प्रहरी भन्छ- आईजीपीको राजीनामाबारेको समाचार भ्रामक हो
काठमाडौं । नेपाल प्रहरीको संगठनलाई कमजोर बनाउने वा विवादमा तानेर सरकारविरुद्ध खेल्ने सोच बनाएका सीमित व्यक्तिहरूको चालबाजीविरुद्ध कानुनी कारबाहीको प्रक्रिया अघि बढाउने प्रहरीले स्पष्ट पारेको छ । प्रहरी प्रवक्ता अविनारायण काफ्लेले एक विज्ञप्ति जारी गर्दै सार्वजनिक सुरक्षा, शान्ति अमनचयन कायम गर्न, अपराध नियन्त्रण गर्न तथा नागरिकको जीउधनको सुरक्षा सुनिश्चित गर्न प्रहरी संगठन सधैं प्रतिबद्ध र जिम्मेवार रहेको बताएका छन् । केही सञ्चारमाध्यममा ‘आईजीपी दानबहादुर कार्कीमाथि राजीनामाको दबाब बढेको’ भन्ने आशयका समाचार तथा टिप्पणीहरू आएकोप्रति नेपाल प्रहरीले गम्भीर ध्यानाकर्षण भएको जनाएको छ । विज्ञप्तिमा भनिएको छ, ‘संगठनको प्रतिष्ठा, व्यावसायिकता तथा कार्यसम्पादनमाथि भ्रम सिर्जना गर्ने उद्देश्यले नियोजित रूपमा भ्रामक सूचना सम्प्रेषण गर्ने सीमित व्यक्तिहरूको चालबाजीलाई नेपाल प्रहरीले प्रचलित कानुनबमोजिम आवश्यक अनुसन्धान तथा कानुनी कारबाहीको प्रक्रिया अगाडि बढाउनेछ ।’ पुष्टि नभएका विषयलाई अनुमानका आधारमा समाचार तथा टिप्पणीका रूपमा प्रस्तुत गर्दा आम नागरिकमा भ्रम, नकारात्मकता र सुरक्षा जोखिम सिर्जना हुने प्रहरीले जनाएको छ । नागरिकको सेवामा समर्पित संस्थाप्रतिको विश्वास र सांगठनिक निष्ठामा असर पर्न सक्ने भन्दै यस्ता अपुष्ट, तथ्यहीन एवम् स्वार्थकेन्द्रित सूचनाको पछि नलाग्न सञ्चारमाध्यम, सामाजिक सञ्जाल प्रयोगकर्ता तथा सरोकारवालाहरूलाई हार्दिक अनुरोध गरिएको छ । सरकारको नीति निर्देशनअनुसार नागरिकप्रतिको विधिसम्मत जिम्मेवारी निर्वाह गर्न नेपाल प्रहरी सदैव समर्पित रहेको उल्लेख गर्दै कुनै पनि प्रकारका भ्रामक प्रचार वा अनावश्यक दबाबबाट विचलित नहुन भनिएको छ । प्रहरीका सकल दर्जाका कर्मचारीहरूलाई उच्च मनोबलका साथ एकताबद्ध भएर काम गर्न निर्देशन दिँदै प्रहरीले आम नागरिकलाई आधिकारिक एवम् तथ्यमा आधारित समाचारमा मात्र विश्वास गर्न र जिम्मेवार सूचना सम्प्रेषणमा सहयोग पुर्याउन अपिल गरेको छ ।
सोमपालको विस्फोटक अर्धशतकमा कर्णाली याक्सद्वारा विराटनगर किंग्स पराजित
