विकासन्युज

छ महिनामा तीन अर्ब ५१ करोड राजश्व सङ्कलन, अन्तःशुल्क ५१ प्रतिशतले घट्याे

विराटनगर । आन्तरिक राजश्व कार्यालय विराटनगरले चालू आर्थिक वर्षको पहिलो छ महिनामा कूल रु तीन अर्ब ५१ करोड ५३ लाख नौ हजार राजश्व सङ्कलन गरेको छ । यो लक्ष्यको तुलनामा करिब २८ प्रतिशतले कमी हो । कार्यालयले सो अवधिमा रु चार अर्ब ४९ करोड ६३ लाख ५५ हजार राजश्व सङ्कलन गर्ने लक्ष्य लिएको थियो । गत वर्ष सो अवधिमा कार्यालयले रु तीन अर्ब १८ करोड १३ लाख ३१ हजार राजश्व सङ्कलन गरेको कार्यालय प्रमुख विमल सापकोटाले जानकारी दिए । कार्यालयका अनुसार आर्थिक वर्ष २०७४/७५ मा सो अवधिमा रु दुई अर्ब ४६ करोड ५३ लाख ९० हजार राजश्व सङ्कलन गरेको थियो । चालू आर्थिक वर्षमा लक्ष्यभन्दा राजश्व कम उठे पनि गएको वर्षभन्दा रु ३३ करोड ३९ लाख ७८ हजार राजश्व बढी सङ्कलन भएको छ । चालू आर्थिक वर्षमा सङ्कलित राजश्वमा आयकरतर्फ रु एक अर्ब ४९ करोड ५६ लाख ७१ हजार, मूल्य अभिवृद्धि करतर्फ रु ८९ करोड ५३ लाख ३० हजार, अन्तःशुल्कतर्फ रु एक अर्ब १२ करोड ३८ लाख तीन हजार, स्वास्थ्य करतर्फ रु ५३ हजार र शिक्षा करतर्फ रु चार लाख ५२ हजार छन् । चालू आर्थिक वर्षको पहिलो छ महिनाको अवधिमा अन्तःशुल्कतर्फ रु दुई अर्ब २१ करोड ४३ लाख चार हजार राजश्व सङ्कलन गर्ने लक्ष्य लिएकोमा सो अवधिमा रु एक अर्ब १२ करोड ३८ लाख तीन हजार मात्र सङ्कलन गरेको छ । यो लक्ष्यको तुलनामा करिब ५१ प्रतिशत कम हो । अन्तःशुल्क कम सङ्कलन हुनुमा मादक पदार्थको कारोवारमा कमी आउनु, विकास निर्माण कार्यले तीव्रता नलिनु र जग्गाको कारोवार नहुनुजस्ता प्रमुख कारण भएको प्रमुख सापकोटाले जानकारी दिएका छन् । उनका अनुसार राजश्व आयकरतर्फ १०३ प्रतिशत, मूल्य अभिवृद्धि करतर्फ १०९ प्रतिशतले वृद्धि भएको छ भने अन्तःशुल्कमा ५१ प्रतिशत कमी देखिएको छ । असोज महिनादेखि पुस मसान्तसम्म अन्तःशुल्कमा क्रमशः वृद्धि भइरहेको प्रमुख सापकोटाले बताए । रासस

पर्वतमा प्लास्टिकको चामल भेटिएको आशङ्का, बिक्री वितरणमा रोक

पर्वत । पर्वतको कुश्मा नगरपालिका–५ मेलमिलाप चोकस्थित स्थानीय प्रेम जैसी लामिछानेको घरमा किनेर ल्याएको चामल प्लास्टिकको भएको पाइएको छ । लामिछानेको घरमा आज बिहान पकाएको भातमा प्लास्टिक भेटिएको हो । भातको डल्ला क्रिकेट बलजस्तै उफ्रिएपछि लामिछाने परिवारले प्लास्टिकको चामल भएको आशङ्का गर्दै सशङ्कित भएका छन् । गणेश खाद्य उद्योग पुरानो पर्सा बजार चितवनले उत्पादन गरेको जीरा मसिनो चामलको भात बल जसरी उफ्रिएपछि स्थानीयवासी सशङ्कित बनेका हुन् । लामिछानेले केही समय पहिले स्थानीय व्यापारी लेखनाथ शर्माको उमानन्द किराना स्टोर्सबाट चामल किनेर ल्याएको र पकाएर हेर्दा भातको डल्ला परेको र प्लास्टिक जस्तो गरी उफ्रिन थालेको उनले बताए । उनका अनुसार अरुबेला खाना बनाउँदा केही समस्या नभए पनि यो चामल भने ढिलो पाक्ने र खानाको स्वाद अर्कै आएकाले डल्ला पारेर उफ्रिएपछि शङ्का लागेको बताए । । आज बिहान यस्तो समस्या देखेपछि उनले तत्कालै जिल्ला प्रशासन कार्यालय र उद्योग वाणिज्य सङ्घलाई खबर गरेका थिए । खबरपश्चात पुगेको टोलीले अनुगमन गरी उक्त चामललाई खाद्य तथा गुणस्तर विभागमा अनुसन्धानका लागि पठाउने तयारी गरेको सहायक प्रमुख जिल्ला अधिकारी अमृत सुवेदीले जानकारी दिएका छन् । शङ्कास्पद भेटिएपछि उक्त ब्राण्डको चामल कुश्माबजारमा विक्रीका लागि रोकसमेत लगाइएको छ । २५ किलोग्राम तौलको बोरामा यस्तो समस्या देखिएको हो ।रासस

