अब कृषि विकास बैंकको एपबाटै डिसहोमको सेवा नवीकरण गर्न सकिने
काठमाडौं । कृषि विकास बैंकका ग्राहकले अब बैंकको स्मार्ट प्लस मोबाइल एपबाटै डिसहोमका विभिन्न सेवा नवीकरण गर्न सक्ने भएका छन् । यो सुविधामार्फत ग्राहकले डिसहोम इन्टरनेट र आईपीटिभीको संयुक्त प्याकेज, इन्टरनेट र डीटीएच टिभीको संयुक्त प्याकेज तथा डिसहोम डीटीएच टेलिभिजन सेवा नवीकरण गर्न सक्नेछन् । यसका लागि ग्राहकले घरमै बसेर स्मार्ट प्लस एप प्रयोग गरी भुक्तानी गर्न सक्नेछन् । यसले सेवा नवीकरण गर्न कार्यालय वा सेवा केन्द्र धाउनुपर्ने झन्झट कम गर्नेछ । डिसहोमले ग्राहकलाई सहज सुविधा उपलब्ध गराउने उद्देश्यले विभिन्न विद्युतीय भुक्तानी माध्यमबाट सेवा नवीकरण गर्न सकिने व्यवस्था गर्दै आएको जनाएको छ । कृषि विकास बैंकको स्मार्ट प्लस एपका साथै अन्य उपलब्ध विद्युतीय भुक्तानी माध्यमबाट पनि डिसहोमका सेवा नवीकरण गर्न सकिने कम्पनीले जनाएको छ ।
कक्रोच पार्टीका दीपकेको आरोप– सरकारले हजारौं इन्स्टाग्राम पोस्ट हटाइरहेको छ
काठमाडौं । कक्रोच जनता पार्टी (सीजेपी) का संस्थापक अभिजीत दीपकेले इन्स्टाग्राममा प्रकाशित सामग्रीमाथि सरकारले सेन्सरसिप लगाइरहेको आरोप लगाएका छन् । उनले सामाजिक सञ्जाल एक्स (पूर्व ट्विटर) मा लेख्दै सरकारले दैनिक हजारौं इन्स्टाग्राम पोस्ट तथा प्रयोगकर्ताका खाता हटाइरहेको दाबी गरेका हुन् । उनले लेखेका छन्, ‘इन्स्टाग्राममाथि कारबाही गरेर कुनै फाइदा हुनेवाला छैन । सरकारले हरेक दिन हजारौं पोस्ट र खाता हटाइरहेको छ । तर, सरकारले एउटा आधारभूत कुरा बुझ्न नसकेको जस्तो देखिन्छ ।’ उनका अनुसार इन्स्टाग्राम मानिसहरूले आफ्ना प्रश्न र असन्तुष्टि व्यक्त गर्ने माध्यम मात्रै हो । ती प्रश्न उठ्नुका वास्तविक कारण सामाजिक सञ्जालभन्दा धेरै गहिरा छन् । उनले भनेका छन्, ‘प्रयोगकर्ताका खाता हटाउँदैमा ती प्रश्न उठ्नुका कारण समाप्त हुँदैनन् । बरु, यस्तो सेन्सरसिपले सरकारप्रति नागरिकको विश्वास अझ कमजोर बनाउन सक्छ । जनताले उठाएका प्रश्नको जवाफ दिनु सरकारको जिम्मेवारी हो ।’ दीपकेले यो संघर्ष लामो समयसम्म चल्न सक्ने भन्दै त्यसका लागि आफूहरू पूर्ण रूपमा तयार रहेको बताएका छन् । उनले भनेका छन्, ‘यो लामो लडाइँ हो र हामी यसका लागि पूर्ण रूपमा तयार छौं ।’
ग्यास किन्दा अनिवार्य बिल लिन महासंघको आग्रह
