महालक्ष्मी विकास बैंकसहित तीन कम्पनीको सेयर मूल्य समायोजन
काठमाडौं । मंगलबार विभिन्न तीन कम्पनीको सेयर मूल्य समायोजन भएको छ । महालक्ष्मी विकास बैंक, निर्धन उत्थान लघुवित्त वित्तीय संस्था र नेपाल हाइड्रो डेभलपर्सको बोनस सेयर पछिको सेयर मूल्य समायोजन भएको हो । जसमध्ये महालक्ष्मी विकास बैंकको २० प्रतिशत बोनस सेयरको लागि मूल्य समायोजन भएको छ । समायोजन पश्चात बैंकको सेयर मूल्य प्रतिकित्ता ४७०.३३ रुपैयाँ कायम भएको छ । त्यस्तै, निर्धन उत्थान लघुवित्त वित्तीय संस्थाको २९.५ प्रतिशत बोनसको लागि सेयर मूल्य समायोजन भएको छ । मूल्य समायोजन पश्चात संस्थाको सेयर मूल्य प्रतिकित्ता १२००.७७ रुपैयाँ कायम भएको छ । त्यसैगरी, नेपाल हाइड्रो डेभलपर्सको पनि ७ प्रतिशत बोनस सेयरको लागि मूल्य समायोजन भएको हो । प्रतिकित्ता ३९१ रुपैयाँलाई आधार मानेर गरिएको समायोजित मूल्य प्रतिकित्ता ३६५.४२ रुपैयाँ कायम भएको छ । यससँगै पुस १२ गतेसम्म यी तीन कम्पनीको सेयर किन्नेले गत वर्षको लाभांश पाउँने छन् भने सो दिन पछाडि किन्नले गत आवको लाभांश पाउँदैनन् ।
अर्घाखाँची सिमेन्टको साधारण सेयर बुक विल्डिङ प्रक्रियामा
काठमाडौं । अर्घाखाँची सिमेन्ट लिमिटेडले बुक विल्डिङ प्रक्रियाबाट साधारण सेयर निष्काशन गर्ने प्रक्रिया अगाडि बढाएको छ । कम्पनीको साधारण सेयर निष्काशन गर्ने र पुँजी वृद्धि गर्ने प्रस्तावसहित कम्पनीले माघ ५ गते २३औं बार्षिक साधारण सभा गर्न लागेको छ । सबै प्रक्रिया पुरा गरेर सेयर सार्वजनिक निष्काशन गर्न अझै एक वर्ष समय लाग्ने कम्पनीका अध्यक्ष पशुपति मुरारकाले बताए । बुक विल्डिङ विधिबाट सेयर निष्काशन गर्न कम्पनी पब्लिक भएको एक आर्थिक वर्ष पूरा अवधिको वार्षिक प्रतिवेदनसहित प्रक्रियामा जानुपर्ने हुन्छ । अर्घाखाँची सिमेन्ट पुरानो कम्पनी भए पनि गत वर्ष मात्र पब्लिक लिमिटेडमा रुपान्तरित भएको हो । कति रकम बराबरको सेयर निष्काशन गर्ने भन्ने निर्णय साधारणसभाबाट हुने कम्पनीका अध्यक्ष मुरारकाले बताए । कम्पनीको हाल चुक्ता पुँजी ७७ करोड रुपैयाँ छ । गत आर्थिक वर्षको नाफाबाट कम्पनीले नगद लाभांश वितरण गर्दैछ । नेपाल धितोपत्र बोर्डले बुक विल्डिङ विधिबाट साधारण सेयर निष्काशन गर्ने व्यवस्था गरेपछि पहिलो पटक सर्वोत्तम सिमेन्टले बुक विल्डिङ विधिबाट सेयर निष्काशन प्रक्रिया अगाडि बढाएको थियो । तर त्यो प्रक्रिया विवादमा परेपछि कुनै पनि कम्पनीले बुक विल्डिङ विधिबाट सेयर निष्काशन गरेका छैनन् ।
नेपाल लाइफ र मेगासहित ८ कम्पनीको सेयर मूल्य बढ्यो, कसको कति ?
काठमाडौं । सोमबारको बजारमा विभिन्न ८ वटा कम्पनीको सेयर मूल्य बढेको छ । कारोबारमा आएका २३८ वटा स्क्रिप्टस् (कम्पनीसहित) हरु मध्ये २७ वटाको सेयर मूल्य बढेको हो । जसमध्ये नेपाल लाइफ इन्स्योरेन्स र मेगा बैंकसहित ८ वटा कम्पनी रहेका छन् । नेपाल लाइफको सेयर मूल्य ७ रुपैयाँ अर्थात ०.४६ प्रतिशतले बढेर प्रतिकित्ता १५४० रुपैयाँमा सेयर किनबेच भएको छ । त्यस्तै, मेगा बैंकको पनि सेयर मूल्य ७.५० रुपैयाँले बढेर प्रतिकित्ता २८५ रुपैयाँमा अन्तिम कारोबार भएको हो । जुन अघिल्लो दिनको तुलनामा २.७० प्रतिशतले बढी हो । सबैभन्दा बढी गोर्खाज फाइनान्स र मध्ये भोटेकोशीको सेयर मूल्य १०/१० प्रतिशतले बढेको छ । सोमबार यी दुई कम्पनीको अन्तिम कारोबार प्रतिकित्ता ८७६.७० र १२१ रुपैयाँमा भएको छ सामलिङ् पावर कम्पनीको ५.९२ प्रतिशतले सेयर मूल्य बढेर प्रतिकित्ता ४९७ रुपैयाँमा कारोबार भएको छ । त्यस्तै, बिशाल बजार कम्पनीको सेयर मूल्य ०.२७ प्रतिशतले बढेर प्रतिकित्ता ४८१५ रुपैयाँ पुगेको छ । बोटलर्स नेपाल (तराई) को सेयर मूल्य १.७३ प्रतिशतले बढेर प्रतिकित्ता १४ हजार ८५० रुपैयाँमा अन्तिम कारोबार भएको छ । त्यसैगरी, माहुली सामुदायिक लघुवित्तको पनि सेयर मूल्य बढेको छ । आइतबारको तुलनामा संस्थाको सेयर मूल्य २.३७ प्रतिशत अर्थात प्रतिकित्ता ३५.६२ रुपैयाँले सेयर मूल्य बढेको छ । र, सोमबारको अन्तिम कारोबार प्रतिकित्ता १५३८ रुपैयाँमा भएको छ ।
