सुनको मूल्य तोलामा ३ हजार २ सय रुपैयाँले घट्यो
काठमाडौं । नेपाली बजारमा शुक्रबार सुनको मूल्य तोलामा ३ हजार २ सय रुपैयाँ घटेको छ । नेपाल सुनचाँदी व्यवसायी महासंघका अनुसार शुक्रबार सुनको मूल्य प्रतितोला २ लाख ८० हजार ३ सय रुपैयाँमा कारोबार भइरहेको छ । बिहीबार २ लाख ८३ हजार ५ सय रुपैयाँमा सुनको कारोबार भएको थियो । त्यस्तै चाँदीको मूल्य तोलामा १०५ रुपैयाँ घटेको छ । बिहीबार तोलाको ३ हजार ९३० रुपैयाँ रहेको चाँदीको मूल्य आज ३ हजार ८२५ रुपैयाँ कायम भएको छ ।
६ बुँदे माग राख्दै डा. केसीले इलामबाट सुरु गरे २५ औं सत्याग्रह
काठामाडौं । चिकित्सा शिक्षा तथा स्वास्थ्य सेवा सुधारका ६ बुँदे माग राख्दै डा. गोविन्द केसीले इलाममा आफ्नो २५औँ सत्याग्रह सुरु गरेका छन् । उनले बिहीबार इलाम सदरमुकामस्थित नारायणस्थान मन्दिर परिसरमा सत्याग्रह सुरु गरेका हुन् । डा. केसीले न्यूनतम पूर्वाधार र जनशक्तिबिनै चिकित्सा शिक्षा कार्यक्रम सञ्चालन गर्न अनुमति दिने निर्णय खारेज गर्नुपर्ने, चिकित्सा शिक्षा आयोगका पदाधिकारीको नियुक्ति तथा निर्णय प्रक्रियामाथि निष्पक्ष छानबिन गर्नुपर्ने र सम्भावित स्वार्थको द्वन्द्व अन्त्य गर्नुपर्ने माग राखेका छन् । उनले गेटास्थित सहिद दशरथ चन्द स्वास्थ्य विज्ञान विश्वविद्यालयलाई पूर्ण क्षमतामा सञ्चालन गर्नुपर्ने र प्रत्येक प्रदेशमा कम्तीमा एउटा सरकारी मेडिकल कलेज स्थापना गर्नुपर्ने मागसमेत अघि सारेका छन् । यसअघि २४औँ सत्याग्रहका क्रममा गत साउन ११ गते सरकारसँग भएको सहमति तीन महिना बितिसक्दा पनि कार्यान्वयन नभएको भन्दै उनले सहमति कार्यान्वयन गर्नुको सट्टा निजी मेडिकल कलेजको स्वार्थअनुकूल छात्रवृत्ति कटौती र मापदण्डबिनै विद्यार्थी सिट वृद्धि गर्ने तयारी भइरहेको आरोप लगाएका छन् । डा. केसीले आवश्यक पूर्वाधार, कानुनी मापदण्ड र प्राज्ञिक जनशक्ति सुनिश्चित नगरी चिकित्सा शिक्षा सञ्चालन गर्दा शिक्षाको गुणस्तर खस्किने र सर्वसाधारणको स्वास्थ्य जोखिममा पर्ने चेतावनी दिएका छन् । यस्ता छन् डा. केसीका माग १. विवादित निर्णय खारेजः न्यूनतम पूर्वाधार, आवश्यक प्राज्ञिक जनशक्ति र कानुनी मापदण्ड पूरा नगरी गेटामा एमबीबीएस तथा नर्सिङ कार्यक्रम सञ्चालन गर्न दिने र मापदण्डविपरीत विभिन्न कलेजमा सिट वृद्धि गर्ने निर्णय तत्काल खारेज गरियोस् । २. निष्पक्ष छानबिन र कारबाहीः चिकित्सा शिक्षा आयोगका उपाध्यक्ष तथा विश्वविद्यालयका उपकुलपति