नानू बाँस्तोलाले दिइन् सहमहामन्त्रीमा उम्मेदवारी
काठमाडौं । नेपाली कांग्रेसकी नेतृ नानू बाँस्तोलाले पार्टीको १५औँ महाधिवेशनमा सहमहामन्त्री पदका लागि उम्मेदवारी दर्ता गराएकी छिन् । बाँस्तोलाले कांग्रेसको नयाँ नेतृत्व चयनका लागि मंगलबार भइरहेको मनोनयन दर्ता प्रक्रियाअन्तर्गत सहमहामन्त्री पदमा उम्मेदवारी दिएकी हुन् । उनी कांग्रेसको केन्द्रीय सदस्यसमेत हुन् । बाँस्तोला विद्यार्थी जीवनदेखि नै कांग्रेसको राजनीतिमा सक्रिय रहँदै आएकी छिन् । उनले नेपाल विद्यार्थी संघको केन्द्रीय सदस्य, नेपाल महिला संघको केन्द्रीय सदस्य तथा कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानको सदस्यका रूपमा काम गरिसकेकी छिन् । उनी राष्ट्रिय तथा अन्तर्राष्ट्रिय प्रशिक्षकका रूपमा समेत सक्रिय रहँदै आएकी छिन् । कांग्रेसको १५औँ महाधिवेशनमा विभिन्न समूह र क्लस्टरबाट सहमहामन्त्री पदमा उम्मेदवारी दर्ता भइरहेको छ । नयाँ नेतृत्व चयनका लागि मंगलबार उम्मेदवारी दर्ता भइरहेको हो ।
हिजो विधान संशोधनको विरोधमा गगन, आज आफ्नै लगन
काठमाडौं । नेपाली कांग्रेसको १४औं महाधिवेशनको पूर्वसन्ध्यामा तत्कालीन महामन्त्रीका उम्मेदवार गगनकुमार थापाले महाधिवेशनको मुखमा विधान संशोधन गरेर पदाधिकारी थप्ने तत्कालीन नेतृत्वको प्रयासको विरोध गरेका थिए । पाँच वर्षपछि भने परिस्थिति उल्टिएको छ । अहिले उनै थापा कांग्रेसका सभापति छन् । १५औं महाधिवेशनको बन्दसत्रले उनकै नेतृत्वमा संशोधित विधान पारित गरेको छ । उक्त संशोधनले केन्द्रीय कार्यसमिति र पदाधिकारीको संख्या उल्लेख्य रूपमा बढाएको छ । १४ औं महाधिवेशनअघि तत्कालीन सभापति शेरबहादुर देउवा नेतृत्वको समितिले पदाधिकारी संख्या बढाउने गरी विधान संशोधनको तयारी गरेको थियो । त्यतिबेला महामन्त्री पदका उम्मेदवार रहेका थापाले यसको विरोध गरेका थिए । ‘पार्टी महाधिवेशनको एक दिनअघि विधान संशोधन गरी पदाधिकारी थप्न थाल्यौं भने त्यसले बेथिति निम्त्याउँछ,’ उनले भनेका थिए । थापाले महाधिवेशनको मुखमा विधान संशोधन गरेर पदाधिकारी थप्ने प्रक्रियामाथि आपत्ति जनाएका थिए । त्यसबाट उनले तत्कालीन नेतृत्वको राजनीतिक उद्देश्य वा गुट व्यवस्थापनमाथि पनि प्रश्न उठाएका थिए । थापाले देउवाले गुट व्यवस्थापनकै लागि पद थप्न खोजेका भन्ने आरोपसमेत लगाएर त्यसको विरोध गरेका थिए । तर तिनै थापाको नेतृत्वमा कांग्रेसको १५औं महाधिवेशनको बन्दसत्रले संशोधित विधान पारित गरेको छ । पारित संरचनाअनुसार केन्द्रीय कार्यसमिति २९७ सदस्यीय हुनेछ । वरिष्ठ उपसभापति पद नयाँ सिर्जना गरिएको छ । अब कांग्रेसमा १ जना वरिष्ठ उपसभापति रहनेछन् । त्यस्तै, उपसभापति ४ जना हुनेछन् भने महामन्त्री ३ जना हुनेछन् । कांग्रेसमा सहमहामन्त्री १५ जना हुने नयाँ व्यवस्था गरिएको छ । त्यस्तै, कोषाध्यक्ष १ जना र प्रवक्ता १ जना रहने अघिल्लो व्यवस्थालाई भने निरन्तरता दिइएको छ । त्यस्तै, सभापतिबाट मनोनीत हुने ६६ केन्द्रीय सदस्यको व्यवस्थासमेत गरिएको छ । यसरी हेर्दा १४औं महाधिवेशनले पारित गरेको १६७ सदस्यीय संरचना बढेर २९७ सदस्यीय भएको छ र पदाधिकारीको संख्या १४ बाट २६ पुगेको छ । अहिले संख्या किन बढाइयो ? महामन्त्री प्रदीप पौडेल नेतृत्वको विधान संशोधन समितिको तर्कअनुसार कांग्रेसमा महाधिवेशन प्रतिनिधिको संख्या बढेको छ । १४औं महाधिवेशनमा ४ हजार ७४३ प्रतिनिधि रहेकोमा अहिले ७ हजार ५०० भन्दा बढी प्रतिनिधि छन् । पौडेलले केन्द्रीय संरचनाको आकार सदस्यताको अनुपातमा ठूलो नभएको बताएका छन् । उनले युवा सहभागिता बढाइएको र जनसम्पर्क समिति, बुद्धिजीवी, श्रमिक तथा द्वन्द्वपीडितलगायत समूहलाई प्रतिनिधित्व दिइएको बताएका छन् । उनले नेतृत्वमा जाने आकांक्षी बढेकाले त्यसको व्यवस्थापन गर्नुपर्ने बाध्यता पनि रहेको बताए । त्यसैले संख्या बढाउनुको कारण केवल गुट व्यवस्थापन हो भन्नु तथ्य नभएर त्यो आलोचकको व्याख्या वा राजनीतिक दाबी भएको पौडेलको भनाइ छ । तर आकांक्षी व्यवस्थापन पनि एउटा कारण हो भन्ने कुरा चाहिँ कांग्रेसकै महामन्त्री पौडेलको सार्वजनिक भनाइबाट पुष्टि हुने कांग्रेसका अर्को समूहका नेताहरू बताउँछन् । नेता डा. प्रकाशशरण महतले गगन आफ्नै बोलीमा अडिन नसकेको टिप्पणी गरे । ‘अहिले गगन थापा सभापति छन् । उनकै नेतृत्वमा कांग्रेसको विधान संशोधन भएर पदाधिकारी १४ बाट २६ र केन्द्रीय कार्यसमिति १६७ बाट २९७ सदस्यीय बनेको छ,’ डा. महतले भने । हिजो देउवा नेतृत्वले पदाधिकारी बढाउँदा बेथिति देख्ने थापा अहिले आफै नेतृत्वमा पुगेपछि त्यसभन्दा ठूलो संरचना बनाइरहेका छन् । त्यसैले उनको पुरानो राजनीतिक मापदण्ड र अहिलेको व्यवहारबीच असंगति देखिने डा. महतको दाबी छ । यो दाबीलाई समर्थन गर्ने सबैभन्दा बलियो आधार स्वयं थापाको पुरानो अभिव्यक्ति भएको डा. महतले औंल्याए । तर अर्को पक्ष भने आजको कांग्रेस १४औं महाधिवेशनको कांग्रेस नभएको दावी गर्छ । केन्द्रीय सदस्य छन्द पहराई भन्छन्, ‘प्रतिनिधि संख्या बढेको छ, नयाँ पुस्ताको सहभागिता बढेको छ र समावेशी प्रतिनिधित्व विस्तार गर्नुपर्ने अवस्था आएको छ ।’ त्यसैले अहिलेको संरचनागत परिवर्तनलाई २०७८ को परिस्थितिसँग हुबहु तुलना गर्न नमिल्ने उनको तर्क छ । अडान बदलियो कि परिस्थिति ? राजनीतिक विश्लेषक परसुराम घिमिरेका अनुसार यस बहसको सबैभन्दा महत्त्वपूर्ण पक्ष यही हो । उनी भन्छन्, ‘गगन थापाले आफ्नो पुरानो भनाइ फिर्ता लिएका छन् भन्ने कुनै स्पष्ट सार्वजनिक अभिलेख भेटिँदैन । उनले अहिलेको विधान संशोधनलाई २०७८ मा आफूले विरोध गरेको प्रक्रियाभन्दा किन फरक भनेर स्पष्टीकरण पनि स्पष्ट दिएको देखिँदैन ।’ गगनको २०७८ को अभिव्यक्ति र अहिलेको निर्णयबीच स्पष्ट तुलना हुने अवस्था बनेको घिमिरेको दाबी छ । यही विषयले नै गगन थापामाथि राजनीतिक प्रश्न खडा गर्ने कांग्रेसका अर्का नेता कृष्णप्रसाद खरेल दाबी गर्छन् । कांग्रेस गुल्मी काठमाडौं सम्पर्क समितिका सभापति समेत रहेका खरेल प्रश्न गर्छन्, ‘हिजो महाधिवेशनको मुखमा विधान संशोधन गर्नु बेथिति थियो भने आजको संशोधन त्यसबाट कसरी फरक छ ?’ ‘यदि फरक छ भने त्यसको आधार के हो ? पार्टीको आकार बदलिएको हो ?,’ उनी प्रश्न थप्छन् । विश्लेषक घिमिरेका अनुसार अहिलेको विवाद २९७ सदस्यीय केन्द्रीय समिति आवश्यक छ कि छैन भन्नेभन्दा पनि केही गहिरो छ । यो प्रश्न कांग्रेसको विधानभन्दा पनि राजनीतिक मापदण्डको स्थिरतासँग जोडिएको बताउँछन् उनी ।
नेपाल कोर एफएचआईआर कार्यान्वयन निर्देशिका स्वीकृत
काठमाडौं । स्वास्थ्य तथा खाद्य स्वच्छता मन्त्रालयले नेपाल कोर एफएचआईआर कार्यान्वयन निर्देशिकाको संस्करण १.०.० स्वीकृत गरी लागू गरेको छ । निर्देशिकाले नेपालका स्वास्थ्य संस्थामा सञ्चालनमा रहेका विद्युतीय चिकित्सा अभिलेख तथा अस्पताल सूचना प्रणालीमा बिरामीको स्वास्थ्यसम्बन्धी विवरण भण्डारण तथा एक–आपसमा आदानप्रदान गर्ने साझा राष्ट्रिय मापदण्ड निर्धारण गरेको छ । निर्देशिकाले बिरामी, स्वास्थ्यकर्मी, स्वास्थ्य संस्था, रोग, प्रयोगशाला, औषधि, खोप तथा प्रेषणलगायत स्वास्थ्यसम्बन्धी विवरणको ढाँचामा एकरूपता कायम गर्ने आधार तय गरेको छ । यससँगै विभिन्न स्वास्थ्य संस्थामा प्रयोग भइरहेका विद्युतीय चिकित्सा अभिलेख प्रणालीबीच अन्तरसञ्चालनयोग्यता कायम गर्न राष्ट्रिय आधार तयार भएको छ । निर्देशिका पूर्ण रूपमा कार्यान्वयनमा आएपछि नागरिकको स्वास्थ्यसम्बन्धी विवरण विभिन्न स्वास्थ्य संस्थामा छरिएर रहने अवस्थालाई कम गर्दै आवश्यकताअनुसार स्वास्थ्य संस्थाबीच सूचना आदानप्रदान गर्न सहज हुने मन्त्रालयले जनाएको छ । बिरामी एक स्वास्थ्य संस्थाबाट अर्कोमा प्रेषण हुँदा यसअघि गरिएको उपचारको विवरणसमेत उपलब्ध हुने, एउटै स्वास्थ्य परीक्षण पटक९पटक गर्नुपर्ने अवस्था घट्ने, स्वास्थ्य बीमाको दाबी प्रशोधनमा सहजता हुने तथा राष्ट्रियस्तरमा गुणस्तरीय र तुलनायोग्य स्वास्थ्य तथ्याङ्क प्राप्त गर्न सहयोग पुग्ने मन्त्रालयको भनाइ छ । मन्त्रालयले उक्त निर्देशिका विद्युतीय माध्यमबाट सम्पूर्ण स्वास्थ्य संस्था, स्वास्थ्य सेवा प्रदायक, शैक्षिक तथा अनुसन्धान संस्था र अन्य सरोकारवालाका लागि सार्वजनिक गरेको छ ।
अस्पताल र पीडित पक्षबीच सहमति