दिनहुँ बढ्दै अपराध, बढी मुद्दा लागुऔषधका

बाँके । केही वर्षयता बाँकेमा आपराधिक घट्ना बढ्दै गएका छन् । पछिल्लो पाँच वर्षयता आपराधिक घटनामा वृद्धि हुँदै गएको जिल्ला प्रहरी कार्यालय बाँकेको तथ्याङ्कले देखाएको छ । सङ्गठीत अपराध, चन्दा आतङ्क, महिला हिंसा, हत्याजस्ता गम्भीर प्रकृतिका घटनामा प्रहरीले सूक्ष्म अनुसन्धान गर्न नसक्दा अपराधको दर उच्च रुपमा बढेको हो । विगतभन्दा पछिल्लो वर्ष हत्या, बलात्कार, अपहरण, लागुऔषध कारोबार, चोरी डकैतीजस्ता गम्भीर प्रकृतिका अपराध बढेको जिल्ला प्रहरी कार्यालय बाँकेले जनाएको छ । अपराधको सङ्ख्या बढ्दैमा मात्र सुरक्षा खस्कियो भन्न नमिल्ने प्रहरीको दाबी छ । “अपराधबारे प्रहरीमा रिपोर्टिङ गर्ने क्रममा वृद्धि भएकाले सङ्ख्या बढेको हुन सक्छ”, बाँकेका प्रहरी प्रमुख एवं प्रहरी उपरीक्षक वीरबहादुर ओलीले भने, “शान्ति सुरक्षा भनेको तथ्याङ्कभन्दा पनि अनुभूत गर्ने कुरा हो ।” प्रहरी उपरीक्षक ओलीले आम नागरिकमा प्रहरीप्रतिको विश्वास बढेका कारण मुद्दाको चाप बढेको बताए । उनले भने, “विगतमा प्रहरीमा आउन हिच्किचाउनेहरु आज सहजै प्रहरी कार्यालयमा आएर न्याय खोज्न थालेका छन् । यो अपराधरहित समाज निर्माणका लागि राम्रो पक्ष हो ।” पछिल्लो समय नागरिक सचेतना तथा प्रहरीप्रतिको विश्वासले मुद्दा दर्ता गर्नेको सङ्ख्या बढेको उनको दाबी छ । प्रहरी उपरीक्षक ओलीका अनुसार जिल्लामा सबैभन्दा बढी मुद्दा लागुऔषधका छन् । अन्य मुद्दाभन्दा लागुऔषधका मुद्दा बढ्दै गएको प्रहरीको तथ्याङ्कले देखाएको हो । आव २०७१/०७२ मा ९९, आव २०७२/०७३ मा ७८, आव २०७३/०७४ मा १३७, आव २०७४/०७५ मा १४७ र आव २०७५/०७६ मा २४९ वटा लागुऔषधका मुद्दा दर्ता भएका छन् । चालू आवको पछिल्लो ६ महिनामा लागुऔषधका १०८ मुद्दा दर्ता भएका छन् । जिल्ला प्रहरी कार्यालय बाँकेले जनाएको छ । जिल्ला प्रहरी कार्यालयका अनुसार चालू आवको पछिल्लो ६ महिनामा ३०२ किलोग्राम लागुऔषध गाँजा, चरेश ९०९ ग्राम, अफिम चार किलो, कोरेक्स एक लिटर, नाइट्रोजेपाम दुई हजार ९२३ ट्याब्लेट बरामद गरेको छ । यसैगरी, जिल्लामा बैंकिङ कसुरसम्बन्धी मुद्दा पनि उल्लेख्य रुपमा बढेको छ । आर्थिक वर्ष २०७४/०७५ मा २४, आव २०७५/०७६ मा १२२ र चालू आवको पहिलो ६ महिनामा ६ वटा बैंकिङ कसुरसम्बन्धी मुद्दा जिल्ला प्रहरी कार्यालयमा दर्ता भएका छन् । त्यस्तै आव २०७१/०७२ मा कूल ७३८ मुद्दा जिल्ला प्रहरी कार्यालयमा दर्ता भएको थियो भने आव २०७५/०७६ मा कूल एक हजार १५६ मुद्दा दर्ता भएको छ । यसले पाँच वर्षको अवधिमा मुद्दा दर्ताको सङ्ख्या दोब्बरले वृद्धि भएको देखाएको छ । जिल्ला प्रहरी कार्यालय बाँकेमा आव २०७२/०७३ मा ७५५, आव २०७३/०७४ मा ८५५, आव २०७४/०७५ मा एक हजार २१ मुद्दा दर्ता भएको तथ्याङ्क छ । चालू आवको पहिलो ६ महिनामा ५६४ मुद्दा दर्ता भएका छन् । यो गत आर्थिक वर्षको सोही अवधिको तुलनामा १९ प्रतिशतले बढी हो । “चालू आर्थिक वर्षको अहिलेसम्म ५६९ मुद्दा फस्र्यौट भएका र ५४ मुद्दा अनुसन्धान प्रक्रियामा रहेका छन्”, प्रहरी उपरीक्षक ओलीले भने, “चालू आवको पछिल्लो ६ महिनामा ६२३ मुद्दामा ७७३ पुरुष र ३३ महिलालाई मुद्दा प्रक्रियामा अनुसन्धानका लागि नियन्त्रणमा लिएको छ ।” उनले चालू आवको ६ महिनामा विभिन्न ४७ शीर्षकमा ५६४ मुद्दा दर्ता भएको जानकारी दिएका छन् । सहकारीको रु ५२ करोड अपचलनको मुद्दा अनुसन्धान गरी अदालत पठाएको जानकारी दिँदै उनले हत्या, आगजनी, लुटपाटलगायतका घटनाको अनुसन्धान गरी कानुनी कारवाही गरेको बताए । बाँकेमा चालू आर्थिक वर्षको पुस महिनासम्म १२ हजार ६५० सवारी साधन कारवाहीमा परेका छन् । कारवाहीमा परेका सवारी साधन तथा सवारी धनीबाट यस अवधिमा रु ६९ लाख ९ हजार राजश्व सङ्कलन गरिएको जिल्ला प्रहरी कार्यालयले जनाएको छ । गत वर्ष ३० हजार ५६२ सवारी साधनबाट रु एक करोड ६७ लाख ७८ हजार ५०० राजश्व सङ्कलन भएको थियो । त्यस्तै प्रहरीले चालू आवको ६ महिनामा ८८ जना जुवाडेलाई कारवाही गरेको छ । जिल्ला प्रहरी कार्यालय बाँकेले ६ महिनामा ५९ जना फरार अभियुक्तलाई पक्राउ गरेको जनाएको छ । तीमध्ये फरार भएका १४ र अदालतबाट सजाय तोकिएका फरार ४५ जना अभियुक्त रहेका छन् । “फरार घोषित अपराधीलाई पक्राउ गरी अदालत बुझाएका छौँ”, प्रहरी उपरीक्षक ओलीले भने । यसैगरी पछिल्लो ६ महिनाको अवधीमा आगलागीका २२ घटना नियन्त्रणका लागि प्रहरी परिचालन गरिएको उनले बताए । रासस