र रजिस्ट्रारलाई निलम्बन गरी निजहरूको नियुक्ति प्रक्रिया, शैक्षिक योग्यता, अनुभव, सम्भावित स्वार्थको द्वन्द्व र पदबहालीपछिका निर्णयबारे उच्चस्तरीय निष्पक्ष छानबिन गरियोस्। छानबिनबाट दोषी ठहरिने पदाधिकारीलाई कानुनी कारबाही गरियोस् । ३. गेटा अस्पताल पूर्ण क्षमतामा सञ्चालनः सहिद दशरथ चन्द स्वास्थ्य विज्ञान विश्वविद्यालयको शिक्षण अस्पताल तत्काल पूर्ण क्षमतामा सञ्चालन गरियोस् । आवश्यक पूर्वाधार, जनशक्ति र सबै कानुनी मापदण्ड पूरा भएपछि मात्र गुणस्तरीय शैक्षिक कार्यक्रम सुरु गरियोस्। विश्वविद्यालयसम्बन्धी ऐनका विवादित तथा दलीय प्रभावयुक्त प्रावधानसमेत परिमार्जन गरियोस् । ४. छात्रवृत्ति र गुणस्तरको रक्षाः सार्वजनिक तथा सरकारी स्रोत प्रयोग हुने संस्थामा अनिवार्य ७५ प्रतिशत छात्रवृत्तिको व्यवस्था कडाइका साथ लागू गरियोस् । निजी कलेजको व्यापारिक स्वार्थका लागि छात्रवृत्ति कटौती गर्ने र मापदण्डविनै सिट वृद्धि गर्ने प्रयास रोकियोस् । ५. सरकारसँग भएका सहमति कार्यान्वयनः २०८३ साउन ११ गते स्वास्थ्य तथा शिक्षा क्षेत्रमा सुधार, सुशासन र सामाजिक न्यायलगायतका विषयमा सरकारसँग भएको सहमति पूर्ण रूपमा कार्यान्वयन गरियोस् । सहमतिमा समेटिएका २०८२ भदौ २४ गते देशभर भएका आगजनी, लुटपाट, तोडफोडलगायत विध्वंसात्मक घटनाको छानबिन तथा दोषीमाथि कारबाहीसम्बन्धी विषयसमेत कार्यान्वयन गरियोस् । ६. सरकारी मेडिकल कलेज विस्तारः इलाम, उदयपुर र डडेलधुरामा सरकारी मेडिकल कलेज वा स्वास्थ्य विज्ञान प्रतिष्ठान स्थापना गर्ने विगतका सहमति शीघ्र कार्यान्वयन गरियोस् । बर्दिवास मेडिकल कलेज निर्माण आयोजना खारेज गर्ने निर्णय बदर गरी निर्माण कार्य अघि बढाइयोस् । चिकित्सा शिक्षा व्यापारिक स्वार्थको साधन होइन, नागरिकको स्वास्थ्य र जीवनसँग प्रत्यक्ष जोडिएको सेवामूलक क्षेत्र हो । यसको गुणस्तर, निष्पक्ष नियमन र सार्वजनिक संस्थाहरूको प्रभावकारी सञ्चालनमा कुनै सम्झौता स्वीकार्य हुन सक्दैन ।
भारतमा चक्रवात ‘अर्नब’का कारण मृत्यु हुनेको सङ्ख्या पाँच पुग्यो, ५७ हजार विस्थापित
