महामन्त्रीमा प्रदीप पौडेलको अग्रता, उपसभापतिमा चन्द्रकान्त भण्डारी अगाडि
काठमाडौं । नेपाली कांग्रेसको महाधिवेशनमा पदाधिकारी चयनका लागि भएको निर्वाचनको मतगणनामा महामन्त्रीतर्फ प्रदीप पौडेल र उपसभापतितर्फ डा. चन्द्रकान्त भण्डारीले अग्रता लिएका छन् । कुल ७ हजार ४३ मत खसेको निर्वाचनमा २ हजार २३१ मत गणना हुँदा खुला उपसभापतिमा डा. चन्द्रकान्त भण्डारीले १ हजार ५७ मत प्राप्त गरेका छन् । दोस्रो स्थानमा रहेका ई. मधु आचार्यले ७१२ मत पाएका छन् । सुरेन्द्रराज पाण्डेले ६८०, गोविन्द भट्टराईले ६०९, धनराज गुरुङले ४०६, दीपक गिरीले ३०१ र प्रा. डा. चन्द्रमोहन यादवले १९३ मत प्राप्त गरेका छन् । खुला उपसभापतिमा दुई जना निर्वाचित हुनेछन् । समावेशी उपसभापतितर्फ विनोदकुमार चौधरीले ६१५ मतसहित अग्रता लिएका छन् । जीवन परियारले ५७८, सीता गुरुङले ३३४, फरमुल्लाह मन्सुरले २८५ र रञ्जित कर्णले १८३ मत प्राप्त गरेका छन् । यस समूहबाट एक जना निर्वाचित हुनेछन् । महामन्त्रीको खुलातर्फ प्रदीप पौडेलले १ हजार ३८१ मतसहित अग्रता कायम गरेका छन् । उदयशमशेर राणाले ७८६, अमरसिंह पुनले ६९५, डा. सुनिलकुमार शर्माले ५२६, गुरुराज घिमिरेले ३२८, नैनसिंह महरले २७०, शंकर तिवारीले ४६ र डा. सन्तोष उपाध्यायले २८ मत प्राप्त गरेका छन् । खुला महामन्त्रीमा दुई जना निर्वाचित हुनेछन् । महिला महामन्त्रीतर्फ डा. डिला संग्रौला (पन्त) ले ९६५ मत प्राप्त गरेकी छन् । महालक्ष्मी उपाध्याय (डिना) ले ९५२ र रिता खनालले २५१ मत पाएकी छन् । महिला महामन्त्रीमा एक जना निर्वाचित हुनेछन् । मतगणना जारी रहेकाले यी परिणाम प्रारम्भिक हुन् । अन्तिम नतिजा सार्वजनिक हुन बाँकी छ । यस्ताे छ पाएकाे मत : कांग्रेस महाधिवेशनमम कूल खसेको मत : ७०४३ गणना : २२३१ उपसभापति (खुल्ला-२ जना) १. गोविन्द भट्टराई - ६०९ २. डा. चन्द्रकान्त भण्डारी - १०५७ ३. प्रा. डा. चन्द्रमोहन यादव - १९३ ४. दीपक गिरी - ३०१ ५. धनराज गुरुङ्ग - ४०६ ६. ई. मधु आचार्य - ७१२ ७. सुरेन्द्रराज पाण्डे - ६८० उपसभापति (समावेशी-१ जना) १. जीवन परियार - ५७८ २. फरमुल्लाह मन्सुर -२८५ ३. विनोद कुमार चौधरी - ६१५ ४. रञ्जित कर्ण -१८३ ५. सीता गुरुङ्ग - ३३४ महामन्त्री (खुल्ला- २ जना ) १. अमरसिंह पुन - ६९५ २. उदय शम्शेर राणा - ७८६ ३. गुरुराज घिमिरे - ३२८ ४. नैनसिंह महर - २७० ५. प्रदीप पौडेल - १३८१ ६. शंकर तिवारी - ४६ ७. डा. सन्तोष उपाध्याय - २८ ८. डा. सुनिल कुमार शर्मा - ५२६ महामन्त्री (महिला-१ जना) १. डा. डिला संग्रौला (पन्त)- ९६५ २. महालक्ष्मी उपाध्याय (डिना) - ९५२ ३. रिता खनाल - २५१