वर्षाका कारण रौतहटमा १७ करोड बढीकाे इँटा नष्ट

वीरगञ्ज । लगातार दुई दिन परेको वर्षले रौतहटका ६१ वटा इँटाभट्टामा पोल्न तयारी अवस्थामा राखिएका लाखौँ इँटा नष्ट भएका छन् । गत बिहीबार र शुक्रबार परेको पानीले यहाँका इँटाभट्टामा पोल्न राखिएको ८० प्रतिशत इँटा नष्ट भएपछि रु १७ करोडभन्दा बढीको क्षति भएको इँटा उत्पादक सङ्घ रौतहटका अध्यक्ष रामविनोद साहले राससलाई बताए । अध्यक्ष साहले भने, “पोल्नलाई तयारीमा राखिएका ८० प्रतिशत इँटा नष्ट भए, एउटा भट्टामा कम्तीमा रु १० लाखभन्दा बढी काँचो इँटा पानीले गलेर नष्ट भयो ।” पोल्न तयारी राखिएको इँटा पानीले गलेर नष्ट भएको छ भने अर्कोतिर मजदूरको खर्च लागेकाले दोहोरो घाटा बेहोर्नु परेको इँटा व्यवसायीको गुनासो छ । गाडीको आयात घट्दा भन्सार राजश्व प्रभावित तेस्रो मुलुकबाट आयात भई नेपाल भित्रिने गाडीको आयात घट्दा वीरगञ्ज भन्सार कार्यालयको राजश्व असुली प्रभावित भएको छ । चालु आवको ६ महिनामा वीरगञ्ज भन्सार कार्यालयले कूल राजश्वको ७० प्रतिशतमात्र राजश्व असुली गर्न सकेको सो कार्यालयले जनाएको छ । सङ्घीय सरकारले चालु आवको पुस मसान्तसम्म रु ९७ अर्ब ५२ करोड ६५ लाख १६ हजार राजश्व उठाउने लक्ष्य लिएको थियो । तेस्रो मुलुकबाट भित्रिने गाडीको आयातमा भने कमी आएको छ । सो अवधिमा भन्सार कार्यालयले ७० प्रतिशत अर्थात् ६८ अर्ब ७० करोड ३८ लाख ६९ हजारमात्र राजश्व असुली गरेको सो कार्यालयका सूचना अधिकारी विमलकुमार साहले बताए । तोकिएको भन्सार राजश्व लक्ष्य प्राप्ति गर्न तेस्रो मुलुकबाट आयात भई नेपाल भित्रिने सवारीसाधनको मुख्य भूमिका रहन्छ । “चालु आवको ६ महिनामा २१ प्रतिशतले गाडी आयात घटेकाले पनि राजश्व प्रभावित भएको छ”, सूचना अधिकारी साहको भनाइ थियो । त्यसबाहेक पेट्रोलियम पदार्थ तथा क्लिङ्करको आयातमा कमी आएकाले राजश्व प्रभावित भएको हो । कार्यालयले भन्सार महसुलतर्फ चालु आवको पुस समान्तसम्म ४१ अर्ब ७८ करोड २२ लाख ७८ हजार लक्ष्य राखेकोमा ७० प्रतिशतले अर्थात् २९ अर्ब २६ करोड ७५ लाख ५६ हजार राजश्व सङ्कलन गरेको छ । मूल्य अभिवृद्धि करतर्फ ३९ अर्ब ४६ करोड ९८ लाख ८४ हजार राजश्व उठाउने लक्ष्यमा ७२ प्रतिशत अर्थात् २८ अर्ब ५६ करोड ७१ लाख ३७ हजार राजश्व सङ्कलन गरेको छ । यसैगरी, सो कार्यालयले अन्तःशुल्कतर्फ १६ अर्ब २९ करोड ४३ लाख ५४ हजार राजश्व उठाउने लक्ष्य रखेकोमा ६७ प्रतिशत अर्थात् १० अर्ब ९३ करोड ९१ लाख २१ हजार राजश्व सङ्कलन गरेको छ । पाम तेलको कच्चापदार्थ आयातमा कमी आएकाले राजश्व प्रभावित भएको छ । भारत सरकारले हालै मात्र रिफाइन्ड पाम र पामोलिन तेल भारततर्फ पैठारी गर्नमा रोक लगाएपछि नेपालमा आयात हुने सो तेलको कच्चापदार्थ आयातमा कमी देखिएकाले राजश्व प्रभावित हुने बताइएको छ । रासस