काठमाडौं । भारतको दक्षिणी राज्य आन्ध्र प्रदेशमा शक्तिशाली चक्रवात ‘अर्नब’का कारण मृत्यु हुनेको सङ्ख्या पाँच पुगेको छ । आन्ध्र प्रदेशका मुख्यमन्त्री एन. चन्द्रबाबु नायडूले बुधबार चक्रवातका कारण पाँच जनाको मृत्यु भएको पुष्टि गरेका हुन् । रुख, पर्खाल तथा विद्युत्का पोल खस्दा र करेन्ट लाग्दा उनीहरूको मृत्यु भएको जनाइएको छ । चक्रवातको जोखिमलाई मध्यनजर गर्दै प्रभावित क्षेत्रका धेरै स्थानमा विद्युत् आपूर्ति बन्द गरिएको छ । विद्यालय तथा कलेजलगायत शैक्षिक संस्थाहरू पनि आगामी केही दिनका लागि बन्द गरिएका छन् । आन्ध्र प्रदेशका दुई विमानस्थलबाट सञ्चालन हुने ३५ भन्दा बढी उडान रद्द तथा अन्यत्र डाइभर्ट गरिएको छ । प्रतिघण्टा १३० किलोमिटरसम्मको गतिमा आएको शक्तिशाली चक्रवात बुधबार बिहान भारतको दक्षिणपूर्वी तथा पूर्वी तटीय क्षेत्रमा प्रवेश गरेको थियो । विशेषगरी आन्ध्र प्रदेशका विभिन्न क्षेत्रमा प्रभाव पारेको चक्रवात त्यसपछि ओडिशा, झारखण्ड, छत्तीसगढ र पश्चिम बङ्गालतर्फ अघि बढेको जनाइएको छ । मुख्यमन्त्री नायडूका अनुसार चक्रवातका कारण करिब ७१ हजार हेक्टर कृषि क्षेत्रमा लगाइएको नरिवल र केरा लगायतका बालीमा आंशिक तथा पूर्ण क्षति पुगेको छ । चक्रवातबाट प्रभावित करिब ५७ हजार मानिसलाई सुरक्षित स्थानमा सारेर राहत शिविरमा राखिएको छ । त्यस्तै, झन्डै १८० घरमा क्षति पुगेको सरकारी अधिकारीहरूले बताएका छन् ।
चीनमा ११० रोबोटले एकैसाथ नृत्य गरेर बनाए विश्व कीर्तिमान
काठमाडौं । चीनमा ११० वटा मानवाकार रोबोटले एकैसाथ नृत्य प्रश्तुत गर्दै विश्व कीर्तिमान कायम गरेका छन् । चीनको पूर्वी शान्दोङ प्रान्तस्थित जिनान सहरमा अक्टोबर २४ मा ती रोबोटले पाँच मिनेटभन्दा लामो समयसम्म सामूहिक नृत्य प्रदर्शन गरेका हुन् । उक्त नृत्य प्रदर्शनमा कुनै पनि रोबोटलाई वास्तविक समयमा मानिसले नियन्त्रण गरेका थिएनन् । पूर्वनिर्धारित प्रविधि तथा स्वचालित प्रणालीको प्रयोगबाट रोबोटहरूले एकैसाथ नृत्य प्रस्तुत गरेका थिए ।एकैपटक सबैभन्दा धेरै मानवाकार रोबोटले नृत्य गरेको उक्त प्रदर्शनलाई गिनिज वल्र्ड रेकर्डले विश्व कीर्तिमानका रूपमा मान्यता दिएको छ ।
नेपाल टेलिकमले माग्यो ८० जना कर्मचारी, उपप्रबन्धकदेखि जुनियर टेक्निसियनसम्म
काठमाडौं । नेपाल दूरसञ्चार कम्पनी लिमिटेड (नेपाल टेलिकम) ले विभिन्न पदमा ८० जनाका लागि दरखास्त आह्वान गरेको छ । कम्पनीले खुला तथा समावेशी प्रतियोगितात्मक परीक्षामार्फत रिक्त पदमा कर्मचारी भर्ना गर्न लागेको हो । कम्पनीका अनुसार नवौँ तहमा उप-प्रबन्धक (चार्टर्ड एकाउन्टेन्ट) पदमा एक जनाका लागि आवेदन खुलाइएको छ । त्यस्तै, आठौँ तहमा वरिष्ठ इन्जिनियर एक जना, वरिष्ठ व्यापार अधिकृत एक जना र वरिष्ठ लेखा अधिकृत एक जना गरी ३ जना कर्मचारी मागेको छ । यसैगरी, सातौँ तहमा टेलिकम इन्जिनियर (इलेक्ट्रोनिक्स एण्ड कम्युनिकेशन)का लागि ३ जना, कम्प्युटरमा १० जना र इलेक्ट्रिकलमा ३ जनाका लागि आवेदन माग गरिएको छ । छैटौँ तहमा सहायक प्रशासनिक अधिकृत ९ जना, सहायक व्यापार अधिकृत ८ जना र सहायक लेखा अधिकृत २ जनाका लागि पनि दरखास्त आह्वान गरिएको छ । कम्पनीले पाँचौँ तहमा ओभरसियर ३ जना, चौथो तहमा टेलिकम टेक्निसियन ९ जना र सहायक १७ जना र तेस्रो तहमा कनिष्ठ प्राविधिक १२ जनाका लागि दरखास्त आह्वान गरिएको हो । इच्छुक तथा योग्यता पुगेका उम्मेदवारले कम्पनीको आधिकारिक वेबसाइट वा अनलाइन आवेदन प्रणालीमार्फत दरखास्त दिन सक्नेछन् । कम्पनीका अनुसार नियमित दस्तुरमा मंसिर ३ गतेसम्म आवेदन दिन सकिनेछ । उक्त अवधिमा आवेदन दिन नसक्ने उम्मेदवारले दोब्बर दस्तुर तिरेर मंसिर १० गतेसम्म दरखास्त बुझाउन सक्ने व्यवस्था गरिएको छ ।
कुमारी बैंकको बोर्डमा गोल्डस्टारका प्रवर्द्धकदेखि पूर्वबैंकरसम्म
काठमाडौं । कुमारी बैंकको सञ्चालक समितिमा गोल्डस्टार जुत्ता उत्पादन गर्ने युनिभर्सल समूहका अध्यक्षदेखि सिमेन्ट उद्योगका व्यवसायी, पूर्वबैंकर, चार्टर्ड एकाउन्टेन्ट र नयाँ पुस्ताका व्यावसायिक प्रतिनिधिसम्मको उपस्थिति छ । बैंकको बोर्डमा उद्योग, व्यापार, वित्तीय व्यवस्थापन, घरजग्गा, बीमा र संस्थागत सुशासनको अनुभव भएका व्यक्तिहरू रहेका छन् । बैंकको सञ्चालक समितिमा अमिरप्रताप जेबी राणा, पशुपति मुरारका, महेशप्रसाद पोखरेल, विजयकुमार श्रेष्ठ, राजाराम खड्का, विजय स्थापित र सिमरन अग्रवाल रहेका छन् । उनीहरूको व्यावसायिक पृष्ठभूमि फरक–फरक भए पनि बैंकको रणनीतिक दिशा, जोखिम व्यवस्थापन, सुशासन र संस्थागत विकास सञ्चालक समितिका साझा जिम्मेवारी हुन् । कुमारी बैंकले २०५७ चैत २१ गतेदेखि ‘क’ वर्गको वाणिज्य बैंकका रूपमा वित्तीय कारोबार सुरु गरेको थियो । बैंकले देवः विकास बैंक, काष्ठमण्डप डेभलपमेन्ट बैंक, महाकाली विकास बैंक, काक्रेबिहार विकास बैंक, पश्चिमाञ्चल फाइनान्स र नेपाल क्रेडिट एन्ड कमर्स बैंकलाई प्राप्ति गरेको छ । बैंकको चुक्ता पुँजी २६ अर्ब २२ करोड ५८ लाख ६१ हजार रुपैयाँ रहेको छ । यसमा संस्थापक सेयरधनीको स्वामित्व ५१ प्रतिशत र सर्वसाधारण सेयरधनीको स्वामित्व ४९ प्रतिशत छ । अमिरप्रताप जेबी राणा कुमारी बैंकका अध्यक्ष अमिरप्रताप जेबी राणा युनिभर्सल समूहका अध्यक्ष तथा अनुभवी व्यवसायी हुन् । उनको नेतृत्वमा समूहअन्तर्गत