सार्वजनिक काममा ६ निर्माण कम्पनीलाई प्रतिबन्ध, कसलाई कति वर्ष ?
काठमाडौं । सार्वजनिक खरिद अनुगमन कार्यालयले ६ निर्माण व्यवसायी तथा आपूर्तिकर्तालाई एकदेखि तीन वर्षसम्मका लागि कालोसूचीमा राखेको छ । कार्यालयले विभिन्न सार्वजनिक निकायबाट प्राप्त सिफारिसका आधारमा उनीहरूलाई कालोसूचीमा राख्ने निर्णय गरेको हो । कार्यालयका अनुसार सस्पेन्सन बृज डिभिजन, ललितपुरको सिफारिसमा काठमाडौंस्थित निलगिरी निर्माण सेवा प्रालि र सडक पूर्वाधार विकास कार्यालय, गुलरिया, बर्दियाको सिफारिसमा बुटवल, रुपन्देहीस्थित लुम्बिनी इन्जिनियरिङ वक्र्स प्रालिलाई तीन-तीन वर्षका लागि कालोसूचीमा राखिएको छ । निलगिरका मुख्य व्यक्ति युवराज डाँगी र लुम्बिनी इन्जिनियरिङका मुख्य व्यक्ति राजन कुमार पोखरेल हुन् । त्यस्तै, सस्पेन्सन बृज डिभिजन, ललितपुरको सिफारिसमा घोराही, दाङस्थित हरिहरी/शर्मिला जे.भी.लाई दुई वर्षका लागि कालोसूचीमा राखिएको छ । उक्त संयुक्त उपक्रममा हरिहरि निर्माण सेवा, काठमाडौं र शर्मिला कन्स्ट्रक्सन सेवा, रोल्पा संलग्न छन् । मुख्य व्यक्तिका रूपमा गौरीलाल डाँगी रहेका छन् । यसैगरी, सडक डिभिजन, दमौली, तनहुँको सिफारिसमा गोरखाको बारपाक सुलिकोट-४ स्थित विन्ध्यवासिनी निर्माण सेवा र गोरखा नगरपालिका-३ स्थित अनुपमा निर्माण सेवालाई एक वर्षका लागि कालोसूचीमा राखिएको छ । विन्ध्यवासिनीका मुख्य व्यक्ति कविन्द्र अधिकारी र अनुपमाका मुख्य व्यक्ति देवेन्द्रजंग कुँवर हुन् । त्यस्तै, सामाजिक विकास कार्यालय, धुलिखेल, काभ्रेपलाञ्चोकको सिफारिसमा सुनसरीको इटहरी-८ स्थित सौरभ कन्स्ट्रक्सनलाई एक वर्षका लागि कालोसूचीमा राखिएको छ । उक्त कम्पनीका मुख्य व्यक्ति शर्वेस आचार्य हुन् । कालोसूचीमा परेका निर्माण व्यवसायी तथा आपूर्तिकर्ताले तोकिएको अवधिभर सार्वजनिक निकायबाट हुने कुनै पनि खरिद प्रक्रियामा सहभागी हुन पाउने छैनन् । सार्वजनिक खरिद ऐन, २०६३ को दफा ६३ को उपदफा (१) बमोजिम कालोसूचीमा राखिएका उनीहरूले प्रतिबन्ध लागू भएको अवधिभर सार्वजनिक खरिदसम्बन्धी कारबाहीमा भाग लिन नपाउने कार्यालयले जनाएको छ ।
चिकित्सा शिक्षामा कहाँ कसरी हुँदैछ सुधार ?
