पाल्पामा दुई महिनामा २५५ जनामा डेंगी सङ्क्रमण पुष्टि
पाल्पा । पछिल्लो दुई महिनामा पाल्पामा २५५ जनामा डेंगी सङ्क्रमण पुष्टि भएको छ । चालु आर्थिक वर्ष २०८३/०८४ को साउन र भदौ महिनामा मात्रै यति ठूलो सङ्ख्यामा सङ्क्रमित भेटिएसँगै जिल्लामा डेंगीको जोखिम उच्च रहेको स्वास्थ्य कार्यालयले जनाएको छ । स्वास्थ्य कार्यालयका ल्याब टेक्निसियन मधुसुदन भट्टराईका अनुसार यसअघिका आर्थिक वर्षहरूमा पनि डेंगी सङ्क्रमणको स्थिति उतारचढावपूर्ण रहेको थियो । विगतका वर्षहरूको तथ्याङ्क हेर्दा आर्थिक वर्ष २०८२/०८३ मा ४३२, २०८१/०८२ मा ५१०, २०८०/०८१ मा ६८६, २०७९/०८० मा २५० र २०७८/०७९ मा २४ जनामा डेंगी सङ्क्रमण पुष्टि भएको थियो। पछिल्लो समय परीक्षणको दायरा फराकिलो बन्दै गएको र जलवायु परिवर्तनका कारण वातावरणीय अनुकूलता मिल्दा सङ्क्रमण बढी देखिएको स्वास्थ्यकर्मीहरूको भनाइ छ । पाल्पास्थित युनाइटेड मिसन अस्पताल, पाल्पा अस्पताल, लुम्बिनी मेडिकल कलेजलगायतका स्वास्थ्य संस्थामा उपचारका लागि पुगेका बिरामीहरूमा डेंगी सङ्क्रमण देखिएको छ । यसबाहेक विभिन्न निजी मेडिकल, प्राथमिक स्वास्थ्य केन्द्र र स्वास्थ्य चौकीहरूमा समेत डेंगी परीक्षण हुँदै आएको छ । वर्षायाममा घर वरिपरि पानी जम्ने स्थानहरू बढ्ने र त्यसले डेंगी सार्ने एडिज जातको लामखुट्टेको प्रजननका लागि अनुकूल वातावरण तयार गर्ने भएकाले जोखिम झन् बढेको छ । यस्ता लामखुट्टेले घरआँगनमा रहेका पुराना टायर, गमला, टिनका डब्बा तथा पानी जम्न सक्ने अन्य भाँडाकुँडामा फुल पार्ने गर्दछन् । सङ्क्रमितको सङ्ख्या बढ्दै गएपछि स्वास्थ्य कार्यालय पाल्पाले सचेतना कार्यक्रमलाई तीव्रता दिएको छ । कार्यालयले सरोकारवालाहरूसँग डेंगी रोकथाम तथा नियन्त्रणसम्बन्धी पैरवी तथा अभिमुखीकरण कार्यक्रमसमेत सञ्चालन गरेको छ । लामखुट्टे नियन्त्रणका लागि घरआँगनदेखि सार्वजनिक स्थानसम्म सरसफाइमा विशेष ध्यान दिनुपर्नेमा जोड दिइएको छ । स्वास्थ्य कार्यालय पाल्पाका प्रमुख गौरव ढकालले लार्भा नष्ट गर्न र लामखुट्टेको टोकाइबाट बच्न सबैलाई आग्रह गरेका छन् । घर, कार्यालय, विद्यालय वा सार्वजनिक क्षेत्रमा पानी जम्न नदिन तथा खाल्डाखुल्डी पुर्न, गमलाको प्लेट, फुलदानी र कुलरको पानी कम्तीमा हप्तामा एक पटक फेर्न तथा खानेपानी वा ढल चुहिएको भए तत्काल मर्मत गर्न उनले अनुरोध गरेका छन् । साथै, लामखुट्टेको टोकाइबाट बच्न पूरा बाहुला भएका लुगा लगाउने, सधैँ झुलभित्र सुत्ने र झ्यालढोकामा जाली हाल्न पनि सुझाव दिइएको छ ।