काठमाडौं । काठमाडौंको थापाथलीस्थित परोपकार प्रसूति तथा स्त्रीरोग अस्पतालमा सुत्केरी महिलाको मृत्यु भएको घटनामा अस्पताल र पीडित पक्षबीच सहमति भएको छ । धादिङको गजुरी गाउँपालिका–८ की ३२ वर्षीया रविना तामाङको मृत्युको विषयमा परिवार र अस्पतालबीच छलफल भएपछि सहमति जुटेको अस्पतालका निर्देशक श्रीप्रसाद अधिकारीले जानकारी दिए । सहमतिपछि परिवारले रविनाको शव बुझेर लगिसकेको उनले बताए । अस्पतालले भने रविनाको मृत्युमा चिकित्सकीय लापरवाही नभएको दाबी गरेको छ । निर्देशक अधिकारीका अनुसार शल्यक्रियामार्फत बच्चा जन्माएको करिब १८ घण्टापछि बेडबाट उठाएर ह्विलचेयरमा राख्ने क्रममा रविना अचानक बेहोस भएकी थिइन् । तत्काल उपचारको प्रयास गरिए पनि उनको मृत्यु भएको अस्पतालको भनाइ छ । पीडित परिवार । मृतकका आफन्तले भने ह्विलचेयरमा राख्ने क्रममा अर्को ह्विलचेयरसँग ठोक्किँदा रविनालाई चोट लागेको र त्यसपछि उनको अवस्था बिग्रिएको आरोप लगाएका थिए । अस्पतालले भने ह्विलचेयर ठोक्किनुलाई मृत्युको कारण मान्न नसकिने जनाएको छ । ‘डाक्टरको गल्ती देखिएको छैन । ह्विलचेयर ठोक्किएको विषयलाई मृत्युको कारण भनिएको छ, तर त्यसरी ठोक्किँदैमा आधा घण्टा वा एक घण्टाभित्रै मृत्यु हुने होइन,’ निर्देशक अधिकारीले भने । अधिकारीका अनुसार शल्यक्रियाको भोलिपल्टसम्म रविना पानी तथा चिया सेवन गर्दै सामान्य अवस्थामा थिइन् । उनको रक्तचापसमेत सामान्य रहेको अस्पतालले जनाएको छ । बेहोस हुने क्रममा एकपटक रक्तचाप बढे पनि त्यसपछि सामान्य अवस्थामा आएको अधिकारीले बताए । उनका अनुसार बिरामीको अवस्था हेर्दा एम्बोलिजम, हृदयघात वा ब्रेन हेमोरेजमध्ये कुनै कारणले मृत्यु भएको हुन सक्ने चिकित्सकहरूको आशंका थियो । यकिन कारण पत्ता लगाउन पोस्टमार्टम गर्न अस्पतालले आग्रह गरे पनि परिवारले नमानेको अधिकारीले बताए । ‘बिरामी सामान्य अवस्थामा हुनुहुन्थ्यो । उठ्ने क्रममा अचानक बेहोस हुनुभयो । यस्तो अवस्थामा एम्बोलिजम, हार्ट अट्याक वा ब्रेन हेमोरेजमध्ये कुनै कारण हुन सक्छ,’ अधिकारीले भने, ‘त्यसैले पोस्टमार्टम गरौं भनेका थियौं, तर परिवारले मानेन ।’ ब्रेन हेमोरेज भएको अवस्थामा अचानक रक्तचाप बढ्न सक्ने भएकाले चिकित्सकहरूले त्यसतर्फ पनि आशंका गरेको उनको भनाइ छ । अस्पतालका अनुसार रविनाको शल्यक्रिया वरिष्ठ चिकित्सकबाट गरिएको थियो । उपचार प्रक्रियामा चिकित्सकीय त्रुटि नभएको निर्देशक अधिकारीको दाबी छ । घटनापछि क्षतिपूर्तिको विषयसमेत उठेको थियो । तर सरकारी अस्पताल भएकाले अस्पतालले क्षतिपूर्ति दिन नसक्ने र उपचारका क्रममा आवश्यक सहजीकरण तथा सहयोग गर्न सक्ने परिवारलाई जानकारी गराइएको अधिकारीले बताए । अधिकारीका अनुसार मृतककी आमाको पनि बच्चा जन्माउने क्रममा यस्तै प्रकृतिको मृत्यु भएको पारिवारिक इतिहासबारे अस्पताललाई जानकारी भएको थियो । यसले पनि रविनाको मृत्युको सम्भावित कारणबारे थप चिकित्सकीय आशंका उत्पन्न गरेको उनले बताए ।
