तस्बिरमा हेर्नुहोस् बुढीगण्डकी बाढी
काठमाडौं । बूढीगण्डकी नदीमा बाढीका कारण गोरखाका विभिन्न गाउँपालिकाहरूमा ठूलो भौतिक क्षति पुगेको छ । बाढीका कारण चार जना मानिस पनि वेपत्ता भएको बताइएको छ । बाढीले सडक सञ्जाल जोड्ने पक्की पुल, झोलुङ्गे पुल, निर्माणाधीन जलविद्युत् आयोजना र स्थानीय बस्तीहरू बगाउँदा जनजीवन प्रभावित बनेको छ । बाढीका कारण गोरखा र धादिङबीचको मुख्य सडक सम्पर्क पूर्ण रूपमा विच्छेद भएको छ । तस्बिरहरू : मनास्लु संरक्षण क्षेत्र परियोजना
पर्यटक बाढीमा फँसेको आशंका, उद्धारका लागि ४ हेलिकप्टर खटाइयो
काठमाडौं । चुमनुब्री गाउँपालिकाले बुढीगण्डकीमा आएको बाढीका कारण पर्यटक फसेको हुनसक्ने बताएको छ । गाउँपालिकाका प्रमुख प्रशासकीय अधिकृत नारायणप्रसाद सापकोटाका अनुसार मनास्लु ट्रेकिङ रुटमा रहेका पर्यटक फसेको आशंका गरिएको जानकारी दिए । उद्धारका लागि भने यतिबेला उक्त क्षेत्रमा ४ हेलिकप्टर खटाइएको उनले बताए । ‘३–४ ठाउँमा फसेकालाई हेलिकप्टरबाट उद्धार गरिएको छ । मनास्लु, लार्केतिर जानु भएका पर्यटकहरू पनि फस्नुभएको छ । मानवीय क्षति यति नै भन्ने यकिन छैन,’ उनले भने । उक्त क्षेत्र हुँदै दैनिक ढेडसयसम्मको संख्यामा आन्तरिक तथा बाह्य पर्यटक मनास्लु ट्रेकिङका लागि जाने गर्थे । यतिबेला केही सुरक्षित रहेको खबर आएपनि बाटोमै रहेका केही बाढीमा परेको हुनसक्ने उनले बताए । ‘बाटोमा जाँदै गरेका के-कति परेका छन् त्यसको खोजी हुँदै छ । बाढी आएको क्षेत्र हुँदै दैनिक सय/डेढसय जना जति पर्यटक सधैं मनास्लु, लार्के जाने हो,’ उनले भने ।
बुढीगण्डकी बाढी : जोखिममा रहेको आरुघाट अस्पतालका बिरामीलाई अन्यत्र सारियो
काठमाडौं । बुढीगण्डकी नदीमा आएको बाढीको जोखिम बढेपछि गोरखाको आरुघाट आधारभूत अस्पतालमा भर्ना भएका बिरामीलाई एम्बुलेन्समार्फत सुरक्षित स्थानमा सारिएको छ । बाढीको पहिलो र दोस्रो लहरपछि नदी आसपासका बस्तीमा जोखिम बढेसँगै अस्पतालमा भर्ना भएका बिरामीलाई आज बिहानैदेखि सुरक्षित स्थानमा सार्न थालिएको हो । अस्पतालका सबै कर्मचारीलाई समेत सुरक्षित स्थानमा स्थानान्तरण गरिएको गोरखा अस्पतालका निमित्त मेसु डा. शम्भु अधिकारीले जानकारी दिए । बाढीले विभिन्न स्थानमा पुल बगाउनुका साथै घर तथा संरचनामा क्षति पुर्याएको छ । बाढीका कारण केही बस्ती जोखिममा परेका छन् भने गोरखा र धादिङ जोड्ने सडकसमेत अवरुद्ध भएको छ । प्राप्त विवरणअनुसार चुमनुब्री गाउँपालिका–३ न्याक्चेतबाट सिर्दिबास जोड्ने पुरानो झोलुङ्गे पुल बाढीले