काठमाडौं । ग्यास विक्रेता महासंघ नेपालले एलपी ग्यास बिक्री गर्दा अनिवार्य रूपमा भ्याट बिल दिनुपर्ने नेपाल आयल निगमको निर्देशनको स्वागत गरेको छ । महासंघले बुधबार विज्ञप्ति जारी गर्दै निगमको निर्णयले ग्यासको कारोबार व्यवस्थित बनाउन सहयोग पुग्ने बताएको हो । निगमको एलपी ग्यास तथा एभिएसन विभागले गत कात्तिक ९ गते सबै ग्यास उद्योगलाई पत्राचार गर्दै ग्यास बिक्री गर्दा उपभोक्तालाई अनिवार्य रूपमा बिल दिने व्यवस्था मिलाउन निर्देशन दिएको थियो । ग्यास बिक्रेताले उपभोक्तालाई ग्यास बिक्री गरेपछि बिल नदिएको गुनासो बढेपछि निगमले यस्तो निर्देशन दिएको हो । महासंघले ग्यासको कारोबारलाई व्यवस्थित र सुरक्षित बनाउन अनिवार्य रूपमा भ्याट बिल वा बीजक जारी गर्ने व्यवस्था महत्वपूर्ण हुने जनाएको छ । यसले ग्यासको कारोबारलाई पारदर्शी बनाउन पनि सहयोग पुग्ने महासंघको भनाइ छ । महासंघका अध्यक्ष ज्ञानेश्वर अर्यालले सबै ग्यास व्यवसायीलाई निगमको निर्देशन पूर्ण रूपमा पालना गर्न आग्रह गरेका छन् । उनले उपभोक्तालाई पनि ग्यास खरिद गर्दा बिक्रेतासँग अनिवार्य रूपमा बिल माग्न र लिने बानी बसाल्न अनुरोध गरेका छन् ।
गुल्मी कांग्रेसको जिल्ला अधिवेशन कात्तिक २० गते, क्षेत्रीय अधिवेशन १४ र १५ मा
काठमाडौं । नेपाली कांग्रेस गुल्मीको १५औँ नियमित महाधिवेशनअन्तर्गत जिल्ला अधिवेशन कात्तिक २० गते हुने भएको छ। नियमित केन्द्रीय महाधिवेशन तयारी समितिले अधिवेशनको कार्यतालिका सार्वजनिक गरेको हो । समितिका संयोजक वेदबहादुर थापामगरले पार्टीको सङ्गठन सुदृढीकरण र लोकतान्त्रिक मूल्य–मान्यताको रक्षाका लागि अधिवेशन गर्न लागिएको बताए । तयारी समितिले नियमित महाधिवेशनलाई पार्टीको स्वाभाविक र आधिकारिक प्रक्रिया भएको दाबी गरेको छ । जिल्ला सचिव रविन्द्र घिमिरेका अनुसार पार्टीको ऐतिहासिक विरासत, मूल जिम्मेवारी र स्वाभाविक विधि तथा प्रक्रियाका हिसाबले नियमित महाधिवेशन नै पार्टीको आधिकारिक मूल प्रवाह हो । घिमिरेका अनुसार बीपी कोइरालाले अघि सारेको राष्ट्रियता र प्रजातन्त्रबीचको सहकार्यलाई आत्मसात् गर्दै पार्टी १५औँ महाधिवेशनको तयारीमा लागेको हो । लोकतन्त्रको संस्थागत विकास, विधिको शासन, मानवअधिकार र प्रेस स्वतन्त्रताको पक्षमा उभिन पनि नियमित १५औँ महाधिवेशनका पक्षमा दृढ रहन घिमिरेले आग्रह गरे । गुल्मी कांग्रेसले अधिवेशन सफल बनाउन पार्टीका सदस्य, शुभेच्छुक र समर्थकसहित अन्य राजनीतिक दल, जनप्रतिनिधि, सरकारी निकाय, पत्रकार तथा सङ्घसंस्थालाई सहयोग र सहभागिताका लागि अपिल गरेको छ । अधिवेशनको कार्यतालिकाअनुसार कात्तिक १४ गते क्षेत्र नम्बर २ को क्षेत्रीय अधिवेशन हुने सचिव घिमिरेले जानकारी दिए । उनका अनुसार कात्तिक १५ गते क्षेत्र नम्बर १ को क्षेत्रीय अधिवेशन हुनेछ भने कात्तिक २० गते जिल्ला अधिवेशन गर्ने गरी कार्यतालिका सार्वजनिक गरिएको छ । कांग्रेस गुल्मीले यसअघि नै वडा र पालिका अधिवेशन सम्पन्न गरिसकेको जानकारी दिएको छ ।