काठमाडौं । कप्तान सोमपाल कामीको उत्कृष्ट अर्धशतकीय इनिङ्सको मद्दतमा कर्णाली याक्सले नेपाल प्रिमियर लिग (एनपीएल) को तेस्रो सिजनमा विराटनगर किंग्सलाई ४ विकेटले पराजित गरेको छ । कर्णालीको जितमा कप्तान सोमपालको प्रदर्शन निर्णायक बन्यो । विशाल लक्ष्य पछ्याउने क्रममा कर्णालीका कप्तान सोमपाल कामीले ३२ बलमा ४ चौका र ३ छक्का प्रहार गर्दै ६२ रनको विस्फोटक अर्धशतकीय पारी खेले। एनपीएलको पहिलो सिजनदेखि कर्णालीको कप्तानी सम्हाल्दै आएका सोमपालको यो पहिलो अर्धशतक हो । त्यस्तै, पवन सर्राफले १ चौका र ३ छक्काको मद्दतमा ३६ रन बनाए । सोमपाल र पवनबीच ६६ रनको महत्वपूर्ण अर्धशतकीय साझेदारी भयो, जुन टोलीको जितको मुख्य आधार बन्यो। यो साझेदारी पछि धरमराएको पारीलाई मध्यक्रमका ब्याटरहरूले सम्हालेका थिए । टोलीका लागि ओपनर अरिफुल इस्लामले ३२ रन बनाए भने गुल्सन झाले अविजित २८ र दीपक डुम्रेले २० रनको योगदान दिए । विराटनगर किंग्सतर्फबाट एञ्जेलो म्याथयुजले ४ ओभरमा २५ रन खर्चिंदै सर्वाधिक ३ विकेट लिए । त्यस्तै, चरिथ अशलंका, प्रतिस जिसी र कप्तान सन्दीप लामिछानेले समान १-१ विकेट हात पारे । यस जितसँगै कर्णाली याक्सले प्रतियोगितामा लगातार दोस्रो जित निकालेको छ । यसअघि कर्णालीले जनकपुर बोल्ट्सलाई १९ रनले पराजित गर्दै विजयी सुरुआत गरेको थियो। यता, विराटनगरले भने लगातार दोस्रो हार व्यहोरेको छ । यसअघि पहिलो खेलमा विराटनगर चितवन राइनोजविरुद्ध ८ रनले पराजित भएको थियो ।
तीन दशकदेखि अलपत्र दमक-चिसापानी सडकको नयाँ ठेक्का प्रक्रिया अघि बढ्यो
काठमाडौं । झापाको दमकदेखि इलामको माङ्सेबुङ जोड्ने दमक-चिसापानी सडकअन्तर्गत माङ्सेबुङ–लारुम्बा-चिसापानी खण्ड कालोपत्रे गर्ने प्रक्रिया अघि बढेको छ । पूर्वाधार विकास मन्त्रालयले लामो समयदेखि अलपत्र रहेको यस सडक खण्डको नयाँ ठेक्का स्वीकृत गर्ने आशयको सूचना प्रकाशित गरेको हो । पूर्वाधार विकासमन्त्री सुनिल लम्सालले यसलाई आफ्नो प्रतिबद्धता कार्यान्वयनतर्फको महत्त्वपूर्ण कदमका रूपमा उल्लेख गर्दै लामो समयदेखि अलपत्र सडकको निर्माण प्रक्रिया अघि बढाइएको जानकारी दिएका छन् । पुर्वाधार विकास मन्त्रालय अन्तर्गतको सडक डिभिजन दमकले प्रकाशित गरेको सूचनाअनुसार नयाँ ठेक्काका लागि प्राप्त बोलपत्रको मूल्याङ्कन सम्पन्न गरी ठेक्का स्वीकृत गर्ने आशयको सूचना जारी गरिएको छ । उक्त ठेक्काका लागि महालक्ष्मी-जय धनञ्जय जेभी, काठमाडौंको १ अर्ब २२ करोड ७९ लाख ४४ हजार ८७२ रुपैयाँ ६१ पैसा कबोल रकमको बोलपत्र प्रारम्भिक रुपमा छनोट भएको छ । यो सडक खण्डको करिब २५‍‍‍‍.