ओपनिङमै ६४ अंकले घट्यो सेयर बजार, सबै समूह राताम्मे
काठमाडौं । आइतबार कोरोबार सुरु भएदेखि नै सेयर बजारमा आरालो यात्रा सुरु भएको छ । ११ बजेर १४ मिनेट जाँदा सेयर बजार ६४.२२ अंकले घटेको हो । सो अवधिसम्म २६ कित्ता सेयर कारोबारबाट कुल ६९ करोड ९४ लाख रुपैयाँको कारोबार भएको छ । आज सबै समूहहरु राताम्मे भएका छन् ।
फर्स्ट माइक्रोफाइनान्सले १० प्रतिशत लाभांश दिने
काठमाडौं । फर्स्ट माइक्रोफाइनान्स लघुवित्त वित्तीय संस्थाले सेयरधनीलाई १०.५३ प्रतिशत लाभांश दिने घोषणा गरेको छ । संस्थाले आर्थिक वर्ष २०७७/७८ को नाफाबाट चुक्तापुँजीको १० प्रतिशत बोनस र ०.५३ प्रतिशत (कर प्रयोजनको लागि) नगद लाभांश वितरण गर्ने प्रस्ताव गरेको हो । भदौ १९ गते बसेको कम्पनी सञ्चालक समितिको बैठकले उक्त प्रस्ताव गरेको हो । जसलाई संस्थाको वार्षिक साधारणसभाले पारित गरेपछि मात्रै सेयरधनीले सो मात्राको लाभांश पाउनेछन् । हाल संस्थाको चुक्ता पुँजी ८७ करोड ६८ लाख रुपैयाँ रहेको छ । १० प्रतिशत बोनसपछि लघुवित्तको चुक्ता पुँजी ९६ करोड ४४ लाख रुपैयाँ पुग्ने छ ।
सरकारको १५ अर्बको विकास ऋणपत्र नेप्सेमा सूचीकृत
काठमाडौं । नेपाल सरकारको विकास ऋणपत्र नेपाल स्टक एक्स्चेञ्ज (नेप्से) मा सूचीकृत भएको छ । सरकारको १५ अर्ब रुपैयाँ बराबरको विकास ऋणपत्र भदौ १८ गते नेप्सेमा सूचीकृत भएको हो । २०८३ ‘ङ’ नामक उक्त ऋणपत्र ५ वर्षे अवधिको रहेको छ । जसमा ४.३७ प्रतिशत व्याजदर पाइने छ र अर्धवार्षिक रुपमा भुक्तानी गरिने जनाइएको छ । त्यस्तै, २०७८ असार २३ गते निष्काशन भएको उक्त विकास ऋणपत्रको साँवा २०८३ असार २३ गते भुक्तानी हुने छ ।