काठमाडौं । शिक्षा तथा खेलकुद मन्त्रालयले डा. गोविन्द केसीसँग विभिन्न समयमा भएका सहमति कार्यान्वयन गर्दै चिकित्सा शिक्षा सुधारका काम अघि बढिरहेको जनाएको छ । मन्त्रालयले राष्ट्रिय चिकित्सा शिक्षा ऐन जारी, चिकित्सा शिक्षा आयोगको स्थापना, छात्रवृत्ति व्यवस्थापन र देशभर चिकित्सा शिक्षाको पहुँच विस्तारलाई सहमति कार्यान्वयनका प्रमुख उपलब्धिका रूपमा उल्लेख गरेको हो । मन्त्रालयका अनुसार चिकित्सा शिक्षालाई नीतिगत तथा संस्थागत रूपमा व्यवस्थित बनाउने, शैक्षिक अवसर विस्तार गर्ने र सुशासन कायम गर्ने दिशामा विभिन्न सुधारका काम भएका छन् । राष्ट्रिय चिकित्सा शिक्षा ऐन, २०७५ जारी भएपछि चिकित्सा शिक्षा आयोग स्थापना भएको र आयोगमार्फत साझा प्रवेश परीक्षा सञ्चालन, तहगत तथा विधागत कोटा निर्धारण, छात्रवृत्तिमा विद्यार्थी छनोट तथा व्यवस्थापन र शैक्षिक संस्थाको नियमनसम्बन्धी काम हुँदै आएको छ । 'विभिन्न समयमा यस विषयमा भएका अध्ययन, कार्यदलका प्रतिवेदन एवम् अपेक्षित सुधारका विषयहरूको चरणबद्ध कार्यान्वयनबाट आज चिकित्सा शिक्षा सापेक्षित रूपमा व्यवस्थित, नेपालको आकर्षणको विषय बनेको छ,' मन्त्रालयले जारी गरेको विज्ञप्तिमा उल्लेख छ । चिकित्सा शिक्षाको पहुँच विस्तारका लागि सरकारले विभिन्न प्रदेशमा शैक्षिक संस्था स्थापना तथा पूर्वाधार विकासलाई प्राथमिकता दिएको छ । कर्णाली र सुदूरपश्चिम प्रदेशमा चिकित्सा शिक्षाका लागि पूर्वाधार विकाससँगै पठनपाठनसमेत सुरु भएको मन्त्रालयले जनाएको छ । सुदूरपश्चिम प्रदेशको कैलालीस्थित गेटामा शहीद दशरथचन्द्र स्वास्थ्य विज्ञान विश्वविद्यालय स्थापना भएर यस वर्षदेखि चिकित्सा शिक्षाका विभिन्न विधामा पठनपाठन सुरु भएको छ । त्यस्तै, कर्णाली प्रदेशको सुर्खेत, लुम्बिनी प्रदेशको बुटवल र मधेश प्रदेशको बर्दिबासमा चिकित्सा शिक्षाका लागि शैक्षिक संस्थाको पूर्वाधार विकास भइरहेको मन्त्रालयले जनाएको छ । चिकित्सा शिक्षा आयोगमार्फत शैक्षिक संस्थालाई सम्बन्धन दिने प्रक्रिया, तहगत तथा विधागत कोटा निर्धारण र विद्यार्थी भर्ना व्यवस्थापनलाई व्यवस्थित, पारदर्शी तथा मापदण्डमा आधारित बनाइएको मन्त्रालयको भनाइ छ । राष्ट्रिय चिकित्सा शिक्षा ऐन, २०७५, नियमावली २०७७ तथा सम्बन्धित मापदण्डअनुसार छात्रवृत्ति कोटा निर्धारण गरी ठूलो सङ्ख्यामा विद्यार्थीलाई निःशुल्क अध्ययनको अवसर प्रदान गरिएको पनि मन्त्रालयले जनाएको छ । पछिल्लो पटक २०८३ साउन ११ गते डा. केसीसँग भएको सहमतिका बुँदा कार्यान्वयनका लागि कार्यदल गठन भई क्रियाशील रहेको मन्त्रालयले जनाएको छ । 'पछिल्लो सहमतिमा भएका बुँदा कार्यान्वयनका लागि कार्यदलहरू गठन भई क्रियाशील छन्,' मन्त्रालयको विज्ञप्तिमा भनिएको छ ।