५ किलोमिटर सडक तीन वर्षभित्र कालोपत्रे गर्ने लक्ष्यसहित २०७६ फागुनमा ठेक्का सम्झौता गरिएको थियो । तर, मन्त्रालयले पटक–पटक ताकेता, पत्राचार तथा सूचना जारी गर्दा पनि निर्माण व्यवसायीले काम अघि नबढाएपछि सम्झौताअनुसार ठेक्का अन्त्य गरिएको थियो । ठेक्का अन्त्यसँगै कार्यसम्पादन जमानत जफत गर्ने, बाँकी काम सम्पन्न गर्न लाग्ने रकम सरकारी बाँकीसरह असुलउपर गर्ने र सम्बन्धित निर्माण व्यवसायीलाई कालोसूचीमा राख्ने निर्णयसमेत गरिएको थियो । ठेक्का अन्त्य गर्ने निर्णयविरुद्ध निर्माण व्यवसायीले अदालतमा मुद्दा दायर गरेपछि कानुनी निरूपणका कारण नयाँ ठेक्का प्रक्रिया अघि बढाउन ढिलाइ भएको थियो । कानुनी प्रक्रिया तथा विभिन्न विवादको समाधान, स्रोत सहमति, लागत अनुमान र डिजाइन अद्यावधिक गर्ने कार्य सम्पन्न गरी पुनः ठेक्का आह्वान गरिएको मन्त्री लम्सालले बताएका छन् । नयाँ ठेक्का स्वीकृत गर्ने आशयको सूचना प्रकाशित भएसँगै लामो समयदेखि निर्माणको प्रतीक्षामा रहेको यस सडक खण्डको स्तरोन्नति प्रक्रिया अघि बढेको छ । स्थानीयवासीका लागि वर्षौँदेखि सास्तीको विषय बनेको यो सडक राजनीतिक दलका चुनावी एजेन्डामा समेत पटक–पटक समेटिँदै आएको थियो । सरकारले प्रतिबद्धताअनुसार सडक निर्माण प्रक्रियालाई अघि बढाएको उल्लेख गर्दै मन्त्री लम्सालले लामो समयदेखि अलपत्र आयोजनालाई कार्यान्वयनमा लैजान आवश्यक प्रक्रिया पूरा गरिएको बताएका छन् । अब ठेक्का स्वीकृति तथा निर्माणसम्बन्धी बाँकी प्रक्रिया पूरा भएपछि सडक स्तरोन्नतिको काम अघि बढ्ने अपेक्षा गरिएको छ । यो सडक कालोपत्रे गर्ने एजेन्डा प्रधानमन्त्री वालेन्द्र शाहको झापा-५को चुनावी प्रतिबद्धता पत्रमा समेत समावेश थियो ।
विराटनगरले कर्णालीलाई दियो १८७ को लक्ष्य
काठमाडौं । नेपाल प्रिमियर लिगको तेस्रो संस्करणअन्तर्गत विराटनगर किंग्सले कर्णाली याक्ससामु १८७ रनको विशाल लक्ष्य प्रस्तुत गरेको छ । विराटनगरले २० ओभरमा ७ विकेटको क्षतिमा १८६ रन जोड्न सफल भएको हो । ओपनर लोकेश बमले ८७ रनको योगदान दिए । ५२ बल खेलेका उनले ९ छक्का र ३ चौका प्रहार गरेका हुन् । यस्तै, एन्जेलो डेभिस म्याथ्युज ३१ तथा आन्द्रे रसेलले २७ रन जोडे । सोमपालले चार विकेट लिए भने नन्दन यादव र मार्क वाटले एक–एक विकेट लिए ।
२ अर्ब बढीको क्रिप्टोकरेन्सीसहित एक युवक पक्राउ