आरुघाट पुलमा बेलिब्रिज राखेर तत्काल आवागमन सञ्चालन गर्ने तयारी
काठमाडौं । आइतबार विहान बुढीगण्डकी नदीमा आएको बाढीले क्षति पुर्याएको गोरखा र धादिङ जोड्ने आरुघाट पुलमा तत्काल बेलिब्रिज राखेर आवागमन सञ्चालन गर्न सकिने सडक विभागले जनाएको छ । अहिले आवागमन पुनः सञ्चालनका लागि आवश्यक प्राविधिक प्रक्रिया अघि बढाइएको विभागले जनाएको छ । विभागका अनुसार बाढीले गोरखा र धादिङ जोड्ने पुलसहित दुईवटा पुलमा क्षति पुर्याएको छ । प्रारम्भिक विवरणअनुसार गोरखाको आरुघाट गाउँपालिका–२ र ३ जोड्ने सोती खोला पुल पूर्ण रूपमा बगाएको छ भने गोरखा र धादिङ जोड्ने आरुघाट पुलको आरसीसी संरचनामा क्षति पुगेको छ । सोती खोलामाथि रहेको ट्रस पुल बाढीले पूर्ण रूपमा बगाएको प्रारम्भिक विवरणमा उल्लेख छ । त्यस्तै, गोरखा र धादिङ जोड्ने आरुघाट पुलको २२ मिटर आरसीसी संरचना बाढीले बगाएको छ । उक्त पुलमा ६० मिटर ट्रस र २५ मिटर आरसीसी संरचना रहेको थियो । बाढीले आरसीसी संरचनाको केही भाग बगाए पनि ट्रस संरचना भने बाँकी रहेको प्रारम्भिक विवरणमा उल्लेख छ ।
बेत्रावतीमा बेलीब्रिज बनेसँगै जोडियो रसुवा र नुवाकोट (तस्बिरसहित)
काठमाडौं । भोटेकोशीको बाढीले बगाएको बेत्रावतीस्थित फलाखु खोलामा नयाँ मोडुलर एक्रो ब्रिज (बेलब्रिज) निर्माणपछि सञ्जालनमा आएको छ । रसुवाको उत्तगया गाउँपालिका ५ र नुवाकोटको विदुर नगरपालिका- १० जोड्ने उक्त पुल आइतबार (आज) बिहान ११ बजेदेखि सञ्चालनमा आएको हो । भदौ १० गतेको बाढीले बेत्रावती बजार हुँदै त्रिशूलीमा मिसिने उक्त खोलामा रहेको नयाँ र पुरानो गरी २ पक्की पुल बगाएको थियो । उक्त पुल निर्माणसँगै पृथ्वी राजमार्गदेखि स्याफ्रुबेसी बजार वारीसम्म पुग्न सहज हुने वडाअध्यक्ष यमनाथ आचार्यले बताए । ‘यो पुल बनेपछि पृथ्वी राजमार्ग हुँदै नुवाकोट र रसुवाको स्याफु्रवेसीको त्रिशूली वारीसम्म पुग्न सहज हुन्छ,’ उनले भने । लामो समयसम्म सवारी आवागमन ठप्प हुँदा स्थानीयवासी र यात्रुहरूले सास्ती भोग्दै आएका थिए । सडक विभाग, स्थानीय प्रशासन एवं नेपाली सेनाले पुल निर्माणलाई प्राथमिकतामा राखेर युद्धस्तरमा काम अगाडि बढाएका थिए । पुल सञ्चालनमा आएसँगै उक्त मार्ग हुँदै हुने दैनिक उपभोग्य वस्तुको ढुवानी तथा जनजीवन सामान्य बन्ने अपेक्षा गरिएको छ । अवरुद्ध सडक खण्ड पुनः सञ्चालनमा आएसँगै स्थानीयहरूले राहतको महसुस गरेका छन् ।
