आज ११ सांसदले प्रश्न सोध्ने, प्रधानमन्त्रीले जवाफ दिने
काठमाडौं । प्रधानमन्त्री वालेन्द्र शाहले आज प्रतिनिधिसभाको बैठकमा सांसदहरूले सोधेका प्रश्नको जवाफ दिने भएका छन् । सङ्घीय संसद् सचिवालयका अनुसार दिउँसो १ बजे बस्ने बैठकमा प्रतिनिधिसभा नियमावली, २०८३ को परिच्छेद–९ अनुसार प्रधानमन्त्रीसँग प्रश्नोत्तर कार्यक्रम सञ्चालन हुने सम्भावित कार्यसूची रहेको छ । प्रधानमन्त्रीसँगको प्रश्नोत्तर कार्यक्रममा विभिन्न राजनीतिक दलका ११ सांसदले प्रश्न सोध्ने भएका छन् । राष्ट्रिय स्वतन्त्र पार्टी (रास्वपा)बाट समीक्षा बाँस्कोटा, अमरेशकुमार सिंह र कृष्णहरि बुढाथोकी, नेपाली कांग्रेसबाट वासना थापा र गीता गुरुङ तथा नेकपा (एमाले)बाट ऐनबहादुर महर र गणेशसिंह ठगुन्नाले प्रश्न गर्ने भएका छन् । त्यस्तै, नेकपाबाट वर्षमान पुन र प्रमेशकुमार हमाल, श्रम संस्कृति पार्टीबाट हर्कराज राई तथा राष्ट्रिय प्रजातन्त्र पार्टी (राप्रपा)बाट खुश्बु ओलीले पनि प्रधानमन्त्रीलाई प्रश्न गर्ने भएका छन् । प्रश्नोत्तर कार्यक्रममा सांसदहरूले सरकारका कामकारबाही, नीतिगत निर्णय तथा समसामयिक राजनीतिक विषयमा प्रधानमन्त्रीसँग जवाफ माग्ने तयारी गरेका छन् । बैठकमा प्रधानमन्त्री शाहले मुस्लिम आयोगको सातौँ वार्षिक प्रतिवेदन, आर्थिक वर्ष २०८१÷८२ प्रस्तुत गर्ने कार्यसूचीसमेत रहेको छ । यस्तै, ऊर्जा, जलस्रोत तथा सिँचाइमन्त्री विराजभक्त श्रेष्ठले नेपाल र भारतबीच दीर्घकालीन विद्युत् व्यापारसम्बन्धी सम्झौता प्रस्तुत गर्नेछन् । यसैगरी, विधायन व्यवस्थापन समिति तथा सार्वजनिक नीति तथा प्रत्यायोजित विधायन समितिको बैठक पनि आज बस्नेछ ।
काठमाडौंमा डेङ्गी नियन्त्रणका लागि रेडक्रसको ‘खोज र नष्ट गर’ अभियान
काठमाडौं । काठमाडौंमा डेङ्गी ज्वरोको संक्रमण बढ्न थालेसँगै नेपाल रेडक्रस सोसाइटी काठमाडौं जिल्ला शाखाले जोखिमयुक्त क्षेत्रहरूमा ‘लामखुट्टेको बासस्थान खोज र नष्ट गर’ अभियान आरम्भ गरेको छ । यसै अभियानअन्तर्गत मंगलबार काठमाडौं महानगरपालिकाको वडा नं. १६ र १७ तथा गोकर्णेश्वर नगरपालिकाको वडा नं. ८ मा रहेका गाडी वर्कसप, फलफूल पसल र कवाडी गोदाम क्षेत्रमा जनचेतना फैलाउने उद्देश्यले सचेतनामूलक कार्यक्रम सम्पन्न गरिएको छ । उक्त अभियानमा रेडक्रस उपशाखाका स्वयंसेवक, युवा रेडक्रस सर्कल, महिला स्वास्थ्य स्वयंसेविका तथा स्थानीय बासिन्दाहरूको सक्रिय सहभागिता रहेको थियो । नेपालमा साउनदेखि असोजसम्मको समयलाई डेङ्गी सार्ने लामखुट्टे वृद्धि हुने मुख्य यामका रूपमा लिने गरिन्छ । डेङ्गी लामखुट्टेको टोकाइबाट हुने संक्रमणले महामारीको रूप लिन नपाओस् भन्ने उद्देश्यका साथ नेपाल रेडक्रस सोसाइटीले यस्ता सचेतनामूलक अभियानलाई निरन्तरता दिने जनाएको छ ।
महिला सशक्तीकरण र सहकार्यमा जोड दिँदै मोरङमा मनाइयो तिजोत्सव
काठमाडौं । नेपाली नारीहरूको महान् हरितालिका तिज-२०८३ को अवसरमा मोरङ उद्योग व्यापार संघको महिला उद्यम समितिको आयोजनामा ‘तिजोत्सव २०८३’ तथा शुभकामना आदानप्रदान कार्यक्रम सम्पन्न भएको छ । संघको महिला उद्यम समितिकी संयोजक श्रुती शर्माको सभापतित्व तथा समितिकी सचिव जिना श्रेष्ठद्वारा सञ्चालित उक्त कार्यक्रममा कोशी प्रदेश सरकारकी सामाजिक विकास मन्त्री गीता तिम्सिना प्रमुख अतिथिको रूपमा उपस्थित थिए । कार्यक्रममा स्वागत मन्तव्य राख्दै समितिकी संयोजक श्रुती शर्माले हरितालिका तिज नेपाली समाजको धार्मिक तथा सांस्कृतिक जीवनसँग अभिन्न रूपमा जोडिएको मौलिक पर्व रहेको बताइन् । यस्ता कार्यक्रमले व्यावसायिक व्यस्तताबीच महिला उद्यमीहरूलाई आपसी भेटघाट, अनुभव तथा विचार आदानप्रदान र पारस्परिक सम्बन्ध विस्तारको अवसर प्रदान गर्ने बताउँदै उनले आगामी दिनमा समेत यस्ता कार्यक्रमहरू ल्याउन समिति तत्पर रहेको जानकारी गराइन् । कार्यक्रममा विशिष्ट अतिथिका रूपमा मोरङ उद्योग व्यापार संघका उपाध्यक्ष अनिल सारडाले महिलाहरूको भूमिका र योगदानप्रति सम्मान व्यक्त गरे । वर्तमान समयमा महिलाहरू घरपरिवारको सीमित दायरामा मात्र नरही आर्थिक, सामाजिक, शैक्षिक, व्यावसायिक तथा विकासका विविध क्षेत्रमा सशक्त रूपमा आफ्नो उपस्थिति स्थापित गर्दै अघि बढिरहेको उनले बताए । महिला सशक्तीकरण तथा समावेशी विकासका लागि महिलाहरूको सक्रिय र अर्थपूर्ण सहभागिता आवश्यक रहेको धारणा व्यक्त गर्दै उनले सम्पूर्णमा तिजको शुभकामना व्यक्त गरे ।