ग्यासको लाममा पाँच कक्षामा पढ्ने मनिष भन्छन्– नेता फेरिए, हाम्रो पालो फेरिएन
काठमाडौं । एकातिर कक्षाकोठाको कालोपाटी, अर्कोतिर सडकको लाम । शनिबारदेखि खाली सिलिन्डर कुर्दैछन् कक्षा ५ का मनिष बस्नेत । काठमाडौंको एउटा साँघुरो गल्लीमा बिहानै उनी ग्यास पाइने आशमा लाइनमा छन् । सडकको पेटीभरि सयौँ राता एलपीजी सिलिन्डरहरू फलामे सिक्री र ताल्चाले एकअर्कामा बाँधिएका छन् । मानौँ कुनै कैदीको लस्कर उभिएको होस् । त्यही लस्करको बीचमा एउटा बालक बसेको छ । मनिष बस्नेत । उनी कक्षा ५ का विद्यार्थी हुन् । सामान्य दिन हुन्थ्यो भने यतिबेला मनिष विद्यालयको पोसाकमा सजिएर कक्षाकोठाको बेन्चमा साथीहरूसँग गणितका हिसाब जोड्दै वा नेपालीका कविता वाचन गर्दै हुन्थे । तर आज उनको दैनिकी कालोपाटीको अगाडि होइन, सडकमा लामबद्ध ग्यास सिलिन्डरको अगाडि सुरु भएको छ । कारण एउटै छ– घरको चुलो निभेको छ, र त्यो चुलो बाल्ने एउटा सिलिन्डर पाउन मनिष शनिबारदेखि सडकको यो अनन्त लाममा बस्न बाध्य छन् । ‘ग्यास छैन । ग्यास पाएन । ग्यास छैन भनेकाले स्कुल नि जान पाएन । १ दिनको छुट्टी लिएर यहाँ आएको छु । अब ग्यास आएन भने फेरि मेरो ग्यासको पछाडिको मान्छेले आफ्नो अगाडि लान्छन् । ग्यासको नि अभाव छ । यो जुन नेता आए नि यो ग्यासको चाहिँ लाइन बस्नुपर्ने कहिले हट्दैन । शनिबारदेखि बसिरहेको । आएको छैन । अब मंगलबारसम्म आउँछ, बसिराख्नु भनेको छ । म पाँच कक्षामा पढ्छु’ मनिषका यी शब्दहरू केवल एउटा बालकको गुनासो मात्र होइनन् । यो देशको सिंगो राज्य संयन्त्र र नागरिकका आधारभूत आवश्यकता पूरा गर्न नसक्ने नेतृत्वमाथिको तीतो र निष्कपट झापड हो । अहिले बालबालिकाले भविष्यका सपना देख्नुपर्ने हो, नयाँ ज्ञान सिक्नुपर्ने हो । तर मनिषले सानै उमेरमा सिकिसकेका छन्– ‘यदि आफ्नो सिलिन्डर नहेरी एकछिन अन्तै गइयो भने पछाडिको मान्छेले आफ्नो सिलिन्डर अगाडि तानिदिन्छ ।’ अभाव र असुरक्षाले एउटा कलिलो मनलाई पनि स्वार्थ र प्रतिस्पर्धाको कठोर नियम बुझ्न बाध्य बनाइदिएको छ । शनिबारदेखि सुरु भएको यो पर्खाइ सोमबारसम्म आइपुग्दा मनिषको सहनशीलताको परीक्षा लिइरहेको छ । आइतबार साँझसम्म पनि डिपोको सटर खुलेन । ‘भोलि बिहानै गाडी आउँछ’ भनिएपछि मनिषले आइतबार राति आफ्ना आमाबुबासँग सल्लाह गरे । घरमा आमाबुबा ज्यालामजदुरी र