११ वर्षदेखि अलपत्र सुखानी नदीको पुलको ठेक्का अन्त्य
काठमाडौं । इलामको सुखानी नदीमा मोटरेबल आरसीसी पुल निर्माण गर्ने ठेक्का सम्झौता सडक डिभिजन इलामले अन्त्य गरेको छ । निर्माण व्यवसायीले करिब ११ वर्ष ३ महिनादेखि निर्माण कार्य अधुरै छाडेर आयोजना अलपत्र पारेपछि डिभिजनले ठेक्का सम्झौता रद्द गर्ने निर्णय गरेको हो । सडक डिभिजन इलामले निर्माण व्यवसायी स्काई अजम्बर–शिवराम जेभी, नयाँ बानेश्वर, काठमाडौंसँगको ठेक्का सम्झौता अन्त्य गरिएको जनाएको छ । डिभिजनले कात्तिक १६ गते ठेक्का अन्त्य गर्ने निर्णय गरेको हो । बुढी सुखानी–लोडिया–च्यामी सडकखण्डअन्तर्गत सुखानी नदीमा पुल निर्माणका लागि गरिएको ठेक्का सम्झौताअनुसार निर्धारित समयभित्र काम सम्पन्न हुन सकेको थिएन । निर्माण व्यवसायीले लामो समयदेखि काम अधुरो छाडेर निर्माणस्थल अलपत्र पारेको र पटक–पटक लिखित पत्राचार तथा निर्देशन दिँदा पनि बाँकी काम पूरा गर्न ठोस पहल नगरेको डिभिजनको भनाइ छ । यसअघि उच्च अदालत पाटनले २०८२ फागुन १३ गते दिएको आदेशअनुसार बाँकी निर्माण कार्य सम्बन्धित निर्माण व्यवसायीबाटै सम्पन्न गराउने उद्देश्यले डिभिजनले पटक–पटक पत्राचार गरेको थियो । अदालतको आदेशको प्रमाणित प्रतिलिपिसहित आवश्यक अवसर र सहजीकरण उपलब्ध गराउँदा पनि निर्माण व्यवसायीले काम अघि बढाउन प्रतिबद्धता नदेखाएको डिभिजनले जनाएको छ । निर्माण व्यवसायीले म्याद थप गरी सुविस्ताको आधारमा ठेक्का अन्त्य गरिदिन निवेदन दिएको र सम्झौताअनुसारका दायित्वसमेत पूरा नगरेको भन्दै डिभिजनले अब बाँकी काम उसैबाट सम्पन्न हुने अवस्था नरहेको निष्कर्ष निकालेको छ । सोही आधारमा ठेक्का सम्झौताको जीसीसी क्लज ५८.१, ५८.२ (क), ५८.२ (ङ) र ५८.२ (च) तथा सार्वजनिक खरिद ऐन, २०६३ को दफा ५९ (७) बमोजिम ठेक्का अन्त्य गरिएको डिभिजनले जनाएको छ । ठेक्का अन्त्यसँगै सार्वजनिक खरिद ऐनको दफा ५९ (८) र ६३, सार्वजनिक खरिद नियमावलीको नियम १४१ तथा ठेक्का सम्झौताका सम्बन्धित प्रावधानअनुसार थप कारबाही प्रक्रिया अघि बढाइएको जनाएको छ । यसैबीच, निर्माण व्यवसायीले सम्पन्न गरिसकेको र भुक्तानी हुन बाँकी रहेको स्वीकार्य कामको वित्तीय फरफारक गर्न १५ दिनभित्र डिभिजनमा उपस्थित हुन आग्रह गरिएको छ । तोकिएको अवधिमा निर्माण व्यवसायी वा उसको प्रतिनिधि उपस्थित नभए डिभिजन आफैंले आवश्यक प्रक्रिया अघि बढाउने जनाएको छ ।
थापाथलीमा तिहार विशेष रैथाने मेला, स्टल शुल्क ५ हजार
काठमाडौं । नेपाली मौलिक संस्कृति, रैथाने उत्पादन र स्थानीय उद्यमशीलताको प्रवर्द्धन गर्ने उद्देश्यले खाद्य व्यवस्था तथा व्यापार कम्पनी लिमिटेडले तिहार विशेष रैथाने मेला आयोजना गर्ने भएको छ । कम्पनीले आगामी कात्तिक २१ देखि २३ गतेसम्म काठमाडौंको थापाथलीस्थित बागमती प्रादेशिक कार्यालय परिसरमा तीनदिने मेला सञ्चालन गर्न लागेको हो । मेलामा आफ्ना मौलिक उत्पादनको प्रदर्शनी तथा बिक्री गर्न इच्छुक कृषक, कृषक