युनिलिभर नेपालले घोषणा गर्यो ६५० प्रतिशत लाभांश
काठमाडौं । युनिलिभर नेपालले गत आर्थिक वर्षको लाभांश घोषणा गरेको छ । कम्पनीले आर्थिक वर्ष २०७७/७८ को नाफाबाट सेयरधनीलाई प्रतिसेयर ६५० रुपैयाँ अर्थात ६५० प्रतिशत नगद लाभांश वितरण गर्ने प्रस्ताव गरेको हो । उक्त प्रस्ताव भदौ २१ गते सम्पन्न कम्पनीको सञ्चालक समितिको बैठकले उक्त प्रस्ताव गरेको हो । प्रस्तावित लाभांशलाई कम्पनीको आगामी साधारण सभाले पारित गरेपछि मात्रै सेयरधनीले सो मात्राको लाभांश पाउने छन् । उक्त प्रस्तावित ६५० प्रतिशत लाभांश अघिल्लो आर्थिक वर्षको तुलनामा बढी हो । कम्पनीले आर्थिक वर्ष २०७६/७७ को नाफाबाट सेयरधनीलाई १०० प्रतिशत मात्रै नगद लाभांश वितरण गरेको थियो ।
आजको बजार अस्थिर हुन सक्ने, धेरै नघट्ने लगानीकर्ताको आश
काठमाडौं । यो साताको दुई असाध्यै अस्थिर देखिएको सेयर बजार आज पनि अस्थिर नै हुन सक्ने आकलन गरिएको छ । केही लगानीकर्ता बजार बढ्नेमा आशाबादी देखिएका छन् भने केही लगानीकर्ता बढेको बजारमा सेयर बेचेर निस्कने दाउमा छन् । आजको बजार पनि अस्थिर नै हुन सक्ने नेपाल इन्भेष्टर्स फोरमका उपाध्यक्ष राजन लम्साल बताउँछन् । ‘आइतबार बजार घटेर नेगेटिभ सर्किट ब्रेक लगाउनु पर्यो भने सोमबार बजार १६२ अंकले बढ्यो, केही लगानीकर्ता अब बजार बढ्छ भन्ने आशामा देखिन्छन् भने केही लगानीकर्ता अब बजार धेरै नबढ्ने भएकोले सेयर बेच्ने मौका पर्खिरहे जस्तो देखिन्छ, त्यसैले निस्कन खोज्नेले बेच्ने र बढ्छ भन्ने आश गर्नेहरुले किन्ने द्वन्द देखिन्छ जस्तो छ,’ उपाध्यक्ष लम्सालले विकासन्युजसँग भने । स्थीर हुन खोज्दै बजार लगानीकर्ताहरु बजार स्थीर हुन खोजिरहेको बताउँछन् । नेगेटिभ सर्किट लागेको भोलिपल्ट नै अघिल्लो दिनको भन्दा बढी अंकले बजार बढेका कारण अझै केही दिन अस्थीरता देखिन सक्ने लगानीकर्ताको अनुमान छ । ‘बजार घट्छ भन्ने त्रासको कारण उत्पन्न भएको प्यानिक सेल सकियो, बेचेर निस्कन खोज्नेहरुले बेचिसकेका छन्, अर्थमन्त्रीको निर्देशनको कारण मार्जिन प्रकृतिको कर्जामा ४ करोड र १२ करोडको सीमामा पनि परिवर्तन हुन्छ भन्ने विश्लेषण एकथरि लगानीकर्ताको छ, यो संख्या ठूलो पनि छ,’ उपाध्यक्ष लम्सालले भने । अर्काथरि लगानीकर्ता भने नयाँ कुनै नीतिगत सु्विधा नआउने र अहिले भएको व्यवस्थामै एड्जस्ट गर्नुपर्ने भएकोले बजार धेरै बढ्दैन भन्ने विश्लेषणमा रहेको लम्सालले सुनाए । यी दुबै तर्कलाई आधार मान्दा बजार स्थीर हुन खोजिरहेको देखिन्छ । तर, प्राविधिक विश्लेषण गर्ने केही विश्लेषकहरुले भने बजार अब बढ्दा ४८ सयदेखि ६५ सय विन्दुको बीचमा नेप्से परिसुचक पुग्ने विश्लेषण