लोअर इर्खुवा हाइड्रोपावरको बिक्री प्रबन्धकमा मुक्तिनाथ क्यापिटल
काठमाडाैं । लोअर इर्खुवा हाइड्रोपावरले धितोपत्र निष्काशन तथा बिक्री प्रबन्धकमा मुक्तिनाथ क्यापिटललाई नियुक्त गरेकाे छ । कम्पनीले जारी पूँजी मध्ये १० प्रतिशत अर्थात ७ लाख कित्ता साधारण शेयर उद्योग प्रभावित क्षेत्र भोजपुर जिल्लाका स्थानिय बासिन्दाहरुलाई र २० प्रतिशत अर्थात १४ लाख कित्ता साधारण शेयर सर्वसाधारणहरुमा जारी गर्न लागेकाे छ । उक्त सम्झौतापत्रमा लोअर इर्खुवा हाइड्रोपावरको तर्फबाट प्रबन्ध संचालक विश्वेश्वर सुवेदी र मुक्तिनाथ क्यापिटलको तर्फबाट प्रमुख कार्यकारी अधिकृत कबिन्द्र ध्वज जोशीले हस्ताक्षर गरेका छन् । हाल उक्त कम्पनीको अधिकृत पूँजी ९० करोड, जारी पूँजी ७० करोड र चुक्ता पूँजी ४९ करोड रहेको छ । स्थानीय बासिन्दा तथा सर्वसाधारणहरुमा शेयर निष्काशन गरी बाँडफाँड गरे पश्चात कम्पनीको चुक्ता पूँजी ७० करोड हुनेछ । लोअर इर्खुवा हाइड्रोपावरले भोजपुर जिल्लाको षडानन्द न.पा र साल्पा सिलिचों गाउँपालिकामा १३ मेगावाट क्षमता भएको लोअर ईर्खुवा जलविद्युत आयोजनाको निर्माण कार्य सम्पन्न गरी व्यापारिक विद्युत उत्पादन गर्ने लक्ष्य लिएको छ ।
नेपाल बंगलादेश क्यापिटलको १९ प्रतिशत नगद लाभांश पारित
काठमाडौं । नेपाल बंगलादेश क्यापिटलको प्रस्तावित १९ प्रतिशत नगद लाभांश पारित भएको छ । असोज १८ गते बानेश्वरको इन्द्रेणी फुडल्याण्डमा सम्पन्न संस्थाको तेस्रो बार्षिक साधारण सभाले सञ्चालक समितिको उक्त प्रस्तावलाई पारित गरेको हो । यससँगै सेयरधनीले २०७८ असार मसान्तसम्म कायम चुक्ता पुँजीको १९ प्रतिशत नगद लाभांश(करसहित) पाउने भएका छन् । हाल संस्थाको चुक्ता पुँजी २० करोड रुपैयाँ रहेको छ । जसको १९ प्रतिशतका दरले ३ करोड ८० लाख रुपैयाँ नगद लाभांश सेयरधनीले पाउने भएका छन् । सभाले आर्थिक वर्ष २०७७/०७८ को सञ्चालक समितिको प्रतिवेदन, लेखापरीक्षकको प्रतिवेदन सहितको आषाढ ३१, २०७८ मा समाप्त भएको वर्षको वासलात, तथा सोही मितिमा समाप्त भएको आ.व. २०७७/०७८ को नाफा नोक्सान हिसाब तथा नगद प्रवाह विवरण पारित गरेको छ । त्यस्तै, सभाले कम्पनी ऐन, २०६३ को दफा १११ अनुसार आर्थिक वर्ष २०७८/०७९ को लेखापरीक्षण गर्न लेखापरीक्षक नियुक्ति गरी निजको पारिश्रमिक तथा नियुक्तिको शर्त तोक्ने प्रस्तावहरु पारित गरेको छ । साथै, कम्पनीको प्रबन्धपत्र तथा नियमावलीमा आवश्यक संसोधन गर्ने विशेष प्रस्ताव समेत पारित भएको छ ।
