दाना–खुर्कोट २२० केभी प्रसारणलाइनको काम तीब्र, ६२ प्रतिशत सकियो
म्याग्दी । कालीगण्डकी करीडोर प्रशारणलाइनको निर्माणले तीब्रता पाएको छ । करीडोरअन्तर्गत म्याग्दीको दानादेखि पर्वतको खुर्कोट जोड्ने २२० केभी क्षमताको ३९ किलोमिटर लामो प्रशारणलाइन र सवस्टेशन निर्माण तीब्र रुपमा भइरहेको छ । म्याग्दी र मुस्ताङमा निर्माणाधीन उक्त जलविद्युत् आयोजनाबाट उत्पादन हुने विद्युत् केन्द्रीय प्रशारणलाइनमा जोड्नका लागि कालीगण्डकी करीडोर प्रशारणलाइन निर्माण शुरु गरिएकोे हो । म्याग्दीको अन्नपूर्ण गाउँपालिका–३ दाना र पर्वतको कुश्मा नगरपालिका–१ खुर्कोटमा विद्युत्को सवस्टेशन निर्माण भइरहेको छ । उक्त आयोजनाको प्रशारणलाइनका लागि टावर निर्माण समेत धमाधम भइरहेको छ । दाना–खुर्कोटसम्म ११४ टावर निर्माण गर्नुपर्नेमा हालसम्म ३५ वटा निर्माण सम्पन्न भएको छ । अन्य टावर निर्माण भइरहेको आयोजनाका प्रमुख चन्दनकुमार घोषले जानकारी दिए । “समयमै आयोजनाको काम सक्न प्रयासरत छौँ” उनले भने । सवस्टेशनको पूर्वाधार निर्माणलाई तीब्र पारिएको छ । नेपाल विद्युत् प्राधिकरणले एशियाली विकास बैंकको सहयोगमा कालीगण्डकी करीडोर प्रशारणलाइन आयोजनाअन्तर्गत सन् २०१६ देखि म्याग्दीको दानाबाट पर्वतको खुर्कोट जोड्ने प्रशारणलाइन र सवस्टेशन निर्माण शुरु गरेको हो । २ अर्ब ९० करोड रुर्पैयाँमा ठेक्का सम्झौता गरेका टाटा प्रोजेक्ट्स र चिन्ट इलेक्ट्रिक जेभीले सवस्टेशनको पूर्वाधार, प्रशारणलाइनको टावर निर्माणसँगै उपकरण खरिदको कामलाई अघि बढाएका छन् । सन् २०१८ को नोभेम्बरमा सम्पन्न गर्ने लक्ष्यसहित निर्माणलाई तीब्रता दिइएको आयोजनाका प्राविधिक सहायक प्रबन्धक लक्ष्मण फुँयालले बताए। सो आयोजनाको हालसम्म ६२ प्रतिशत काम सम्पन्न भएको छ । कालीगण्डकी करीडोर प्रशारणलाइनअन्तर्गत विद्युत् प्राधिकरणले पहिलो चरणमा दाना–खुर्कोटमा सवस्टेशन र प्रशारणलाइन निर्माणको काम अघि बढाएको छ भने खुर्कोटदेखि नवलपरासीको बर्दघाटसम्म दोस्रो चरणमा प्रशारणलाइनको पूर्वाधार बनाउने तयारी भइरहेको छ । यहाँ उत्पादन हुने विद्युत् राष्ट्रिय प्रशारणलाइनमा जोड्नका लागि पूर्वाधार निर्माणले गति लिएसँगै म्याग्दीमा निर्माणाधीन जलविद्युत् आयोजनाले समेत पूर्वाधार निर्माणलाई तीब्रता दिएको छ । आयोजनाले प्रशारणलाइनको टावर रहने जग्गा अधिग्रहणका लागि ४ करोड ५० लाख रुपैयाँ भन्दा बढी मुआब्जा वितरण गरिसकेको छ । टावरका लागि ९३ रोपनी जग्गा अधिग्रहण गरिनेछ । कालीगण्डकी करीडोर राष्ट्रिय प्रशारणलाइनमार्फत् म्याग्दी र मुस्ताङमा निर्माण भएका र निर्माणाधीन जलविद्युत् अयोजनाबाट उत्पादन हुने विद्युत्लाई राष्ट्रिय प्रशारणमा जोडिनेछ । उक्त प्रशारणलाइनअन्तर्गत १३ मेगावाट क्षमताको थापाखोला जलविद्युत् आयोजनाले उत्पादन शुरु गरिसकेको छ भने म्याग्दीको अन्नपूर्ण गाउँपालिकामा ५ मेगावाटको घलेम्दीखोला, ४२ मेगावाटको मिस्त्रीखोला, १४ मेगावाटको घारखोला तथा १०० मेगावाटको निलगिरि र निलगिरि क्यास्केट हाल निर्माणाधीन अवस्थामा छन् । त्यस्तै रघुगंगा गाउँपालिकामा ४० मेगावाटको राहुघाटले समेत निर्माण शुरु गरेको छ भने अन्नपूर्ण गाउँपालिकामै १६४ मेगावाटको कालीगण्डकी गर्ज, ६२ मेगावाटको निलगिरि, ३८ मेगावाटको निलगिरि क्यास्केटलगायतका आयोजनाले काम शुरु गर्ने तयारी गरेका छन् । रासस
एनआइसी एसिया बैंकको नाफा १ अर्ब ४९ करोड, निष्क्रिय कर्जा ०.०६ प्रतिशत
काठमाडौं । एनआर्इसी एसिया बैंकले गत आर्थिक बर्षमा १ अर्ब ४९ करोड रुपैयाँ खुदनाफा गरेको छ । बैंकले मंगलबार वित्तिय विवरण सार्वजनिक गरी गत आर्थिक बर्षमा १ अर्ब ४९ करोड ६६ लाख रुपैयाँ नाफा आर्जन गरेको हो । जुन अघिल्लो आर्थिक बर्ष २०७३।७४ को भन्दा २१ करोड रुपैयाँ बढि हो । सो आवमा बैंकले १ अर्ब २८ करोड रुपैयाँ नाफा गरेको थियो । एनआइसी एसियाले १ खर्ब ५१ अर्ब रुपैयाँ निक्षेप संकलन गरेर १ खर्ब २१ अर्ब कर्जा लगानी गरेको छ । गत आर्थिक वर्षमा बैंकले १३ अर्ब २९ करोड ब्याज आम्दानी गरेको छ । बैंकले आक्रमक रुपमा शाखा विस्तार र महंगोमा निक्षेप परिचालन गर्दा खर्च बढेको छ । समीक्षा अवधिमा बैंकले ९ अर्ब ३३ करोड रुपैयाँ ब्याज खर्च गरेको छ। बैंकले २०७३ असार मसान्तमा ६ अर्ब ९० करोड ब्याज आम्दानी गरेर ४ अर्ब ३६ करोड रुपैयाँ ब्याज खर्च गरेको थियो । एनआइसी एसियाको खराब कर्जा लगभग शुन्य अवस्थाा पुगेको छ । गत असारसम्म बैंकको निष्क्रिय कर्जा ०.०६ प्रतिशतमा झरेको छ । बैंकको प्रति सेयर आम्दानी (ईपीएस) १८ रुपैयाँ ९४ पैसा रहेको छ । बैंकको आधार ब्याजदर बढेर ११.१६ प्रतिशत पुगेको छ । आर्थिक वर्षको अन्तिम महिनामा ब्याजदर अन्तर (स्प्रेड ) ५.१० प्रतिशत रहेको छ । बैंकको निक्षेप लागत ७.६७ प्रतिशत रहेको छ ।