चक्रवात ‘अर्नब’को प्रभावले देशभर वर्षा र हिमपात
काठमाडौं । हाल देशमा पश्चिमी वायुको आंशिक प्रभावसँगै बङ्गालको खाडीमा विकसित चक्रवात ‘अर्नब’को प्रभाव परेको छ । यसको असर हिजोदेखि नै देशका विभिन्न भागमा देखिएको छ । मौसम पूर्वानुमान महाशाखाका अनुसार आज देशभर साधारणतया बादल लागेको छ । कोशी र बागमती प्रदेशका पहाडी तथा तराई क्षेत्र र मधेस प्रदेशका केही स्थानमा हल्का वर्षा भइरहेको छ । आज दिउँसो देशका अधिकांश स्थानमा बादल लाग्नेछ । कोशी, मधेस, बागमती, गण्डकी र लुम्बिनी प्रदेशका धेरै स्थान तथा कर्णाली र सुदूरपश्चिम प्रदेशका हिमाली भूभागका अधिकांश स्थानमा मेघगर्जन र चट्याङसहित मध्यम वर्षा तथा हिमपात हुने पूर्वानुमान छ । त्यस्तै, मधेस, बागमती, गण्डकी र लुम्बिनी प्रदेशका तराई क्षेत्रका केही स्थानमा हुरी चल्ने सम्भावना छ । कोशी, मधेस, बागमती, गण्डकी र लुम्बिनी प्रदेशका केही स्थान तथा कर्णाली र सुदूरपश्चिम प्रदेशका हिमाली र पहाडी भूभागका एकदुई स्थानमा भारी वर्षासँगै हिमपात हुनसक्ने महाशाखाले जनाएको छ । आज राति पनि देशका अधिकांश स्थानमा बादल लाग्ने तथा मेघगर्जन र चट्याङसहित मध्यम वर्षा र हिमपात हुने सम्भावना छ । केही स्थानमा भारी वर्षा तथा हिमपात हुनसक्ने महाशाखाको पूर्वानुमान छ । महाशाखाका अनुसार आज र भोलि देशका अधिकांश स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ । कोशी, मधेस, बागमती र गण्डकी प्रदेशका केही स्थानमा भारी वर्षा तथा एकदुई स्थानमा अति भारी वर्षा र हिमपात हुनसक्ने अनुमान गरिएको छ । लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका केही स्थानमा पनि भारी वर्षा र हिमपातको सम्भावना छ । सम्भावित वर्षाका कारण धानबाली भित्र्याउनेलगायत कृषि कार्य आज र भोलि नगर्न महाशाखाले अनुरोध गरेको छ । उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिम रहेकाले सतर्कता अपनाउन तथा पर्यटकलाई उच्च हिमाली क्षेत्रमा नजान पनि आग्रह गरिएको छ । त्यस्ता क्षेत्रमा पुगिसकेका पर्यटकलाई मौसम अनुकूल नहुँदासम्म सुरक्षित स्थानमा रहन महाशाखाले अनुरोध गरेको छ । वर्षासँगै चिसो बढ्न सक्ने, जोखिमयुक्त स्थान तथा सडक छेउमा पहिरो खस्न सक्ने र सडक तथा हवाई यातायात प्रभावित हुनसक्ने भएकाले सतर्कता अपनाउन महाशाखाले सर्वसाधारण र सम्बन्धित निकायलाई आग्रह गरेको छ । सम्भावित जोखिम न्यूनीकरणका लागि आवश्यक पूर्वतयारी गर्न पनि अनुरोध गरिएको छ ।
सिलिगुडीको दिवाली एक्जिबिसनमा मोरङ उद्योग व्यापार संघको सहभागिता, के के भयो छलफल ?