विभिन्न व्यवसाय सञ्चालन भइरहेका छन्, जसमा ३ हजार ५०० भन्दा बढी व्यक्तिले रोजगारी पाएको विवरण छ । युनिभर्सल समूह जुत्ता उत्पादन तथा बिक्रीका लागि परिचित छ । समूहअन्तर्गत गोल्डस्टार ब्रान्डका खेलकुद जुत्ता र दुई दशकभन्दा लामो समयदेखि बजारमा रहेको हाथी ब्रान्डका हवाई चप्पल उत्पादन तथा बिक्री हुँदै आएका छन् । राणा थोपाल खोला हाइड्रोपावर नेपाल प्रालिका अध्यक्षसमेत हुन् । सिंगापुरस्थित जेएसएस इन्टरनेसनल स्कुलबाट उच्च शिक्षा हासिल गरेका राणा उद्यमशीलता प्रवद्र्धनमा पनि सक्रिय छन् । उनी सन् २०१७÷१८ मा इन्टरप्रेन्योर्स अर्गनाइजेसनको नेपाल शाखाका संस्थापक सदस्य तथा अध्यक्ष थिए । साथै, उनी वल्र्ड इन्भाइरोन्मेन्ट सोसाइटी, योङ प्रेसिडेन्ट्स अर्गनाइजेसन, फुटवेयर एसोसिएसन अफ नेपाल र नेपाल उद्योग परिसंघसँग आबद्ध छन् । सामाजिक क्षेत्रमा पनि उनको संलग्नता रहेको छ । पशुपति मुरारका मुरारका समूहका प्रबन्ध निर्देशक पशुपति मुरारका नेपालको उत्पादनमूलक तथा व्यापारिक क्षेत्रमा स्थापित व्यवसायी हुन् । उनले त्रिभुवन विश्वविद्यालयबाट वाणिज्य विषयमा स्नातक गरेका छन् । सानै उमेरदेखि पारिवारिक व्यवसायमा संलग्न हुँदै आएका मुरारकाले समूहको व्यवसाय विस्तार र व्यवस्थापनमा नेतृत्वदायी भूमिका निर्वाह गरेका छन् । निजी क्षेत्रको छाता संगठन नेपाल उद्योग वाणिज्य महासंघका पूर्वअध्यक्ष समेत रहेका उनको नेतृत्वमा अर्घाखाँची सिमेन्ट प्रालि र पशुपति आइरन एन्ड स्टिल प्रालिलगायत उत्पादनमूलक कम्पनी सञ्चालनमा छन् । त्यस्तै, पीके ट्रेडर्स र प्यारामाउन्ट मोटर्स प्रालिलगायत व्यापारिक कम्पनीसँग पनि उनको आबद्धता छ । मुरारका कुमारी बैंकसँगै एनएमबी बैंक, हिमालयन रिइन्स्योरेन्स र नेपाल लाइफ इन्स्योरेन्सलगायत वित्तीय संस्थाका प्रवद्र्धकसमेत हुन् । सामाजिक सेवामा समेत सक्रिय मुरारकाको पहलमा लहानमा रामकुमार उमा प्रसाद मुरारका मेमोरियल अस्पताल र जेएस मुरारका बहुमुखी कलेज स्थापना भएका छन् । उनी राउन्ड टेबल नेपाल तथा योङ प्रेसिडेन्ट्स अर्गनाइजेसन नेपालका पूर्वअध्यक्षसमेत हुन् । साथै, काठमाडौंस्थित लायन्स क्लब क्यापिटलका चार्टर सदस्य पनि हुन् । महेशप्रसाद पोखरेल बैंकका सञ्चालक महेशप्रसाद पोखरेलसँग बैंकिङ तथा वित्तीय व्यवस्थापनको अनुभव छ । उनले वाणिज्य विषयमा स्नातक (बीकम) गरेका छन् । सेयर कारोबार तथा वित्तीय व्यवस्थापनमा विशेष अनुभव हासिल गरेका पोखरेलले यसअघि