चक्रवात अर्नबको प्रभावले नेपालमा बादल फैलियो, उच्च सतर्कता अपनाउन आग्रह
काठमाडौं । भारतको आन्ध्र प्रदेश र यानमको तटीय क्षेत्रमा जमिनमा चक्रवात अर्नबको प्रभाव देखिँदा नेपालमा पनि बादल फैलिन थालेको छ । जल तथा मौसम विज्ञान विभागका अनुसार काठमाडौंसहित देशका विभिन्न भागमा उच्च बादल देखिन थालेको छ । चक्रवातको बाहिरी क्षेत्रबाट आउने उच्च बादल नेपालमा फैलिन थालेसंगै बुधबार कतैकतै हल्का वर्षा हुन सक्ने विभागले जनाएको छ । बिहीबार साँझदेखि भने वर्षाको सम्भावना बढ्नेछ । केही स्थानमा भारी र एक दुई स्थानमा धेरै भारी वर्षासमेत हुन सक्ने विभागले जनाएको छ । नेपालसम्म आइपुग्दा यो समुद्री चक्रवातकै तीव्रतामा रहने सम्भावना छैन । तर चक्रवातले ल्याउने ओसिलो हावा र पश्चिमी वायुसँग सम्बन्धित माथिल्लो तहको न्यूनचापीय रेखाबीच अन्तरक्रिया हुँदा नेपालमा भारी वर्षा हुन सक्ने मौसम विद्हरु बताउँछन् । विशेषगरी बिहीबार साँझदेखि शनिबार बिहानसम्मको करिब ३६ घण्टा बढी सतर्क रहनुपर्ने र विभागले हिमाली क्षेत्रमा जारी गरेको रेड अलर्ट कायमै राखेको छ । मंगलबारसम्म बंगालको खाडीको समुद्री सतहमा रहेको चक्रवात बुधबार बिहानदेखि स्थल प्रवेश प्रक्रिया सुरू भएको हो । भारतको मौसम विज्ञान विभागका अनुसार चक्रवातको स्थल प्रवेश प्रक्रिया बापट्ला र विशाखापट्टनमको बीचमा यानमको दक्षिणतर्फ भइरहेको छ । बुधबार बिहानदेखि सुरु भएको स्थल प्रवेश प्रक्रियाका क्रममा भारतका विभिन्न ठाउँमा भारी वर्षा र तीव्र हावाहुरी चलेको छ भारतीय समाचार संस्था एएनआईले जनाएको छ । चक्रवातको केन्द्रमा हावाको गति प्रतिघन्टा १२५ देखि १३५ किलोमिटर छ । हावाको झोक्का प्रतिघण्टा १५० किलोमिटरसम्म पुगेको भनेर एएनआईले लेखेको छ । चक्रवातको प्रभावले आन्ध्र प्रदेशको काकिनाडामा रूखहरू ढलेका छन् भने विद्युतका तारहरू चुँडिएका छन्। विशाखापट्टनममा सडक अवरुद्ध भएका छन् । तटीय क्षेत्रमा समुद्रको पानी बस्तीमा पस्न सक्ने चेतावनीसमेत जारी गरिएको छ ।
२.८५ अर्बमा कुपण्डोलमा पाँचतारे होटल बन्दै, प्रतिकोठा लागत २.७० करोड
काठमाडौं । ललितपुरको कुपण्डोलमा अन्तर्राष्ट्रिय होटल ब्रान्ड हायात प्लेसको पाँचतारे होटल निर्माण भइरहेको छ । अनिशा अग्रवाल र गणेश अग्रवालको समान लगानी रहेको सायन होटल्स प्रालिले १०५ कोठाको होटल निर्माण गरिरहेको हो । कम्पनीले सन् २०२८ अप्रिलको मध्यदेखि होटल सञ्चालनमा ल्याउने लक्ष्य राखेको छ । व्यावसायिक प्रतिस्पर्धा, बढ्दो निर्माण लागत र उच्च ऋणभारका बीच अघि बढिरहेको यो परियोजना