सुनाइरहेका छन् । केही विश्लेषकहरुले भने अहिलेको विन्दुबाट बजार घटेर २४ सयदेखि २५ सय विन्दुको बीचमा नेप्से परिसुचक रहने दाबी पनि गरिरहेका छन् । कम्पनीहरुले गत आर्थिक वर्षको वार्षिक साधारणसभा गरेर लाभांश वितरण गर्ने समय नजिकिएको छ । पुस मसान्तसम्ममा कम्पनीहरुले वार्षिक साधारणसभा गरिसक्नु पर्ने कानुनी व्यवस्था छ । सोही कारण बजार पुस अघि नट्ने अनुमान पनि गरिएको छ । तर, अबका दिनमा बजारले कस्तो गति लिन्छ भनेर स्पष्ट दृश्य देखिनको लागि अझै केही दिन पर्खन जरुरी देखिएको लगानीकर्ताहरुको विश्लेषण छ ।
टिप्पणी: सेयरबाट अर्बौं कमाउने खेलमा पटक-पटक नीतिगत परिवर्तन
काठमाडौं । करका दर परिवर्तन गर्दा उद्योगी, व्यापारी र उपभोक्तामा जति छिटो असर पर्छ, त्यो भन्दा छिटो पुँजी बजारसँग सम्बन्धित नीतिले बजारलाई प्रभावित पार्छ । अर्थमन्त्रालय र नेपाल राष्ट्र बैंकले पुँजी बजारसँग सम्बन्धित नीति छिटो छिटो परिवर्तन गर्ने गरेको छ । यसमा स्वार्थ समूहहरुको ठूलो चलखेल हुन्छ । रातारात सेयरबाट करोडौं मात्र होइन, अरबौं रुपैयाँ लाभ लिने वर्गले अर्थमन्त्री वा गभर्नरलाई बारबार प्रभावित गरेर लाभ लिँदै आएको छ । पुँजी वृद्धिको नीति, मर्जर तथा एक्विजिशनको नीति, लाभांश दर कसिलो वा खुकुलो बनाउने नीति, कर्जाको सीमामा बढाउने वा घटाउने, कहिले खुलेआम लाइसेन्स बक्री गर्ने, कहिले लाइसेन्स बन्द गर्ने, कहिले मर्जमा जानेलाई बम्पर छुट दिने, कहिले शुन्य सहनशिलताको नीति लिने, कहिले जोखिम कोषमा जाने रकम बढाइदिने, कहिले घटाइदिने, कहिले सूचिकृत कम्पनीहरुको कम्पनीको नाफा बढाउने मद्दत पुग्नेगरी नीति ल्याइदिने, कहिले सूचिकृत कम्पनीको नाफा सेयरधनीलाई वितरण गर्न नमिल्ने नीति ल्याइदिने नीतिले पुँजी बजारमा धेरै तलमाथि गराएको छ । कहिले मनलाग्दी प्रिमियम मूल्यमा सेयर जारी गर्न छुट दिने, कहिले सेयर प्रिमियमको आधार र मापदण्ड तोक्ने, घरी बढाबढ मूल्यमा सेयर निष्काशन गर्न छुट दिने, घरी निश्चित प्रिमियम मूल्य तोकेर सेयर बिक्री गर्न दिने नियामकीय नीतिहरु खुलेआम भ्रष्टाचारको दृष्यहरु हुन् । कहिले सेयरमा पुँजीगत लाभकर १० प्रतिशत बनाउने कहिले ५ प्रतिशत बनाउने, कहिले ब्रोकर कमिशनमा भ्याट लगाउने, कहिले भ्याट छुट दिने, कहिले खुला बजारको दुहाई दिएर नीति, नियम, आधार, मापदण्ड सबैमा आँखा चिम्लने, कहिले बजारमा सकारात्मक विभेद वा संरक्षणात्मक हस्तक्षेप भनेर पुँजी बजारमा नीति नियम, आधार, मापदण्डको नियामकीय पञ्जा फैलाउने कार्य पुँजी बजारका विकृति रुपहरु हुन् । कुनै अर्थमन्त्री वा गभर्नरले पुँजी बजारलाई अनुत्पादक क्षेत्र भन्ने, यो क्षेत्रमा