भूकम्प पीडितको सम्पत्ति लिलामी नगर्न राष्ट्र बैंकको निर्देशन
काठमाडौं । नेपाल राष्ट्र बैंकले भूकम्प पीडितको घरजग्गा लिलामी नगर्ने बैंक तथा वित्तीय संस्थालाई निर्देशन दिएको छ । बैंक तथा वित्तीय संस्थाले कर्जा लिएको २ वर्षमै धमाधम घरजग्गा लिलामी गर्न थालेपछि केन्द्रीय बैंकले सोमबार निर्देशन जारी गरी रोक्न भनेको छ । राष्ट्र बैंकले अर्को ब्यवस्था नभएसम्म भूकम्प पीडितको लिलाम नगर्न निर्देशन दिएको हो । भूकम्प पीडितलाई दिने सहुलियत कर्जाको अवधि न्युनतम ५ र १० वर्षसम्म तोकिएको छ । राष्ट्र बैंकले बैंकहरुलाई शुन्य ब्याजमा पुनर्कर्जा दिने व्यवस्था गरेको छ । सो रकम भूकम्प पीडितले २ प्रतिशत ब्याजमा मा पाउने ब्यवस्था गरिएको छ । यो व्यवस्था अनुसार हालसम्म १ अर्ब ७७ करोड रुपैयाँ कर्जा प्रवाह भएको केन्द्रीय बैंकले जनाएको छ । उपत्यकामा २५ लाख र बाहिर १५ लाख रुपैयाँसम्म ऋण पाउने व्यवस्था गरिएको छ ।पुनरकर्जाको अवधि १ वर्षको हुने र पछिल्लो १ वर्ष थप्ने व्यवस्था भएपछि बैंकले धमाधम लिलामी गर्न थालेका हुन् ।
जनता बैंकको थप दुई शाखा मोरङ र रोल्पामा
काठमाडौं । जनता बैंक नेपाल लिमिटेडले मोरङ र रोल्पा गरि दुई नयाँ शाखाबाट कारोवार शुरु गरेको छ । यी दुई शाखा सहित बैंकको शाखा सञ्जाल १२१ पुगेको छ । साथै, बैंकले ४० शाखा रहित बैंकिङ्ग, २ सिमित बैंकिङ्ग ईकाइ, २ एक्सटेन्सन काउन्टर र ६९ एटिएमबाट सेवा प्रदान गरिरहेको छ । बैंकको हाल ५९ अर्ब ४२ करोड रुपैयाँ निक्षेप र ५४ अर्ब ८ करोड रुपैयाँ कर्जा कारोवार रहेको छ ।
महालक्ष्मी विकास बैंकले शुरु गर्यो निःशुल्क मेहेन्दी कार्यक्रम, विभिन्न ६ शाखाबाट लगाइने
काठमाडौं । महालक्ष्मी विकास बैंक लिमिटेडले महिला ग्राहकका लागि पहिलोपटक मेहेन्दी कार्यक्रम २०७५ आयोजना गरेको छ । बैंकले साउन महिनाको अवसर पारी नेपाली नारीहरुलाई लक्षित गर्दै हिन्दु संस्कृतीको जर्गेना गर्ने प्रयास स्वरुप उक्त कार्यक्रम गरेको हो । आइतबारबाट शुरु भएको उक्त कार्यक्रम बैंकका विभिन्न ६ वटा शाखाहरुमार्फत साताभरि नै सञ्चालन हुने छ । बैंकले सो कार्यक्रम राजधानी भित्रका बसुन्धारा, महाराजगञ्ज, बानेश्वर, कुमारीपाटी, सातदोबाटो, तथा दरबारमार्ग शाखाहरुमा पालैपालो गर्नेछ । यस कार्यक्रममा इच्छुक महिला ग्राहकहरुले आफुलाई पायक पर्ने शाखामा गई निःशुल्क रुपमा आर्कषक मेहेन्दी लगाउन सक्नेछन् । बैंकले साउन १३ गते बसुन्धारा शाखामा मेहेन्दी कार्यक्रम सम्पन्न गरेको छ । साथै, बैंकले क्रमश: महाराजगन्ज, बानेश्वर, कुमारीपाटी, सातदोबाटो, तथा दरबारमार्ग शाखाहरुमा साउन १४ देखि साउन १८ सम्म सो कार्यक्रम सञ्चालनमा ल्याउने छ ।
