स्काइवाकमा पोखरा फाइनान्सका ग्राहकलाई १५ प्रतिशत छुट
काठमाडौं । पोखरा फाइनान्स लिमिटेडका ग्राहकले काठमाडौंको कमलादीस्थित स्काइवाकको टिकट खरिदमा १५ प्रतिशत छुट पाउने भएका छन् । पोखरा फाइनान्स र वन्डर्स नेपाल प्रालिअन्तर्गत सञ्चालित स्काइवाकबीच ग्राहक सुविधा विस्तारसम्बन्धी सम्झौता भएपछि फाइनान्सका ग्राहकले उक्त छुट पाउने भएका हुन् । सम्झौताअनुसार पोखरा फाइनान्सका ग्राहकले स्काइवाकको टिकट खरिद गर्दा १५ प्रतिशत छुट प्राप्त गर्न सक्नेछन् । ग्राहकलाई थप सुविधा र लाभ उपलब्ध गराउने उद्देश्यले गरिएको सहकार्यबाट ग्राहक प्रत्यक्ष रूपमा लाभान्वित हुने फाइनान्सले जनाएको छ । पोखरा फाइनान्सले हाल ३८ वटा शाखामार्फत नगद कारोबार, आरटीजीएस, आईपीएस, कनेक्ट आईपीएस, रेमिट्यान्स, क्लियरिङ तथा सीआईएसलगायतका सेवा दिँदै आएको छ । फाइनान्सले मोबाइल बैंकिङ, डेबिट कार्ड र क्यूआर कोडलगायतका डिजिटल बैंकिङ सुविधा पनि उपलब्ध गराउँदै आएको जनाएको छ ।
पर्यटन बोर्डले दशैंमा देशभर लिंगे पिङ निर्माण गर्ने
काठमाडौं । नेपालीहरूको महान् पर्व बडादशैंको अवसरमा मौलिक संस्कृति, परम्परा र चाडपर्वलाई पर्यटनसँग जोड्दै नेपाल पर्यटन बोर्डले विभिन्न पर्यटकीय गन्तव्यमा लिंगे पिङ निर्माण तथा सञ्चालन गर्ने भएको छ । नेपाल पर्यटन बोर्डको पर्यटन सम्पदा तथा पर्यटन विकास महाशाखाले सांस्कृतिक पर्यटन प्रवर्द्धन गर्ने उद्देश्यले काठमाडौं उपत्यकासहित देशका विभिन्न पर्यटकीय गन्तव्यमा स्थानीय तह तथा पर्यटनसम्बद्ध संघसंस्थासँगको सहकार्यमा लिंगे पिङ निर्माण तथा सञ्चालन गर्न लागेको हो । बोर्डले ललितपुर महानगरपालिका, कीर्तिपुर नगरपालिका, चाँगुनारायण नगरपालिका, भक्तपुर पर्यटन विकास समिति, ठमेल पर्यटन विकास समिति, हिमालयन उद्धार संघ, ट्रेकिङ एजेन्सिज एसोसिएसन अफ नेपाल (टान), होटल संघ नेपाल, होटल व्यवसायी महासंघ तथा विभिन्न प्रदेशका होटल तथा पर्यटन व्यवसायी संघसंस्थासहित पर्यटकीय क्षेत्रका सम्बन्धित निकायसँग सहकार्य गरेको छ । सम्झौताअनुसार विभिन्न पर्यटकीय गन्तव्यमा लिंगे पिङ निर्माण गरी दशैंको अवधिभर सञ्चालन गरिनेछ । विशेषगरी पर्यटकको आवागमन बढी हुने तथा सांस्कृतिक गतिविधिका लागि उपयुक्त स्थानमा लिंगे पिङ राखिने व्यवस्था गरिएको हो । नेपाल पर्यटन बोर्ड र सम्बन्धित स्थानीय तह तथा संस्थाबीच भएको सम्झौतामा पिङ निर्माण तथा सञ्चालन गर्दा आवश्यक सुरक्षा व्यवस्था, भीड व्यवस्थापन र दुर्घटना न्यूनीकरणका उपाय अनिवार्य रूपमा अपनाउनुपर्ने उल्लेख छ । दशैंको कार्यक्रम सम्पन्न भएपछि पिङ हटाई निर्माणस्थललाई पूर्ववत् अवस्थामा फर्काउने जिम्मेवारीसमेत सम्बन्धित पक्षको हुने सम्झौतामा उल्लेख छ । नेपाल पर्यटन बोर्डले नेपालीहरूको मौलिक संस्कृति, परम्परा र चाडपर्वको संरक्षण तथा प्रवर्द्धन गर्दै सांस्कृतिक पर्यटनलाई थप प्रवर्द्धन गर्ने उद्देश्यले दशैंमा लिंगे पिङ निर्माण तथा सञ्चालनको कार्यक्रम अघि बढाएको जनाएको छ ।