सिद्धार्थ बैंकको सञ्चालकका रूपमा ११ वर्षभन्दा बढी समय काम गरेका थिए । सिद्धार्थ बैंकमा रहँदा उनले रणनीतिक योजना, संस्थागत सुशासन र बैंकको विकाससम्बन्धी काममा योगदान गरेका थिए । हाल कुमारीको सञ्चालकका रूपमा उनले वित्तीय क्षेत्रमा हासिल गरेको अनुभव उपयोग गर्दै संस्थागत विकास, नवीनता र प्रभावकारी वित्तीय अभ्यासमा योगदान गर्दै आएका छन् । विजयकुमार श्रेष्ठ विजयकुमार श्रेष्ठ वित्तीय क्षेत्रमा दुई दशकभन्दा बढी अनुभव भएका व्यवसायी हुन् । उनले व्यवसाय प्रशासनमा स्नातकोत्तर (एमबीए) गरेका छन् । उनले आफ्नो व्यावसायिक यात्रा कर्मचारी सञ्चय कोषबाट सुरु गरेका थिए र सन् १९९८ देखि २०२२ सम्म त्यहाँ प्रमुख प्रबन्धकका रूपमा काम गरेका थिए । सन् २०२२ अप्रिलदेखि श्रेष्ठ सञ्चयकोष घरजग्गा व्यवस्थापन कम्पनी प्रालिका प्रमुख कार्यकारी अधिकृतका रूपमा कार्यरत छन् । उनी कुमारी बैंक र सञ्चयकोष घरजग्गा व्यवस्थापन कम्पनीका सञ्चालकसमेत हुन् । श्रेष्ठले यसअघि देवः विकास बैंक, हिमालयन बैंक, राष्ट्रिय बीमा कम्पनी, प्रभु इन्स्योरेन्स र बैंक अफ काठमाडौंमा पनि सञ्चालकका रूपमा काम गरेका छन् । राजाराम खड्का राजाराम खड्का व्यवसाय तथा वित्तीय क्षेत्रमा दुई दशकभन्दा बढी अनुभव भएका व्यवसायी हुन् । उनले सन् १९९६ मा त्रिभुवन विश्वविद्यालयअन्तर्गत शंकरदेव क्याम्पसबाट वित्त विषयमा व्यवसाय प्रशासनमा स्नातकोत्तर (एमबीए) गरेका थिए । उनले प्रथम श्रेणीमा ६६.३० प्रतिशत अंक प्राप्त गरेका थिए । यसअघि उनले मकवानपुर बहुमुखी क्याम्पसबाट लेखा तथा बजारीकरण विषयमा वाणिज्यमा स्नातक गरेका थिए । खड्का हाल गौरीशंकर सिमेन्ट प्रालिका कार्यकारी निर्देशक छन् । यसअघि उनले करिब साढे सात वर्ष महाशक्ति सिमेन्ट लिमिटेडको प्रबन्ध निर्देशकका रूपमा काम गरेका थिए । उनको व्यावसायिक अनुभव बैंकिङ क्षेत्रमा पनि फैलिएको छ । उनले इन्टरनेसनल डेभलपमेन्ट बैंक लिमिटेडको प्रमुख कार्यकारी अधिकृत र सनराइज बैंक लिमिटेडको वरिष्ठ प्रबन्धकका रूपमा जिम्मेवारी सम्हालेका थिए । साथै, एनआईसी एशिया बैंक, एभरेस्ट बैंक र नबिल बैंकमा विभिन्न जिम्मेवारीमा रहेर काम गरेका छन् । विजय स्थापित विजय स्थापित चार्टर्ड एकाउन्टेन्ट तथा सम्पत्ति शुद्धीकरण निवारणसम्बन्धी विशेषज्ञ हुन् । लेखा, लेखापरीक्षण, वित्तीय परामर्श र वित्तीय अपराध नियन्त्रणसम्बन्धी क्षेत्रमा उनले व्यावसायिक अनुभव हासिल गरेका छन् । स्थापितले