काठमाडौं । भारतको पश्चिम बङ्गालस्थित सिलिगुडीमा आयोजना गरिएको ‘दिवाली एक्जिबिसन (प्रदर्शनी)’मा मोरङ उद्योग व्यापार संघका अध्यक्ष अनिल कुमार साहले सहभागिता जनाउँदै द्विपक्षीय व्यापारिक छलफल गरेका छन् । भारतको महिला उद्यमीहरूको प्रतिष्ठित संस्था ‘इन्डियन उमन्स इरा (आईडब्ल्यूई) बजार’ले कात्तिक १० र ११ गते सो प्रदर्शनी आयोजना गरेको हो । आईडब्ल्यूई बजारकी अध्यक्ष नेहा जैनको विशेष निमन्त्रणामा संघका अध्यक्ष साह प्रदर्शनीमा सहभागी थिए । उत्पादन अवलोकन तथा अनुभव आदानप्रदानप्रदर्शनीका क्रममा अध्यक्ष साहले त्यहाँका महिला उद्यमीहरूद्वारा उत्पादित वस्तुहरू, हस्तकला, फेसन, दैनिक उपभोग्य वस्तुहरू तथा सेवामूलक स्टलहरूको स्थलगत अवलोकन गरेका थिए । सो अवसरमा उनले उद्यमीहरूको व्यावसायिक सिर्जनशीलता, उद्यमशीलता विकास र सीमापार बजारीकरणका विविध सम्भावनाहरूबारे प्रत्यक्ष कुराकानी गर्दै उत्पादनसम्बन्धी जानकारी तथा अनुभवहरू आदानप्रदान गरे । सीमावर्ती व्यापार र नेटवर्क विस्तारमा जोडछलफलका क्रममा अध्यक्ष साहले नेपालको औद्योगिक तथा व्यावसायिक विकासमा अग्रणी भूमिका निर्वाह गर्दै आएको मोरङ उद्योग व्यापार संघको ऐतिहासिक पृष्ठभूमि, वर्तमान गतिविधि र संस्थागत उद्देश्यहरूबारे जानकारी गराए । सीमावर्ती क्षेत्रका महिला उद्यमीहरूको व्यावसायिक सञ्जाल विस्तार गर्न र नेपाली तथा भारतीय बजारबीच सेतुको भूमिका निर्वाह गर्न संघ सदैव अग्रसर रहेको उनले बताए । साथै, संघद्वारा नियमित रूपमा आयोजना गरिने अन्तर्राष्ट्रियस्तरको एक्स्पोमा सहभागी हुन उनले भारतीय महिला उद्यमीहरूलाई निमन्त्रणा दिए । यसबाट नेपाली महिला उद्यमीहरूको सञ्जाल विस्तार गर्न र नेपाली उत्पादनहरूको प्रवद्र्धनमा टेवा पुग्ने उनले विश्वास व्यक्त गरे ।
नेपालभर सुरू भयो चेरी क्यूको डेलिभरी
काठमाडौं । गत नाइमा मोबिलिटी एक्सोपमा नेपाल आएको चेरी क्यू इलेक्ट्रीक एसयूभीको नेपालभर डेलिभरी सुरु भएको छ । नेपालका लागि चेरीको आधिकारिक बिक्रेता पायोनियर मोटोकर्प प्रालिले एकसाथ देशका प्रमुख सहरहरुमा डेलिभरी सुरू गरेको हो । कम्पनीका अनुसार काठमाडौंसहित नेपालका प्रमुख सहरहरू चितवन, बिर्तामोड, बुटवल, विराटनगरमा औपचारिक रूपमा डेलिभरी सुरू गरिएको छ । सेग्मेन्टकै उत्कृष्ट विशेषताहरूले सुसज्जित चेरी क्यूमा ४१.२ किलोवाट आवर क्षमताको ब्याट्री छ । जसले एकपटकको फुचार्जमा ४०० किलोमिटर रेन्ज दिने कम्पनीको दाबी छ । चेरी क्यूमा ५४० डिग्री क्यामेरा, १८५ एमएम ग्राउण्ड क्लियरेन्स, विद्युतीय रूपमा सञ्चालित ७० लिटरको फ्रङ्क स्पेस, १५.६ इन्चको टचस्क्रीन इन्फोटेनमेन्ट सिस्टम तथा २० भन्दा बढी एडास सुविधाहरू रहेका छन् । आधुनिक सहरी जीवनशैलीलाई ध्यानमा राखेर डिजाइन गरिएको यस अर्बन एसयूभीले आकर्षक डिजाइन र अत्याधुनिक प्रविधिको उत्कृष्ट संयोजन प्रस्तुत गर्दछ । चेरी क्यूले प्रतिष्ठित रेड डट डिजाइन अवार्ड २०२५ र आइएफ डिजाइन अवार्ड २०२६ समेत प्राप्त गरेको छ ।