काठमाडौं । २ अर्ब १६ करोड एक लाख २० हजार ८२१ नेपाली रुपैयाँबराबरको क्रिप्टोकरेन्सीसहित एक युवक पक्राउ परेका छन् । प्रहरीले धनुषाको सबैला नगरपालिका– १२ का सुनीलकुमार यादवलाई पक्राउ गरेको हो । बाइनान्स आइडीमार्फत दुई करोड ६९ लाख ९१ हजार ३८८ युएसडिटी (२ अर्ब १६ करोड एक लाख २० हजार ८२१ नेपाली रुपैयाँ) बराबरको कारोबार गरेको आरोपमा उनी पक्राउ परेका हुन् । काठमाडौं उपत्यका अपराध अनुसन्धान कार्यालय र जिल्ला प्रहरी कार्यालय, धनुषाको संयुक्त टोलीले यादवलाई पक्राउ गरेको हो । काठमाडौं जिल्ला अदालतबाट म्याद थप गरी अनुसन्धान अघि बढाएको प्रहरीले जनाएको छ ।
बिचौलिया इनमको भीआईपी कनेक्सन खोतल्न एसपीको नेतृत्वमा छुट्टै अनुसन्धान समिति
काठमाडौं । बिचौलियाका रूपमा चिनिएका इनम सापकोटासँग उच्चपदस्थ व्यक्तिहरूको सम्बन्ध खुल्न थालेपछि प्रहरीले अनुसन्धानका लागि छुट्टै समिति गठन गरेको छ । काठमाडौं उपत्यका प्रहरी कार्यालय रानीपोखरीमा कार्यरत प्रहरी उपरीक्षक (एसपी) नरहरि रेग्मीको नेतृत्वमा समिति गठन गरिएको हो । रेग्मी नेतृत्वको टोलीले जिल्ला प्रहरी परिसर काठमाडौंको हिरासतमा रहेका सापकोटामाथि अनुसन्धान सुरु भइसकेको प्रहरी स्रोतको भनाइ छ । पूर्वप्रधानन्यायाधीश चोलेन्द्रशमशेर जबरासँग सम्बन्ध देखिएपछि सापकोटा पक्राउ परेका थिए । हाल थुनामा रहेका उनीमाथि अनुसन्धान अघि बढ्दै जाँदा अन्य उच्चपदस्थ व्यक्तिहरूसँग पनि सम्पर्क रहेको विवरण फेला पर्न थालेको प्रहरी स्रोतको भनाइ छ । प्रहरी स्रोतका अनुसार विभिन्न क्षेत्रका प्रभावशाली व्यक्तिहरूसँग सापकोटाको सम्पर्क देखिएपछि प्रहरीले अनुसन्धानको दायरा फराकिलो बनाएको हो । पाँचतारे होटलमा मिटिङ, भीआईपीका मुद्दाबारे छलफल प्रधानन्यायाधीशले भने : इनम सापकोटासँग मेरो कुनै सम्पर्क र सम्बन्ध छैन
संसारलाई भोटेकोशी विपत्तिबारे जानकारी गराउँदै नेपाल
काठमाडौं । नेपालले भोटेकोशी-त्रिशूली विपत्तिबारे थाइल्याण्डको राजधानी बैंककमा उच्चस्तरीय क्षेत्रीय बहस आयोजना गरेको छ । एसिया प्यासिफिक देशका मन्त्रीहरु सहभागी उच्चस्तरीय बहसमा नेपालले आफूले भोगेको जलवायु संकट र शृंखलाबद्ध विपद्बारे जानकारी गराउँदै विश्वव्यापी तापमान वृद्धि र जलवायु परिवर्तनका कारण हिमाली क्षेत्रमा निम्तिएको संकटबारे छलफल गरेको छ । संयुक्त राष्ट्रसंघीय एशिया तथा प्रशान्त क्षेत्रका लागि आर्थिक तथा सामाजिक आयोग (यूएन ईएससीएपी) को पाँचौँ मन्त्रीस्तरीय सम्मेलनको अवसरमा नेपालले बिहीबार ‘सगरमाथादेखि सागरसम्मः एसिया-प्रशान्त क्षेत्रमा शृङ्खलाबद्ध विपद् रोक्न नेपालको