कांग्रेस महाधिवेशनमा भरतराज ढकालले दिए केन्द्रीय सदस्यमा उम्मेदवारी
काठमाडौं । नेपाली कांग्रेसका युवा नेता भरतराज ढकालले पार्टीको १५औं महाधिवेशनमा केन्द्रीय सदस्य पदमा उम्मेदवारी दर्ता गराएका छन् । युवा उद्यमी तथा सफल बैंकर्स ढकालले पेशागत विज्ञको क्लस्टरतर्फबाट केन्द्रीय सदस्यमा मंगलबार (आज) उम्मेदवारी दर्ता गराएका हुन् । उनी नेपाली कांग्रेसको १५ औं अधिवेशनअन्तर्गत स्याङ्जा क्षेत्र नम्बर १ बाट १००९ मत प्राप्त गरी केन्द्रीय महाधिवेशन प्रतिनिधिमा निर्वाचित भएका थिए । बैंक तथा वित्तीय क्षेत्रमा लामो समय बिताएका ढकाल मुक्तिनाथ विकास बैंकका पूर्वप्रमुख कार्यकारी अधिकृतसमेत हुन् । उनी डेभलपमेन्ट बैंकर्स एसोसिएसनका पूर्वअध्यक्ष र मुक्तिनाथ कृषि कम्पनीको प्रबन्ध सञ्चालक तथा अध्यक्ष पनि हुन् । ढकाल लामो समयदेखि बालबालिका, वातावरण, सहकारी, बैंक तथा वित्तीय संस्था र कृषि क्षेत्रमा काम गर्दै आएका विज्ञको रूपमा परिचित रहेका छन् ।
बैंकिङ कसूरमा दोषी ठहरिएका लक्ष्मण थोकर पक्राउ
काठमाडौं । बैंकिङ कसूर मुद्दामा दोषी ठहर भई फरार रहेका लक्ष्मण थोकर पक्राउ परेका छन् । प्रहरीले उनलाई काठमाडौं महानगरपालिका–२७, महाबौद्धबाट मंगलबार (आज) पक्राउ गरेको हो । काठमाडौं जिल्ला अदालतले असोज २ गते दक्षिणकाली नगरपालिका–६ का ४२ वर्षीय थोकरलाई बैंकिङ कसूर मुद्दामा १ करोड ३ लाख रुपैयाँ बिगो, बिगोको ५ प्रतिशत जरिवाना र ६ महिना कैद सजाय सुनाएको थियो । पुष्पाञ्जली लक्की निर्माण सेवाका सञ्चालकसमेत रहेका थोकर फैसला कार्यान्वयन नगरी फरार रहेका थिए । उनी काठमाडौं उपत्यकाका विभिन्न स्थानमा लुकिछिपी बस्दै आएको भन्ने सूचनाका आधारमा प्रहरीले खोजी गरेको थियो । सोही क्रममा उनी पक्राउ परेका छन् । पक्राउ परेका थोकरलाई फैसला कार्यान्वयनका लागि काठमाडौं जिल्ला अदालतमा पेश गरिएको प्रहरीले जनाएको छ ।
ग्लोबल आइएमई बैंकको एसीईओ बने बुद्धि अकेला
काठमाडौं । ग्लोबल आइएमई बैंकको सहायक प्रमुख कार्यकारी अधिकृत (एसीईओ) पदमा बुद्धि अकेला बढुवा भएका छन् । यसअघि उनी बैंकको नायब महाप्रबन्धक (डीजीएम) पदमा कार्यरत थिए । बैंकिङ क्षेत्रमा २२ वर्षभन्दा लामो अनुभव सँगालेका अकेलाले सन् २००४ मा नेपाल बैंक लिमिटेडबाट नायब प्रबन्धकका रूपमा आफ्नो बैंकिङ करिअर सुरु गरेका थिए । उनी सन् २००६ देखि ग्लोबल आइएमई बैंकमा निरन्तर आबद्ध छन् । आफ्नो लामो बैंकिङ यात्राका क्रममा उनले एकीकृत