सिण्डिकेट हटेपछि यातायात व्यवसायी धमाधम दर्ता हुन थाले, ५ महिनामा नै थपिए २८२ कम्पनी
काठमाडौँ । सिण्डिकेट हटेको ५ महिनाको अवधिमा २८२ वटा नयाँ यातयात कम्पनी थपिएका छन् । यो समेत गरी यातायात व्यवसाय गर्ने कम्पनीको संख्या ९२२ पुगेको कम्पनी रजिष्टारको कार्यालयले जनाएको छ । गत चैतसम्म ६४० वटा मात्रै यातायात कम्पनी रजिष्ट्रार कार्यलयमा दर्ता भएका थिए । सरकारले यातायात समिति खारेज गरेर दर्ता गर्न र नयाँलाई धमाधम गाडी सञ्चालनका लागि रुट इजाजत दिन थालेपछि संगठित रुपमा व्यवसायी दर्ता हुने क्रम बढेको रजिष्टार कार्यालयले जानकारी दिएको छ । पछिल्लो समयमा मयुर यातायात, अन्नपुर्ण यातायात, महानगर यातायात, सुर्यौदय, सिटीलगायत यातायात दर्जनौं कम्पनीले काठमाडौं उपत्यका र बाहिर बस सञ्चालन गरिरहेका छन् । वस सञ्चालन गर्न नयाँ कम्पनी आउने क्रम जारी रहेको कार्यालयले जनाएको छ । यसैगरी अन्य व्यवसाय सञ्चालनका गर्नका लागि दर्ता गर्न आउने कम्पनीको संख्या बढेको छ । आर्थिक वर्ष २०७१/०७२ देखि २०७४/०७५ सम्म रजिष्ट्रार कार्यालयमा १ लाख ६८ हजार २८२ वटा कम्पनीले कम्पनी दर्ताका लागि निवेदन दिएका थिए । जसमा ६८ हजार ४३६ वटा मात्रै दर्ता भएको रजिष्ट्रार कार्यालयले जनाएको छ । विभिन्न कारणले ९९ हजार ८४६ वटा कम्पनीहरु दर्ता हुन सकेन्न । अर्थिक वर्ष २०७१/०७२ मा ३३ हजार ३३७ वटा कम्पनी रजिष्ट्रार कार्यालयमा परेको निवेदन मध्य १८ हजार ७३७ वटा मात्रै कम्पनी रजिष्ट्रार कार्यलयमा दर्ता भएका थिए । सो आर्थिक वर्षमा २६ हजार ६२० वटा दर्ता हुन सकेन्न । अर्थिक वर्ष २०७२/०७३ मा ३८ हजार १९२ वटा कम्पनी दर्ताका लागि कार्यालयमा निवेदन परेको थियो । जसमध्य १४ हजार ८५९ वटा मात्रै कम्पनी रजिष्ट्रार कार्यलयमा दर्ता भएका थिए । सो आर्थिक वर्षमा २३ हजार ३३३ वटा दर्ता हुन सकेन्न । अर्थिक वर्ष २०७३/०७४ मा ४५ हजार ३५७ वटा कम्पनीले रजिष्ट्रार कार्यालयमा दर्ताका लागि निवेदन दिएका थिए । जसमध्ये १८ हजार ७३७ वटा मात्रै कम्पनी रजिष्ट्रार कार्यलयमा दर्ता भएका थिए । सो आर्थिक वर्षमा २६ हजार ६२० वटा दर्ता हुन सकेन्न । अर्थिक वर्ष २०७४/०७५ मा ५१ हजार ३९६ वटा कम्पनीको रजिष्ट्रार कार्यलयमा दर्ताका लागि निवेदन परेको थियो । जसमध्ये ३३ हजार ३३४ वटा मात्रै कार्यालयमा दर्ता भएका थिए । सो आर्थिक वर्षमा २९ हजार ६२ वटा दर्ता