काममा जानैपर्ने बाध्यता । यदि कोही लाइनमा नबस्ने हो भने चार दिनको पर्खाइ बालुवामा पानी बन्ने खतरा छ । अन्ततः मनिषले विद्यालयमा ‘एक दिनको बिदा’ लेखाउने निधो गरे । तर त्यो ‘एक दिनको बिदा’ अहिले अनिश्चित बनेको छ । एक दिनको बिदा अब चार दिनको गैरहाजिरीमा बदलिँदै छ । मनिषको कापीमा शिक्षकले दिएका प्रश्नहरू अनुत्तरित छन्, जस्तै अनुत्तरित छन् ती सरकारी मन्त्री र आयल निगमका हाकिमहरू, जसले सिंहदरबारको वातानुकूलित कोठाबाट माइक फुक्दै भन्छन्– ‘बजारमा ग्यासको कुनै अभाव छैन, एक हप्तामा सबै सामान्य हुन्छ, कोही लाइन बस्नु पर्दैन ।’ ‘बजारमा ग्यासको अभाव छैन, उपभोक्ता आत्तिनु पर्दैन’– शनिबारदेखि सोमबारसम्म लाइन बस्दा पनि सिलिन्डर हात परेको छैन । सयौँ मिटरसम्म सिलिन्डरलाई सिक्री–ताल्चाले बाँधेर बालबालिका समेत पहरा दिन विवश छन् । ग्यास नपाउँदा विद्यालय जाने बालबालिकाको पढाइ छुटिरहेको छ । मंगलबारसम्म ग्यास आउला वा नआउला, त्यो त समयले बताउला । तर केही थान ग्यासका सिलिन्डर आए पनि मनिषको यो खोसिएको सोमबार कहिल्यै फर्किने छैन । उनको मस्तिष्कमा कोरिएको यो अविश्वासको घाउ कुनै सरकारी वक्तव्यले पुछ्न सक्नेछैन । जब देशको भविष्य मानिएका बालबालिकालाई कक्षाकोठाबाट तानेर ग्यासको लाममा उभ्याइन्छ, तब कुनै पनि देश ‘समृद्ध’ हुन सक्दैन ।
बाढी गएको १३ औं दिनमा १३ सय बढीको शव फेला
काठमाडौं । रसुवाको बाढीले बगाएर हालसम्म १ हजार ३५६ जनाको शव फेला परेको छ । नेपाल प्रहरीका अनुसार विभिन्न स्थानबाट बाढी बगाएर ल्याएको अवस्थामा १ हजार ३५६ जनाको शव फेला परेको हो । प्रहरीका अनुसार ५३० पुरुष, महिला ३२९ महिला, आशिंक अंग ४९७ र १ हजार ३४८ जनाको शव मुचुल्का भइसकेको छ । ९८ शव मृतकका आफन्तलाई हस्तान्तरण गरिसकिएको छ । १ हजार २८० शवको डिएन परीक्षण गरिएको र १ हजार २९० मृतकका आफन्तको शवको डिएनए संकलन गरिएको छ । कुल २ हजार ५७० को डिएनए परीक्षण गरिएको छ । १ हजार ४४ जनाको शव जमिनमुनी राखिएको प्रहरीले जनाएको छ ।
सुन तोलामा २ हजार ४०० रुपैयाँले घट्यो
