रिलायन्स लाइफ र सन्चो हस्पिटलबीच मेडिकल इन्स्योरेन्सको लागि सम्झौता
काठमाडौं । रिलायन्स लाइफ इन्स्योरेन्स र सन्चो हस्पिटलहेटौडा बीच मेडिकल इन्स्योरेन्सको लागि सेवा सम्झौता भएको छ । उक्त सम्झौता पश्चात रिलायन्स लाइफ इन्स्योरेन्सका ग्राहक तथा बीमितहरुले हस्पिटलको प्रयोगशाला सेवा, एक्स-रे, इसिजी, इको लगायत सेवाहरूमा विशेष छुट पाउनेछन । सम्झौता कार्यक्रममा अंडरराइटिङ विभाग प्रमुख एकराज पाठक, एरिया मेनेजर सुर्य गिरी लगायत सन्चो हस्पिटलका तर्फबाट मेनेजर अशोक कायस्थको उपस्थिति रहेको थियो । रिलायन्स इन्स्योरेन्सले आफ्ना ग्राहकहरुको सुविधाका लागि विभिन्न जिल्लामा मेडिकल इन्स्योरेन्स तथा अंडरराइटिङको लागि स्थानीय स्वास्थ संस्थाहरुसंग सम्झौता गर्ने कार्यलाई निरन्तरता दिंदै गईरहेको छ ।
महालक्ष्मी लाईफले प्रदेश १ मा सम्पन्न गर्यो महिला सशक्तिकरण कार्यक्रम
काठमाडौं । प्रदेश १ मा महिला सशक्तिकरणमा महालक्ष्मी लाईफ कार्यक्रम सम्पन्न भएको छ । महालक्ष्मी लाईफ इन्स्योरेन्सले आफ्नो संस्थागत सामाजिक उत्तरदायीत्व अन्तर्गत प्रदेश १ को विभिन्न पाँच स्थानमा ुमहिला सशक्तिकरणमा महालक्ष्मी लाईफु कार्यक्रम सम्पन्न गरेको हो । समाजमा पिछडिएका र अवसर नपाएका महिलाहरुलाई स्वरोजगार बनाई आय आर्जनको बारेमा अग्रसर गराउने उद्देश्यले माघ १३ गतेबाट संचालित कार्यक्रम चन्द्रगढी, विर्तामोड, इटहरी, धरान र विराटनगरमा सम्पन्न भएको छ । भद्रपुर नगरपालिकाकी उपमेयर राधा कार्कीको अध्यक्षतामा माघ १३ गते चन्द्रगढीमा संचालित कार्यक्रममा ८० जनाको सहभागिता रहेको थियो । उपमेयर कार्कीले महिलाहरुको आर्थिक सामाजिक विकासको लागि संचालित कार्यक्रममा भद्रपुर नगरपालिका महालक्ष्मी लाईफ संग मिलेर काम गर्न तैयार रहेको बताएकी थिइन् । अन्तरक्रिया कार्यक्रममा प्रमुख कार्यकारी अधिकृत रमेश कुमार भट्टराई , बजार प्रमुख प्रशान्तराज धमला, चन्द्रगढी कार्यालय प्रमुख गीर्वाण भट्टराई र ९ नम्बर वडा सदस्य मंजु राउत खड्काले कार्यक्रमको महत्व र उपयोगिता बारेमा प्रकाश पारेका थिए। यस्तै, माघ १४ गते विर्तामोडमा अर्जुनधारा नगरपालिकाकी कार्यपालिका सदस्य चन्दा तामाङको अध्यक्षतामा सम्पन्न उत्प्रेरणा कार्यक्रममा १४० भन्दा बढीको सहभागिता रहेको थियो । कार्यक्रमका प्रमुख अतिथि रमेश कुमार भट्टराईले बीमा जस्तो परोपकारी काममा सहभागि भई घरको जिम्मेवारी बहनसँगै मनग्य आय आर्जन गर्न सकिने बीमा व्यवसायमा संलग्न हुन महिलाहरुलाई आग्रह गरेका थिए । कार्यक्रममा कम्पनीका बजार प्रमुख प्रशान्तराज धमला, कम्पनीका गुञ्जन थापा, गंगाराम थापा, जेसिस अध्यक्ष सुस्मा पौडेल र बोर्डिङ प्रिन्सिपल भास्कर भट्टराईले कार्यक्रमको महत्व बारेमा प्रकाश पारेका थिए । त्यसैगरी माघ १६ गते विराटनगरमा हरिनगरा गाउँपालिका उपाध्यक्ष रिमझिम कुमारी भगतको अध्यक्षतामा महिला सशक्तिकरण सम्बन्धी कार्यक्रम सम्पन्न भएको छ । ९० जना भन्दा बढीको सहभागिता रहेको कार्यक्रममा महिला अधिकार र्मी शान्ति पाख्रिन, प्रमुख कार्यकारी अधिकृत रमेश कुमार भट्टराई, बजार प्रमुख प्रशान्तराज धमला, उपक्षेत्रिय प्रमुख हिरा निरौलाले बीमाको माध्यमले महिलाहरुलाई सक्रिय हुन र आय आर्जनको बाटोमा अग्रसर हुन आग्रह गरेका थिए । । यसका साथै, महालक्ष्मी लाईफले माघ १५ गते इटहरी र धरानमा पनि महिला सशक्तिकरण सम्बन्धी कार्यक्रम संचालन गरेको थियो । जीवन देवीको अध्यक्षतामा संचालित उत्प्रेरणा कार्यक्रममा कम्पनीका शाखा प्रमुख अर्चना तण्डुकार, क्षेत्रिय प्रमुख राम प्रसाद भुसाल र नायव प्रमुख कार्यकारी अधिकृत रामेश्वर श्रेष्ठले महिलाहरु आर्थिक रुपमा सशक्त भएमा मात्र मनोबल बढ्ने र समाजमा नेतृत्व गर्न सक्ने हुने भएकोले बीमाको माध्यमले सक्रिय हुन र आय आर्जन गर्न आग्रह गरेका थिए ।