बगाएको छ । त्यस्तै, धार्चे गाउँपालिका–५ माछिखोलाबाट केरौजा जोड्ने झोलुङ्गे पुल पनि बगाएको छ । माछिखोलाको तल्लो बस्तीमा बाढी पस्दा पाँचदेखि सातवटा घर र त्यति नै संख्यामा रहेका टहरामा क्षति पुगेको छ । धार्चे गाउँपालिका–३ सल्लेरीमा २० देखि २२ वटा घर जोखिममा परेका छन् । पछिल्लो विवरणअनुसार सोही स्थानमा निर्माणाधीन सहज ऊर्जा पावर हाउस र आसपासका सातदेखि आठवटा घरसमेत बाढीले बगाएको छ । यसैगरी, आरुघाट गाउँपालिका–२ र ३ अन्तर्गत मान्वु जोड्ने सोतीमा रहेको फलामे मोटरेबल पक्की पुल पनि बाढीले बगाएको छ । आरुघाट गाउँपालिका–९ नयाँपुलस्थित गोरखाबाट धादिङ जोड्ने पक्की पुलका तीन भागमध्ये गोरखातर्फको एउटा भाग बाढीले बगाएर क्षति पुर्याएको छ । पुलमा क्षति पुगेपछि उक्त सडकखण्ड पूर्णरूपमा अवरुद्ध भएको छ । उद्धार तथा बाढी अनुगमनसम्बन्धी विवरणअनुसार बिहान ८ बजे बाढी आरुघाट पुगेको थियो भने बिहान ८ बजेर ५५ मिनेटमा घ्यालचोक पुगेको थियो । बाढीबाट भएको क्षतिको थप विवरण संकलन तथा प्रभावित क्षेत्रमा उद्धार र अनुगमनको काम भइरहेको छ । मानवीय क्षति तथा विस्थापितको संख्याबारे भने अहिलेसम्म केही जानकारी नआएको डा. अधिकारीले जानकारी दिए ।
खानामा किरा परेको उजुरीपछि मन्त्र थकालीलाई साढे २ लाख जरिवाना
काठमाडौं । काठमाडौंको महाराजगञ्जस्थित मन्त्र थकालीमा भान्साको सरसफाइमा लापरबाही गरेको पाइएपछि २ लाख ५० हजार रुपैयाँ जरिवाना गरिएको छ । खाद्यान्नमा किरा परेको गुनासोपछि खाद्य प्रविधि तथा गुण नियन्त्रण विभाग र वाणिज्य, आपूर्ति तथा उपभोक्ता संरक्षण विभागसहितको संयुक्त अनुगमन टोलीले गरेको निरीक्षणमा भान्सामा विभिन्न कैफियत भेटिएको हो । अनुगमनका क्रममा ग्रिन तारा हस्पिटालिटी प्रालिद्वारा सञ्चालित उक्त रेस्टुरेन्टको भान्सामा साङ्ला र भुसुना देखिनुका साथै पकाइएका खाद्य पदार्थ खुला राखिएको पाइएको थियो । फ्रिज तथा भान्सामा खाद्य सामग्री अव्यवस्थित रूपमा भण्डारण गरिएको र ड्रेनेज तथा खुला डस्टबिनको सरसफाइमा समेत लापरबाही भएको टोलीले जनाएको छ । त्यस्तै, फ्राइ गरिएको आलु पत्रिकामा बेरेर राखिएको पाइएको थियो । अस्वस्थकर अवस्थामा राखिएको करिब एक किलोग्राम फ्राइ आलु अनुगमन टोलीले नष्ट गरेको छ । कैफियत भेटिएपछि उपभोक्ता संरक्षण ऐन, २०७५ बमोजिम रेस्टुरेन्टलाई २ लाख ५० हजार रुपैयाँ जरिवाना गरिएको हो । टोलीले किट नियन्त्रणको प्रभावकारी व्यवस्था गर्न, भान्साको सरसफाइमा ध्यान दिन, खाद्य पदार्थ छोपेर राख्न र मसी लागेका कागजमा खाद्य वस्तु राख्ने अभ्यास पूर्ण रूपमा बन्द गर्न निर्देशन दिएको छ । अनुगमन टोलीले देखिएका सबै कैफियत सात दिनभित्र सुधार गरी त्यसको प्रमाणसहित विभागमा उपस्थित हुनसमेत निर्देशन दिएको छ । तोकिएको अवधिमा सुधार नगरे प्रचलित खाद्य स्वच्छता तथा गुणस्तर ऐन, २०८१ बमोजिम थप कारबाही गरिने विभागले जनाएको छ ।