हुन सकेन्न । रजिष्ट्रार कार्यलयको सूचना अधिकारी धर्मराज रोकायाले १ अर्ब रुपैयाँ भन्दा बढी चुक्ता पुँजी भएका १४९ कम्पनी दर्ता भएको जानकारी दिएका छन् । ५० करोड देखी ९९ सय करोड रुपैयाँ सम्मको चुक्ता पुँजी भएको १६९ वटा कम्पनी दर्ता भएका छन् । ५० करोड रुपैयाँ भन्दा कम चुक्ता पुँजी भएको १ लाख ९३ हजार ३४ कम्पनी दर्ता भएको रोकायाले बताए ।
सिटी एक्सप्रेस फाइनान्सको हकप्रद सेयर भदौ १ देखि निष्कासन हुने
काठमाडौं । सिटी एक्सप्रसे फाइनान्स कम्पनी लिमिटेडले भदौ १ गतेदेखि हकप्रद सेयर निष्कासन गर्ने भएको छ । कम्पनीले चुक्तापुँजी बढाउन १६७ प्रतिशत अर्थात २५ करोड रुपैयाँ बराबरको २५ लाख कित्ता हकप्रद सेयर निष्कासन गर्न लागेको हो । हकप्रद सेयर निष्कासन बन्द असोज ४ गते हुने निष्कासन तथा बिक्री प्रवन्धक काठमाडौं क्यापिटल मार्केट्स लिमिटेडले जनाएको छ । हकप्रद सेयर बाँडफाँडपछि कम्पनीको चुक्तापुँजी ४० करोड रुपैया पुग्ने छ । हाल १५ करोड रुपैयाँ चुक्तापुँजी छ । साउन २० गतेसम्म कायम रहेका सेयरधनीले आवेदन दिन पाउने छन् ।
एनसीसी बैंकको हकप्रद सेयर निष्कासन भदौ ४ देखि
काठमाडौं । नेपाल क्रेडिट एन्ड कमर्श (एनसीसी) बैंकले भदौ ४ गतेदेखि साविकका सेयरधनीलाई हकप्रद सेयर निष्कासन गर्ने भएको छ । बैंकले चुक्तापुँजी बढाउन ५० प्रतिशत अर्थात २ अर्ब ३३ करोड ९५ लाख २९ हजार १०० रुपैयाँ बराबरको २ करोड ३३ लाख ९५ हजार २९१ कित्ता हकप्रद सेयर निष्कासन गर्न लागेको हो । हकप्रद निष्कासन असोज ७ गतेसम्म हुने निष्कासन तथा बिक्री प्रवन्धक सनराइज क्यापिटल लिमिटेडले जनाएको छ । हकप्रद निष्कासनपछि बैंकको चुक्तापुँजी ७ अर्ब १ करोड ८५ लाख रुपैयाँ हुने छ । हकप्रद निष्कासनपछि पनि बैंकको ९९ करोड रुपैयाँ चुक्तापुँजी नपुग्ने देखिएको छ । तोकिएको समयमा पुँजी नपुरउनेमा एनसीसी बैंक मात्र भएको छ ।
सिटिजन बैंकको एफपीओ आजदेखि खुला, २३०० कित्तासम्म भर्न पाइने
काठमाडौं । सिटिजन्स बैंक इन्टरनेसनल लिमिटेडले आजदेखि सर्वसाधारणका लागि थप निष्कासन (एफपीओ) गरेको छ । बैंकले प्रतिकित्ता १०० रुपैयाँ अंकित मूल्यमा १०० रुपैयाँ प्रिमियम थप गरी २०० रुपैयाँमा एफपीओ निष्कासन गरेको हो । बैंकले निष्कासन गर्न लागेको एफपीओ ४ लाख ६३ हजार ८२६ कित्ता रहेको छ । एफपीओबाट बैंकले ९ करोड २७ लाख ६५ हजार २०० रुपैयाँ संकलन गर्ने छ । एफपीओ निष्कासन बन्द छिटोमा साउन १८ गते शुक्रबार र ढिलोमा भदौ १४ गतेसम्म हुने निष्कासन तथा बिक्री प्रवन्धक ग्लोबल आईएमई क्यापिटल लिमिटेडले जनाएको छ । न्युनतम ५० र अधिकतम २ हजार ३०० कित्ता एफपीओ भर्न पाइने छ । ४ दिनभित्र पनि एफपीओमा पर्याप्त आवेदन नपरे संस्थागत लगानीकर्तालाई खुला हुने बैंकले जनाएको छ । सी–आस्वा सदस्य बैंक तथा वित्तीय संस्थाका शाखाबाट दरखास्त फारम लिने तथा बुझाउने व्यवस्था रहेको छ । एफपीओ बाँडफाँडपछि बैंकमा संस्थापकको ५१ र सर्वसाधारणको ४९ प्रतिशत स्वामित्व हुने छ । चुत्तापुँजी बढेर ८ अर्ब ७ करोड ९६ लाख रुपैयाा पुग्ने बैंकले जनाएको छ । संस्थापक र सर्वसाधारणको स्वामित्व ५१ः४९ प्रतिशत मिलाउन एफपीओ निष्कासन गरेको बैंकले जानकारी दिएको छ ।
एलआईसी नेपालले घोषणा गर्यो नयाँ बोनस दर, ८५ रुपैयाँसम्म दिने
काठमाडौं । लाइफ इन्स्योरेन्स कम्पनी (एलआईसी) नेपाल लिमिटेडले बिमितलाई ८५ रुपैयाँसम्म बोनस दिने घोषणा गरेको छ । कम्पनीले प्रतिहजार न्युनतम ६१ देखि ८५ रुपैयाँसम्म बिमितलाई बोनस दिने भएको हो । आर्थिक वर्ष ०७३/०७४ का लागि बिमितलाई नयाँ बोनस दर निधारण गरेको कम्पनीले जनाएको छ । कम्पनीले ल्याएको जीवन आस्था योजनामा प्रतिवर्ष न्युनतम ८० देखि ८५ रुपैयाँसम्म बोनस दिने भएको छ । यो अन्य योजनाको भन्दा बढी हो । सावधिक आजिवन जीवन बीमामा वर्ष हेरी न्युनतम ६१ देखि ८५ रुपैयाँसम्म बोनस दिने भएको छ । जीवन तरङ बीमामा न्युनतमा ६१ देखि ७२ र अग्रिम भुत्तानी सावधिक जीवन बीमामा प्रतिहजार ६१ देखि ६३ रुपैयाँसम्म बोनस दिने एलआईसीले जनाएको छ ।
वाइड बडी अन्नपूर्णले पायो अनुमति, पहिलो उडान दोहामा
काठमाडौ । राष्ट्रिय ध्वजावाहक नेपाल वायुसेवा निगमको पहिलो वाइड बडी ‘अन्नपूर्ण’ विमानले यही साउन १६ गते देखि व्यावसायिक उडान शुरु गर्ने भएको छ ।नेपाल नागरिक उड्डयन प्राधिकरणले आज सो विमानलाई उडान अनुमति (एओसी) प्रदान गरेपछि निगमले उडान तालिका सार्वजनिक गरेको हो । निगमका महाप्रबन्धक सुगतरत्न कंसाकारका अनुसार निगमको पहिलो वाइड बडी जहाजले राति १० बजे उडान गर्नेछ । निगमको जहाजले सातामा तीन उडान गर्नेछ । ‘नाइन एन एएलवाई’ कलसाइन दिएको उक्त वाइड बडी ए ३३०–२०० सिरिजको विमानले पुरानो गन्तव्य कतारको राजधानी दोहाबाट आफ्नो पहिलो उडान भर्न लागेको निगमले जनाएको छ । दोहाका