भोटेकोशी-त्रिशूली विपत्तिले सिकाएका पाठहरू’ विषयक संवाद आयोजना गरेको हो । यूएन ईएससीएपीसँग मिलेर नेपालले संयुक्तरुपमा बैंककस्थित संयुक्त राष्ट्रसंघीय सम्मेलन केन्द्रमा आयोजित उक्त कार्यक्रममा एशिया-प्रशान्त क्षेत्रका विभिन्न देशका मन्त्री, कूटनीतिज्ञ, वैज्ञानिक तथा विपद् व्यवस्थापन विज्ञहरूको सहभागिता रहेको छ । कार्यक्रममा गत भदौमा नेपालको उच्च हिमाली क्षेत्रमा गएको विशाल हिम-पहिरोका कारण भोटेकोशी र त्रिशूली नदी क्षेत्रमा भीषण शृंखलाबद्ध विपत्ति आएको र यस घटनाले जलविद्युत् आयोजना, सडक पूर्वाधार, सीमावर्ती संयन्त्र तथा स्थानीय समुदायको जीविकोपार्जनमा ठूलो क्षति पु¥याएको जानकारी गराइयो । वैज्ञानिकहरूका अनुसार १.५ डिग्री सेल्सियसको तापमान वृद्धिको सीमा नाघ्दै गएको वर्तमान अवस्थामा हिमाली क्षेत्रमा देखा परेका यस्ता विपद्हरू कुनै एक देशमा मात्र सीमित नरही तल्लो तटीय क्षेत्र र सीमापारसम्म असर पु¥याउने ‘शृंखलाबद्ध जोखिम’का रूपमा विकसित भइरहेको पनि जानकारी गराइएको छ । कार्यक्रमको उद्घाटन सत्रमा नेपालकातर्फबाट ऊर्जा, जलस्रोत तथा सिँचाइ मन्त्री बिराजभक्त श्रेष्ठले भोटेकोशी-त्रिशूली विपत्ति नेपालका लागि मात्र नभई सम्पूर्ण एशिया-प्रशान्त क्षेत्रका लागि नै चेतावनीको घण्टी भएको बताए । उनले हिमाली जोखिमसँग जुध्न अन्तर्राष्ट्रिय सहकार्य, भू-उपग्रह (स्याटलाइट) तथा डिजिटल प्रविधिको प्रयोग र वित्तीय स्रोतको आवश्यकतामा जोड दिए । यस्तै, थाइल्याण्डका लागि नेपाली राजदूत धनबहादुर ओली र यूएन ईएससीएपीका कार्यकारी सचिव अमिदा सल्सीया अलिस्याहबानाले हिमाली भेगदेखि समुद्रसम्मको पारिस्थितिकीय प्रणालीलाई बचाउन क्षेत्रीय तथ्यांक आदानप्रदान र एकीकृत पूर्वसूचना प्रणाली अपरिहार्य रहेको उल्लेख गरे । संवादका क्रममा विपद् उत्थानशीलता सुदृढ गर्न मुख्य तीन विषयमा गहन छलफल भएको छ । जसमा जलवायु, हिममण्डल र भौगर्भिक परिवर्तनले निम्त्याउने जोडिएका जोखिमहरूको सूक्ष्म अध्ययन गर्ने, संकटको समयमा छिमेकी देशहरूबीच आपत्कालीन तथ्यांक, जलवैज्ञानिक मापन र जोखिमसम्बन्धी सूचना तत्काल साटासाट गर्ने र अन्तरिक्ष प्रविधि, स्याटेलाइट नक्सांकन, आर्टिफिसियल इन्टेलिजेन्स र युवाकेन्द्रित प्रविधिको प्रयोगमार्फत पूर्वसूचना प्रणालीलाई चुस्त बनाउने विषयलाई नेपालले जोड दिएको छ । संवादमा नेपालका तर्फबाट राष्ट्रिय योजना आयोगका सदस्य सञ्जय