काठमाडौं । नेपाली बजारमा सोमबार सुन र चाँदी दुवैको मूल्य घटेको छ । सुन प्रतितोला २ हजार ४०० रुपैयाँ र चाँदी प्रतितोला ३५ रुपैयाँले सस्तिएको हो । नेपाल सुनचाँदी व्यवसायी महासंघका अनुसार सोमबार छापावाल सुन प्रतितोला ३ लाख १ हजार ९०० रुपैयाँमा कारोबार भइरहेको छ । आइतबार सुन प्रतितोला ३ लाख ४ हजार ३०० रुपैयाँमा कारोबार भएको थियो । पछिल्ला केही दिनदेखि नेपाली बजारमा सुनको मूल्य निरन्तर घट्दो क्रममा रहेको महासंघले जनाएको छ । यस्तै, चाँदीको मूल्य पनि सोमबार घटेको छ । चाँदी प्रतितोला ४ हजार ६९० रुपैयाँमा कारोबार भइरहेको छ। आइतबार चाँदी प्रतितोला ४ हजार ७२५ रुपैयाँमा कारोबार भएको थियो । अन्तर्राष्ट्रिय बजारमा सुनको मूल्यमा आएको गिरावटको प्रभाव नेपाली बजारमा पनि देखिएको व्यवसायीहरूले बताएका छन् ।
भोटेकोशीको बाढीलाई लिएर भिडियो बनाइ खुसी मनाउने मडै पक्राउ
काठमाडौं । सामाजिक सञ्जालमार्फत सामाजिक सहिष्णुतामा आघात पुर्याउने तथा विभिन्न जातजातिलाई लक्षित गरी होच्याउने, अपमानित गर्ने एक युवक पक्राउ परेका छन्। नेपाल प्रहरीको साइबर ब्यूरोका अनुसार शनिवार बैतडीको सुर्नया गाउँपालिका–७ स्थायी घर भई हाल काठमाडौंको चन्द्रागिरी नगरपालिका–१२, बलम्बु बस्ने २४ वर्षीय वीरेन्द्र मडै पक्राउ परेका हुन् । गत भदौ १० गते भोटेकोशीमा आएको बाढीबाट भएको जनधनको क्षतिसम्बन्धी विषयलाई लिएर उनले जातजातिलाई लक्षित गरी होच्याउने, अपमानित गर्ने तथा उक्त विपत्तिमा खुशी व्यक्त गर्ने किसिमको भिडियो बनाएर सामाजिक सञ्जाल फेसबुकको रिल्समार्फत गरेका थिए । ब्यूरोबाट गरिएको प्राविधिक विश्लेषण तथा अनुसन्धानका क्रममा भिडियो सामग्री प्रसारण गर्ने व्यक्तिको पहिचान खुलेपछि ब्यूरोबाट खटिएको टोलीले मडैलाई २०८३ भदौ २० गते पक्राउ गरेको हो। पक्राउ परेका मडैविरुद्ध विद्युतीय (इलेक्ट्रोनिक) कारोबार ऐन, २०६३ अन्तर्गतको कसुरमा काठमाडौं जिल्ला अदालतबाट म्याद थप गरी थप अनुसन्धान भइरहेको साइबर ब्यूरोले जनाएको छ।
बाढीपीडितका लागि सङ्कलित राहत सामग्रीमै लापरवाही, म्याद गुज्रिएका खाद्यान्न भेटिए
काठमाडौं । विपत्तिको समयमा बाढीपीडितका लागि सङ्कलन गरिएका राहत सामग्रीमै ठूलो लापरवाही र गैरजिम्मेवारीपन देखिएको छ । भोटेकोशी बाढी प्रभावित क्षेत्रमा पठाउन लागिएका खाद्यान्न न्यून गुणस्तरका तथा म्याद नाघेका भेटिएपछि खाद्य प्रविधि तथा गुण नियन्त्रण विभाग र डिभिजन कार्यालय काठमाडौंले राहत सङ्कलन तथा भण्डारण केन्द्रमा कडाइ गरेको छ । विभाग र डिभिजन कार्यालयको टोलीले राजधानीका पाँच मुख्य राहत सङ्कलन तथा भण्डारण स्थलमा आकस्मिक अनुगमन गर्दा केही स्थापित निकायमा समेत उपभोग्य मिति सकिएका खाद्य सामग्री भेटिएका हुन् । अनुगमनका क्रममा बुटवलस्थित गिरिधारी फुड प्रोडक्टको २१ बोरा भुजाको म्याद गुज्रिएको भेटिएपछि त्यसको बिक्री तथा वितरण रोक्दै छुट्टै ‘एक्सपायर्ड जोन’मा राख्न लगाइएको विभागले जनाएको छ । त्यस्तै, प्रहरी तालिम केन्द्र सामाखुसीमा राहतका लागि राखिएका चोकोफन र पाँच केजीका चक्की आटासमेत म्याद नाघेको अवस्थामा भेटिएको थियो। दुई दिन मात्र म्याद बाँकी रहेका ५९ प्याकेट दालमोठ पनि प्रभावित क्षेत्रमा नपठाउन निर्देशन दिइएको छ । राधास्वामी सत्सङ्ग केन्द्र, सामाखुसीमा राखिएको २५ केजीको उसिना चामलको उपभोग्य मिति सकिएको पाइएपछि तत्काल हटाइएको छ । यता, खाद्य व्यवस्था तथा व्यापार कम्पनीको थापाथलीस्थित गोदाममा राखिएका फोर्टिफाइड चामल, मुसुरो दाल र सूर्यमुखी तेलको लेबल तथा उपभोग्य मिति भने सही र दुरुस्त अवस्थामा पाइएको विभागले जनाएको छ । त्यसैगरी, त्रिभुवन अन्तर्राष्ट्रिय विमानस्थलमा विदेशबाट राहतस्वरूप प्राप्त चक्की आटा, चिया, चिनी, चामल, चना, चिउरा, नुन, तेल तथा मसलाको अवस्था पनि सन्तोषजनक पाइएको छ । विभागकी वरिष्ठ खाद्य अनुसन्धान अधिकृत डा।बालकुमारी शर्माका अनुसार बाढीपीडितको स्वास्थ्यमा थप जोखिम नहोस् भन्ने उद्देश्यले राहत सङ्कलन केन्द्रमै पुगेर खाद्य सामग्रीको सूक्ष्म अनुगमन गरिएको हो । विभागले विपत्तिको संवेदनशील समयमा राहतको नाममा गुणस्तरहीन, अस्वस्थकर तथा म्याद गुज्रिएका खाद्य सामग्री वितरण नगर्न सबै सरोकारवालालाई सचेत गराएको छ । साथै, राहत सामग्रीको सङ्कलन, भण्डारण र वितरणमा ‘असल वितरण अभ्यास’का न्यूनतम मापदण्ड अनिवार्य रूपमा पालना गर्नसमेत विभागले निर्देशन दिएको छ ।
कृषि उद्यम प्रवर्द्धनका लागि राष्ट्रिय वाणिज्य बैंक र सुरक्षण कोषबीच सहकार्य
काठमाडौं । राष्ट्रिय वाणिज्य बैंक लिमिटेड र निक्षेप तथा कर्जा सुरक्षण कोषबीच ऋणीगत (एकल) कृषिकर्जा सुरक्षण योजना सञ्चालनसम्बन्धी समझदारीपत्रमा हस्ताक्षर भएको छ । समझदारीपछि काभ्रेपलाञ्चोक, जुम्ला, सुर्खेत, बाजुरा र कैलालीका ९ स्थानीय तहमा कृषिकर्जा सुरक्षण योजना सञ्चालन गरिने भएको छ । भदौ १८ गते टंगालस्थित निक्षेप तथा कर्जा सुरक्षण कोषको कार्यालयमा आयोजित कार्यक्रममा राष्ट्रिय वाणिज्य बैंकका प्रमुख कार्यकारी अधिकृत देवेन्द्र रमण खनाल र निक्षेप तथा कर्जा सुरक्षण कोषका प्रमुख कार्यकारी अधिकृत डिला राम गिरीले समझदारीपत्रमा हस्ताक्षर गरेका हुन् । समझदारीअनुसार काभ्रेपलाञ्चोकको पाँचखाल नगरपालिका, जुम्लाको