निर्धारित समयमै सम्पन्न गर्नु कम्पनीका लागि महत्त्वपूर्ण चुनौती बनेको छ । होटल निर्माणको काम सन् २०२६ सेप्टेम्बर २१ सम्म करिब ४८ प्रतिशत पूरा भएको कम्पनीले जनाएको छ । सन् २०२१ सेप्टेम्बरमा स्थापना भएको सायन होटल्सले सुरुमा ११२ कोठाको होटल निर्माण गर्ने योजना बनाएको थियो । पछि योजनामा संशोधन गर्दै कोठाको संख्या १०५ मा सीमित गरिएको हो । करिब १५ हजार ५७ वर्गफिट क्षेत्रफलको जग्गामा निर्माण भइरहेको होटलको बाँकी काम निर्धारित समयभित्र पूरा गर्ने कम्पनीको लक्ष्य छ । कम्पनीले होटल निर्माणको काम सन् २०२७ अक्टोबरको मध्यसम्ममा सम्पन्न गर्ने योजना बनाएको छ । तर, हायातको मापदण्ड पूरा गर्ने प्रक्रिया तथा सञ्चालनपूर्वका तयारीका कारण व्यावसायिक सेवा सुरु हुन सन् २०२८ अप्रिलको मध्यसम्म लाग्ने अनुमान गरिएको छ । यसअघि सन् २०२७ जुलाईको मध्यदेखि सञ्चालन सुरु गर्ने योजना थियो । होटल निर्माणका लागि परियोजनाको संशोधित कुल लागत २ अर्ब ८५ करोड ७० लाख रुपैयाँ अनुमान गरिएको छ । यो यसअघिको अनुमानभन्दा करिब चार प्रतिशत कम हो । यद्यपि, निर्माण सामग्रीको मूल्यवृद्धि, अमेरिकी डलर तथा चिनियाँ युआनको तुलनामा नेपाली रुपैयाँ कमजोर हुनु र निर्माण अवधि लम्बिनुले लागत बढ्न सक्ने कम्पनीले जनाएको छ । कम्पनीका अनुसार परियोजनाको लागतमा जग्गा खरिदले पनि ठूलो हिस्सा ओगटेको छ । हालसम्मको वित्तीय प्रगतिमा जग्गा खरिदको लागतबाट मात्रै करिब १७ प्रतिशत योगदान रहेको छ । कुपण्डोलमा जग्गा खरिद गर्नुपर्दा होटलको प्रतिकोठा लागत करिब दुई करोड ७० लाख रुपैयाँ पुगेको छ । उक्त लागतमा क्यासिनो र भोजभतेर आयोजना गर्ने हल निर्माणको खर्चसमेत समावेश रहेको कम्पनीले जनाएको छ । सायन होटल्सले परियोजनाका लागि दुई अर्ब रुपैयाँ ऋण लिएको छ । यसअघि दुई अर्ब पाँच करोड रुपैयाँ ऋणको प्रस्ताव गरिएको थियो । परियोजनाको कुल लागतको करिब ७० प्रतिशत ऋणबाट जुटाउने योजना रहेको छ । परियोजनाका लागि आवश्यक ऋणको व्यवस्था पूरा भएको कम्पनीको भनाइ छ । यसअघि आवश्यक ऋणको करिब ३९ प्रतिशतको मात्रै व्यवस्था भएको थियो । त्यस्तै, प्रवर्द्धकले हालसम्म आवश्यक स्वपुँजीको करिब ३२ प्रतिशत लगानी गरेका छन् । यसअघि यस्तो लगानी करिब १७ प्रतिशत थियो । अनिशा अग्रवाल र गणेश अग्रवालको कम्पनीमा समान ५०-५० प्रतिशत सेयर स्वामित्व रहेको छ । परियोजनाको वित्तीय संरचनामा ऋणको हिस्सा ठूलो रहेकाले होटल सञ्चालनमा आएपछि आम्दानी अपेक्षाअनुसार हुन नसके ऋणको साँवा तथा ब्याज भुक्तानीमा दबाब पर्न सक्छ । होटल व्यवसायमा कर्मचारी, भवन मर्मतसम्भार, ऊर्जा तथा अन्य सञ्चालन खर्चको