पालुङटारमा ठूलो क्षमताको सबस्टेसन बनाइदिउँला, प्रसारण लाइन बनाउन दिनुस्ः घिसिङ

काठमाडौं । मस्र्याङदी करिडोर २२० केभी डबल सर्किट विद्युत् प्रसारण लाइन आयोजना निर्माणमा गोरखामा भइरहेको अवरोध हटाउन पहल सुरु गरिएको छ । आयोजनाको उदीपुर (लमजुङ)–मार्कीचोक (तनहुँ) खण्डअन्तर्गत गोरखाको पालुङटार नगरपालिकाको वडा नं ४ र ५ का बासिन्दाले रुट परिवर्तन माग गर्दै एक वर्षअघिदेखि प्रसारण लाइन निर्माणमा अवरोध गर्दे आएका छन् । नेपाल विद्युत प्राधिकरणले सुरुमा मस्र्याङदी नदीको किनारै किनार प्रसारण लाइन निर्माणको डिजाइन तयार गरेको थियो । तर, नागरिक उड्यन प्राधिकरणले त्यहाँ लाइन निर्माण गरिएमा पालुङटार एयरपोर्टमा विमान उडान र अवतरण गर्न नसकिने बताएपछि रुट परिवर्तन गरिएको थियो । प्राधिकरणले एयरपोर्ट एवं प्रस्तावित स्मार्ट पालुङटार सिटीलाई असर नपर्ने र सामाजिक तथा वातावरणीय क्षति कम हुने गरी वस्ती र जंगलको बीचबाट प्रसारण लाइनको नयाँ रुट तय गरेको छ । लमजुङको गरमवेशीबाट पालुङटार नगरपालिकाको वडा नं ४ र ५ हुँदै मार्कीचोकतर्फ जाने ३७ किलोमिटर लाइनको गरमवेशी– पालुङटार ५.६ किलोमिटर खण्डमा १६ वटा टावर निर्माण गर्नु पर्नेछ । पालुङटारका स्थानीय बासिन्दाले प्रसारण लाइन बस्तीबाट छिराउन खोजिएको भन्दै रुटमा असहमति जनाउँदै आएका छन् । उदीपुर–मार्कीचोक खण्डमा लमजुङतर्फ भने कुनै समस्या छैन । लमजुङमा पर्ने टावर निर्माण सुरु गरिएको छ । ‘गेम चेन्जर आयोजना’को रुपमा निर्माण सुरु गरिएको आयोजनामा अवरोध उत्पन्न भएपछि ऊर्जा, जलस्रोत तथा सिंचाइ मन्त्री वर्षमान पुनको पहलमा गोरखाबाट प्रतिनिधिसभामा प्रतिनिधित्व गर्ने सांसद चुडामणि खड्काको संयोजकत्वमा समन्वय समिति गठन गरिएको छ । समितिमा त्यस क्षेत्रका प्रदेश सभाका सांसद, नगरपालिकाका मेयर, उपमेयर, सहरी विकास मन्त्रालय लगायतका प्रतिनिधि रहेका छन् । पूर्व प्रधामन्त्रीसमेत रहेका गोरखा–२ बाट प्रतिनिनिधिसभाका सांसद डा.बाबुराम भट्टराई, विद्युत प्राधिकरणका कार्यकारी निर्देशक कुलमान घिसिङ, प्रदेशसभाका सांसद, नगरपालिका मेयर तथा उपमेयर, सहरी विकास मन्त्रालय र नागरिक उड्यन प्राधिकरणका प्रतिनिधि लगायतले आयोजनाका प्रस्तावित रुटबारे पालुङटारमा स्थानीयसँग अन्तरक्रिया गरेका छन् । पालुङटार विमानस्थल चल्न व्यवधान नहुने र स्थानीयलाई पनि कम क्षति पुग्ने गरी प्रसारण लाइन निर्माण गरिनु पर्ने डा. भट्टराईले बताए । ‘प्राविधिक दृष्टिकोणमा सम्भव भएमा रुटको अरु विकल्पबारे पनि अध्ययन गरौ, सम्भव नै नहुने देखिएमा अहिले प्रस्ताव गरिएको रुटबाट पुग्ने क्षतिलाई कम गर्नेतर्फ सोचौं, ‘तर मासु पनि खाने रगत पनि नबगाउने भनेजस्तो विकास पनि चाहिने तर आफ्नो भने केही नगुमाउने भन्ने हुँदैन, यसो भन्न थाल्यौं भने यहाँ आएको विकास पनि गुमाउन सक्छौं त्यसैले थोरै गुमाएर धेरै लाभ लिने गरी अगाडि बढौं,’ डा. भट्टराईले भने । प्राधिकरणका कार्यकारी निर्देशक घिसिङले राजनीतिक फाइदा वेफाइदाभन्दा पनि सामाजिक र वातावरणीय क्षति काम हुने गरी विस्तृत रुपमा प्राविधिक अध्ययन गरी रुट तय गरिएकाले निर्माणमा सहयोग गरिदिन स्थानीयलाई आग्रह गरे । ‘एयरपोर्ट नचाहिने हो भने मस्र्याङदी नदीको किनारै किनार लैजाँदा धेरै सजिलो र टावरहरु पनि कम बनाउनु पर्छ, त्यहाँबाट लैजाँदा एयरपोर्ट या प्रसारण लाइनमध्ये एक छोड्नु पर्ने देखिएपछि दुवै संचालन हुन सक्ने विभिन्न विकल्पहरुमाथि छलफल