आचार्य, राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी धर्मराज उप्रेती र जल तथा मौसम विज्ञान विभागकी महानिर्देशक अर्चना श्रेष्ठले कार्यपत्र तथा विश्लेषणात्मक प्रस्तुतिहरू दिएका छन् । यसैगरी थाइल्याण्ड, भुटान, फिजी, सामोआ, श्रीलंका र किर्गिजस्तानका मन्त्रीहरूका साथै चीन (एनडिआरसी), भारत (आईएसआरओ), विश्व मौसम विज्ञान संगठन (डब्लुएमओ), इसिमोड, एशियाली विकास बैंक (एडिबी) लगायतका निकायका प्रतिनिधिहरूले हिमाली क्षेत्रको उत्थानशीलताका लागि क्षेत्रीय एक्सन एजेण्डा तयार गर्नुपर्नेमा जोड दिएका छन् । उक्त क्षेत्रीय संवादले नेपालको पुनःनिर्माण र पुनरुत्थानमा सहयोग पु¥याउनुका साथै एशिया-प्रशान्त क्षेत्रका अन्य देशहरूका लागि नीतिगत मार्गदर्शन र साझा रणनीति तय गर्ने अपेक्षा नेपालले लिएको छ । जलवायु विपद् पूर्वतयारीका लागि एसिया प्यासिफिक क्षेत्रीय अन्तरिक्ष सहकार्य गर्ने नेपालको प्रस्तावलाई ५३ देशले समर्थन गर्दै सहयोग गर्ने प्रतिबद्धता जनाएका छन् । नेपालका तर्फबाट ऊर्जामन्त्री श्रेष्ठले जलवायु विपदको सामना गर्न क्षेत्रीय रूपमा अन्तरिक्ष प्रविधि, स्याटलाइट सूचना पहुँच र तथ्यांक आदानप्रदान गर्न प्रस्ताव गरेका थिए ।
च्याटजीपीटीको सल्लाहमा औषधी घटाएकी महिलाको मृत्यु, ओपनएआईविरुद्ध मुद्दा
काठमाडौं । अमेरिकामा च्याटजीपीटीको सल्लाहमा मिर्गी रोगको औषधी घटाएकी एक महिलाको मृत्यु भएपछि ओपनएआईविरुद्ध मुद्दा दायर भएको छ । सियाटलकी ३१ वर्षीया बोवेन वानको औषधीको मात्रा क्रमशः घटाएपछि मिर्गीको समस्या बल्झिएर मृत्यु भएको थियो । त्यसपछि उनका परिवारले ओपनएआई र कम्पनीका संस्थापक साम अल्टम्यानविरुद्ध मुद्दा दायर गरेका हुन् । सान फ्रान्सिस्कोस्थित अदालतमा दायर मुद्दामा च्याटजीपीटीले गलत र जोखिमपूर्ण स्वास्थ्य सल्लाह दिएको आरोप लगाइएको छ । च्याटजीपीटीले गैरकानुनी रूपमा चिकित्सकीय अभ्यास गरेको र त्यसकै कारण वानको मृत्यु भएको परिवारको दाबी छ । अदालती कागजातअनुसार वानले स्वास्थ्य सेवा र अमेरिकाको स्थायी बसोबास अनुमति लिने प्रक्रियामा औषधीबारे बुझ्न च्याटजीपीटी प्रयोग गर्थिन् । उनले अंग्रेजी र म्यान्डारिन भाषामा च्याटजीपीटीसँग परामर्श लिने गरेकी थिइन् । मुद्दामा उल्लेख भएअनुसार च्याटजीपीटीले औषधी घटाउँदा अंग्रेजी, म्यान्डारिन र वु भाषामा राम्रोसँग बोल्ने क्षमता फर्किने विश्वास दिलाएको थियो । च्याटजीपीटीले उनलाई चिकित्सकमाथि