ठूलो हिस्सा नियमित रूपमा व्यहोर्नुपर्ने हुन्छ । त्यसैले कोठा उपयोग दर कम हुँदा वा आम्दानी अनुमानभन्दा घट्दा नाफा र नगद प्रवाहमा प्रत्यक्ष असर पर्न सक्छ । होटलले अन्तर्राष्ट्रिय ब्रान्डको पहिचान र सुविधाका आधारमा ग्राहक आकर्षित गर्ने कम्पनीले अपेक्षा गरेको छ । तर, बजारमा पहिलेदेखि सञ्चालनमा रहेका होटल तथा नयाँ प्रवेश गर्ने प्रतिस्पर्धीसँग प्रतिस्पर्धा गर्नुपर्ने बाध्यता छ ।
इजरायलमा ७७.७ प्रतिशत मतदान, मतगणनामा नेतन्याहुको पार्टी अगाडि
काठमाडौं । इजरायलमा मंगलबार सम्पन्न संसदीय निर्वाचनको मतगणनामा प्रधानमन्त्री बेन्जामिन नेतन्याहुको लिकुड पार्टी अगाडि देखिएको छ । बुधबार बिहानसम्म करिब ४० प्रतिशत मतगणना हुँदा लिकुडले २१.७० प्रतिशत र प्रमुख प्रतिस्पर्धी गादी आइजेनकोटको याशार पार्टीले १५.७२ प्रतिशत मत प्राप्त गरेका छन् । निर्वाचनमा ७७.७ प्रतिशत मतदान भएको छ । इजरायलको केन्द्रीय निर्वाचन समितिका अनुसार करिब ५७ लाख मतदाताले मतदान गरेका हुन् । यो सन् १९९९ यताकै उच्च सहभागिता हो । सन् २०२२ को तुलनामा मतदान ७.१ प्रतिशत बिन्दुले बढेको छ । मतदान सकिएलगत्तै सार्वजनिक सर्वेक्षणमा विपक्षी गठबन्धन अगाडि देखिए पनि रातभर अद्यावधिक भएका प्रक्षेपणमा नेतन्याहु पक्षको स्थिति सुधारिएको छ । रोयटर्सका अनुसार पछिल्ला प्रमुख सर्वेक्षणले नेतन्याहु समर्थक गठबन्धनलाई ५१ देखि ५२ र विपक्षी गठबन्धनलाई ४९ देखि ५१ सिट प्राप्त हुने अनुमान गरेका छन् । यद्यपि, प्रारम्भिक मतगणनामा नेतन्याहु पक्षको अग्रता सर्वेक्षणको तुलनामा बढी देखिएको छ । करिब ३७.४ प्रतिशत मतगणनाका आधारमा गरिएको सिट अनुमानमा नेतन्याहु समर्थक गठबन्धनले ५७, विपक्षीले ४७ र अरब दलहरूले १६ सिट प्राप्त गर्ने देखिएको छ । यी अनुमान मतगणना अघि बढेसँगै परिवर्तन हुन सक्छन् । इजरायलको १२० सदस्यीय संसद् नेसेटमा सरकार गठन गर्न कम्तीमा ६१ सिट आवश्यक पर्छ । अहिलेसम्म कुनै पनि पक्षको स्पष्ट बहुमत सुनिश्चित भएको छैन । निर्वाचनमा अरब समुदायको सहभागिता पनि उल्लेखनीय देखिएको छ । इजरायली च्यानल १२ का अनुसार अरब मतदाताको सहभागिता करिब ८० प्रतिशत पुगेको छ । अरब दलहरूको बढ्दो प्रभावले सरकार गठनको समीकरणमा महत्त्वपूर्ण भूमिका खेल्न सक्ने देखिएको छ । नेतन्याहुले समर्थकहरूलाई सम्बोधन गर्दै बलियो दक्षिणपन्थी सरकार गठन गर्ने बताएका छन् । उनले अरब दलहरूको समर्थनमा सरकार गठन गर्ने सम्भावना अस्वीकार गरेका छन् । उता, पूर्वसेना प्रमुख आइजेनकोटले मतदाताले राजनीतिक परिवर्तन चाहेको दाबी गरेका छन् । सन् २०२३ अक्टोबर ७ मा हमासले गरेको आक्रमणपछिको यो पहिलो आमनिर्वाचन हो । गाजा युद्ध, इरानसँगको द्वन्द्व र नेतन्याहुको नेतृत्वमाथिको असन्तुष्टि निर्वाचनका प्रमुख मुद्दा बनेका थिए । मतगणना जारी रहेकाले अन्तिम नतिजा आउन बाँकी नै छ ।