समूह, कृषि सहकारी संस्था, महिला तथा युवा उद्यमी र रैथाने तथा स्थानीय उत्पादकबाट स्टल सहभागिताका लागि आवेदन आह्वान गरिएको छ । इच्छुकले ३ दिनभित्र आवेदन दिनुपर्नेछ । कम्पनीका अनुसार मेलामा तिहार विशेष परिकार तथा परम्परागत खाद्य सामग्री, फूल तथा माला, सजावटका सामग्री, परम्परागत पोसाक, हस्तकलाका सामग्री, माटाका भाँडाकुँडा, रैथाने बाली, कृषि उपज र अन्य स्थानीय तथा स्वदेशी उत्पादनलाई प्राथमिकता दिइनेछ । मेलामा सहभागी हुने एउटा स्टलका लागि पाँच हजार रुपैयाँ शुल्क तोकिएको छ । उक्त शुल्कमा मूल्य अभिवृद्धि कर (भ्याट) समावेश छैन ।
दीपावलीमा स्वदेशी फूल र माला बिक्रीका लागि काठमाडौं महानगरले तोक्यो ३३ स्थान
काठमाडौं । दीपावली पर्वलाई लक्षित गर्दै काठमाडौं महानगरपालिकाले स्वदेशी फूल तथा माला बिक्री वितरणका लागि महानगर क्षेत्रभित्र ३३ स्थान तोकेको छ । नेपाली किसानले उत्पादन गरेका फूल र मालाको बिक्रीलाई प्रोत्साहन गर्ने उद्देश्यले महानगरले व्यवसायी तथा सर्वसाधारणका लागि बिक्रीस्थल निर्धारण गरेको हो । महानगरपालिकाले दीपावलीका अवसरमा प्लास्टिकजन्य फूल, माला तथा सजावटका सामग्री बिक्री वितरण नगर्न आग्रह गरेको छ । स्वदेशी फूल र मालाको बिक्रीलाई प्राथमिकता दिन व्यवसायी, व्यापारी तथा सर्वसाधारणलाई अनुरोध गर्दै महानगरले सूचनाको अवज्ञा गरी प्लास्टिकजन्य वा गुणस्तर कायम नभएका फूल, माला तथा सजावटका सामग्री बिक्री गरेको पाइएमा जफत गर्ने चेतावनीसमेत दिएको छ । महानगर प्रहरी बलले सरोकारवाला निकायसँग समन्वय गरी नेपाली किसानले उत्पादन गरेका फूल तथा माला बिक्री गर्न विभिन्न स्थान तोकेको जनाएको छ । नयाँ बानेश्वरस्थित एनबी सेन्टर र आइप्लेक्स मल, शंखमुलस्थित बिगमार्ट, मध्य बानेश्वरस्थित सेल्सबेरी, बत्तीसपुतलीस्थित फोनेक्स टावर, तीनकुने चौर, सिफल चौर, चाबहिल, स्वयम्भू, कालीमाटी, कलंकी, नयाँ बजार र माछापोखरी क्षेत्रमा बिक्रीस्थल तोकिएका छन् । त्यस्तै, हाँडीगाउँ, सामाखुशी, महाराजगञ्ज, गोंगबु, बालुवाटार, कमलादी, पुतलीसडक, अनामनगर, टेबहाल, सुन्धारा, न्यूप्लाजा, लगन, जैसिदेवल र भृकुटीमण्डपलगायतका स्थानमा पनि फूल तथा माला बिक्री गर्न सकिने व्यवस्था गरिएको छ । महानगरले केही बिक्रीस्थलका लागि सम्पर्क व्यक्ति र फोन नम्बरसमेत सार्वजनिक गरेको छ । नयाँ बानेश्वरको एनबी सेन्टरका लागि आकृति श्रेष्ठ, शंखमुलको बिगमार्टका लागि विपिन रावल, आइप्लेक्स मलका लागि शिशिरकुमार पोखरेल, मध्य बानेश्वरको सेल्सबेरीका लागि सपना सिजापती र बत्तीसपुतलीको फोनेक्स टावरका लागि सुरज थापालाई सम्पर्क व्यक्ति तोकिएको छ । त्यस्तै, चाबहिलको एसी कम्प्लेक्सका लागि गोविन्दराज गिरी, गणेशस्थान तरकारी बजारका लागि अज्जन श्रेष्ठ र केएल टावरअगाडिका लागि चेतना गुरुङलाई सम्पर्क गर्न सकिने महानगरले जनाएको छ । अन्य बिक्रीस्थलका लागि पनि महानगरले सम्पर्क व्यक्ति तथा फोन नम्बर उपलब्ध गराएको छ ।