गरी अहिलेको रुट नै उत्कृष्ठ प्राविधिक विकल्पको रुपमा तय गरिएको हो’, घिसिङले भने । तत्काल यो लाइनको निर्माण गर्न सकिएन भने मस्र्याङदी नदी बेसिनमा निर्माणाधीन जलविद्युत् आयोजनाको विद्यत् प्रवाह गर्न नसकि अर्बाैं रुपैयाँ पेनाल्टी तिर्नुपर्ने संवेदनशील अवस्था रहेको भन्दै घिसिङले अहिले तय गरिएको रुटबाटै अझै कम क्षति हुने गरी लाइन निर्माण गरिने बताए । उनले स्मार्ट सिटीको रुपमा विकास गर्न लागिएको पालुङटारमा विद्युत् आपूर्तिलाई भरपर्दो र गुणस्तरीय बनाउन ठूलो क्षमताको सबस्टेसन बनाइदिन प्राधिकरण तयार गरेकोसमेत प्रतिबद्धता जनाए । विद्युत् प्रसारण लाइनको रुट जताबाट लगे पनि स्मार्ट सिटीलाई कुनै असर नपर्ने र स्मार्ट सिटीको अपहरण नहुने प्रष्ट पार्दै सहरी विकास मन्त्रालयकी सहसचिव सरिता मास्केले स्मार्ट सिटीलाई धेरै विद्युत्को आवश्यक पर्ने भएकाले लाइनलाई अवसरको रुपमा प्रयोग गर्न आग्रह गरिन् । नागरिक उड्यन प्राधिकरणका उपप्रवन्धक कृष्णप्रसाद पौडेलले पालुङटार एयरपोर्टलाई संचालनमा ल्याउन चालू आर्थिक वर्षबाट स्तारोन्नति गर्न लागिएको जानकारी दिंदै मस्र्याङदी नदीको किनारै किनार प्रसारण लाइन निर्माण गरिएमा एयरपोर्ट चलाउन नसकिने प्रष्ट पारे । पालुङटार नगरपालिकाका मेयर दिपकबाबु कँडेल र उममेयर पम्फा बसेलले विकास नरोकिने र जनतालाई पनि कम क्षति पुग्ने गरी प्रसारण लाइन निर्माण गरिनु पर्नेमा जोड दिइन् । यो लाइन एक वर्षभित्रमा निर्माण सक्ने लक्ष्य राखिएको छ । मस्र्याङदी नदी बेसिनमा निर्माणाधीन र निर्माण हुने जलविद्युत आयोजनाको विद्युत् प्रवाहका लागि ११३ किलोमिटर २२० केभी डबल सर्किट मस्र्याङदी करिडोर प्रसारण लाइन निर्माण गर्न लागिएको हो । मनाङको धारापानीबाट सुरु हुने प्रसारण लाइन चितवनको भरतपुरस्थित न्यू भरतपुर सबस्टेसनमा पुगेर टुंगिनेछ । आयोजनाले धारापानी, खुदी, उदीपुर र न्यू भरतपुर २२०÷१३२÷३३ केभी सबस्टेसनको निर्माण गर्नेछ । युरोपेली लगानी बैकको ९ करोड अमेरिकी डलर सहुलितपूर्ण ऋणमा आयोजनाको निर्माण भइरहेको हो । मस्र्याङदी–काठमाडौं प्रसारण लाइन निर्माण अन्तिम चरणमा मस्र्याङदी नदी बेसिनका जलविद्युत् आयोजनाको विद्युत काठमाडौं उपत्यकामा ल्याउन निर्माणाधीन तनहुँको मार्कीचोकबाट काठमाडौंको मातातीर्थसम्मको मस्र्याङदी–काठमाडौं २२० केभी डबर सर्किट प्रसारण लाइनको निर्माण अन्तिम चरणमा पुगेको छ । ८२ किलोमिटर प्रसारण लाइनमा पर्ने २ सय ३१ टावरमध्ये स्थानीयको अवरोधका कारण ५ वटाको मात्रै निर्माण बाँकी छ भने तार ७५ किलोमिटरभन्दा बढी तानिएको छ । धादिङको धुनीबेंसी नगरपालिकाको नौबिसे र पिलटारमा स्थानीयको अवरोधले क्रमशः तीन र दुई वटा टार निर्माण हुन सकेको छैन । नेपाल विद्युत प्राधिकरणका कार्यकारी निर्देशक घिसिङ तथा प्रसारण निर्देशनालयका उपकार्यकारी निर्देशक बज्रभूषण चौधरी र आयोजना प्रमुख तारा प्रधानको टोलीले नगरपालिका मेयर, धादिङका प्रमुख जिल्ला अधिकारी र वडाध्यक्षलाई आइतबार भेटी प्रसारण लाइन निर्माणमा सहयोग र सहजीकरण गरिदिन आग्रह गरे । ‘हाल रहेको मस्र्याङदी–काठमाडौं १३२ केभी प्रसारण लाइनबाट काठमाडौंमा करिब एक सय मेगावाटभन्दा विद्युत् लैजान सक्दैनौं, राजधानीको लाइफ लाइनको रुपमा निर्माण गरिएको लाइन निर्माणमा आवश्यक सहयोग गरिदिनु पर्यो’, घिसिङले भने । निर्माण अवरोध हटेमा चैतभित्रमा प्रसारण लाइनको निर्माण सकिने आयोजना प्रमुख प्रधानले बताए ।