चन्दननाथ नगरपालिका, पातारासी गाउँपालिका र तातोपानी गाउँपालिका, सुर्खेतको वीरेन्द्रनगर नगरपालिका, बाजुराको बुढीगंगा नगरपालिका, बुढीनन्दा नगरपालिका र त्रिवेणी नगरपालिका तथा कैलालीको धनगढी उपमहानगरपालिकामा योजना सञ्चालन हुनेछ । योजनाअन्तर्गत दुई वर्षसम्म प्रत्येक स्थानीय तहमा ८ करोड रुपैयाँका दरले कुल १६ करोड रुपैयाँसम्म कृषिकर्जा लगानी गरिने व्यवस्था गरिएको छ । योजनामा प्रतिग्राहक न्यूनतम २ लाख ५० हजारदेखि अधिकतम ३ करोड रुपैयाँसम्म कर्जा उपलब्ध हुनेछ भने कर्जाको अवधि सात वर्षसम्म रहनेछ । समझदारीपत्रअनुसार कर्जाको सुरक्षणका लागि ३० करोड रुपैयाँको सुरक्षण कोष स्थापना गरिनेछ । यसमा निक्षेप तथा कर्जा सुरक्षण कोषले १० करोड ५० लाख रुपैयाँ, ९ स्थानीय तहले प्रतितह ५० लाख रुपैयाँका दरले कुल ४ करोड ५० लाख रुपैयाँ र संयुक्त राष्ट्रसंघीय पूँजी विकास कोषमार्फत प्राप्त संयुक्त राष्ट्रसंघको दिगो विकास लक्ष्यसम्बन्धी संयुक्त कोषले १५ करोड रुपैयाँ योगदान गर्नेछ । दुवै संस्थाले योजनाले कृषि उद्यमशीलता विकास, उत्पादकत्व वृद्धि, खाद्य सुरक्षा र रोजगारी सिर्जना गर्दै राष्ट्रिय अर्थतन्त्रको दिगो तथा उत्थानशील विकासमा योगदान पुग्ने विश्वास व्यक्त गरेका छन् । समझदारी कार्यक्रममा निक्षेप तथा कर्जा सुरक्षण कोषका प्रबन्धक विक्रान्त आचार्य, राष्ट्रिय वाणिज्य बैंकको कृषि तथा सामाजिक बैंकिङ विभागका विभागीय प्रमुख विश्वप्रकाश ज्ञवाली, उपप्रबन्धक राजन घिमिरेलगायत दुवै संस्थाका अधिकारीहरूको उपस्थिति रहेको थियो । पूर्ण सरकारी स्वामित्वको राष्ट्रिय वाणिज्य बैंकले हाल देशका सातै प्रदेशका ७७ जिल्ला सदरमुकामसहित दुर्गम क्षेत्रसम्म फैलिएका ३१६ शाखा कार्यालय र ३३५ एटिएममार्फत ४८ लाखभन्दा बढी ग्राहकलाई निक्षेप, कर्जा, मोबाइल बैंकिङ तथा अन्य डिजिटल बैंकिङ सेवा उपलब्ध गराउँदै आएको छ ।
महँगीले थिच्यो अभिभावकलाई, बालबालिकाको पढाइ खर्च जुटाउनै मुस्किल
काठमाडौं । सिरियामा सन् २०२६/२७ को नयाँ शैक्षिक सत्र सुरु हुन लाग्दा राजधानी दमास्कसका पुराना बजारहरूमा शैक्षिक सामग्री खरिद गर्ने अभिभावकहरूको भीड लागेको छ । यद्यपि, देशको जर्जर आर्थिक अवस्था र बढ्दो महँगीका कारण आफ्ना बालबालिकाका लागि आवश्यक सामग्री जुटाउन अभिभावकहरूलाई निकै सकस भइरहेको छ । दमास्कसस्थित स्टेसनरी सामग्रीको मुख्य केन्द्र ‘अल–असरौनिया’ बजारमा भेटिएका स्थानीय बासिन्दा अबु मासाले बजारमा सामानको मूल्य अत्यधिक बढेको गुनासो गरे । उनले भने, ‘सामानहरू निकै महँगा छन् र मानिसहरूसँग पर्याप्त रकम छैन । हामीले खर्च कटौती गर्न जेठी छोरीको पुरानो झोला कान्छी छोरीलाई दिने निर्णय गरेका छौँ र केवल एउटा नयाँ झोला मात्र किन्दैछौँ ।’ अर्का स्थानीय बासिन्दा फादीका अनुसार बजार मूल्य र सर्वसाधारणको आम्दानीबीच कुनै सन्तुलन छैन । धेरैजसो मानिसहरू बजारमा सामान हेर्न आए पनि खरिद गर्ने सामर्थ्य राख्दैनन् । ‘हामी एकैपटक सबै सामग्री किन्न सक्ने अवस्थामा छैनौँ, त्यसैले केवल तत्काल आवश्यक पर्ने सामान मात्र किन्दैछौँ,’ उनले भने । बजारको वर्तमान अनुमानअनुसार, एक प्राथमिक तहका विद्यार्थीका लागि आधारभूत स्टेसनरी सेटको मूल्य १ लाखदेखि २ लाख ५० हजार सिरियाली पाउन्ड (करिब ८ देखि १९ अमेरिकी डलर) सम्म पर्दछ । सिरियामा हाल न्यूनतम मासिक पारिश्रमिक १२ हजार ५६० नयाँ सिरियाली पाउन्ड (करिब १०५ डलर) रहेको छ । यस तथ्याङ्कलाई हेर्दा, एउटा बच्चाको प्रारम्भिक शैक्षिक तयारीका लागि मात्रै अभिभावकको मासिक आम्दानीको २० देखि ५० प्रतिशतसम्म खर्च हुने देखिन्छ । स्टेसनरी व्यवसायी मोहम्मद खैर जकमकजीका अनुसार, गत वर्षको तुलनामा यस वर्ष व्यापार निकै सुस्त छ । ग्राहकहरूले पहिले जस्तो पूर्ण सेट खरिद नगरी केवल अत्यावश्यक सामानहरू मात्र छानीछानी लैजाने गरेका छन् । विश्व बैंकको प्रतिवेदनअनुसार सिरियामा मुद्रास्फीति (महँगी दर) सन् २०२४ को ७२.१ प्रतिशतबाट घटेर सन् २०२५ मा ११.५ प्रतिशतमा झरेको छ । मुद्रास्फीतिमा केही सुधार देखिए पनि उच्च जीवनस्तर खर्च, कमजोर श्रम बजार र पुनर्निर्माणका चुनौतीहरूले गर्दा सर्वसाधारणको क्रयशक्ति अझै न्यून छ । यसैबीच, लामो समयको द्वन्द्व र विनाशपछि सिरियाको शिक्षा प्रणाली पुनरुत्थानको प्रक्रियामा रहेको छ । शिक्षा मन्त्रालयका अनुसार सन् २०२६ मा १ हजार ३७० विद्यालयहरूको पुनर्निर्माण गरिएको छ, जबकि ६ हजारभन्दा बढी विद्यालय अझै मर्मतको पर्खाइमा छन् । मन्त्रालयले उल्लेख गरेको युनिसेफको तथ्याङ्कअनुसार, करिब २४ लाख ५० हजार सिरियाली बालबालिका अझै पनि विद्यालय जानबाट वञ्चित छन् । विदेशबाट करिब ५ लाख बालबालिका स्वदेश फर्किएका कारण शिक्षा प्रणालीमा थप दबाब सिर्जना भएको छ । यस्तो अवस्थामा, सीमित बजेटका बीच आफ्ना बालबालिकालाई विद्यालय पठाउनु सिरियाली परिवारहरूका लागि ठूलो चुनौती बनेको छ ।
