सुपरमादी हाइड्रोले ३१ करोडको सेयर जारी गर्ने, बिक्री प्रबन्धकमा सानिमा क्यापिटल
काठमाडौं । सुपरमादी हाइड्रोपावर कम्पनीले ३१ करोड ५० लाख रुपैयाँ बराबरको प्राथमिक सेयर(आईपीओ) निष्काशन गर्ने भएको छ । कम्पनीले एक सय अंकित दरको ३१ लाख ५० हजार कित्ता सेयर आयोजना प्रभावित क्षेत्रका स्थानियवासी तथा सर्वसाधारण लगानीकर्तामा निष्काशन गर्न लागेको हो । सो मात्राको सेयर निष्काशन गर्नको लागि कम्पनीले सानिमा क्यापिटललाई निष्काशन तथा बिक्री प्रबन्धकको रुपमा नियुक्त गरेको छ । सो क्रममा सानिमा क्यापिटलका तर्फबाट प्रमुख कार्यकारी अधिकृत भिष्म राज चालिसे र सुपरमादी हाइड्रोपावरका तर्फबाट अध्यक्ष पुष्पज्योति ढुंगानाले सम्झौता पत्रमा हस्ताक्षर गरेका छन् । कम्पनीले गण्डकी प्रदेश कास्की जिल्ला स्थित साविक नामाजुङ्ग र पार्चे गा.वि.स हालमादी गाउँपालिका अवस्थित मादीखोलामा निर्माणाधिन सुपरमादी जलविद्युत आयोजनामा (४४ मे.वा.) लगानी गर्न सो मात्राको सेयर जारी गर्न लागेको हो । सुपरमादी हाइड्रोपावर लिमिटेड कम्पनी ऐन, २०६३ बमोजिम २०६५ साल माघ ३ गते नेपाल सरकार, कम्पनी रजिष्ट्रारको कार्यालयमा पब्लिक लिमिटेड कम्पनीको रुपमा स्थापना भएको कम्पनी हो । कम्पनीको गण्डकी प्रदेश, कास्की जिल्लाको मादीगाउँपालिका (तत्कालिन नामाजुङ्ग र पार्चे गा.वि.स.) मा बहने मादीखोलाको पानी प्रयोग गरी निर्माण गर्न लागेको आयोजना करिब ६५ प्रतिशत सम्पन्न भएको छ । त्यस्तै, आगामी २०७८ साल पुस महिना भित्र विद्युतको व्यापारिक उत्पादन प्रारम्भ गर्ने योजना रहेको छ ।
नेपालकै पहिलो म्युचुअल फण्डको राफसाफ तथा फछ्र्यौट अब ‘टी प्लस टू’ मा हुने
काठमाडौं । एनआईबिएल म्युचुअल फण्ड अन्तर्गत सञ्चालित नेपालकै पहिलो खुलामुखी याेजना “एनआईबिएल सहभागिता फण्ड” को राफसाफ तथा फछ्र्यौट टी प्लस टूमा हुने भएको छ । हाल ‘टी प्लस थ्री’ प्रणालीमा राफसाफ तथा फछ्र्यौट हुँदै आएको उक्त फण्डकाे इकाई आज(माघ १४ गते) देखि भने ‘टी प्लस टू’ प्रणालीमा अर्थात एकदिन छिटाे हुने भएको हो । हालै नेपालको धितोपत्र बजारमा धितोपत्र कारोबारको राफसाफ तथा फछ्र्यौट चक्र ‘टी प्लस थ्री’ कायम गरिएको अभ्यासलाई समेत दृष्टिगत गर्दै क्यापिटलले आजैदेखि नयाँ व्यवस्था लागू गरेको हो । साथै, यस योजनाको विवरण पुस्तिकामा सो चक्रलाई कार्य प्रणाली तथा दक्षतामा अभिवृद्धि गर्दै घटाउँदै लगिने क्यापिटलले इकाईधनीलाई जानकारी गराएको छ । “एनआईबिएल सहभागिता फण्ड” नेपाल इन्भेष्टमेण्ट बैंक कोष प्रबद्र्धक तथा एनआईबिएल एस क्यापिटल योजना व्यवस्थापक तथा डिपोजिटरी रहेको एनआईबिएल म्युचुअल फण्ड अन्तर्गत सञ्चालित खुलामुखी म्युचुअल फण्ड हो ।
आईपीओ जारी गर्ने प्रस्तावसहित बुद्धभुमी नेपाल हाइड्रोले डाक्यो एजीएम
काठमाडौं । बुद्धभुमी नेपाल हाइड्रोपावर कम्पनीले आगामी फागुन ७ गते वार्षिक साधारणसभा (एजीएम) डाकेको छ । माघ ९ गते बसेको कम्पनी सञ्चालक समितिले कम्पनीको १३औं वार्षिक साधारणसभा सो दिन दिउँसो ३ बजे गर्ने निर्णय गरेको हो । बैठकको निणर्यअनुसार सभा काठमाडौंको महाराजगञ्जस्थित कम्पनीको रजिष्ट्रार कार्यालयमा हुने भएको छ । सभामा सञ्चालक समितिले प्राथमिक सेयर(आईपीओ) निष्काशन गर्ने विशेष प्रस्ताव लगेको छ । यससँगै सभाले पारित गरेसँगै कम्पनीले आईपीओ निष्काशन गर्ने प्रकृया अघि बढाउने छ । त्यस्तै, सभाले सञ्चालक समितिको तर्फबाट अध्यक्षको प्रतिवेदन, कम्पनीको आर्थिक वर्ष २०७६/७७ को लेखा परिक्षण प्रतिवेदन र आर्थिक वर्ष २०७७/७८ को लागि लेखा परिक्षक नियुक्ती गर्ने र निजको पारिश्रमिक तोक्ने प्रस्तावलाई अनुमोदन गर्ने छ ।