महालक्ष्मी लाईफ इन्स्योरेन्सको ‘सामुहिक म्यादी जीवन बीमा’ सार्वजनिक

काठमाडौं । महालक्ष्मी लाईफ इन्स्योरेन्सले आफ्नो वार्षिकोत्सवको पूर्व सन्ध्यामा ‘सामुहिक म्यादी जीवन बीमा’ सार्वजनिक गरेको छ । एउटा बीमालेखबाट संगठित संस्थाको कर्मचारी, ऋणी, लगानी कर्ता, निक्षेपकर्ता वा सदस्यहरुको म्यादी बीमा गर्न सकिने समेत विशेषता रहेको यस बीमा योजनामा समूहका सदस्यहरु बीमा अवधि भित्र थपघट गर्न सकिने सुविधा रहेको छ । साथै, यस बीमालेखमा ऐच्छिक सुविधा अन्तर्गत कुनै कारणवश समूहका सदस्यको (बीमित) दुर्घटनाबाट मृत्यु भएमा थप बीमाङ्क बराबर रकम प्रदान गरिने, बीमा अवधि भित्र बीमितको मृत्यु भएमा क्रिया खर्च बराबर बीमाङ्कको १५ प्रतिशत वा ५० हजार रूपैयाँ जुन कम हुन्छ सो रकम थप प्रदान गरिन्छ । साथै, बीमा अवधि भित्र समूहका सदस्य (बीमित) को दुर्घटनाबाट अङ्गभङ्ग भए अङ्गभङ्ग वापतको बीमाङ्कको अनुपातिक रकम क्षतिपूर्ती प्रदान गरिने छ । र पूर्ण अपाङ्ग र अशक्त भएमा बीमाङ्क बराबर रकम प्रदान गरिने सुविधा रहेको छ । एकदमै न्यून बीमाशुल्कमा बीमा गर्न सकिने यस बीमा योजनाले संगठित संस्था, प्रतिष्ठान, संघ संगठनमा सम्बद्ध व्यक्तिहरुको जीवनमा आइपर्ने मृत्यु तथा अङ्गभङ्गबाट पर्न सक्ने वित्तीय जोखिमलाई न्यनीकरण गर्ने विश्वास लिइएको छ ।