भारी वर्षाको पूर्वानुमानपछि स्वास्थ्य सेवा तयारी अवस्थामा राख्न आग्रह
काठमाडौं । सम्भावित भारी वर्षा तथा त्यसबाट हुन सक्ने बाढी,पहिरो र डुबानलगायतका विपद्को जोखिमलाई मध्यनजर गर्दै स्वास्थ्य क्षेत्रलाई उच्च सतर्कतामा रही पूर्वतयारी तथा प्रतिकार्यका काम प्रभावकारी बनाउन स्वास्थ्य तथा खाद्य स्वच्छता मन्त्रालयले आग्रह गरेको छ । जल तथा मौसम विज्ञान विभाग तथा विपद् जोखिम न्यूनीकरण तथा व्यवस्थापन प्राधिकरणका अनुसार २०८३ कार्तिक १२ देखि १४ गतेसम्म देशका विभिन्न स्थानमा चट्याङ,हावाहुरीसहित मध्यमदेखि भारी वर्षा हुन सक्ने पूर्वानुमान रहेपछि स्वास्थ्य क्षेत्रको तयारीलाई सुदृढ बनाउन निर्देशन दिइएको हो । यस सम्बन्धमा स्वास्थ्य आपतकालीन तथा विपद् व्यवस्थापन इकाईले सातै प्रदेशका प्रादेशिक स्वास्थ्य आपतकालीन कार्यसञ्चालन केन्द्रलाई पत्राचार गर्दै आवश्यक स्वास्थ्य सेवा तथा प्रतिकार्य क्षमता तयारी अवस्थामा राख्न आग्रह गरेको छ । इकाईका प्रमुख डा. हेमन्त चन्द्र ओझाद्वारा जारी पत्रमा प्रत्येक प्रदेशमा चौबिसै घण्टा सम्पर्कमा रहने एक जना आपतकालीन सम्पर्क व्यक्ति (इमर्जेन्सी फोकल पर्सन) तोक्न,निजको सम्पर्क विवरण इकाईमा उपलब्ध गराउन तथा सार्वजनिक गर्न भनेको छ । त्यसैगरी,सम्बन्धित हब तथा स्याटेलाइट अस्पताल सञ्जालसँग समन्वय गरी आकस्मिक चिकित्सकीय टोली (ईएमटी) सहित आवश्यक स्वास्थ्य जनशक्तिलाई तयारी अवस्थामा राख्न आग्रह गरिएको छ । स्वास्थ्य क्षेत्रका साझेदार निकायसँग समन्वय गरी उपलब्ध जनशक्ति,औषधि,स्वास्थ्य सामग्री,उपकरण,एम्बुलेन्स तथा अन्य स्रोतसाधनको विवरण अद्यावधिक गर्न पनि भनिएको छ । विपद्का बेला घाइते तथा प्रभावित नागरिकलाई समयमै स्वास्थ्य सेवा उपलब्ध गराउन प्रदेशमा रहेका एम्बुलेन्स प्रेषण केन्द्रसँग निरन्तर समन्वय गरी एम्बुलेन्स सेवाको सहज,शीघ्र र प्रभावकारी परिचालन सुनिश्चित गर्नुपर्ने पत्रमा उल्लेख छ । इकाईले स्वास्थ्य क्षेत्रसँग सम्बन्धित घटना तथा अवस्थाको विवरण दैनिक रूपमा ‘जिरो रिपोर्टिङ’ वा ‘इन्सिडेन्ट रिपोर्टिङ’ मार्फत अनिवार्य रूपमा पठाउन पनि सबै प्रदेशका केन्द्रलाई आग्रह गरेको छ । सम्भावित विपद्का बेला स्वास्थ्य सेवामा अवरोध हुन नदिन,आवश्यक जनशक्ति तथा स्वास्थ्य सामग्रीको उपलब्धता सुनिश्चित गर्न र प्रभावित क्षेत्रमा तत्काल प्रतिकार्य परिचालन गर्न यी तयारीलाई प्राथमिकतामा राखिएको हो ।
