सेयर बजारमा ७ अर्ब ४६ करोडको कारोबार
काठमाडौं । सोमबार सेयर बजारमा दोहोरो अंकको गिरावट आएको छ । नेपाल स्टक एक्सचेन्ज (नेप्से) परिसूचक ३०.६० अंकले घटेर २५७० बिन्दुमा झरेको छ । नेप्सेका अनुसार २२ कम्पनीको सेयर मूल्य बढ्दा २४९ कम्पनीको सेयर मूल्य घटेको छ । ४ कम्पनीको सेयर मूल्यमा भने कुनै परिवर्तन आएको छैन । सोमबार ३६८ कम्पनीको ४ करोड कित्ता सेयर किनबेच हुँदा ७ अर्ब ४६ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार एनएमबी डिभेन्चर ८.५० प्रतिशतको ४८ करोड रुपैयाँ बराबरको कारोबार भएको छ । साथै १० प्रतिशत एनआईसी एसियको ४६ करोड र एभरेष्ट बैंक डिभेन्चरको ३७ करोड रुपैयाँ बराबरको कारोबार भएको छ । आज सामुदायिक लघुवित्तको सेयर मूल्य ५.३७ प्रतिशतले बढेको छ ।
जनउत्थान लघुवित्तका डेपुटी सीईओ सूर्यप्रसाद उपाध्यायले दिए राजीनामा
काठमाडौं । जनउत्थान सामुदायिक लघुवित्त वित्तीय संस्था लिमिटेडका नायब प्रमुख कार्यकारी अधिकृत (डेपुटी सीईओ) सूर्यप्रसाद उपाध्यायले पदबाट राजीनामा दिएका छन् । संस्थाका अनुसार उपाध्यायले व्यक्तिगत कारण देखाउँदै पदबाट राजीनामा दिएका हुन् । सञ्चालक समितिको १४६औँ बैठकले उनको राजीनामा स्वीकृत गर्दै असार ३० गतेदेखि लागू हुने गरी स्वीकृति दिएको संस्थाले जनाएको छ । लघुवित्तले नेप्सेलाई उपाध्यायको राजीनामा स्वीकृत भएको जानकारी गराएको हो ।
माजिद अन्सारीमाथि भएको कुटपिटबारे मानवअधिकार आयोगमा उजुरी
काठमाडौं । जेनजी अभियन्ता माजिद अन्सारीमाथि प्रहरीले कुटपिट गरी नियन्त्रणमा लिएको घटनालाई लिएर राष्ट्रिय मानवअधिकार आयोगमा उजुरी परेको छ । अन्सारीको तर्फबाट जेनजी मुभमेन्ट अलायन्सले इमेलबाट उजुरी पठाएको आयोगले जनाएको छ । आयोगका सहप्रवक्ता श्यामबाबु काफ्लेका अनुसार उजुरी आयोगमा अध्ययनको क्रममा छ । जेनजी मुभमेन्ट अलायन्सले सोमबार प्रधानमन्त्री तथा मन्त्रिपरिषद्को कार्यालय, गृह मन्त्रालय, नेपाल प्रहरी तथा घटनामा संलग्न रहेको आरोप लागेका प्रहरी टोलीविरुद्ध आयोगमा उजुरी दिएको हो । अलायन्सले गत शनिबार कीर्तिपुरस्थित होल्डिङ सेन्टरमा अन्सारीमाथि कुटपिट गर्ने प्रहरी टोलीसँगै प्रधानमन्त्री कार्यालय तथा गृह मन्त्रालयको प्रतिनिधि भएको दाबी गर्ने ओजस्वी थापाविरुद्ध पनि उजुरी दिएको जनाएको छ । थापाले घटनाका क्रममा प्रहरीलाई निर्देशन दिँदै परिचालन गरेको आरोप अलायन्सको छ । उजुरीमा अन्सारीमाथि भएको व्यवहारले संविधानको धारा १६, १७, २० र २२ ले प्रत्याभूत गरेको सम्मानपूर्वक बाँच्न पाउने हक, विचार तथा अभिव्यक्तिको स्वतन्त्रता, शान्तिपूर्ण भेला हुने स्वतन्त्रता तथा पक्राउ परेका व्यक्तिको संवैधानिक अधिकार उल्लङ्घन भएको दाबी गरिएको छ । अलायन्सले घटनासम्बन्धी भिडियो फुटेज, कीर्तिपुर अस्पतालको स्वास्थ्य परीक्षण प्रतिवेदन तथा त्रिभुवन विश्वविद्यालय शिक्षण अस्पतालको उपचारसम्बन्धी कागजातसमेत आयोगमा प्रमाणका रूपमा बुझाएको जनाएको छ । कुटपिटबाट घाइते भएका अन्सारीको हाल महाराजगञ्जस्थित त्रिभुवन विश्वविद्यालय शिक्षण अस्पतालमा उपचार भइरहेको छ ।
फेसबुकमा रोजगारीको प्रलोभन देखाएर बंगलादेश भाग्दै गरेका ५ जना पक्राउ
काठमाडौं । आकर्षक रोजगारीको प्रलोभन देखाएर अनलाइन ठगी गर्नुका साथै अवैध क्रिप्टो कारोबारमा संलग्न रहेको आरोपमा एक नेपाली र चार बंगलादेशी नागरिक पक्राउ परेका छन् । नेपाल प्रहरीको साइबर ब्युरोका अनुसार फेसबुकमार्फत ‘कतारस्थित कम्पनीमा अन्तर्वार्ताबिनै (डाइरेक्ट हायर) रोजगारी प्राप्त गर्न सकिने’ भन्दै भ्रामक विज्ञापन प्रकाशित गरी सेवाग्राहीलाई मोबाइल एप डाउनलोड तथा प्रयोग गर्न लगाएर बैंक खातामा रहेको रकम अन्य खातामा स्थानान्तरण गरी ठगी गरेको उजुरीपछि अनुसन्धान अघि बढाइएको थियो । प्राविधिक विश्लेषण तथा अनुसन्धानका क्रममा उक्त कार्यमा संलग्न रहेको आरोपमा काठमाडौंको कोटेश्वर बस्दै आएका महोत्तरीका २९ वर्षीय सुभाषकुमार मण्डल रहेका छन् । यस्तै बंगलादेशका २५ वर्षीय एमडी जुबाएर अहमेद, २६ वर्षीय एमडी नुर आलम, २४ वर्षीय एमडी नासिम मिया र २७ वर्षीय एमडी रानी कमाल पनि पक्राउ परेका छन् । उनीहरूलाई असार २६ गते त्रिभुवन अन्तर्राष्ट्रिय विमानस्थलबाट बंगलादेश जान लागेको अवस्थामा पक्राउ गरिएको हो । अनुसन्धानका क्रममा उनीहरू अनलाइन ठगीका साथै बाइनान्स मार्फत क्रिप्टो तथा यूएसडीटी कारोबारमा समेत संलग्न रहेको खुलेको प्रहरीले जनाएको छ । पक्राउ परेका पाँचै जनाविरुद्ध विद्युतीय (इलेक्ट्रोनिक) कारोबार ऐन, २०६३ अन्तर्गतको कसुरमा काठमाडौं जिल्ला अदालतबाट पाँच दिनको म्याद थप अनुमति लिएर थप अनुसन्धान भइरहेको साइबर ब्युरोले जनाएको छ।
मिडिया हाउसको गेटमै गाडी राखेर पत्रकारलाई अवरोध, दोषीमाथि कारबाही गर्न माग