सबैकाे आँखा बानेश्वरकाे खाइमाेनाेमा

काठमाडाैं । काठमाडौं बानेश्वर चोकको वायाँपट्टीको अग्लो विल्डिङ । त्यही विल्डिङको भुइँतलामा सफा चिटिक्क परेको एउटा पसल छ । त्यो पसलको बाहिरीपट्टी लेखिएको देखिन्छ खाइमोनो जापान । खाइमोनो जापान ? सायद तपाईं पनि अल्मलिनुभयो होला । त्यो बाटोमा हिड्ने जोकोहीले पनि ‘खाइमोनो’मा आँखा लगाएर हिडिरहेका देखिन्छन् । सिसाको ढोका खोलेर भित्र पस्ने वित्तिकै मलिन र स्पष्ट आवाजमा सुनिन्छ-यहाँलाई खाइमोनोमा स्वागत छ । जापानी भाषामा खाइमोनो भनेको नेपालीमा किनमेल हो । अब तपाईंले बुझिसक्नुभयो होला बानेश्वरको खाइमोनो सुपरमार्केट ।खाइमोनो भित्रको माहोल पृथक किसिमको छ । सबै आ-आफ्नो कामका व्यस्त देखिन्छन् । त्यही व्यस्तको माहोलमा काम गर्न व्यस्त देखिन्थे निरोज भुसाल । खाइमोनोका चिफ अपरेसन ईन्चार्ज हुन निरोज भुसाल ।  उनी र उनका साथीहरुले जापानमा उत्पादित विभिन्न सामानहरु ल्याएर नेपालमा व्यवसाय थालेका छन् । उनले आफ्नो पसलमा आउने ग्राहकलाई फरक किसिमको स्वाद र अनुभव दिन खोजिरहेका छन् । विगत वर्षहरुमा जापानमा बटुलेका अनुभवहरु प्रयोग गरेर उनी आफ्नै देशमा केही गर्ने वातावरण सिर्जना गरिरहेका छन् । गुल्मीको रेसुङ्गा नगरपालिका १ तम्घास स्थायी घर भएका भुसालको जीवन संघर्षमय छ । उनको जीबनयात्रा प्रेरणादायी पनि छ । आफ्नो छोराले प्रगती गरोस् । धेरै पढोस् र असल मान्छे बनेर समाजको सहयोग गरोस् भन्ने सबै आमाबुबाको चाहना हुन्छ । त्यही चाहना निरोजका आमाबुबाको पनि थियो । आमाबुबाको त्यही चाहना र आफ्नो लक्ष्यलाई पछ्याउँदै निरोज संर्घषको दौरानमा छन् । आफ्नो सपनालाई साकार गर्न र आत्मनिर्भर भएर बाँच्न उनले उनका साथीहरु मिलेर हाल काठमाडौंको बानेश्वर चोकमै एउटा खाइमोनो नामको पसल स्थापना गरेका छन् । करिब ५ करोडमा खाइमोनो स्थापना निरोज भुसाल आफै केही गर्नु पर्छ भन्ने मानसिकता बोकेका एक उदाहरणीय युवा हुन् । उनका संघर्षका पाइलाहरु धेरै लामा छन् । तिनै संघर्षका पाइलाहरुलाई यथार्थमा बदल्दै उनी रउनका साथीहरुले करिब ५ करोडको लागतमा खाइमोनो जापान स्थापना गरेका छन् ।  करिब १० वर्ष जापानमा काम गरिसकेका उनले जापानमै उत्पादन भएका विभिन्न सामानहरुलाई नेपालमा ल्याएर विक्रि गरिरहेका छन् । ‘१० वर्ष जापानमै काम गरेँ, जापानको विजनेस पोलिसी बुझेँ, त्यसपछि आफ्नै देशमा केही गर्नुपर्छ भन्ने सोचले यो व्यवसाय गर्न थालेँ,’ उनले भने ।  करिब ५ जना साथी मिलेर खाइमोनो जापान खोलेका छन् । नेपालमा निरोजले मात्र काम गरिरहेका छन् । उनका अन्य साथीहरु जापानबाटै काम गर्ने उनी बताउँछन् । हाल खाइमोनोमा जापानी उत्पादनहरु मात्र पाइन्छन् । जव खाइमोनोभित्र मान्छे प्रवेश गर्छ उसले जापानमा भएको आभास गर्छ । पसलको संरचना, पसलमा भएका सामान, काम गर्ने कर्मचारी र पसलको पद्धती दुरुस्तै जापानिज छ । जब हाम्रा ग्राहकहरु पसलमा आउँछन, दुरुस्तै जापानमा आएको महसुस हुने गरेको प्रतिक्रिया दिने निरोज बताउँछन् । अहिले खाइमोनोमा जापानी उत्पादनका स्टेशनरी, कस्मेटिक, हाउसहोल्ड, किचेन, स्वास्थ्यसँग सम्बन्धित सामान, ट्वेजलगायतका सामानहरु पाइन्छन् ।  खाइमोनो जापानसँग सम्बन्धित भएकोले यहाँ पाइने सामानहरु अन्यकोमा पाइनेसँग कुनै तुलना नहुने उनी बताउँछन् । ‘हाम्रो सामानको मूल्य अन्यकोभन्दा सस्तो नै हुन्छ, क्वालिटीपनि अन्यको भन्दा राम्रो छ,’ उनले भने । जापनिज उत्पादनका सामानहरु नेपाली ग्राहकले मन पराउने भएकोले ती सामान नेपालमै ल्याएर पसल खोलेको उनले बताए । हाल खाइमानेनोमा १० जनाले रोजगारी पाएका छन् । खाइमोनोको सामान प्रयोग गर्न आउने ग्राहकको संख्या दैनिक बढ्दै गएको उनी बताउँछन् । १० वर्ष जापानमा निरोज भुसाल सानैदेखि पढ्नमा साह्रै रुची राख्थे । पढाईको सिलसिलामा उनले धेरै विद्यालयहरुको अनुभव पनि लिए । उनले विद्यालयको शिक्षा दिपेन्द्र पुलिस स्कूलबाट लिए । दश कक्षा पास भइसकेपछि उनी प्लस टु पढन् बुटवल गए । पढाई पनि राम्रै थियो । प्लस टु पनि राम्रैसँग पास गरे निरोजले । उनको चाहना बिबिए पढ्ने थियो । उनी बिबिए पढ्न पुनः काठमाडौं आए । कलेजमा पढ्दै गर्दा उनको मन अब विदेश जाने तर्फ लाग्यो । विदेश कसरी जाने भन्ने सोचमा लागे उनी । विदेश जानका लागि उनले अप्लाई पनि गरे । उनी पास भए । अब उनको जापान जाने कुरा तय भयो । जापान जाने चाहना भएका उनको इच्छा पनि पुरा भयो । बीबीए पढ्दै गर्दा उनी जापान गए । त्यतिखेर उनी १९/२० वर्षका थिए । उनले जापानको रिचुमिकान एसिया प्यासिफिक युनिभर्सिटीमै बिबिए गरे । ‘लगभग १० वर्ष जापानमा बसें, जापानमा धेरै काम गरेँ, रेष्टुरेण्ट, फ्याक्ट्री, लगायतका कम्पनीमा काम गरेँ ।’ उनले भने । जापानमा पढ्दै काम गर्दै गर्दा धेरै कुरा सिकेको उनी बताउँछन् । ‘त्यहाँको काम सिकेर नै आफ्नै देशमा आएर केही गर्ने ममा उत्सुकता भयो, साथीहरुसँग आफुभन्दा ठुलोबाट सल्लाह लिएर नेपाल फर्केँ र यो पसल खोलेँ,’ उनले भने । जापानमा काम गर्दा त्यहाँका मानिसहरुले आफ्नै देशमा केही गर्नुपर्छ भनेर सल्लाह दिने गरेको उनी बताउँछन् । विदेशमा गइहाले पनि त्यहाँको सीप र अनुभवलाई प्रयोग गरेर नेपालमै केही गर्न सकिने उनको भनाइ छ । यसका लागि सरकाले पनि सहज वातावरण सिर्जना गर्नु पर्ने उनको धारणा छ । खाइमोनो स्थापनाको समयमा पनि धेरै समस्या भएको बताउँदै उनले सरकारले केही गर्ने चाहना भएका युवालाई सहज वातावरण सिर्जना गरेर काममा लगाउनु पर्ने बताए ।  यो सँगै अन्य ठाउँमा पनि खाइमोनो विस्तार गर्ने उनको सोच छ । उनले काठमाडौंका मूख्य मूख्य ठाउँमा खाइमोनोको सेवा विस्तार गर्ने बताए । ग्राहकले सस्तो सामानभन्दा पनि गुणस्तर प्रयोग गर्न चाहने भएकाले आफुले नेपालमा खाइमोनोको आवश्यकता महसुुस गरेको उनको धारणा छ ।