लक्ष्मी बैंकको नयाँ शाखा ललितपुरको सानेपामा
काठमाडौं । लक्ष्मी बैंकले आफ्नो शाखा संजाल विस्तार गर्ने क्रममा ललितपुरको सानेपामा ९५औँ शाखा विस्तार गरेको छ । यो शाखा मार्फत ग्राहकहरुको वित्तीय आवश्यकता पुरा गर्न आवश्यक सम्पूर्ण रिटेल बैकिंग सेवा प्रदान गर्नुका साथै साना तथा लघु व्यवसायीहरु तथा विशेषगरी कृषि व्यवसायीहरुमाझ वित्तीय पहुँच पुर्याउने लक्ष्य राखेको छ । यस नयाँ शाखाको साथ लक्ष्मी बैंकको ९५ शाखा, ३ हस्पिटल सेवा काउन्टर, १०५ एटिएम, २५०० भन्दा बढि रेमिटेन्स् एजेन्ट तथा ५१ शाखा रहित बैंकिङ्ग एजेन्टहरु पुगेको छ । यी शाखाहरुका साथ बैंकले आफ्नो सेवाअझ सुदृढ अनि व्यापक बनाउने विश्वास राखेको छ ।
सिटिजन्स बैंकको प्रवक्तामा उमंग शर्मा नियुक्त
काठमाडौं । सिटिजन्स बैंक इन्टरनेसनल लिमिटेडले प्रवक्तामा उमंग शर्मालाई नियुक्त गरेको छ । करिव १७ वर्ष अघि नविल बैंक नेपालबाट करियर थालेकी शर्मा बैंकिङ क्षेत्रमा एक अनुभवी बैंकरका रूपमा परिचित छिन् । बैंकको स्थापनाकाल देखिनै कार्यरत शर्माले यस दौरानमा कर्जा विभाग अन्तर्गत उपभोक्ता बैकिंग यूनिट, संस्थागत कर्जा, एस एम ई जस्ता क्षेत्रमा उलेख्य काम गरिसकेकी छिन् । हाल उनी अन्तर्गत सामान्य सेवा विभाग, मानव संसाधन विभाग र कर्पोरेट कम्युनिकेशन विभाग रहेका छन् । बैंकका प्रमुख कार्यकारी अधिकृत राजनसिंह भण्डारीले बैंकिङ क्षेत्रमा अनुभवी शर्माले बैंकलाई नयाँ उचाइँमा लैजाने विश्वास व्यक्त गरेका छन् ।
गरिमा विकास बैंक र मुनाल बचत ऋण सहकारीबीच रेमिटेन्स सम्झौता
काठमाडौं । गरिमा विकास बैंक लिमिटेड र पोखरको मुनाल बचत तथा ऋण सहकारीबीच रेमिटेन्स सम्झौता भएको छ । उक्त सम्झौतामा बैंकको तर्फबाट प्रमुख कार्यकारी अधिकृत गोविन्दप्रसाद ढकाल र सहकारीको तर्फबाट अध्यक्ष दुर्गाप्रसाद हुमागाँईले हस्ताक्षर गरेका छन् । यस सम्झौता पश्चात मुनाल बचत सहकारीका ग्राहकले गरिमा रेमिट मार्फत रकम पठाउन, भुक्तानी गर्न तथा खातामा जम्मा गर्न सक्नेछन् ।
संस्थापक लगानीकर्तालाई नेपाल बैंकको एफपीओ खुला, स्वामित्व घटाउन लागेको सरकारले किन्ला त ?