जोखिम व्यवस्थापन, व्यवसाय विस्तार, शाखा सञ्चालन, कर्जा प्रशासन तथा आन्तरिक लेखापरीक्षण जस्ता प्रमुख विभागहरूमा कुशलतापूर्वक जिम्मेवारी सम्हालिसकेका छन् । साथै उनले बैंकको प्रमुख जोखिम अधिकृत (सीआरओ) को जिम्मेवारी समेत सम्हालेका थिए । यसका साथै अकेलाले बैंकको सहायक कम्पनी ग्लोबल आइएमई लघुवित्त वित्तीय संस्था लिमिटेडको सञ्चालक समिति अध्यक्षको भूमिकासमेत सम्हाल्दै आएका छन् । अकेलाले पोखरा विश्वविद्यालयबाट व्यवसाय प्रशासनमा स्नातकोत्तर (एमबीए) गरेका छन् । उनको लामो बैंकिङ अनुभव, जोखिम व्यवस्थापन तथा समग्र कार्यसञ्चालन दक्षताले बैंकको सेवा प्रवाहलाई थप प्रभावकारी, सुरक्षित र गुणस्तरीय बनाउन योगदान पुग्ने विश्वास बैंकले लिएको छ ।
प्रहरीको चारैवटा विधि विज्ञान प्रयोगशाला सञ्चालनमा
काठमाडौं । बागमती प्रदेश प्रहरी कार्यालयले विधि विज्ञान प्रयोगशाला सञ्चालनमा ल्याएको छ । कार्यालय परिसरमा सञ्चालन भएको नेपाल प्रहरीको चौथो विधि विज्ञान प्रयोगशाला हो । अपराध अनुसन्धानलाई छिटो, छरितो, वैज्ञानिक, विश्वसनीय र प्रमाणमुखी बनाउन उक्त प्रयोगशाला गत २२ गते देखि सञ्चालनमा ल्याइएको नेपाल प्रहरीका प्रवक्ता अबीनारायण काफ्लेले जानकारी दिए । उनका अुनसार काठमाडौं, धरान र नेपालगंजमा समेत नेपाल प्रहरीको विधि विज्ञान प्रयोगशालाहरू रहेका छन् । प्रयोगशालामा लागूऔषध परीक्षणका साथै बायोलोजी, सिरोलोजी र डीएनएका नमुना परीक्षणहरू समेत सुरू गरिएको छ । प्रयोगशाला सञ्चालनमा आएसँगै हाल सम्म विभिन्न घटनाबाट संकलित १ सय ५० वटा भन्दा बढी नमुनाहरूको परीक्षण गरिएको छ । भोटेकोशी बाढीसँग सम्बन्धित १५ वटा नमुनाहरूको परीक्षण गरी प्रतिवेदन समेत तयार गरिएको छ । लागूऔषधको हकमा अधिकतम १० दिनभित्र परीक्षण सम्पन्न गरी प्रतिवेदन बुझाउने कार्यतालिका बनाइएको छ । प्रयोगशालामा बागमती प्रदेशका मकवानपुर, चितवन र सिन्धुली तथा मधेश प्रदेशका बारा, रौतहट र सर्लाही जिल्लाहरूबाट शव पहिचान तथा अन्य फरेन्सिक परीक्षणका लागि नमुनाहरू प्राप्त हुन्छन् । अपराध अनुसन्धानमा प्रमाणको सुरक्षित व्यवस्थापन तथा वैज्ञानिक परीक्षणसँगै अपराधसँग सम्बन्धित तथ्यको विश्लेषणमा प्रयोगशालाले विशेष भूमिका निर्वाह गर्दछ । वैज्ञानिक परीक्षणबाट प्राप्त प्रमाणले अनुसन्धानलाई थप विश्वसनीय बनाउन तथा अदालतमा बलियो प्रमाण प्रस्तुत गर्ने प्रक्रियामा समेत मद्दत गर्दछ ।
दुई लाख धरौटीमा प्रसाईं रिहा
