नेपाल बैंकका सञ्चालक दाहालले लिए शपथ, बैंकको हितमा सक्दो योगदान गर्ने प्रतिवद्धता
काठमाडौं । नेपाल बैंकका नवनियुक्त सञ्चालक सुमन दाहालले पद तथा गोपनियताको शपथ ग्रहण गरेका छन् । दाहालले असार ७ गते सञ्चालक समितिका अध्यक्ष मधु कुमार मरासिनीबाट शपथ लिएका हुन् । नवनियुक्त सञ्चालक दाहाल नेपाल सरकार, अर्थ मन्त्रालयको तर्फबाट बैंकको रिक्त रहेको सञ्चालक पदमा नियुक्त भएका हुन् । उनी अर्थ मन्त्रालयका सहसचिव पनि हुन् । शपथ ग्रहण कार्यक्रम पश्चात् अध्यक्ष मधुकुमार मरासिनीले नव नियुक्त सञ्चालकलाई सञ्चालक समितिमा स्वागत गर्दै सञ्चालक समितिमा रहेर बैंकको सर्वोपरी हितमा सञ्चालक सदस्य सुमन दाहालको भूमिका महत्वपूर्ण रहने विश्वास व्यक्त गरे । त्यस्तै, नवनियुक्त सञ्चालक सदस्य सुमन दाहालले नेपाल बैंकको सञ्चालकको जिम्मेवारी निर्वाह गर्न पाएकोमा खुशी व्यक्त गर्दै आफूले बैंकको हितमा सक्दो योगदान गर्ने प्रतिवद्धता व्यक्त गरेका छन् । शपथ ग्रहण कार्यक्रममा यस बैंक सञ्चालक समितिका सदस्यहरु, प्रमुख कार्यकारी अधिकृत, का.मु. नायब प्रमुख कार्यकारी अधिकृत, विभागीय प्रमुखहरु र कम्पनी सचिव समेतको उपस्थिति रहेको थियो ।
राधी विद्युत कम्पनीको अध्यक्षमा पति नियुत्त
काठमाडौं । राधी विद्युत कम्पनीको अध्यक्षमा बिमेशमान पति नियुक्त भएका छन् । असार ७ गते बसेको कम्पनी सञ्चालक समितिको बैठकले पतिलाई अध्यक्ष पदमा नियुक्त गरेको हो । बैठकले सञ्चालक अनिल कुमार रुङ्गटालाई परिवर्तन गरी सञ्चालक पदमा बिमेशमान पतिलाई नियुक्त गरेको हो । र, सोही बैठकले असार ७ गतेदेखि नै लागू हुने गरी सञ्चालक पतिलाई अध्यक्ष पदमा नियुक्त गरेको हो । खारे इन्भेष्टमेन्टबाट प्रतिनिधित्व गर्दै आएका सञ्चालक रुङ्गटालाई सेयरधनी खारे इन्भेष्टमेन्टले पत्र मार्फत फिर्ता बोलाएकाले उनको ठाउँमा पतिलाई नियुक्त गरिएको कम्पनीले जानकारी गराएको छ ।
माछापुच्छ्रे बैंकको सञ्चालकमा हरिभक्त सिग्देल नियुक्त
काठमाडौं । माछापुच्छ्रे बैंकको सञ्चालकमा हरिभक्त सिग्देल नियुक्त भएका छन् । असार ३ गते बसेको बैंक सञ्चालक समितिको बैठकले सिग्देललाई सञ्चालक पदमा नियुक्त गरेको हो । नवनियुक्त सञ्चालक सिग्देल राम जानकी इन्भेष्टमेन्ट एण्ड पेट्रोलियम सप्लायर्स प्रा.लि.को तर्फबाट नियुक्त भएका हुन् ।