नेपाल चार्टर्ड एकाउन्टेन्ट्स संस्थाबाट सन् २०१७ मा चार्टर्ड एकाउन्टेन्सी (सीएपी–थ्री) पूरा गरेका थिए । उनले शंकरदेव क्याम्पसबाट सन् २०१८ मा व्यवस्थापनमा स्नातकोत्तर गरेका छन् । साथै, सन् २०१९ जुनमा प्रमाणित सम्पत्ति शुद्धीकरण विशेषज्ञ (सीएएमएस) कोर्स पूरा गरेका थिए । उनी स्थापित रायमाझी एसोसिएट्स, चार्टर्ड एकाउन्टेन्ट्सका प्रबन्ध साझेदारका रूपमा कार्यरत छन् । उनले विभिन्न संस्थालाई वित्तीय परामर्श तथा लेखापरीक्षण सेवा प्रदान गर्दै आएका छन् । यसअघि उनले जनवरी २०१८ देखि अगस्ट २०२३ सम्म नेपाल एसबीआई बैंकमा काम गरेका थिए । त्यसअघि लुम्बिनी बैंक, पीएम एन्ड एसोसिएट्स तथा केबी चित्रकार एन्ड कम्पनीमा पनि विभिन्न जिम्मेवारी सम्हालेका थिए । स्थापितसँग सार्वजनिक संस्थान, गैरसरकारी संस्था तथा अन्तर्राष्ट्रिय विकास परियोजनाको लेखापरीक्षणमा समेत अनुभव छ । उनले नेपाल राष्ट्र बैंक र ज्योति विकास बैंकलगायत संस्थाको वैधानिक लेखापरीक्षणको नेतृत्व गरेका छन् । सिमरन अग्रवाल कुमारी बैंककी सञ्चालक सिमरन अग्रवालसँग व्यवस्थापन, सञ्चालन तथा व्यवसाय विकाससम्बन्धी अनुभव छ । उनले भारतको मुम्बईस्थित एसपी जैन इन्स्टिच्युट अफ म्यानेजमेन्ट एन्ड रिसर्चबाट सन् २०२१ मेमा पारिवारिक व्यवसाय व्यवस्थापनसम्बन्धी स्नातकोत्तर कार्यक्रम पूरा गरेकी छन् । यसअघि उनले मुम्बईकै नरसी मोंजी कलेजबाट सन् २०१९ मेमा व्यवस्थापनमा स्नातक गरेकी थिइन् । काठमाडौंस्थित रातो बंगलाबाट सन् २०१५ मा सीआईई ए लेभलको अध्ययन पूरा गरेकी अग्रवालको शैक्षिक पृष्ठभूमि स्वदेश र विदेश दुवैसँग जोडिएको छ । अग्रवालले स्प्राइटलाइट फुड्स प्रालिमा सञ्चालन तथा बजारीकरण व्यवस्थापक र जेन टाइगर कोम्बुचामा सञ्चालन व्यवस्थापकका रूपमा काम गरेकी छन् । साथै, अल्फाबेट इन्भेस्टमेन्टमा सामाजिक सञ्जाल तथा व्यवसाय विकाससम्बन्धी जिम्मेवारी पनि सम्हालेकी छन् ।
वीरगञ्जस्थित माइस्थान शाखा सिटी अफिसमा गाभ्दै नेपाल बैंक
काठमाडौं । नेपाल बैंक लिमिटेडले वीरगञ्ज महानगरपालिकामा रहेका आफ्ना दुई शाखालाई समायोजन गर्ने भएको छ । बैंकले वीरगञ्जस्थित माइस्थान शाखालाई वीरगञ्ज सिटी अफिस शाखामा गाभेर एकीकृत रूपमा सञ्चालन गर्न लागेको हो । बैंकले पछिल्लो समय डिजिटल बैंकिङ सेवा प्रयोग गर्ने ग्राहकको सङ्ख्या बढ्दै गएको र वीरगञ्ज महानगरपालिकाभित्र वित्तीय संस्थाका शाखा उल्लेख्य मात्रामा रहेकाले शाखा समायोजन गर्न