओको रुपमा पाएको हो । सरकारले गत चैत १३ गते नै ओझालाई कम्पनीको सीईओमा नियुक्त गर्ने निर्णय गरेको हो । सरकारको निर्णय अनुसार कम्पनीको सञ्चालक समितिको बैठकले उनलाई चैत १५ गतेदेखि नै लागू हुने गरी सीईआको कार्यभार सम्हाल्ने जिम्मेवारी दिएको हो । यसअघि राष्ट्रिय बीमा कम्पनीमा नेपाल सरकारका उपसचिव डा. डिल्लीराज अर्याल सीईओ थिए । उनलाई सरकारले फिर्ता बोलाएपछि सीईओ पद रिक्त रहेको थियो ।
आईएमई ग्रुपको वरिष्ठ उपाध्यक्षमा सुमन पोखरेल, सीईओमा खिलेन्द्र पौडेल
काठमाडौं । आइएमई ग्रुपको सिनियर भाइस प्रेसिडेन्टमा सुमन पोखरेल नियुक्त भएका छन् । यसअघि आइएमईका प्रमुख कार्यकारी अधिकृत (सीइओ) रहेका पोखरेललाई बोर्डको बैठकले सिनियर भाइस प्रेसिडेन्टमा नियुक्त गरेको हो । त्रिभुवन विश्वविद्यालयबाट बिजिनेश स्टडिजमा स्नातकोत्तर गरेका पोखरेलसँग बैंकिङ क्षेत्रमा १३ वर्ष काम गरेको अनुभव छ । उनी नेपाल रेमिटर्स एसोसिएसनका अध्यक्ष र नेपाल व्यवस्थापन संघका दोस्रो उपाध्यक्ष पनि हुन् । यस्तै, बोर्ड बैठकले आइएमईको सीइओमा खिलेन्द्र पौडेललाई नियुक्त गरेको छ । पौडेल यसअघि कम्पनीका महाप्रबन्धक थिए । पौडेलले त्रिभुवन विश्वविद्यालयबाट व्यवस्थापनमा स्नातकोत्तर गरेका छन् । रेमिट्यान्स उद्योगमा आफ्नो २० वर्षको व्यावसायिक अनुभवमा उनले २ वर्ष मलेसियामा आईएमईको ओभरसिज अपरेसनको नेतृत्व गरेका थिए ।