बाढी प्रभावितलाई होल्डिङ सेन्टरमा पठाउने तयारी
काठमाडौं । बुढीगण्डकीमा आएको बाढी प्रभावितलाई होल्डिङ सेन्टरमा पठाउने तयारी भएको छ । प्रमुख जिल्ला अधिकारी धर्मेन्द्रप्रसाद मिश्रका अनुसार उद्धार गरिएका १८ जनालाई गोरखा र धादिङको सिमानामा पर्ने आरुघाटमा राखिएको छ । ‘उद्धारको क्रम जारी छ । १७–१८ जनालाई उद्धार गरेर आरुघाटकै ओल्लो पल्लो गाउँमा सारिएको छ,’ उनले थपे, ‘उहाँहरुलाई अब होल्डिङ्ग सेन्टर वा इच्छाएको गन्तव्यमा पठाउने निर्णय भएको छ ।’ जिल्ला सुरक्षा समितिको बैठकपछि उक्त निर्णय गरिएको प्रमुख जिल्ला अधिकारी मिश्रले जानकारी दिए ।
बुढीगण्डकीको बाढीले ४ जलविद्युत आयोजनामा क्षति
काठमाडौं । बुढीगण्डकी नदीमा आएको बाढीले चारवटा जलविद्युत् आयोजनामा क्षति पु‍र्याएको छ । प्रारम्भिक विवरणअनुसार बाढीबाट कुल ४१२.४१ मेगावाट क्षमताका चार जलविद्युत् आयोजना प्रभावित भएका छन् । बाढीका कारण आयोजनाका क्याम्प क्षेत्र, निर्माण उपकरण, बेलिब्रिज, पहुँच सडक तथा आयोजनास्थल पुग्ने पुलमा क्षति पुगेको हो । तीमध्ये ३४१ मेगावाट क्षमताको बुढीगण्डकी जलविद्युत् आयोजनामा सबैभन्दा बढी क्षति पुगेको देखिएको छ ।उक्त आयोजनाको मुख्य क्याम्प क्षेत्र बाढीले बगाएको छ । आयोजनास्थलमा रहेका केही निर्माण उपकरणसमेत बाढीले बगाएको प्रारम्भिक विवरणमा उल्लेख छ । त्यस्तै, २४.५ मेगावाट क्षमताको दोभान खोला जलविद्युत् आयोजनामा पनि बाढीले क्षति पु‍र्याएको छ । उक्त आयोजनाको क्याम्प क्षेत्रका केही घरमा क्षति पुगेको छ भने बेलिब्रिज बाढीले बगाएको छ । बाढीबाट ३०.९१ मेगावाट क्षमताको यारु खोला जलविद्युत् आयोजना पनि प्रभावित भएको छ । आयोजनाको बेलिब्रिजमा क्षति पुगेको जनाइएको छ । आयोजनास्थलमा रहेका निर्माण सामग्री तथा उपकरणसमेत बाढीले बगाएको विवरणमा उल्लेख छ । यसैगरी, १६ मेगावाट क्षमताको माछा खोला जलविद्युत् आयोजनामा पनि क्षति पुगेको छ । बाढीले आयोजनाको पहुँच सडक तथा आयोजनास्थल पुग्ने पुलमा क्षति पुर्याएको हो । सडक र पुलमा भएको क्षतिका कारण आयोजनास्थलसम्मको आवागमन तथा निर्माण कार्य प्रभावित हुनसक्ने देखिएको छ। यद्यपि चारवटै आयोजनामा बाढीले पु‍र्याएको कुल आर्थिक क्षतिको यकिन विवरण सार्वजनिक भएको छैन ।