‘लगानीकर्ताले ८ खर्ब बढी गुमाईसके, तत्काल यी ५ बुँदे माग सम्बोधन गरियोस्’
काठमाडौं । लामो समयदेखि निरन्तर रुपमा घटिरहेको पुँजीबजार प्रति नेपाल इन्भेष्टर्स फोरमले ध्यानाकर्षण गरेको छ । पुँजीबजारका लगानीकर्ता संगठन इन्भेष्टर्स फोरमले सोमबार एक विज्ञप्ति जारी गर्दै दैनिक घटेको बजारले लगानीकर्तामा पर्न गएको आर्थिक तथा मनोवैज्ञानिक असर प्रति ध्यानाकर्षण गराएको हो । फोरमले पुँजीबजारले हालसम्ममा ८ खर्ब रुपैयाँभन्दा बढी गुमाइसकेको बताएको छ । जुन पुँजीबजारको इतिहासमा सबैभन्दा बढी हो । यसले गर्दा ४४ लाखभन्दा बढी लगानीकर्ताहरु थप मारमा परेका छन् । त्यस्तै, जिम्मेवार निकायहरुको अदूरदर्शि नीतिका कारण पुँजीबजारमा आपूर्ति बढ्न गएको फोरमको आपत्ति छ । तर, आपूर्तिकै कारणले बजार घटबढ नभई जिम्मेवार निकायहरुको पुँजीबजार प्रति हेर्ने दृष्टिकोण र कमजोर प्रविधि, पूर्वाधार तथा लगानीकर्तामैत्री ऐन कानूनहरु नहुनु नै प्रमुख कारण रहेको फोरमको आरोप छ । साथै, पुँजीबजारको विकास र विस्तारको लागि विगतमा उठाईएका मागहरु हालसम्म पनि सम्बोधन नभएकाले पनि पुँजीबजार निरन्तर रुपमा घटिरहेको फोमरले जनाएको छ । त्यसैले, बजारमा लगानीकर्ताको आकर्षण बढाउन र लगानी सुरक्षाको आभाष दिलाई बजारको विश्वसनीयता बढाउनको लागि यथाशीघ्र विभिन्न ५ बुँदे मागहरु सम्बोधन गर्न आग्रह गरेको छ । १. नेपाल राष्ट्र बैंकको मौद्रिक नीति २०७८ र एकीकृत निर्देशिकाले शेयर धितो कर्जालाई कुनै एउटा बैंकबाट ४ करोड र ३ वटा बैंकबाट १२ करोडको सिमा तोकेर लगानी गर्ने वातावरणमा निरुत्साहित गरेको कारण उक्त नियम तुरुन्त खारेज गरियोस् । २. नयाँ ब्रोकर संख्याहरू थप गरी वाणिज्य बैंकको सहायक कम्पनीलाई ब्रोकर लाईसेन्स दिई उक्त बैंकहरूको देशभरिको सबै शाखाहरूबाट कारोबार गर्ने सुविधा विस्तार गरियोस् । ३. ब्रोकर मार्फत हुने मार्जिन कर्जा यथाशीघ्र उपलब्ध गराईयोस् । ४. हालको कारोबार हेर्दा ब्रोकर कमिसन अत्यन्त महङ्गो भएको हुनाले समय सापेक्ष अविलम्ब समायोजन गरियोस् । ५. पूँजीबजारलाई नियमन गर्ने नेपाल धितोपत्र बोर्ड र नेपाल स्टक एक्सचेञ्ज लामो समयदेखि निमित्तको भरमा चलिरहेको हुँदा उक्त नेपाल धितोपत्र बोर्ड र नेपाल स्टक एक्सचेञ्जमा योग्य व्यक्ति अविलम्ब नियुक्ति गरी यथासक्य चाँडो भन्दा चाँडो आम लगानीकर्ताको समस्या समाधान गरियोस् ।
