सानिमा रिलायन्सको नयाँ योजना : न्यूनतम भुक्तानी, अधिकतम सुरक्षा र ग्यारेन्टी फिर्ता
काठमाडौं । पछिल्लो समय सानिमा रिलायन्स लाइफ इन्स्योरेन्स कम्पनीको ‘मेरो सुनिश्चित प्रतिफल जीवन बीमा योजना’ ग्राहकको रोजाइमा परेको छ । ग्यारेन्टेड प्रतिफल सहित आएको यस जीवन बीमा योजनामा ग्राहकले बोनसको कुनै चिन्ता लिन पर्ने छैन । आफूले तिर्न सक्ने बीमाशुल्कको आधारमा बीमाङ्क कायम हुने र जोखिम बहन सँगै बीमा अवधिको समाप्तिमा ग्यारेन्टीको रकम फिर्ता पाईने हुनाले यसमा आकर्षण बढ्दो छ । ग्राहकलाई बीमा गर्नका लागि निकै उपयोगी र नयाँ किसिमको रहेको यस बीमालेखमा विभिन्न लाभहरू समावेश छन् । अन्य बीमालेखमा भन्दा फरक यस बीमालेखमा बीमा परिपक्व हुँदा आर्जित भुक्तानी रकम फरक पर्दैन । यस्तै बीमा शुरू भएको मितिमा नै आधारभूत बीमाशुल्कको २.५ गुणा सम्मको एकमुस्ट भुक्तानीको ग्यारेन्टी समेते यस पोलिसीमा गर्दै आएको छ । यस बीमालेखमा ग्राहकको आकर्षण बढ्नुको अर्को कारण भनेको सीमित समय मात्रै बीमाशुल्क भुक्तानी गरी लामो समय जोखिम बहन हुने आकर्षक सुविधा समावेश भएकाले हो । आफूसँग केही समयसम्म रहने बचतबाट नै यसको बीमा गर्न सकिने भएकाले पनि यो बीमालेख किन्न सहज छ । ५ र ७ वर्षसम्मको मात्र बीमाशुल्क भुक्तानी गरेर १६ र २० वर्षसम्मको दीर्घकालिन बचत र जोखिम बहन गर्न सकिने भएकाले यो बीमालेख आफ्नो जीवनको सक्रिय अवस्थामा हुँदा नै गर्न उचित हुने देखिन्छ । आफूले आम्दानी गर्न सक्ने अवस्थामा नै बीमा गराउँदा यस बीमालेखबाट धेरै लाभ लिन सकिन्छ । आधारभूत बीमाशुल्कको न्यूनतम २ गुणा देखि अधिकतम २.५ गुणा सम्म रक्षावरण लाभपाउन सकिन्छ । यो योजना अन्तर्गत बीमितले आफ्नो आवश्यकता र तत्कालको क्षमता अनुसार बीमाशुल्क भुक्तानी गर्न सक्नेछन् । सीमित अवधिको लागि बीमाशुल्क भुक्तानी गरी बीमालेख अवधिभर सुरक्षा र परिपक्व रकम ग्यारेन्टीका साथ पाउन सकिने आकर्षक विशेषता यस बीमालेखमा रहेको छ । कसरी गर्न सकिन्छ यस्तो बीमा ? यस बीमालेख कसरी गर्दा सबैलाभ पाउन सकिन्छ भन्ने बुझाउनका लागि यहाँ वर्ष ३५ का कुबेरलाई राखिएको छ । ३५ वर्षीय कुबेरले २० वर्ष बीमा अवधिका लागि यस बीमा लेख रोज्छन् । यसमा उनले बीमाशुल्क सात वर्षमा तिरिसक्ने गरी सम्झौता गर्छन् । उनले प्रत्येक वर्ष आधारभूत बीमाशुल्क एक लाख रुपैयाँ वा १ लाख ३६ हजार ३१३ (पूरक करार सुविधा सहित) भुक्तानी गर्ने विकल्प रोज्छन् । यस अनुसार कुबेरको १७ लाख ५० हजार रुपैयाँ बीमाङ्क कायम हुन्छ । यसका लागि उनले ७ वर्षमा ९ लाख ५४ हजार १९१ रुपैयँ मात्र तिर्छन् । कम्पनीका अनुसार यस बीमालेखमा कुबेरलाई बीमा अवधिको समाप्तिमा १७ लाख ५० हजार रुपैयाँ (भुक्तानी गरेको आधारभूत बीमाशुल्कको २.