काठमाडौं । मेडिकल व्यवसायी दुर्गा प्रसाईंलाई धरौटीमा रिहा गर्न अदालतले आदेश दिएको छ। मंगलबार जिल्ला अदालत, काठमाडौंका न्यायाधीश उमेशप्रसाद मैनालीको इजलासले प्रसाईंलाई दुई लाख रुपैयाँ धरौटीमा रिहा गर्न आदेश दिएको हो। नेपाल प्रहरीको साइबर ब्युरोको टोलीले उनलाई असोज १२ गते पक्राउ गरेको थियो। उनीविरुद्ध साइबर अपराधमा अनुसन्धान भइरहेको छ। राष्ट्रिय स्वतन्त्र पार्टी (रास्वपा) की सांसद रचना खतिवडाको उजुरीका आधारमा प्रसाईं पक्राउ परेका थिए। खतिवडा जेनजी शहीद रसिक खतिवडाकी आमा हुन्। शहीदलाई लिएर प्रसाईंले सामाजिक सञ्जालमा अपमानजनक टिप्पणी गरेको आरोप छ।
२७ पदाधिकारी पदमा ४१ जनाको उम्मेदवारी
काठमाडौं । नेपाली कांग्रेसको १५औं महाधिवेशनको तेस्रो दिन मंगलबार नयाँ केन्द्रीय कार्यसमितिका लागि मनोनयन दर्ता भइरहेको छ । आज बिहान १२ बजेबाट सुरु भएको मनोनयन दर्ता साँझ ६ बजेसम्मका लागि तोकिएको छ । जसमा हालसम्म ४१ जनाले पदाधिकारीमा मात्रै मनोनयन दर्ता गराएका छन् । पदाधिकारीको शीर्ष पद सभापतिमा रामकृष्ण खड्कीले उम्मेदवारी दर्ता गराएका छन् । त्यस्तै, सभापति पछिको वरिष्ठ उपसभापति पदमा विश्वप्रकाश शर्माको एकल उम्मेदवारी दर्ता भएको छ । उपसभापति पदमा भने हालसम्म १४ जनाको उम्मेदवारी दर्ता गराएका छन् । यस्तै, महामन्त्रीतर्फ ३ महिलासहित ११ जनाको उम्मेदवारी दर्ता भएको छ । सहमहामन्त्रीको विभिन्न कलस्टरमा १५ जनाको उम्मेदवारी दर्ता भएको छ । नेपाली कांग्रेसको १५औं महाधिवेशनको संशोधित विधानअनुरूप पदाधिकारी संख्या बढाएर २७ पुर्याइएको छ । यसअघि १७ जनाको पदाधिकारी संख्या थियो । हालसम्म क–कसले दिए पदाधिकारीमा उम्मेदवारी ? सभापति १.श्यामकृष्ण खड्गी वरिष्ठ उपसभापति २.विश्वप्रकाश शर्मा उपसभापति (खुला) ३.डा. चन्द्रमोहन यादव ४.सुरेन्द्रराज पाण्डे ५.डा. मीनेन्द्र रिजाल ६.गोविन्द भट्टराई ७.देवराज चालिसे ८.मधुप्रसाद आचार्य ९.धनराज गुरुङ १०.दीपक गिरी ११.डा. चन्द्र भण्डारी समावेशी उपसभापति १२.विनोद चौधरी १३.फरमुल्लाह मन्सुर १४.जीवन परियार महिला उपसभापति १५.पुष्पा भुसाल –सीता गुरुङ महामन्त्री (महिला) १६.डिला संग्रौला १७.रिता खनाल १८.महालक्ष्मी उपाध्याय डिना महामन्त्री (खुला) १९.शंकर तिवारी २०.सुनिल शर्मा २१.नैनसिंह महर २२.प्रदीप पौडेल २३.गुरुराज घिमिरे २४.अमरसिंह पुन २५. डा.सन्तोष उपाध्याय २६. उदयशमशेर जबरा सहमहामन्त्री (महिला) २७.प्रतिमा गौतम सहमहामन्त्री (खुला) २८.देवेन्द्रराज कँडे २९.रामहरि खतिवडा ३०.डिल्लीराम सुवेदी सहमहामन्त्री (पिछडिएको क्षेत्र) ३१.जीवनबहादुर शाही ३२.मीन भाम सहमहामन्त्री (खसआर्य) ३३.मनोजमणि आचार्य ३४.अजयबाबु शिवाकोटी ३५.जगदिश्वरनरसिंह केसी सहमहामन्त्री (आदिवासी जनजाती) ३६.बहादुरसिंह लामा सहमहामन्त्री (थारु) ३७.तेजुलाल चौधरी सहमहामन्त्री (अल्पसंख्यक) ३८.आङगेलु शेर्पा सहमहामन्त्री (मुस्लिम) ३९.अब्दुल सत्तर सहमहामन्त्री (मधेशी) ४०.अभिषेकप्रताप शाह ४१.नानु बाँस्तोला