चुमनुव्री गाउँपालिकाका अध्यक्ष भन्छन् : ५ गोठाला र १०० चौंरी वेपत्ता भए
काठमाडौं । गोरखाको चुमनुव्री गाउँपालिका-६ स्थित चुम्बेको उन्जुल खोलामा आएको बाढीमा परी पाँचजना चौंरी गोठाला बेपत्ता भएका छन् । बाढीमा करिब सयवटा चौंरीसमेत बेपत्ता भएका छन् । चुमनुव्री गाउँपालिकाका अध्यक्ष निमा लामाले पाँच जना चौंरी गोठाला बेपत्ता भएको जानकारी दिएका हुन् । बाढीका कारण पशुचौपायासमेत हराएकाले क्षतिको विवरण संकलन गर्नुपर्ने देखिएको उनले बताए । गाउँपालिकाका प्रमुख प्रशासकीय अधिकृत नारायणप्रसाद सापकोटाले भने बाढीबाट ठूलो मानवीय क्षति नभएको हुन सक्ने बताएका छन् । यद्यपि, बेपत्ता गोठालाको अवस्थाबारे यकिन विवरण प्राप्त हुन बाँकी छ । बाढी प्रभावित क्षेत्रमा भएको क्षति र बेपत्ताको अवस्थाबारे थप विवरण आउन बाँकी छ ।
खोला थुनिएर पानी एक्कासि बगेको हुन सक्ने मौसम विभागको प्रारम्भिक निष्कर्ष
काठमाडौं । गोरखाको बुढीगण्डकी क्षेत्रमा आइतबार बिहान आएको बाढीको मुख्य कारण सामान्य वर्षा मात्र नभई पहिरोले खोला थुनिएर पानी एक्कासि बगेको हुन सक्ने मौसम विज्ञान विभागले प्रारम्भिक निष्कर्ष निकालेको छ । पछिल्ला दिनमा रेकर्ड गरिएको वर्षाको मात्रा ठूलो बाढी निम्त्याउन पर्याप्त नदेखिएपछि विभागले पहिरोका कारण उत्पन्न विपद्को सम्भावनालाई प्राथमिकतामा राखेर अध्ययन थालेको हो । विभागकी महानिर्देशक डा. अर्चना श्रेष्ठका अनुसार गोरखाका बारपाक, नामरुङ र सेतीबेसीलगायतका वर्षामापन केन्द्रमा पछिल्ला दिनमा सामान्यदेखि मध्यम मात्राको वर्षा रेकर्ड भएको छ । तर, उक्त वर्षाले मात्रै ठूलो बाढी निम्त्याएको हुन सक्ने अवस्था नदेखिएकाले पहिरोले खोला थुनेर बाढी आएको हुन सक्ने प्रारम्भिक आकलन गरिएको उनले बताइन् । श्रेष्ठका अनुसार पछिल्लो २४ घण्टामा गोरखाका विभिन्न वर्षामापन केन्द्रमा उल्लेख्य वर्षा रेकर्ड भएको छैन । अक्टोबर ६ मा बारपाकमा २१ मिलिमिटर वर्षा भएको थियो भने अक्टोबर १० मा विभिन्न केन्द्रमा ५ देखि २४ मिलिमिटरसम्म वर्षा मापन गरिएको थियो । अक्टोबर ७ मा घ्याच्चुङ तथा अक्टोबर ८ र ९ मा बारपाकमा पनि छोटो अवधिमा वर्षा भएको तथ्यांकले देखाएको छ । ‘प्रारम्भिक विश्लेषणअनुसार पछिल्लो वर्षाले पहिरो निम्त्याएको र पहिरोका कारण खोला थुनिएर बाढी आएको हुन सक्ने सम्भावना छ,’ श्रेष्ठले बताइन् । यद्यपि, बाढीको कारण पहिरो मात्रै भएको निष्कर्षमा पुग्न नसकिने विभागको भनाइ छ । हालैको आँधीका कारण उच्च हिमाली क्षेत्रमा भएको हिमपात तथा हिमनदीसम्बन्धी घटनाको सम्भावनालाई पनि नकार्न नसकिने भन्दै विभागले थप अध्ययन आवश्यक रहेको जनाएको छ । विभागका अनुसार गोरखा क्षेत्रमा ठूलो वर्षा नभए पनि जमिन कमजोर अवस्थामा रहेको हुन सक्ने भएकाले सामान्य वर्षाले समेत पहिरोको जोखिम बढाउन सक्छ । हालको मौसम पूर्वानुमानले उक्त क्षेत्रमा ठूलो वर्षा प्रणाली सक्रिय हुने संकेत नदेखाए पनि छिटपुट वर्षाको सम्भावना भने छ । बाढी प्रभावित क्षेत्र र कमजोर भू-भागमा निरन्तर निगरानी तथा सतर्कता आवश्यक रहेको विभागले जनाएको छ । बाढीको वास्तविक कारण पहिचान गर्न पहिरो, खोला थुनिएको अवस्था र उच्च हिमाली क्षेत्रका सम्भावित घटनाबारे थप अध्ययन गरिनेछ ।
बुढीगण्डकीको बाढीकाे जोखिममा परेका ६ जनाको हवाई उद्धार
काठमाडौं । बुढीगण्डकी नदीमा आएको आकस्मिक बाढीपछि पहिरोको जोखिममा रहेका गोरखाको जगत क्षेत्रबाट ६ जनाको हवाई उद्धार गरिएको छ। प्रधानमन्त्री बालेन्द्र शाहले सामाजिक सञ्जालमा स्टाटस लेख्दै उद्धार कार्यका लागि नेपाली सेनाको टोली परिचालन गरिएको जानकारी दिएका छन् । प्रधानमन्त्री शाहका अनुसार बाढी प्रभावित क्षेत्रमा खोज तथा उद्धारका लागि नेपाली सेनाको फौज हवाई तथा स्थलमार्गबाट खटिएको छ । काठमाडौंमा रहेको कम्पोजिट क्विक रियाक्सन टिमसमेत हवाई साधनमार्फत प्रभावित क्षेत्रमा तैनाथ गरिएको छ। बाढी प्रभावित क्षेत्रमा उद्धार, राहत वितरण तथा जोखिममा रहेका नागरिकलाई सुरक्षित स्थानमा स्थानान्तरण गर्न हेलिकप्टर परिचालन गरिएको प्रधानमन्त्री शाहले उल्लेख गरेका छन् । बुढीगण्डकी नदीमा आएको बाढीपछि नदी तटीय क्षेत्रमा जोखिम बढेको छ । प्रभावित क्षेत्रको अवस्था आकलन गर्दै उद्धार तथा राहत कार्य अघि बढाइएको छ ।
बढ्यो सुनचाँदीको मूल्य, प्रतितोलामा कतिमा हुँदैछ कारोबार ?
काठमाडौँ । नेपाली बजारमा आइतबार (आज) सुनचाँदीको मूल्य बढेको छ । नेपाल सुनचाँदी व्यवसायी महासंघका अनुसार आज सुनको मूल्य प्रतितोला ८०० रुपैयाँले उकालो लागेर दुई लाख ९६ हजार ५०० रुपैयाँमा कारोबार भइरहेको छ । आइतबार चाँदीको मूल्य पनि बढेको छ । आज चाँदी तोलामा ३५ रुपैयाँले बढेर चार हजार ४४० रुपैयाँमा कारोबार भइरहेको छ ।