काठमाडौं । काठमाडौंका विभिन्न मिडिया हाउसको गेटमा बेवारिसे कारको शंकास्पद पार्किङ गरी आतंक सिर्जना गरिएको भन्दै नेपाल पत्रकार महासंघले ध्यानाकर्षण भएको जनाएको छ । महासंघले आज (असार २९ गते) एक प्रेस विज्ञप्ति जारी गर्दै यसको विरोध गरेको हो । विज्ञप्ति अनुसार आज बिहान ७ बजेदेखि नै तीनकुनेस्थित कान्तिपुर पब्लिकेसन, नयाँ बानेश्वरको अनलाइन खबर र मध्यबानेश्वरस्थित हिमालय टेलिभिजनको कार्यालय गेटमै सवारी साधन पार्किङ गरी पत्रकारहरूलाई आवतजावत गर्न समस्या सिर्जना गरिएको पाइएको छ । तत्काल गाडीको अवरोध हटाई सञ्चारकर्मी र सञ्चारगृहको सुरक्षा गर्न सम्बद्ध निकायसँग जोडदार माग गरिएको जारी विज्ञप्तिमा भनिएको छ । महासंघले सञ्चारमाध्यम र पत्रकारको अधिकार उपभोगमा अवरोध पु¥याउने यो निन्दनीय र रहस्यमय घटनाको तत्काल छानबिन गर्न तथा दोषीमाथि आवश्यक कानुनी कारबाही गर्न सम्बन्धित निकायको ध्यानाकर्षण गराएको छ । साथै, उक्त अवरोध हटाउन महासंघले हाल सुरक्षा निकायसँग समन्वय गरिरहेको जानकारी समेत प्रेस विज्ञप्ति मार्फत दिइएको छ ।
अश्लील भिडियो र तस्बिर सार्वजनिक गरी ब्ल्याकमेल गर्ने दुई जना पक्राउ
काठमाडौं । सामाजिक सञ्जालमार्फत महिलाको चरित्रहत्या, ब्ल्याकमेल तथा मानसिक दुःख–हैरानी दिएको आरोपमा एक भारतीय र एक नेपाली नागरिक पक्राउ परेका छन् । नेपाल प्रहरीको साइबर ब्युरोका अनुसार पीडित महिलाको अश्लील भिडियो तथा तस्बिर दुरुपयोग गर्दै ब्ल्याकमेल गर्ने, अनुचित लाभका लागि बारम्बार दबाब दिने र माग पूरा नभएपछि टिकटकमा सामग्री सार्वजनिक गरी चरित्रहत्या गर्ने कार्यमा संलग्न भारतको आसाम राज्य, गुवाहाटीको मदनपुर निवासी २६ वर्षीय जावरुल हक पक्राउ परेका हुन् । उनलाई असार २६ गते काठमाडौं महानगरपालिका–२७ बाट पक्राउ गरिएको हो । यसैगरी, प्रेम सम्बन्ध विच्छेद भएपछि फेसबुकमार्फत अश्लील सामग्री पोस्ट गरी चरित्रहत्या गर्ने, मानसिक तनाव र दुःख–हैरानी दिने आरोपमा ओखलढुंगाको चम्पादेवी गाउँपालिका–६ स्थायी घर भई हाल काठमाडौं बस्दै आएका २४ वर्षीय सरोज कार्कीलाई पनि सोही दिन पक्राउ गरिएको साइबर ब्युरोले जनाएको छ । दुवै जनाविरुद्ध विद्युतीय (इलेक्ट्रोनिक) कारोबार ऐन, २०६३ अन्तर्गतको कसुरमा काठमाडौं जिल्ला अदालतबाट पाँच दिनको म्याद थप गरी अनुसन्धान भइरहेको साइबर ब्युरोले जनाएको छ ।
अस्पतालदेखि विद्यालयसम्म मुक्तिनाथ विकास बैंकको सामाजिक सहयोग