सक्रिय लगानीकर्तालाई वित्तीय अपराधीको रुपमा चित्रण गर्ने, कुनै अर्थमन्त्री वा गभर्नरले पुँजीबजारलाई अर्थतन्त्रको धड्कन ठान्ने, पुँजीबजारको लगानीकर्तालाई असली पुँजीपति मान्ने सोच, चिन्तन, नीति, कार्यशैली पुँजीबजारको अस्थिरताका मुल कारण हुन् । पुँजी बजारको विगत ३० वर्षको इतिहासले यहि पुष्टि गरिरेको छ । र, वर्तमान अर्थमन्त्री जर्नादन शर्मा तथा गभर्नर महाप्रसाद अधिकारीको पछिल्ला गतिविधि र अभिव्यक्ति नै अहिलेको सेयर बजारको अस्थिरताका कारण हुन् । बैंक तथा वित्तीय संस्थाबाट कर्जा लिएर सेयरमा लगानी गरिने पुँजीको वहावलाई नियन्त्रण गर्न राष्ट्र बैंकले एउटा नीति लियो । त्यहि नीतिको विपक्षमा अर्थमन्त्री शर्मा उभिएका छन् । गभर्नरले आफ्नो नीतिको बचाउ गर्दै सार्वजनिक रुपमा बोलेपछि सेयर बजारको मूल्य मापन गने इन्डेक्स नेप्से एकै दिने १०८ अंकले घट्यो । उच्च दरको गिरावट रोक्न नेगेटिभ सर्किट ब्रेक लगाउनु पर्यो । अर्थमन्त्रीले गभर्नरलाई सेयर धितो कर्जाको सीमा ४ करोड र १२ करोडलाई हटाउन टेलिफोनमा भनेको भनेर अर्थमन्त्रीले प्रेस विज्ञप्ति निकाले । गभर्नरले पनि मिलाएर नीतिगत सुधारकाे बचत दिएकाे अर्थमन्त्रीले जारी गरेकाे विज्ञप्तीमा उल्लेख छ । सोही दिन नेप्से १६२ अंकले वृद्धि भयो । अर्थमन्त्रीको निर्देशन राष्ट्र बैंकले पालना गर्छ वा गर्दैन, अर्थमन्त्रीको निर्देशन लागू भएर आउने हो वा राष्ट्र बैंकको नीतिले निरन्तरता पाउने हो, अनिश्चित नै छ । यति अनिश्चितताका बीच केहीले ठूलो फाइदा लिइरहेका छन् भने धेरै लगानीकर्ता जोखिमा परेका छन् । लगानीकर्ता तथ्यमा नभई बहकाउका आधारमा बजारमा भिडेका छन् । तुलनात्मक रुपमा उच्च प्रतिफल दिने वाणिज्य बैंकहरुको सेयर मूल्य सस्तो छ । तर तुलनात्मक रुपमा अझै केही वर्ष लाभांश दिन नसक्ने कम्पनीहरुको सेयर मूल्य महँगो छ । १० प्रतिशत लाभांश दिने सामर्थ्य भएको लघुवित्तको सेयर ५ हजार छ, १० प्रतिशत लाभांश दिने सामर्थ्य भएको बीमा कम्पनीको सेयर मूल्य १ हजार ५ सय रुपैयाँ छ भने १० प्रतिशत नै लाभांशको सामथ्र्य भएको वाणिज्य बैंकको सेयर मूल्य ५०० रुपैयाँ छ । र, अब ७ वर्ष लाभांश दिन सक्ने सामर्थ्य नभएको जलविद्युत कम्पनीको सेयर ५/७ सय रुपैयाँ छ । सेयर मूल्य घट्यो भनेर सडकमा नाराबाजी गर्नुले यी लगानीकर्ता न आफ्नो गल्ती अनुभूति गर्न सक्छन् । नत रातारात सेयरबाट अर्बौं कमाउने नीतिगत परिवर्तनको नाटकको दृष्यलाई सहि ढंगले बुझ्न सक्दछन् । पात्र र प्रवृति सबै खुलस्त छन् । मात्र बुझ्न र बुझाउन कठिन छ । सम्बन्धित समाचार गर्भनरलाई अर्थमन्त्रीले फोन गरेपछि सेयर बजारमा १६२ अंकको वृद्धि