बुढीगण्डकीमा बाढीको जोखिमसँगै स्वास्थ्य आपतकालीन संयन्त्र सक्रिय
काठमाडौं । गोरखाको चुमनुब्री गाउँपालिका क्षेत्रमा बूढीगण्डकी नदीमा आएको ठूलो बाढी र नदीको बहाव निरन्तर बढिरहेको अवस्थालाई मध्यनजर गर्दै स्वास्थ्य आपत्कालीन कार्यसञ्चालन केन्द्र (एचइओसी) सक्रिय गरिएको छ । स्वास्थ्य तथा खाद्य स्वच्छता मन्त्रालयले बाढी प्रभावित क्षेत्रमा आवश्यक स्वास्थ्य सेवा, आकस्मिक उपचार तथा स्वास्थ्यसम्बन्धी सहायता उपलब्ध गराउने तयारी र समन्वयका लागि केन्द्र सक्रिय गरिएको जनाएको छ । मन्त्रालयले बुढीगण्डकी नदीसहित जोखिममा रहेका नदी तटीय क्षेत्रका नागरिकलाई उच्च सतर्कता अपनाउन, जोखिमयुक्त स्थानबाट सुरक्षित स्थानमा जान तथा सम्भावित विपद्बाट बच्न आवश्यक सावधानी अपनाउन आग्रह गरेको छ । बाढी प्रभावित क्षेत्रमा स्वास्थ्य सेवा, आकस्मिक उपचार वा अन्य स्वास्थ्यसम्बन्धी सहयोग आवश्यक परेमा १११५ मा सम्पर्क गर्न सकिने मन्त्रालयले जनाएकाे छ ।
‘तेस्रो पक्कु फेस्टिभल–२०८३’ आजदेखि सुरु
काठमाडौं । ‘तेस्रो पक्कु फेस्टिभल–२०८३’ आजदेखि सुरु भएको छ । प्रेसिडेन्ट बिजनेस ग्रुपले यस वर्ष पनि ‘पक्कु फेस्टिभल–२०८३’ आयोजना गर्न लागेको हाे । नेपाली मौलिक खानाका परिकार, रैथाने स्वाद र हाम्रो समृद्ध आतिथ्य संस्कृतिको संरक्षण, प्रवद्र्धन तथा ब्रान्डिङ गर्ने उद्देश्यका साथ ‘पक्कु फेस्टिभल–२०८३’ आयोजना गर्न लागेको जनाएको छ । प्रेसिडेन्ट बिजनेस ग्रुपले विगत तीन वर्षदेखि निरन्तर रूपमा पक्कु फेस्टिभल आयोजना गर्दै आएको छ । विगतका संस्करणबाट प्राप्त अनुभव, ग्राहक तथा स्वादका पारखीहरूबाट प्राप्त सुझाव र नेपाली मौलिक खानाप्रति बढ्दै गएको आकर्षणले यस अभियानलाई थप परिष्कृत र प्रभावकारी बनाउने प्रेरणा दिएको आयोजकले जनाएको छ । देखि असोज २९ गतेसम्म पाँच दिनसम्म प्रेसिडेन्ट बिजनेस ग्रुपका विभिन्न आउटलेटहरूमा पक्कुका साथै विविध परिकार प्रस्तुत गरिनेछन् । काठमाडौंको सुन्धारा, महाराजगञ्ज, बत्तीसपुतली र कलंकीस्थित आउटलेटहरूमा पक्कुको मौलिक स्वाद, परम्परागत पाकविधि र नेपाली आतिथ्यताको विशेष अनुभव प्रदान गर्ने तयारी गरिएको छ । यस अभियानलाई काठमाडौंमा मात्र सीमित नराखी लुम्बिनी प्रदेशबाट समेत नेपाली मौलिक स्वादको प्रवद्र्धन गर्ने