नेपाल बंगलादेश बैंकले तीन महिनामा कमायो ४१ करोड नाफा
काठमाडौं । नेपाल बंगलादेश बैंकले चालु आर्थिक वर्षको पहिलो तीन महिनामा ४१ करोड १६ लाख रुपैयाँ नाफा गरेको छ । जुन अघिल्लो आवको तुलनामा १५ करोड ९५ लाख रुपैयाँले घटी हो । बैंकले अघिल्लो आर्थिक वर्ष २०७७र७८ को पहिलो त्रैमाससम्ममा ५७ करोड ११ लाख रुपैयाँ नाफा गरेको थियो । समीक्षा अवधिमा बैंकको वितरणयोग्य नाफा बढेर ८ करोड ९४ लाख रुपैयाँ रहेको छ । जुन गत वर्ष ५ करोड ८९ लाख रुपैयाँ मात्रै थियो । त्यस्तै, बैंकको जगेडा कोषमा ५ अर्ब १९ करोड ३९ लाख रुपैयाँ छ । गत असोज मसान्तसम्ममा बैंकले कुल ७७ अर्ब ८८ करोड निक्षेप संकलन गरी कूल ७२ अर्ब १४ करोड रुपैयाँ कर्जा लगानी गर्न सफल भएको छ । समीक्षा अवधिमा बैंकको प्रतिसेयर आम्दानी घटेको छ । गत वर्ष २६.८९ रुपैयाँ प्रतिसेयर आम्दानी रहेको बैंकको प्रतिसेयर आम्दानी चालु आवमा १८.२९ रुपैयाँमा झरेको छ ।
गोर्खाज फाइनान्सको अध्यक्षमा गौरव बुढाथोकी
काठमाडौं । गोर्खाज फाइनान्सको अध्यक्षमा गौरव बुढाथोकी चयन भएका छन् । कार्त्तिक १४ गते बसेको सञ्चालक समितिको बैठकको बहुमतले बुढाथोकीलाई अध्यक्ष पदमा चयन गरेको हो । यससँगै नवनियुक्त अध्यक्ष बुढाथोकीले आगामी ४ वर्षसम्म संस्थामा रहेर आफ्नो कार्यकाल सम्हाल्नेछन् । उनी सर्वसाधारण समूहबाट संस्थाको सञ्चालक समितिमा रहेका छन् ।
नेप्सेले ब्रोकर नम्बर ४० लाई सोध्यो तीन दिने स्पष्टिकरण
काठमाडौं । नेपाल स्टक एक्स्चेञ्ज (नेप्से)ले ब्रोकर नम्बर ४० (क्रियटिभ सेक्युरिटिज) लाई तीन दिने स्पष्टिकरण सोधेको छ । नेप्सेले कार्त्तिक १४ गते उक्त ब्रोकरको नाममा सार्वजनिक सूचना जारी गर्दै आगामी कार्त्तिक १७ गतेसम्ममा स्पष्टिकरण पेश गर्न आग्रह गरेको हो । नेप्सेका अनुसार ब्रोकरले गत असोज १० गते स्वरोजगार लघुवित्त वित्तीय संस्थाको संस्थापक सेयर कारोबार गर्न स्वीकृति माग गरिएकोमा नेप्सेबाट स्वीकृति नलिई कारोबार गरेको थियो । सो सम्बन्धमा नेप्सेले गत असोज २५ गते नै एक पत्रमार्फत ७ कार्य दिनको समय दिई जवाफ पेश गर्न निर्देशन दिएको थियो । तर, कार्त्तिक १४ गतेसम्म पनि उक्त ब्रोकरबाट जवाफ नआएकाले नेप्सले त्यसको स्पष्टिकरण माग्दै तीन दिनभित्र पेश गर्न पुनः निर्देशन दिएको हो ।