नेपाली कांग्रेसको सहमहामन्त्रीमा उम्मेदवारी
काठमाडौंं । नेपाली कांग्रेसका नेता एवं पूर्वमन्त्री जीवनबहादुर शाहीले कर्णालीको समृद्धि र देशको समुन्नतिका लागि पक्षमा दृढ रहेको बताएका छन् । काठमाडौंमा जारी कांग्रेसको १५औँ महाधिवेशनमा सहमहामन्त्री पदमा उम्मेदवारी दिँदै केन्द्रीय सदस्य शाहीले पिछडिएको क्षेत्र र कर्णाली प्रदेशको सशक्त बनाउने बताएका हुन् । नेता शाहीले प्रभावकारी प्रतिनिधित्वका लागि पार्टीको महाधिवेशनमा सहमहामन्त्री पदमा आफ्नो उम्मेदवारी दिएको स्पष्ट पारे । शाहीले कर्णालीको भूगोल, उत्पीडित, दलित, जनजाति तथा पिछडिएको क्षेत्रका जनताको आवाजलाई पार्टीको नीति निर्माण तह र केन्द्रीय पदाधिकारी तहसम्म पु¥याउनका लागि आफूले उम्मेदवारी दिएको बताए । कर्णाली प्रदेशका पूर्वमुख्यमन्त्री शाहीले कर्णालीको समग्र विकास र त्यहाँका जनताको जीवनस्तर उकास्नु नै आफ्नो मुख्य राजनीतिक एजेण्डा रहेको उल्लेख गरे । ‘विकासबिना कुनै पनि भूगोलको समृद्धि सम्भव छैन र विकास अभावमा जनताको मनोबल पनि उच्च हुन सक्दैन । भौगोलिक रूपमा पछि पारिएको कर्णालीलाई राष्ट्रिय राजनीतिको मूलधारमा ल्याउन र समावेशीकरणलाई व्यवहारमा उतार्न पदाधिकारी तहमा कर्णालीको प्रतिनिधित्व अत्यावश्यक छ,’ शाहीले भने । यसअघि पनि ११औँ महाधिवेशनदेखि १४औँ महाधिवेशनसम्म लगातार केन्द्रीय सदस्यमा निर्वाचित भइ सहमहामन्त्रीमा समेत प्रतिस्पर्धा गरिसकेको प्रसंग उल्लेख गर्दै नेता शाहीले कर्णालीको पीडा र भूगोलको अवस्था बुझेको नेतृत्वले मात्रै यस क्षेत्रको सही प्रतिनिधित्व गर्न सक्ने दावी गरे । शाहीले अनुभव र युवा जोशको समिश्रणपार्टीभित्र चलिरहेको युवा नेतृत्वको बहस र पुस्तान्तरणका विषयमा टिप्पणी गर्दै राजनीति र पेसागत दक्षता फरक कुरा भएको बताए । शाहीले पार्टी र देश सञ्चालनका लागि अनुभवी पुराना नेताहरूको मार्गदर्शन र युवाको नयाँ विचार तथा उत्साहको समीश्रण हुनुपर्नेमा जोड दिए । ‘एउटा परिवारमा बाजे, बुबा र छोराको जुन सम्बन्ध र सहकार्य हुन्छ, राजनीतिमा पनि त्यस्तै अन्तरपुस्ता समन्वय आवश्यक छ, केवल युवा वा केवल पाका नेताहरूले मात्रै सिङ्गो देश वा पार्टी चलाउन सक्दैनन्, त्यसैले अनुभव र नवीनताको सन्तुलन हुनुपर्छ,’ उनले भने । नेता शाहीले पार्टीले ३५ वर्षमुनिका युवालाई खुला तथा आरक्षण कोटाबाट अनिवार्य प्रतिनिधित्व गराउने व्यवस्था गरेको र ती युवालाई अग्रजहरूले राजनीति र मुलुकको रणनीतिबारे प्रशिक्षित र मार्गदर्शन गर्दै लैजानुपर्ने धारणा व्यक्त गरे । उनले महाधिवेशनले पार्टीलाई एकढिक्का बनाउनेविगतका चुनाव तथा आन्तरिक अभ्यासमा केही उतारचढाव आए पनि यो महाधिवेशनले नेपाली कांग्रेसलाई एकीकृत र थप मजबुत बनाउने विश्वास व्यक्त गरे। उनले संगठनभित्रका असन्तुष्ट पक्ष र बाहिरिएका साथीहरूलाई समेटेर अगाडि बढ्न नेतृत्व तहबाट पहल भइरहेको जानकारी दिए । ‘सबैलाई मिलाएर लैजाने वातावरण निर्माण भइरहेको छ । यो महाधिवेशन एकताको महाधिवेशन बन्नेछ र यसले पार्टीलाई नयाँ ऊर्जाका साथ एकढिक्का बनाएर अगाडि बढाउनेछ,’ नेता शाहीले भने ।