काठमाडौं । मुक्तिनाथ विकास बैंक लिमिटेडले स्वास्थ्य सेवा, स्वच्छ खानेपानी र सामुदायिक कल्याणमा टेवा पुर्याउने उद्देश्यले विभिन्न स्वास्थ्य संस्था, शैक्षिक संस्था तथा स्थानीय तहलाई स्वास्थ्य तथा खानेपानीसम्बन्धी सामग्री हस्तान्तरण गरेको छ । बैंकले सामाजिक तथा सरकारी अस्पताल, स्वास्थ्य चौकी र स्थानीय तहमार्फत २६ वटा व्हीलचेयर वितरण गरेको जनाएको छ । यसअन्तर्गत सल्यान जिल्ला अस्पताललाई १० वटा, सल्यानकै त्रिवेणी गाउँपालिकास्थित त्रिवेणी स्वास्थ्य चौकीलाई ३ वटा, मोरङको रंगेली अस्पताललाई १० वटा तथा रुपन्देहीको ओमसतिया गाउँपालिका–१ वडा कार्यालयमार्फत शारीरिक रूपमा फरक क्षमता भएका तथा आवश्यकतामा रहेका व्यक्तिका लागि ३ वटा व्हीलचेयर उपलब्ध गराइएको छ । त्यसैगरी, बैंकले मोरङको पथरी नगर अस्पताललाई चार थान तीन–सिटे कुर्सी, मदन भण्डारी अस्पताल तथा ट्रमा सेन्टरलाई तीन वटा विद्युतीय पानी डिस्पेन्सर र सल्यानस्थित श्री जनकल्याण आधारभूत विद्यालयलाई चार वटा वाटर प्युरिफायर हस्तान्तरण गरेको छ । बैंकले स्वास्थ्य सेवा, शिक्षा र सामाजिक समावेशितालाई प्राथमिकतामा राख्दै यस्ता सामाजिक उत्तरदायित्वका कार्यक्रमलाई निरन्तरता दिँदै आएको जनाएको छ । आगामी दिनमा पनि समुदायको दिगो विकास र जनकल्याणमा योगदान पुर्याउने यस्ता कार्यक्रमलाई थप प्रभावकारी रूपमा अघि बढाइने बैंकको भनाइ छ ।
सिटी एक्सप्रेसको २०औँ वार्षिकोत्सव, रक्तदानसँगै उत्कृष्ट कर्मचारी सम्मानित
काठमाडौं । सिटी एक्सप्रेस मनी ट्रान्सफरले स्थापना भएको २० वर्ष पूरा गरेको अवसरमा रक्तदान कार्यक्रम आयोजना गरेको छ । कम्पनीले २०औँ वार्षिकोत्सवको अवसरमा केन्द्रीय कार्यालय परिसरमा ‘रक्तदान जीवनदान, हामी सबैको योगदान’ भन्ने मूल नारासहित संस्थागत सामाजिक उत्तरदायित्व (सीएसआर) अन्तर्गत खुला रक्तदान कार्यक्रम सञ्चालन गरेको जनाएको छ । उक्त कार्यक्रममा कम्पनीका कर्मचारीसहित विभिन्न क्षेत्रका व्यक्तिहरूको उल्लेख्य सहभागिता रहेको थियो । वार्षिकोत्सवकै अवसरमा कम्पनीले उत्कृष्ट कर्मचारीहरूलाई सम्मान तथा पुरस्कृत पनि गरेको छ । कार्यक्रममा सिटी एक्सप्रेसका ब्रान्ड एम्बेसडर तथा चर्चित हास्यकलाकार जितु नेपालको पनि उपस्थिति रहेको थियो । कम्पनीले विगत १९ वर्षदेखि रेमिट्यान्स क्षेत्रमा सेवा प्रदान गर्दै आएको उल्लेख गर्दै विश्वका विभिन्न मुलुकबाट नेपालमा सुरक्षित र भरपर्दो रेमिट्यान्स सेवा उपलब्ध गराइरहेको जनाएको छ । साथै, कम्पनीले सिटी पे वालेटमार्फत अनलाइन भुक्तानी सेवा सञ्चालन गर्नुका साथै सोही प्लेटफर्मबाट रेमिट्यान्स भुक्तानी सेवा पनि उपलब्ध गराउँदै आएको जनाएको छ ।