अविश्वास गर्न प्रेरित गरेको आरोप पनि छ । औषधी घटाएको कुरा चिकित्सकबाट लुकाउन सिकाएको र आफै मुख्य स्वास्थ्य सल्लाहकार बनेको परिवारको दाबी छ । वानले चिकित्सकले सिफारिस गरेका औषधीबारे पनि च्याटजीपीटीसँग सल्लाह लिन्थिन् । च्याटजीपीटीले उनलाई कुन औषधी नखाने र चिकित्सकको स्वीकृतिबिना कति मात्रा लिने भन्ने निर्देशन दिएको आरोप छ । त्यस्तै, चिकित्सकलाई जानकारी नदिई औषधी सेवन गर्ने तालिका बनाइदिएको र चिकित्सकसँग कसरी कुरा गर्ने भन्ने पनि सिकाएको मुद्दामा उल्लेख छ । कागजातअनुसार च्याटजीपीटीले वानलाई उनका विशेषज्ञ चिकित्सकले यस्तो अवस्था सायद पहिले कहिल्यै नदेखेको र उनको समस्या बुझ्न नसक्ने बताएको थियो । चिकित्सकले औषधी घटाउने योजनालाई जोखिमपूर्ण मान्न सक्ने चिन्ता वानले व्यक्त गरेकी थिइन् । तर, च्याटजीपीटीले चिकित्सकले औषधी छिटो घटाएको बताए पनि त्यसको अर्थ आफ्नो निर्णय गलत भएको नहुने आश्वासन दिएको आरोप छ । चिकित्सकले औंल्याएका जोखिम उनको अवस्थामा लागू नहुने विश्वाससमेत च्याटजीपीटीले दिलाएको परिवारको दाबी छ । मुद्दाअनुसार च्याटजीपीटीले वानलाई दैनिक ४०० मिलिग्राम ल्यामोट्रिजिन औषधीको मात्रा २५ दिनभित्र लगभग शून्यमा झार्न प्रेरित गरेको थियो । सामाजिक सञ्जालमा पनि जिम्मेवारीबारे बहस यस घटनापछि सामाजिक सञ्जाल रेडिटमा एआई कम्पनीहरूको जिम्मेवारीबारे बहस सुरु भएको छ । एक प्रयोगकर्ताले एआईको गलत प्रयोग गरेको भन्दै प्रयोगकर्तालाई मात्र दोष दिन नहुने बताएका छन् । उनका अनुसार एआई प्रणाली बनाउने कम्पनी पनि त्यसबाट हुने क्षतिप्रति जिम्मेवार हुनुपर्छ । उनले एआईले अन्य संस्थाको प्रणालीमा अनधिकृत पहुँच पुर्याउँदा विकासकर्ता र सञ्चालकलाई जिम्मेवार ठहर गरिने उदाहरण दिएका छन् । तर, स्वास्थ्यसम्बन्धी जोखिमपूर्ण सल्लाह दिँदा कम्पनीलाई जिम्मेवारीबाट मुक्त गर्न खोज्नु विरोधाभासपूर्ण भएको उनको तर्क छ । उनले एआई कम्पनी र प्रयोगकर्ताको जिम्मेवारी स्पष्ट पार्ने नियमनको अभाव रहेको पनि औंल्याएका छन् । ओपनएआईले आफ्ना एआई प्रणाली अत्यन्त उन्नत र शक्तिशाली रहेको दाबी गर्दै आएको छ । यस्तो दाबी गर्ने कम्पनीले जोखिमपूर्ण सल्लाह पहिचान गर्न र रोक्न सक्ने सुरक्षा व्यवस्था पनि बनाउनुपर्ने ती प्रयोगकर्ताको भनाइ छ । सामान्य सुरक्षा उपायसमेत प्रभावकारी नभए एआईको क्षमता र सुरक्षाबारे कम्पनीले गर्ने दाबीमाथि प्रश्न उठ्ने उनले बताएका छन् ।