पल्सर आरपीएम बुटवलमा युवाको ऊर्जा र स्थानीय प्रतिभाको प्रदर्शन
काठमाडौं । युवापुस्ताको ऊर्जा, सिर्जनशीलता र सडक संस्कृतिलाई एउटै मञ्चमा प्रस्तुत गर्दै आयोजना गरिएको पल्सर आरपीएम बुटवल सफलतापूर्वक सम्पन्न भएको छ । बुटवलस्थित ढुंगा स्केट–एड स्केट पार्कमा आयोजित कार्यक्रममा करिब २ हजार ५०० जनाको उत्साहपूर्ण सहभागिता रहेको आयोजकले जनाएको छ । कार्यक्रममा बाइक स्टन्ट, बीएमएक्स, स्केटबोर्डिङ, बिबोइङ, ग्राफिटी तथा डिजे प्रस्तुतिलगायत सडक संस्कृतिसँग सम्बन्धित विभिन्न गतिविधि प्रस्तुत गरिएको थियो । पल्सर एन१६० मार्फत गरिएको स्टन्ट प्रदर्शनले कार्यक्रमको आकर्षण थप बढाएको थियो । कार्यक्रममा स्थानीय कलाकार, राइडर तथा विभिन्न विधाका प्रतिभाको सहभागिता रहेको थियो । स्थानीय डिजे पिज्जा र डिजे नकआउटको प्रस्तुतिले पनि सहभागीलाई मनोरञ्जन प्रदान गरेको थियो । त्यस्तै, पल्सर एन१६० र एनएस२०० का डिस्प्ले तथा टेस्ट राइड जोन राखिएको थियो । यसमार्फत सहभागीले मोटरसाइकललाई नजिकबाट हेर्नुका साथै टेस्ट राइडको अनुभव लिन पाएका थिए । कफी, खानाका परिकार तथा गिफ्ट पप–अप स्टलले कार्यक्रमलाई थप अन्तरक्रियात्मक बनाएको थियो । पल्सर आरपीएम मनोरञ्जनमा मात्र सीमित नभई स्थानीय प्रतिभा तथा युवा समुदायलाई आफ्नो सीप, रुचि र सिर्जनशीलता प्रस्तुत गर्ने मञ्च उपलब्ध गराउने उद्देश्यले आयोजना गरिएको हो । काठमाडौंमा सुरु भएको पल्सर आरपीएमको यात्रा बुटवलसम्म विस्तार हुँदै स्थानीय युवा समुदाय र सडक संस्कृतिसँग जोडिएको कम्पनीले जनाएको छ । कार्यक्रम सफल बनाउन योगदान पुर्याउने कलाकार, राइडर, डिजे, साझेदार, सञ्चारमाध्यम, आयोजक टोली, विक्रेता तथा सहभागी सबैलाई बजाज पल्सरले धन्यवाद दिएको छ । कम्पनीका अनुसार बुटवलसम्म आइपुगेको पल्सर आरपीएमको यात्रा अब नयाँ सहर र नयाँ समुदायसँग जोडिँदै अघि बढ्नेछ ।
एनसेल ग्राहकलाई ट्रान्क्विलिटी स्पामा बाइ वान गेट वानसहित विशेष छुट