५ गुणा) रकम भुक्तानी गरिने छ । यस्तै कुबेर कुनै समयमा दुर्घटनाको प्रत्यक्ष कारणबाट पूर्ण स्थायी रुपमा अशक्त भएमा १७ लाख ५० हजार रुपैयाँ बीमाङ्क बराबरको रकम १२० मासिक किस्तामा भुक्तानी कम्पनीले गर्नेछ । दुर्घटना मिति पछि बीमाशुल्क मिनाहा गरिने समेत कम्पनीले सुनिश्चित गरेको छ । यस्तै कुनै कारणबस कुबेरको मृत्यु भएमा उनको हकवालालाइे घटना मितिको आधारमा १७ लाख ५० हजार रुपैयाँसम्म र दुर्घटनाको प्रत्यक्ष कारणबाट मृत्यु भएमा उनको हकवालालाई १७ लाख ५० हजार रुपैयाँमा थप रकम एकमुष्ट भुक्तानी गरिने छ । घातक रोग सुविधा घातक रोग सुविधा अन्तर्गत कुबेरलाई १८ मध्ये कुनै एक घातक रोगको चिकित्सकीय रुपमा प्रमाणित भएमा उपचारका लागि एकमुष्ट १७ लाख ५० हजार रुपैयाँ भुक्तानी गरिने छ । ।
सानिमा रिलायन्सले बाजुराका १४७ जना विद्यार्थीलाई वितरण गर्यो झोला
काठमाडौं । सानिमा रिलायन्स लाइफ इन्स्योरेन्सले संस्थागत सामाजिक उत्तरदायित्व अन्तर्गत बाजुराको बजेडी आधारभूत विद्यालयका विद्यार्थीहरूलाई शैक्षिक सामग्री राख्ने झोला वितरण गरेको छ । वैशाख २४ गते सम्पन्न कार्यक्रममा कम्पनीका क्षेत्रीय प्रबन्धक गणेश उप्रेतीको उपस्थितिमा ईसिडी देखि कक्षा ८ सम्म अध्ययनरत १४७ विद्यार्थीहरूलाई झोला हस्तान्तरण गरिएको हो । दुर्गम तथा अति पिछडिएको क्षेत्रका विद्यार्थीहरूलाई सहयोग पुर्याउने उद्देश्यले कम्पनीले उक्त पहल गरेको जनाएको छ । सानिमा रिलायन्सले भविष्यमा पनि शिक्षा, स्वास्थ्य, वातावरण संरक्षण, वित्तीय साक्षरता तथा विपद् व्यवस्थापन जस्ता सामाजिक क्षेत्रमा योगदान पुर्याउने योजना बनाएको छ । कम्पनीले नाफामुखी व्यापारसँगै सामाजिक उत्तरदायित्वलाई पनि प्राथमिकतामा राखेको बताएको छ । देशभर १६९ शाखा सञ्जाल विस्तार गरिसकेको सानिमा रिलायन्सको ५ अर्बभन्दा बढी पूँजी, २० अर्बभन्दा बढीको लगानी, र २० हजारभन्दा बढी अभिकर्ताहरू कार्यरत रहेका छन् ।
ब्याज र प्राकृतिक विपतको असर निर्जीवन बीमामा, नाफा ५४.४५ प्रतिशत घट्यो, २ कम्पनी घाटामा
काठमाडौं । निर्जीवन बीमा कम्पनीहरूको नाफामा गिरावट आएको छ । चालु आर्थिक वर्ष २०८१/८२ को तेस्रो त्रैमासमा १४ वटा निर्जीवन बीमा कम्पनीहरूको खुद नाफा ५४.४५ प्रतिशत अर्थात् २ अर्ब ८८ करोड १७ लाख रुपैयाँ घटेर २ अर्ब ४१ करोड ३ लाख ४६ हजार रुपैयाँ मात्रै आर्जन गरेका हुन् । जबकी गत वर्षको चैतमा यी कम्पनीहरूले ५ अर्ब २९ करोड २० लाख ७३ हजार रुपैयाँ खुद नाफा आर्जन गरेका थिए । समीक्षा अवधिमा प्राकृतिक विपत्ति वाढी पहिरोको सामना देशले गर्नु परेको कारण बीमा कम्पनीमा आबद्ध वीमतिहरूलाई पनि असर परेका कारण बीमा कम्पनीहरूको नाफामा असर परेको उच्च व्यवस्थापकहरू बताउँछन् । वीमतिहरूको क्षतिलाई पूर्ति गर्नु नै कम्पनीको महत्वपूर्ण जिम्मेवारी भएकाले छिटो छरितो दाबी भुक्तानी गरिरहेको र कम्पनीहरूले अपेक्षाकृत मुनाफा हासिल गर्न नसकेको उनीहरूको भनाइ छ । समीक्षा अवधिमा सानिमा जिआईसी इन्स्योरेन्स र शिखर इन्स्योरेन्सको मात्रै नाफा वृद्धि भएको छ । चैतसम्ममा सानिमा जिआईसीको नाफा १६.