लागि निगमको २७४ सिट नै भरिसकेको छ । “दोहा उडानका लागि निगमले आज नियामक निकाय नेपाल नागरिक उड्डयन प्राधिकरण (क्यान) बाट उडान अनुमतिपत्र (एओसी) पाएको हो”, महाप्रबन्धक कंसाकारले भने। “प्राधिकरणबाट आज अनुमति पाएका छौँ, भोलि मंगलबारसम्म सबै प्रक्रिया पूरा गरेर व्यावसायिक उडान शुरु गर्ने योजना बनाएका छौँ”, उन।ले भने वाइड बडीले भारतको नयाँ दिल्ली परीक्षण उडान ‘पुफिङ फ्लाइट’ गरिसकेको छ । पहिलो वाइड बडी गत असार १४ गते त्रिभुवन अन्तर्राष्ट्रिय विमानस्थलमा अवतरण गरेको थियो । निगमका प्रवक्ता रवीन्द्र श्रेष्ठले उक्त जहाज गत सोमबार त्रिभुवन अन्तर्राष्ट्रिय विमानस्थल काठमाडौँबाट भारतको इन्दिरा गान्धी अन्तर्राष्ट्रिय विमानस्थलसम्मको परीक्षण उडान गरिसकेको जनाएको छ । ‘अन्नपूर्ण’ नाम दिइएको सो जहाज गत असार १४ गते काठमाडौँ अवतरण भएको थियो । निगमले वाइड बडी ए ३३०–२२० सिरिजको जहाजमार्फत अन्तर्राष्ट्रिय उडानमा आफ्नो हिस्सा बढाउने लक्ष्य राखेको छ । अन्तर्राष्ट्रिय हवाई उड्डयन संगठनको छाता संगठन (आइकाआ) ले व्यावसायिक उडान अघि परीक्षण उडान गर्नुपर्ने व्यवस्थाअनुसार सो प्रक्रियासमेत पूरा भएको छ । नेपाल नागरिक उड्डयन प्राधिकरणको सिफारिशमा नै निगमको बाइड बडी जहाजले त्यस्तो उडान गरेको हो । निगमले उडानका लागि सबै प्रक्रिया पूरा गरेको छ । उक्त उडानमा निगमका प्राविधिक तथा अधिकारी सहभागी थिए । यस्तै निगमको ‘मकालु’ नाम राखिएको वाइड बडी जहाज यही साउन ११ गते काठमाडौँमा अवतरण भइसकेको छ । ‘नाइन एन एएलजेट’ कलसाइनको उक्त जहाज आइसकेको र उडान अनुमतिका लागि तयारी हालतमा छ । बढीमा अबको दुई साताभित्र त्यस्तो अनुमति प्राप्त हुनेछ । नेपालको पर्यटन प्रवद्र्धनमा सहयोग पु¥याउने लक्ष्यका साथ नयाँ जहाज खरिद गरिएको र त्यसले निगमको हिस्सा बढाउनसमेत सहयोग पुग्ने विश्वास लिइएको छ । नयाँ विमान दोहा र दुबईमा उडाउने तयारी गरिएको र निकट भविष्यमा जापान र चीनका विभिन्न गन्तव्यमा उडान गर्ने तयारी गरिएको छ । निगमले नयाँ वाइड बडी विमानबाट दक्षिण कोरिया, जापान, अस्ट्रेलिया, लण्डनजस्ता गन्तव्यमा उडान गर्ने योजना बनाएको प्रवक्ता श्रेष्ठले बताउनुभयो । हाल अन्तर्राष्ट्रिय उडानका आठ गन्तव्य भारतको नयाँ दिल्ली, बेङ्लोर र मुम्बई तथा हङ्कङ, मलेसिया, थाइल्याण्ड, दोहा र दुबईमा उडान भर्दै आएको छ । रासस