काठमाडौं । एनसेलका ग्राहकहरूले अब ट्रान्क्विलिटी स्पामा स्पा तथा सौन्दर्य सेवामा विशेष छुट तथा ‘बाइ वान गेट वान’ अफर पाउने भएका छन् । एनसेल र ट्रान्क्विलिटी स्पाबीचको साझेदारीअन्तर्गत ग्राहकका लागि यस्तो योजना सार्वजनिक गरिएको हो । रु ४९९ वा सोभन्दा बढी मूल्यको प्रिपेड प्याक वा पोस्टपेड प्लान खरिद गर्ने ग्राहकले सिग्नेचर मसाज, बडी स्क्रब, शिरोधारा र प्रिमियम केयर फेसियलमा ‘बाइ वान गेट वान’ अफर पाउनेछन् । अर्थात्, दुई जनाले एक जनाको मूल्यमा यी सेवा लिन सक्नेछन् । त्यस्तै, एक्लै सेवा लिने ग्राहकले स्पा सेवामा २५ प्रतिशत र ब्युटी सेवामा २० प्रतिशत छुट पाउनेछन् । यी सुविधा नेपाली नागरिकका लागि मात्र उपलब्ध हुने कम्पनीले जनाएको छ । रु. ९९ देखि रु. ४९९ भन्दा कम मूल्यका प्याक वा प्लान प्रयोग गर्ने ग्राहकले पनि विशेष छुट पाउनेछन् । युवा तथा अन्य ग्राहकले स्पा सेवामा २० प्रतिशत एकमुस्ट छुट पाउनेछन् भने पर्यटकले १० प्रतिशत छुट पाउनेछन् । साझेदारीसम्बन्धी सम्झौता एनसेलका प्रोडक्ट्स डाइरेक्टर ललित शारडा र ट्रान्क्विलिटी स्पाका चिफ अपरेटिङ अफिसर रनिल फैजुले हालै एक कार्यक्रमबीच आदानप्रदान गरेका थिए । अफरको लाभ लिन ग्राहकले एनसेल एप खोलेर ‘पार्टनर्ड सर्भिसहरू’ मा गई ट्रान्क्विलिटी स्पा छनोट गरी आधिकारिक आउटलेटमा लाभ रिडिम गर्न सक्नेछन् । एपमा देखाइने लाभ ग्राहकले खरिद गरेको प्याक वा प्लानका आधारमा निर्धारण हुनेछ । योग्य नभएका ग्राहकले सम्बन्धित योग्य प्याक वा योजना खरिद गरी सुविधा लिन सक्नेछन् । एनसेलका चिफ कन्ज्युमर बिजनेस अफिसर उपाङ्ग दत्ताले साझेदारीले ग्राहकलाई कनेक्टिभिटीबाहेक अन्य क्षेत्रमा पनि थप मूल्य र सुविधा प्रदान गर्ने बताए । उनका अनुसार वेलनेस अनुभवलाई एनसेलको इकोसिस्टममा जोडेर ग्राहकका लागि थप सान्दर्भिक र पहुँचयोग्य लाभ उपलब्ध गराउने लक्ष्य राखिएको छ । एनसेलले आफ्नो बढ्दो पार्टनर इकोसिस्टममार्फत ग्राहकलाई थप मूल्य र सुविधा प्रदान गर्ने निरन्तर प्रयासअन्तर्गत यो सहकार्य गरिएको जनाएको छ ।
चिरीबाबुले दिए कांग्रेस केन्द्रीय सदस्यमा उम्मेदवारी
काठमाडौं । ललितपुर महानगरपालिकाका मेयर चिरिबाबु महर्जनले नेपाली कांग्रेसको १५औँ महाधिवेशनमा केन्द्रीय सदस्यमा उम्मेदवारी दर्ता गराएका छन् । मंगलबार राष्ट्रिय सभागृहमा उनले खुलातर्फ कांग्रेस केन्द्रीय सदस्य पदमा मनोनयन दर्ता गराएका हुन् । उनले मनोनयन दर्तापछि सञ्चारकर्मीसँग कुरा गर्दै सभापतिमा गगन थापा भारी मतले निर्वाचित हुने दाबी गरे । कांग्रेसभित्र प्रतिस्पर्धा हुनु सामान्य कुरा रहेको उनको भनाइ छ । उनले भने, ‘नेपाली कांग्रेस भनेको नेपालको लार्जेस्ट डेमोक्रेटिक पार्टी हो । प्रजातान्त्रिक पार्टीभित्र कम्पिटिसन हुनु भनेको सामान्य कुरा हो । यसलाई अचम्म मान्नुपर्ने आवश्यकता छैन । तर लेखिराख्नुस्, गगनकुमार थापा धेरै भोट ल्याएर उहाँ जित्नुहुन्छ ।’ ललितपुर महानगरपालिकाको दुई पटक मेयर भइसकेका महर्जन अब पार्टी राजनीतिमा सक्रिय हुने तयारीमा लागेका हुन् । संविधानले स्थानीय तहको प्रमुख तथा उपप्रमुख लगातार दुई पटकभन्दा बढी हुन बन्देज लगाएको छ ।