२ अर्बभन्दा बढीको क्रिप्टोकरेन्सी कारोबार गर्ने एक जना धनुषाबाट पक्राउ
काठमाडौं । नेपाल राष्ट्र बैंकको नीति तथा प्रचलित कानुन विपरीत विभिन्न विद्युतीय माध्यम तथा अनलाइन बेटिङ एप्लिकेसनमार्फत सट्टेबाजी गर्ने र अवैध रूपमा क्रिप्टोकरेन्सीको ठूलो कारोबार गर्ने एक व्यक्ति पक्राउ परेका छन् । काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले विशेष सूचनाका आधारमा सूक्ष्म निगरानी र प्राविधिक विश्लेषण गरी उनलाई पक्राउ गरेको हो । २ अर्ब १६ करोडभन्दा बढीको अवैध कारोबारपक्राउ पर्नेमा जिल्ला धनुषाको सबेला नगरपालिका वडा नं. १२ स्थायी वतन भएका २८ वर्षीय सुनिल कुमार यादव रहेका छन् । प्रहरीका अनुसार यादवले बाइनान्स आईडीमार्फत २,६९,११,३८८.५० युएसडी अर्थात नेपाली रुपैयाँ २ अर्ब १६ करोड १ लाख २० हजार ८ सय २१ बराबरको कारोबार गरेको खुल्न आएको छ । कानूनी कारवाही प्रक्रियाजिल्ला प्रहरी कार्यालय, धनुषाको समन्वयमा पक्राउ परेका यादवलाई मुलुकी अपराध संहिता, २०७४ को परिच्छेद-५ को दफा १२५ (जुवा खेल्न वा सट्टाबाजी गर्न नहुने) तथा सोही संहिताको दफा २६२ (क) १ (अभौतिक मुद्राको प्रयोग गर्न नहुने) अन्तर्गतको कसूरमा कारवाही अगाडि बढाइएको छ । उनलाई सम्मानित काठमाडौं जिल्ला अदालत, बबरमहलबाट म्याद थप गरी अहिले आवश्यक अनुसन्धान तथा कानूनी कारवाही भइरहेको काठमाडौं उपत्यका अपराध अनुसन्धान कार्यालयका सूचना अधिकारी तथा प्रहरी उपरीक्षक रामेश्वर कार्कीद्वारा जारी प्रेस विज्ञप्तिमा जनाइएको छ ।
प्रहरी भन्छ- आईजीपीको राजीनामाबारेको समाचार भ्रामक हो
काठमाडौं । नेपाल प्रहरीको संगठनलाई कमजोर बनाउने वा विवादमा तानेर सरकारविरुद्ध खेल्ने सोच बनाएका सीमित व्यक्तिहरूको चालबाजीविरुद्ध कानुनी कारबाहीको प्रक्रिया अघि बढाउने प्रहरीले स्पष्ट पारेको छ । प्रहरी प्रवक्ता अविनारायण काफ्लेले एक विज्ञप्ति जारी गर्दै सार्वजनिक सुरक्षा, शान्ति अमनचयन कायम गर्न, अपराध नियन्त्रण गर्न तथा नागरिकको जीउधनको सुरक्षा सुनिश्चित गर्न प्रहरी संगठन सधैं प्रतिबद्ध र जिम्मेवार रहेको बताएका छन् । केही सञ्चारमाध्यममा ‘आईजीपी दानबहादुर कार्कीमाथि राजीनामाको दबाब बढेको’ भन्ने आशयका समाचार तथा टिप्पणीहरू आएकोप्रति नेपाल प्रहरीले गम्भीर ध्यानाकर्षण भएको जनाएको छ । विज्ञप्तिमा भनिएको छ, ‘संगठनको प्रतिष्ठा, व्यावसायिकता तथा कार्यसम्पादनमाथि भ्रम सिर्जना गर्ने उद्देश्यले नियोजित रूपमा भ्रामक सूचना सम्प्रेषण गर्ने सीमित व्यक्तिहरूको चालबाजीलाई नेपाल प्रहरीले प्रचलित कानुनबमोजिम आवश्यक अनुसन्धान तथा कानुनी कारबाहीको प्रक्रिया अगाडि बढाउनेछ ।’ पुष्टि नभएका विषयलाई अनुमानका आधारमा समाचार तथा टिप्पणीका रूपमा प्रस्तुत गर्दा आम नागरिकमा भ्रम, नकारात्मकता र सुरक्षा जोखिम सिर्जना हुने प्रहरीले जनाएको छ । नागरिकको सेवामा समर्पित संस्थाप्रतिको विश्वास र सांगठनिक निष्ठामा असर पर्न सक्ने भन्दै यस्ता अपुष्ट, तथ्यहीन एवम् स्वार्थकेन्द्रित सूचनाको पछि नलाग्न सञ्चारमाध्यम, सामाजिक सञ्जाल प्रयोगकर्ता तथा सरोकारवालाहरूलाई हार्दिक अनुरोध गरिएको छ । सरकारको नीति निर्देशनअनुसार नागरिकप्रतिको विधिसम्मत जिम्मेवारी निर्वाह गर्न नेपाल प्रहरी सदैव समर्पित रहेको उल्लेख गर्दै कुनै पनि प्रकारका भ्रामक प्रचार वा अनावश्यक दबाबबाट विचलित नहुन भनिएको छ । प्रहरीका सकल दर्जाका कर्मचारीहरूलाई उच्च मनोबलका साथ एकताबद्ध भएर काम गर्न निर्देशन दिँदै प्रहरीले आम नागरिकलाई आधिकारिक एवम् तथ्यमा आधारित समाचारमा मात्र विश्वास गर्न र जिम्मेवार सूचना सम्प्रेषणमा सहयोग पुर्याउन अपिल गरेको छ ।
सोमपालको विस्फोटक अर्धशतकमा कर्णाली याक्सद्वारा विराटनगर किंग्स पराजित
काठमाडौं । कप्तान सोमपाल कामीको उत्कृष्ट अर्धशतकीय इनिङ्सको मद्दतमा कर्णाली याक्सले नेपाल प्रिमियर लिग (एनपीएल) को तेस्रो सिजनमा विराटनगर किंग्सलाई ४ विकेटले पराजित गरेको छ । कर्णालीको जितमा कप्तान सोमपालको प्रदर्शन निर्णायक बन्यो । विशाल लक्ष्य पछ्याउने क्रममा कर्णालीका कप्तान सोमपाल कामीले ३२ बलमा ४ चौका र ३ छक्का प्रहार गर्दै ६२ रनको विस्फोटक अर्धशतकीय पारी खेले। एनपीएलको पहिलो सिजनदेखि कर्णालीको कप्तानी सम्हाल्दै आएका सोमपालको यो पहिलो अर्धशतक हो । त्यस्तै, पवन सर्राफले १ चौका र ३ छक्काको मद्दतमा ३६ रन बनाए । सोमपाल र पवनबीच ६६ रनको महत्वपूर्ण अर्धशतकीय साझेदारी भयो, जुन टोलीको जितको मुख्य आधार बन्यो। यो साझेदारी पछि धरमराएको पारीलाई मध्यक्रमका ब्याटरहरूले सम्हालेका थिए । टोलीका लागि ओपनर अरिफुल इस्लामले ३२ रन बनाए भने गुल्सन झाले अविजित २८ र दीपक डुम्रेले २० रनको योगदान दिए । विराटनगर किंग्सतर्फबाट एञ्जेलो म्याथयुजले ४ ओभरमा २५ रन खर्चिंदै सर्वाधिक ३ विकेट लिए । त्यस्तै, चरिथ अशलंका, प्रतिस जिसी र कप्तान सन्दीप लामिछानेले समान १-१ विकेट हात पारे । यस जितसँगै कर्णाली याक्सले प्रतियोगितामा लगातार दोस्रो जित निकालेको छ । यसअघि कर्णालीले जनकपुर बोल्ट्सलाई १९ रनले पराजित गर्दै विजयी सुरुआत गरेको थियो। यता, विराटनगरले भने लगातार दोस्रो हार व्यहोरेको छ । यसअघि पहिलो खेलमा विराटनगर चितवन राइनोजविरुद्ध ८ रनले पराजित भएको थियो ।