काठमाडौं । नेपाल बैंकको बिक्री नभएको थप सेयर निष्कासन (एफपीओ) संस्थापकलाई खुला गरिएको छ । भोली मंगलबारदेखि बिहीबारसम्म ३ दिन संस्थापक लगानीकर्तालाई खुला गरिएको हो । सोमबारसम्म बैंकको २ अर्ब ७५ करोड रुपैयाँ एफपीओ बिक्री भएको छ । संस्थापक लगानीकर्तामा सरकार र केही सर्वसाधारणको मात्र स्वामित्व रहेकाले एफपीओ बिक्री हुने संभावना न्युनछ । सरकारले आफनो स्वामित्व ६२.२१ प्रतिशतबाट घटाएर ५१ प्रतिशतमा ल्याउन एफपीओ निष्कासन गरेकाले खरिद गर्ने संभावना नदेखिएको हो । एफपीओ बाँडफाँडपछि बैंकमा सर्वसाधारणको ३७.७९ बाट ४९ प्रतिशत हिस्सा रहने छ । संस्थापकको निष्कासनपछि एफपीओ बाँडफाँड हुने निष्कासन तथा बिक्री प्रवन्धक धु्रब तिमल्सिनाले बताए । बाँडफाँडबाट बाँकी रहेको एफपीओ ८ वटा अण्डरराइटरले खरिद गर्नेछन् । सीबीआईएल क्यापिटल लिमिटेड, ग्लोबल आईएमई क्यापिटल लिमिटेड, आरबीबी मर्चेन्ट बैंकिङ लिमिटेड, एनआईबीएल एस क्यापिटल लिमिटेड, सिभिल क्यापिटल लिमिटेड, सनराइज क्यापिटल लिमिटेड, लक्ष्मी क्यापिटल मार्केट्स लिमिटेड, सानिमा क्यापिटल लिमिटेडले सर्कार्ने छन् । कर्मचारी संचय कोषले थप १ अर्ब रुपैयाँ बैंकको एफपीओमा लगानी गरेको छ । संगठित संस्थाबाट सबैभन्दा बढी एफपीओ किन्नेमा संचय कोष भएको छ। बैंकले प्रतिसेयर १०० रुपैयाँ अंकित मूल्यमा १८० रुपैयाँ प्रिमियम थपेर प्रतिकित्ता २८० रुपैयाँमा एफपीओ निष्कासन गरेको हो । बैंकले १ करोड ७६ लाख ८४ हजार ८५८ कित्ता एफपीओ निष्कासन गरेको छ । एफपीओबाट बैंकले ४ अर्ब ९५ करोड १७ लाख रुपैयाँ संकलन गर्नेछ ।
सेञ्चुरी कमर्सियल बैंकको थप ३ शाखा सञ्चालनमा
काठमाडौं । सेञ्चुरी कमर्सियल बैंकले थप ३ स्थानमा नयाँ शाखा कार्यालयहरु विस्तार गरेको छ । बैंकले चितवनको टांडी, महोत्तरीको बर्दिबास र धनुषाको बिरेन्द्र बजारमा शाखा कार्यालयहरु विस्तार गरी सञ्चालनमा ल्याएको हाे। उक्त शाखा कार्यालयहरुको उद्घाटन बैंकका अध्यक्ष राजेशकुमार श्रेष्ठले गरेका छन् । बैंकले नयाँ शाखा कार्यालयहरु मार्फत ग्राहकहरुलाई कर्जा, निक्षेप लगाएतका सम्पूर्ण बैंकिङ्ग सुविधा उपलब्ध गराउने छ । बैंकले काठमाडौं उपत्यकामा १२ शाखा, ६ वटा एक्स्टेन्सन काउन्टर र उपत्यका बाहिर ८३ शाखा, २ वटा एक्स्टेन्सन काउन्टर साथै १० वटा शाखारहित बैंकिङ्ग गरी जम्मा ११३ स्थानबाट कारोबार सञ्चालन गरिरहेको छ । त्यस्तै, बैंकको गत असार मसान्तमा कुल निक्षेप ६१ अर्ब ३२ करोड तथा कुल कर्जा ५५ अर्ब रुपैयाँ पुगेको छ ।