प्रिमियर स्टीलले ल्यायाे ‘प्रिमियर नेक्स्ट ५०० डी’ डण्डी बजारमा

काठमाडाैं ।  पूर्वाधार निर्माणको लागि प्रिमियर स्टीलले ‘प्रिमियर नेक्स्ट ५०० डी’ डण्डी बजारमा ल्याएको छ। सारडा र एके राठी ग्रुपको संयुक्त लगानीको यस कम्पनीले मजबुत निर्माणको लागि प्रिमियर नेक्स्ट ५०० डी भएकाे जनाएकाे छ । डण्डी न्यूनतम ८ मिलिमिटरदेखि अधिकतम ३२ मिलिमिटरसम्म उपलब्ध रहेको कम्पनीका ब्राण्डिङ एण्ड प्रमोसन्स प्रमुख सजल राउतले जानकारी दिए। ‘यस डण्डीमा अधिकतम लचकता छ’ उनले भने । प्रणालीमार्फत तयार हुने भएकाले दीर्घकालीन प्रयोगको लागि उपयोग रहेको कम्पनीको भनाइ छ । २०७२ सालको भुकम्पपछि भएको अधिकांश क्षतिलाई मध्यनजर गरी उक्त स्टील बजारमा ल्याएकाे जनाएकाे छ । नेपाल भारतलगायतका देशको लागि उच्च लचकता भएको छटको आवश्यकता भएअनुसार रहेको कम्पनीको दाबी छ । कम्पनीका अनुसार प्रिमियर नेक्स्ट ५०० डी ब्राण्डको डण्डी पूर्व मेचीदेखि पश्चिम बुटवल, पोखरासम्म उपलब्ध रहेको कम्पनीको भनाइ छ। ब्राण्डको उत्पादनलाई विस्तार गर्ने कामलाई आक्रमक रुपमा अघि बढाइरहेको कम्पनीको दाबी छ । यस डण्डीले गुणस्तर चिन्ह एनएस १९१ र आइएसओ ९००१ र २०१५ प्राप्त गरिसकेको छ। यो छडमा कार्वन, सल्फर र फोस्फरसको रासायनिक मात्रामा कन्ट्रोल गरी इलोङगेशन (तन्कने) पनि १६ प्रतिशत न्यूनतम तय गरिएको बताइएको छ। प्रिमियर नेक्स्ट ५०० डी ब्राण्डको डण्डी उपभोक्ताले आफ्नो रोजाइ अनुसार छनौट र प्रयोग सक्ने कम्पनीको भनाइ छ। आगो नलाग्ने, शक्तिशाली र भुकम्प प्रतिरोधी विशेषता यसमा रहेको छ । यस स्टीलमा रहेका विशेषताले यस प्रडक्टलाई अझ उचाइमा पुयाउने कम्पनीको विश्वास छ। ठूलो पूर्वाधार आयोजनामा पनि यसको प्रयोग बढिरहेको छ। प्रडक्टको लागि ‘प्रिमियर स्टील, भरोशा नयाँ युग निर्माणको’ भन्ने स्लोगन तय गरिएको छ। यसले भोलीको निर्णय गर्दा आज हामीले राम्रो प्रडक्ट प्रयोग गर्नुपर्छ भन्ने सन्देश दिने कम्पनीको दाबी छ। बिल्डटेक प्रर्दशनीले पनि छडका प्रवर्द्धनमा महत्वपूर्ण भूमिका खेलेको कम्पनीको भनाइ छ।