२१ प्रतिशत बढेर २३ करोड ३५ लाख ५७ हजार रुपैयाँ र शिखर इन्स्योरेन्सको १.७९ प्रतिशत बढेर ३५ करोड ७० लाख ५४ हजार रुपैयाँ खुद नाफा आर्जन गरेका छन् । गत वर्षको चतैमा सानिमा जिआईसीले २० करोड ९ लाख ७७ हजार रुपैयाँ र शिखरले ३५ करोड ७ लाख ६१ हजार रुपैयाँ नाफा गरेका थिए । यस अवधिमा अधिकांश कम्पनीको नाफा घटेको छ भने नेशनल इन्स्योरेन्स र ओरियण्टल इन्स्योरेन्स ऋणात्मक बनेका छन् । देशको विद्यमान अवस्थामा अपेक्षाकृत लगानीको वातावरण बन्न नसक्नु र आर्थिक विकास बिना बीमा बजारको पनि विकास हुन नसक्ने भएकाले त्यसको प्रत्यक्ष असर बीमा कम्पनीहरूमा परेको बीमा कम्पनीका उच्च व्यवस्थापकहरू बताउँछन् । उनीहरूका अनुसार बीमा बजारमा बढ्दो प्रतिस्पर्धा, बढ्दो मुद्रास्फितिको कारण संचालन खर्चमा वृद्धि, बीमा सम्बन्धी जनचेतनाको कमी र अस्थिर आर्थिक तथा राजनीतिक वातावरणका कारण व्यवसायमा असर परेको छ । साथै, बैंक तथा वित्तीय क्षेत्रको ब्याजदर घट्दा पनि कम्पनीहरूको नाफामा असर गरेको उनीहरूको तर्क छ । समीक्षा अवधिमा सबैभन्दा धेरै यूनाइटेड अजोड इन्स्योरेन्सको नाफा घटेको छ । यूनाइटेड अजोडको ५७.६५ प्रतिशत घटेर ११ करोड ६१ लाख २२ हजार रुपैयाँ मात्रै नाफा गरेको छ । गत वर्षको चैतमा कम्पनीले २७ करोड ४२ लाख २४ हजार रुपैयाँ खुद नाफा आर्जन गरेको थियो । प्रभु इन्स्योरेन्सको ४८.४३ प्रतिशत घटेर २० करोड २ लाख ८८ हजार रुपैयाँ, हिमालयन एभरेष्ट इन्स्योरेन्सको ४५.२० प्रतिशत घटेर ३३ करोड २३ लाख ७९ हजार रुपैयाँ, सगरमाथा लुम्बिनी इन्स्योरेन्स (सलिको)को ४७ प्रतिशत घटेर २५१९४९ हजार रुपैयाँ खुद नाफा गरेका छन् । यस्तै, आईजीआई प्रुडेन्सियल इन्स्योरेन्सको ४३.३० प्रतिशत घटेर २६ करोड ५१ लाख १ हजार रुपैयाँ, नेपाल इन्स्योरेन्सको ३९.४३ प्रतिशत घटेर १७ करोड ८४ लाख ५० हजार रुपैयाँ, शिद्धार्थ प्रिमियर इन्स्योरेन्सको २४.०३ प्रतिशत घटेर ४५ करोड ३६ लाख ४ हजार रुपैयाँ मात्रै नाफा गरेका छन् । सार्वजनिक वित्तीय विवरण अनुसार राष्ट्रिय बीमा कम्पनीको २३.३७ प्रतिशत घटेर ३९ करोड ५६ लाख ६३ हजार रुपैयाँ, एनएलजी इन्स्योरेन्सको ९.७७ प्रतिशत घटेर १२ करोड ३३ लाख ४२ हजार रुपैयाँ, नेको इन्स्योरेन्सको २.१६ प्रतिशत घटेर ३६ करोड ९३ लाख २८ हजार रुपैयाँ नाफा गरेका छन् । समीक्षा अवधिमा नेशनल इन्स्योरेन्स र ओरियण्टल इन्स्योरेन्सले नोक्सानी बेहोरेका छन् । नेशनल इन्स्योरेन्सको खुद नोक्सानी ७२ करोड ८१ लाख ५१ हजार रुपैयाँ छ । गत वर्षको चैतमा यस कम्पनीले १४ करोड १० लाख ३३ हजार रुपैयाँ नाफा गरेको थियो । यस्तै, ओरियण्टलले १३ करोड ८३ लाख ४० हजार रुपैयाँ नोक्सानी बेहोरेको छ । जबकी गत वर्षको चैतमा यस कम्पनीले ४६ करोड १७ लाख ३१ हजार रुपैयाँ नाफा गरेको थियो ।
