सगरमाथा इन्स्योरेन्सद्वारा साइकलिङ प्रतियोगीको निशुल्क दुर्घटना बीमा
काठमाडौं । सगरमाथा इन्स्योरेन्स कम्पनीले बक्स अफिस साइकलिङ प्रतियोगीको प्रति प्रतियोगी ५ लाख रुपैयाँ बराबरको निशुल्क दुर्घटना बीमा गराएको छ । इन्स्योरेन्स पार्टनरका रुपमा कम्पनीले सो संग सम्बन्धित विबिध आर्थिक सहयोग समेत गरेको छ । उक्त प्रतियोगिता असोज २४ गते शनिबार भद्रकाली देखि कागेश्वरी सहिद पार्कसम्म हुन गइरहेको बक्स अफिस साइकलिङ २०२० “नेपाली मन नेपाली सिनेमा, आन्तरिक पर्यटनमा टेवा साइकल चलाउ, प्रदूषण हटाउ, पर्यावरण जोगाऔं” भन्ने मूल नाराका साथ हुँदै छ । यसै गरि सगरमाथा इन्स्योरेन्स कम्पनिले विगतमा पनि आन्तरिक पर्यटनलाई बढुवा दिने उद्देश्यका साथै शारिरिक तथा मानसिक स्वच्छताका लागि एडभेन्चर स्पोर्टस् अन्तर्गत फष्ट वेमेन जोननालिष्ट एभरेष्ट एस्पेडिसन २०१८, मे थाई बक्सिङ स्पोर्टस् इभेन्ट जस्ता कृयाकलापहरुमा सहयोग तथा सहभागिता जनाइसकेको छ ।
१४ लाखले गरे कोरोना बीमा, आइतवारदेखि फास्ट ट्रयाकमा दाबी भुक्तानी हुने
काठमाडौं । गत बुधबार (असोज २१ गते) सम्ममा १४ लाखभन्दा बढीले कोरोना बीमा गरेका छन् । बीमा समितिका अनुसार गत बुधबारसम्म १ लाख ४६ हजार ६ सय ९२ बीमा लेखबाट १४ लाख १ हजार ६ सय ९ जनाले कोरोना बीमा गराएका छन् । यस्तो बीमाबाट ८० करोड २१ लाख १५ हजार ४ सय ८९ रुपैयाँ बीमा शुल्क संकलन भएको छ । यो अवधिमा सबैभन्दा बढी बीमालेख सरकारी स्वामित्व पनि रहेको राष्ट्रिय बीमा कम्पनीले विक्री गरेको छ । राष्ट्रिय बीमा कम्पनीले २ लाख ५९ हजार ३ सय ३५ बीमा लेखबाट १५ करोड ५७ लाख २२ हजार २ सय ७ रुपैयाँ बीमा शुल्क संकलन गरेको छ । यस्तै, शिखर इन्स्यारेन्स कम्पनीले २ लाख ४ हजार ६ सय ९० बीमा लेख विक्री गरेर ११ करोड २३ लाख २७ हजार ८ सय रुपैयाँ बीमा शुल्क संकलन गरेको छ । तेस्रो स्थानमा रहेको सगरमाथा इन्स्यारेन्स कम्पनीले १ लाख ३१ हजार १ सय ३२ बीमा लेख विक्री गरेर ७ लाख ५८ लाख ४८ हजार ७ सय ३५ रुपैयाँ बीमा शुल्क संकलन गरेको छ । सबैभन्दा कम कोरोना बीमा लेख विक्री गर्नेमा सानिमा जनरल इन्स्योरेन्स कम्पनी छ । सानिमाले अहिलेसम्म १७ हजार ७ सय २७ बीमा लेख विक्री गरी १ करोड १ लाख ३२ हजार ४ सय रुपैयाँ बीमा शुल्क संकलन गरेको छ । पर्सिदेखि फास्ट ट्रयाकमा भुक्तानी कोरोना बीमाको दाबी भुक्तानीमा केही ढिलाइ भएको गुनासो आइरहेको छ । अबदेखि यस्तो गुनासो नआउने गरी फास्ट ट्रयाकमा भुक्तानी हुने समितिका कार्यकारी निर्देशक राजुरमण पौडेलले जानकारी दिए । ‘केही प्राविधिक कारणले दाबी भुक्तानीमा केही ढिलाइ भएको थियो, पर्सि (असोज २५ गते) देखि फास्ट ट्रयाकमा दाबी भुक्तानी गर्ने व्यवस्था मिलाएका छौं,’ कार्यकारी निर्देशक पौडेलले भने । कोरोना बीमा दाबी भुक्तानीमा निश्चित रकमभन्दा बढी दायित्व सिर्जना भएमा सरकारले भुक्तानी दिने कोरोना बीमा कार्यविधि बनाइएको छ । सो कार्यविधि अनुसार सरकारले दाबी भुक्तानी गर्न हुँदैन भन्दै सर्वाेच्च अदालतमा मुद्दा परेपछि दाबी भुक्तानीमा केही समस्या आएको थियो । सर्वाेच्चले सो विषयमा छलफलका लागि दुबै पक्षलाई असोज २६ गते बोलाएको छ ।
रिलायबल नेपाल लाइफद्वारा घातक रोगबाट असक्तलाई बीमा दावी भुक्तानी
काठमाडौं। रिलायबल नेपाल लाइफ इन्स्योरेन्सले घातक रोगको कारणबाट असक्त भएका बीमित कमल बहादुर थापालाई बीमा दावी भुक्तानी गरेको छ । कम्पनीले असोज २१ गते असक्त थापालाई दावी भुक्तानी गरेको हो । थापाले कम्पनीबाट जीवन बीमा गरेका थिए । कार्यक्रममा कम्पनीका बाग्लुङ्ग शाखाका प्रबन्धक प्रेम प्रसाद पौडेलले बीमितहरुलाई समयमा नै दावी भुक्तानी गर्नु कम्पनीको दायित्व भएको बताउँदै कम्पनीको नीति अनुरुप यथासिघ्र दावी भुक्तानी गरिएको बताए ।