लागेको जनाएको छ । बैंकका अनुसार माइस्थान शाखा समायोजन भएपछि वीरगञ्ज सिटी अफिस शाखा कायम रहनेछ । उक्त शाखा वीरगञ्ज महानगरपालिका-४ मा रहेको छ । दुवै शाखाबीचको दूरी करिब एक किलोमिटर रहेको बैंकले जनाएको छ । शाखा समायोजनपछि कात्तिक १६ गते सोमबारदेखि एकीकृत कारोबार सुरु हुनेछ । त्यसपछि माइस्थान शाखाका सम्पूर्ण ग्राहकको खाता तथा व्यक्तिगत विवरण कायम रहने वीरगञ्ज सिटी अफिस शाखामा स्थानान्तरण हुनेछन् । ग्राहकले बैंकिङ सेवा लिनका लागि पुरानै शाखामा जानुपर्ने बाध्यता भने रहने छैन । बैंकले आफ्ना सम्पूर्ण शाखाबाट उपलब्ध गराउँदै आएको बैंकिङ सेवा तथा सुविधा समायोजनपछि पनि निरन्तर प्राप्त गर्न सकिने जनाएको छ ।
सेबोनबाट इम्पेरियल इनोभेसनले पायो लाइसेन्स
काठमाडौं । नेपाल धितोपत्र बोर्ड (सेबोन)ले इम्पेरियल इनोभेसन फण्ड लिमिटेडलाई विशिष्टीकृत लगानी कोषको व्यवस्थापकका रूपमा काम गर्न अनुमतिपत्र प्रदान गरेको छ । विशिष्टीकृत लगानी कोष नियमावली, २०७५ अन्तर्गत बोर्डले कम्पनीलाई कोष व्यवस्थापक (फण्ड म्यानेजर)को लाइसेन्स दिएको हो । अनुमतिपत्र प्राप्त गरेसँगै इम्पेरियल इनोभेसनले नेपालको उत्पादनशील अर्थतन्त्र, नवप्रवर्तन र उद्यमशीलताको विकासमा योगदान पुर्याउने लक्ष्यसहित लगानी कोष स्थापना तथा सञ्चालनका लागि आवश्यक नियामकीय प्रक्रिया अघि बढाउने तयारी गरेको छ । कम्पनीले नवीकरणीय ऊर्जा, सूचना प्रविधि, पर्यटन र कृषिलगायत उच्च वृद्धिको सम्भावना भएका क्षेत्रमा दीर्घकालीन पुँजी परिचालन गर्ने लक्ष्य राखेको छ । कम्पनीको नेतृत्वमा अध्यक्ष अम्बिका प्रसाद पौडेल र प्रबन्ध सञ्चालक बोधराज देवकोटा छन् । सञ्चालक समितिमा नेपाल राष्ट्र बैंकका पूर्वकार्यकारी निर्देशक नारायण प्रसाद पौडेल, फेडेरेसन अफ नेपलिज इन्डस्ट्रिज एन्ड इन्टरप्रेनर्सका अध्यक्ष तथा व्यवसायी भागीरथ सापकोटा छन् । त्यस्तै, बैंकिङ, बीमा तथा लगानी व्यवस्थापन क्षेत्रमा अनुभव हासिल गरेका शिव सिंह कार्की र सबिना राना स्वतन्त्र सञ्चालकका रूपमा रहेका छन् । कोष व्यवस्थापकको अनुमतिपत्र प्राप्त गरेसँगै कम्पनीले सम्भावनायुक्त क्षेत्रमा लगानी परिचालन गर्ने दिशामा प्रक्रिया अघि बढाउने बाटो खुलेको छ । नवीकरणीय ऊर्जा, सूचना प्रविधि, पर्यटन र कृषिजस्ता क्षेत्रमा दीर्घकालीन पुँजी परिचालन गर्ने कम्पनीको लक्ष्यले उत्पादनशील क्षेत्रको विकास र उद्यमशीलता प्रवद्र्धनमा योगदान पुर्याउने जनाएको छ ।
