आईसीएफसी फाइनान्सको भदौ २७ गतेदेखि बुक क्लोज, वार्षिक साधारणसभामा जाँदै
काठमाडौं । आईसीएफसी फाइनान्स लिमिटेडको आगामी भदौ २७ गते देखि १४ दिनसम्म बुक क्लोज हुने भएको छ । संस्थाले साधारणसभामा जाने प्रयोजनको लागि उक्त दिन देखि असोज ९ गतेसम्म कम्पनीको दर्ता पुस्तिका बन्द गर्न लागेको हो । संस्थाको आगामी १५औँ वार्षिक साधारणसभा आगामी असोज ९ गने हुँदै छ । उक्त सभाले चुक्ता पुँजीको ८ प्रतिशत (अर्थात ७ करोड ५ लाख ७३ हजार ७९२ रुपैयाँ) नगद लाभांश दिने कम्पनीको प्रस्तावलाई पारित गर्ने भएको छ । हाल संस्थाको चुक्ता पुँजी ८८ करोड २१ लाख ७२ हजार ४०० रुपैयाँ रहेको छ ।
गरिमा विकास बैंकबाटै यूनियन लाईफको इन्स्योरेन्स सेवा पाइने
काठमाडौं । गरिमा विकास बैंक लिमिटेड र यूनियन लाईफ इन्स्योरेन्स कम्पनी लिमिटेडबीच बैंकान्स्योरेन्स सेवा प्रदान गर्ने सम्बन्धीमा सम्झौता भएको छ । सो सम्बन्धी समझदारीपत्रमा गरिमा विकास बैंकको तर्फबाट प्रमूख कार्यकारी अधिकृत गोविन्दप्रसाद ढकाल र यूनियन लाईफ इन्स्योरेन्स कम्पनीको तर्फबाट प्रमूख कार्यकारी अधिकृत मनोजकुमार लाल कर्णले हस्ताक्षर गरेका छन् । सो सम्झौता पश्चात गरिमा विकास बैंकका ग्राहकहरुले विकास बैंकका जुनसुकै शाखा कार्यालयबाट यूनियन लाईफ इन्स्योरेन्सले प्रदान गर्ने जीवन बीमा सम्बन्धी सेवाहरु प्राप्त गर्न सक्ने छन् ।
एनसीसी बैंक र एनएलजी इन्स्योरेन्सबीच बैंकास्योरेन्स सम्झौता
काठमाडौं । नेपाल क्रेडिट एण्ड कमर्स(एनसीसी) बैंक लिमिटेड र एनएलजी इन्स्योरेन्स कम्पनी लिमिटेडबीच बैंकास्योरेन्स सम्झौता भएको छ । सम्झौता अनुसार एनसीसी बैंकको कर्पोरेट तथा विभिन्न शाखा कार्यालयहरुबाट एनएलजी इन्स्योरेन्स कम्पनीको पोलिसी बिक्री गरिनेछ । सम्झौतामा एनसीसी बैंकको तर्फबाट प्रमुख कार्यकारी अधिकृत रमेशराज अर्याल र एनएलजी इन्स्योरेन्सका तर्फबाट कायम मुकायम प्रमुख कार्यकारी अधिकृत सुनील बल्लभ पन्तले संयुक्त रुपमा हस्ताक्षर गरेका छन् ।