उद्देश्यले भैरहवामा आयोजना हुने फुड फेस्टिभलमा प्रेसिडेन्टको पक्कुलाई प्रस्तुत तथा प्रवद्र्धन गरिँदैछ । यसले नेपाली मौलिक खानालाई विभिन्न भूगोल, समुदाय र पर्यटकीय गन्तव्यसँग जोड्दै यसको पहिचानलाई व्यापक बनाउने हाम्रो प्रयासलाई थप गति दिनेछ । पक्कुलाई एउटा परिकारका रूपमा मात्र होइन, नेपाली स्वाद, संस्कृति र आतिथ्यताको विशिष्ट पहिचानका रूपमा स्थापित गर्ने उद्देश्य आयोजनको छ । प्रेसिडेन्ट बिजनेस ग्रुप विगत दुई दशकदेखि होटल तथा रेस्टुरेन्ट व्यवसायमा निरन्तर सक्रिय रहँदै आएको स्थापित व्यावसायिक समूह हो । यस अवधिमा हामीले खाना, सेवा, गुणस्तर, स्वच्छता र आतिथ्यतालाई आफ्नो व्यावसायिक यात्राको मूल आधार बनाउँदै आएका छन् । ‘स्वाद, स्वास्थ्य र आतिथ्यता सँगसँगै’ भन्ने मूल मान्यताका साथ प्रेसिडेन्टले आफ्नै व्यावसायिक पहिचान, सेवा संस्कार र ग्राहकको विश्वास निर्माण गर्ने प्रयास गर्दै आएको छ । प्रेसिडेन्ट बिजनेस ग्रुपले आगामी दिनमा आफ्नो व्यावसायिक सञ्जाललाई थप विस्तार गर्ने तयारी गरिरहेको छ । रुपन्देहीको बुटवल तथा काठमाडौंको बुढानीलकण्ठबाट समेत नयाँ आउटलेटहरू सञ्चालनमा ल्याउने हाम्रो योजना रहेको आयोजकले जनाएको छ । यी नयाँ गन्तव्यले स्थानीय बजारमा गुणस्तरीय सेवा तथा आतिथ्यताको पहुँच विस्तार गर्नुका साथै थप रोजगारीका अवसर सिर्जना गर्न योगदान पु¥याउने अपेक्षा आयोजकको छ । हाल प्रेसिडेन्ट बिजनेस ग्रुपअन्तर्गतका विभिन्न व्यवसाय तथा आउटलेटहरूमा ३५० जनाभन्दा बढीले प्रत्यक्ष रोजगारी प्राप्त गरिरहेका छन् ।
टाइम्स इनर्जीका १५ संरचना बगायो, १८ जना कर्मचारी सुरक्षित
काठमाडौं । गोरखाको सल्लेरीस्थित टाइम्स इनर्जी प्राइभेट लिमिटेडमा बुढीगण्डकी नदीको आकस्मिक बाढीले ठूलो भौतिक क्षति पु‍र्याएको छ । बाढीका कारण कम्पनीका ९ वटा ब्लक र ६ वटा सार्वजनिक भवन बगेका छन् । स्थानीयले बाढी आउन लागेको सूचना दिएपछि आयोजनामा कार्यरत १८ जना कर्मचारी सुरक्षित स्थानमा पुगेर ज्यान जोगाउन सफल भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ । कर्मचारीहरूको उद्धारका लागि नेपाली सेनाको हेलिकप्टर परिचालन गर्ने तयारी भइरहेको छ । यसैबीच, सेनाको टोलीले ६ जनालाई हवाई उद्धार गरिसकेको जनाएको छ । घटनापछि नेपाली सेना, सशस्त्र प्रहरी बल र नेपाल प्रहरीको टोली उद्धार तथा राहत कार्यमा परिचालित भएका छन् ।