घट्दो बजारमा लुम्बिनी जनरलको सेयर मूल्यमा उछाल, अझै बढ्न सक्ने
काठमाडौं । दोश्रो बजारमा लुम्बिनी जनरल इन्स्योरेन्सको सेयर मूल्य निरन्तर बढेको छ । पछिल्लो समय निरन्तर घटेको बजारमा कम्पनीको सेयर मूल्य भने निरन्तर सर्किट लेभलमा बढीरहेको छ । सगरमाथा इन्स्योरेन्ससँग मर्जर प्रकृयामा रहेको कम्पनीको सेयर गत साताको बिहीबारदेखि बढीरहेको छ । रोक्का रहेको कम्पनीको सेयर कारोबार फुकुवा भएपछि दोश्रो बजारमा कम्पनीको सेयरको भाउ बढेको नेप्सेको तथ्यांकले देखाउँछ । नेपाल स्टक एक्स्चेञ्जले कम्पनीको सेयर कारोबार गत माघ १२ गतेदेखि खुला गरेको थियो । गत माघ १२ गतेदेखि माघ १७ गतेसम्ममा इन्स्योरेन्सको सेयर मूल्य ४१.३६ प्रतिशत अर्थात प्रतिकित्ता १५७.९ रुपैयाँले बढीसकेको छ । यो अवधिमा जम्मा चार दिन सेयर कारोबार खुला भयो । यो चार दिनमा नेप्से परिसूचक भने ७१.९४ अंकले घटीसकेको छ । गत माघ ११ गते २१८३.६२ बिन्दुमा रहेको परिसूचक माघ १७ गतेसम्म निरन्तर घटेर २१११.६८ बिन्दुमा झरेको छ । रोक्कापछि खुलेको कारोबारको पहिलो दिनमै कम्पनीको सेयर मूल्य १० प्रतिशतले बढेर ४२०.२० रुपैयाँमा पुग्यो । त्यसपछिको कारोबारमा पनि सेयर मूल्य १० प्रतिशतले बढेर प्रतिकित्ता ४६२.२० रुपैयाँ पुग्यो । अर्को दिनको कारोबारमा पनि कम्पनीको सेयर मूल्य १० प्रतिशतले बढेर प्रतिकित्ता ५०८.४० रुपैयाँ पुग्यो । र, माघ १७ गतेको कारोबारमा भने कम्पनीको सेयर मूल्य ६.२० प्रतिशतले बढेर प्रतिकित्ता ५३९.९० रुपैयाँ पुगेको छ । किन बढ्यो कम्पनीको सेयर मूल्य ? पछिल्लो समय घट्दो बजारमा पनि कम्पनीको सेयर मूल्य भने निरन्तर बढीरहेको छ । सगरमाथा इन्स्योरेन्ससँग मर्जरमा जाने अन्तिम तयारीमा भएकोले कम्पनीको सेयर मूल्य बढेको एक जानकारले बताए । सगरमाथासँग १००ः८० को स्वाप रेसियोमा मर्ज हुन लागेको लुम्बिनीको सेयर मूल्य स्वाप रेसियोको आधारमा अझै बढ्नु पर्ने धेरैको बुझाइ छ । मंगलबारको बजारमा सगरमाथा इन्स्योरेन्सको सेयर मूल्य प्रतिकित्ता ७७९ रुपैयाँ छ । सगरमाथा इन्स्योरेन्स कम्पनी र लुम्बिनी जनरल इन्स्योरेन्स क्रमश १००:८० को सेयर आदान प्रदान अनुपात (स्वाप रेसियो) मा मर्ज हुने गरी हुने गरी दुई कम्पनीबीच अन्तिम सम्झौता पनि भइसकेको छ । लुम्बिनी जनरल इन्स्योरेन्सले गत आर्थिक वर्षको नाफाबाट सेयरधनीलाई चुक्ता पुँजीको ६.९९ प्रतिशत बोनस सेयर दिने भएको छ । र, सोमा लाग्ने कर प्रयोजनको लागि ०.३६७९ प्रतिशत नगद लाभांश वितरण गर्ने कम्पनीले जनाएको छ । यता सगरमाथा इन्स्योरेन्सले पनि सेयरधनीलाई चुक्ता पुँजीको १२.४ प्रतिशत बोनस र कर प्रयोजनको लागि ०.६५७९ प्रतिशत नगद लाभांश वितरण गर्ने प्रस्ताव गरेको छ । दुवै कम्पनीको आर्थिक वर्ष २०७८/०७९ को वित्तीय विवरणअनुसार प्रस्तावित बोनस सेयर वितरण पश्चात स्वाप रेसियो गणना गरी मर्जर पश्चात कायम हुने कम्पनीको चुक्ता पुँजी २ अर्ब ६२ करोड रुपैयाँ नाघ्ने कम्पनीले जनाएको छ ।
