साढे ३ महिनापछि नेप्सेले फुकुवा गरिदियो बिशाल बजारको सेयर कारोबार
काठमाडौं । नेपाल स्टक एक्स्चेञ्ज(नेप्से)ले साढे ३ महिना अवधिपश्चात बिशाल बजार कम्पनीको सेयर कारोबार फुकुवा गरिदिएको छ । गत २०७७ माघ १८ गतेदेखि रोक्का भएको कम्पनीको सेयर कारोबार अब २०७८ बैशाख ९ गतेदेखि फुकुवा हुने भएको हो । कम्पनीले भने बमोजिमको वित्तीय विवरणहरु पेश निर्देशन दिँदा पनि कम्पनीले पेश नगरेकोले नेप्सेले सेयर कारोबार रोक्का गरिदिएको थियो । त्यसपश्चात कम्पनीले २०७७ बैशाख ३ गते आर्थिक वर्ष २०७३/७४ देखि २०७७/७८ को पुस मसान्तसम्मको वित्तीय विवरणहरु पेश गरेकोले नेप्सेले कारोबार फुकुवा गरिदिने निर्णय गरेको हो । साथै, उक्त लेखापरीक्षण प्रतिवेदन प्राप्त भई सञ्चालक समितिको निर्णय भएपश्चात यथाशिघ्र साधारणसभा सम्पन्न गर्ने कम्पनीको प्रतिवद्धता रहेको छ । बैशाख ८ गतेको नेप्सेको निर्णयअनुसार कम्पनीको भोलि अर्थात बैशाख ९ गतेदेखि सेयर कारोबार शुरु हुने छ । पछिल्लो समय कम्पनीको अन्तिम कारोबार प्रतिकित्ता २ हजार ८८० रुपैयाँमा भएको थियो ।
ग्लोबल आइएमई र स्पर्श लघुवित्तले शुरु गरे एकीकृत कारोबार, निक्षेप २ अर्ब बढी पुग्यो
काठमाडौं । ग्लोबल आइएमई लघुवित्त वित्तीय संस्था र स्पर्श लघुवित्त वित्तीय संस्थाको आज (बैशाख ८ गते) देखि एकीकृत कारोबार शुरु भएको छ । स्पर्श लघुवित्तलाई प्राप्ति गरेपश्चात ग्लोबल आईएमई लघुवित्त वित्तीय संस्थाको नामबाट एकीकृत कारोबार शुरु भएको हो । बेसीशहर-८, लमजुङ केन्द्रीय कार्यालय भई राष्ट्रियस्तर कार्यक्षेत्र भएको ग्लोबल आइएमई लघुवित्त वित्तीय संस्था लिमिटेडले पोखरा-२६, कास्की केन्द्रीय कार्यालय भएको स्पर्स लघुवित्त वित्तीय संस्था लिमिटेडलाई प्राप्ति एकीकृत कारोबार शुरु भएको हो । एकीकृत कारोबार पश्चात् वित्तीय संस्थाको कुल चुक्ता पुँजी ४३ करोड १७ लाख रुपैयाँ, कुल कर्जा लगानी ६ अर्ब १४ करोड रुपैयाँ, निक्षेप तथा बचत २ अर्ब ३ करोड रुपैयाँ रहेको छ । त्यस्तै, देशका विभिन्न ५१ जिल्लाका ९९ वटा शाखा कार्यालयहरु मार्फत वित्तीय सेवा प्रदान भईरहेका छन् । साथै, वित्तीय संस्थाको कुल ग्राहक सदस्यहरु १ लाख २३ हजार ४१३ जना रहेका छन् भने ६३ हजार २९० जना ऋणी सदस्यहरुले विभिन्न शीर्षक अन्तर्गत कर्जा सुविधा उपभोग गरिरहेका छन् । सो कार्यक्रमका प्रमुख अतिथि ग्लोबल आइएमई बैंकका प्रमुख कार्यकारी अधिकृत रत्नराज बज्राचार्यले लघुवित्त क्षेत्रमा डुप्लीकेसन समस्या रहेको र त्यसको निराकरणको उपाय मध्येको एक उपाय मर्जर तथा प्राप्तिले डुप्लीकेसनमा कमी हुने बताए । साथै, मर्जरले सफल र सुदृढ संस्था हुन तथा नेपाल राष्ट्र बैंकको नीतिलाई पनि सहयोग पुग्ने उनले बताए ।
सेयर बजारः फेरि माथि चढ्न थकाई मार्दैछ कि तल झर्ने तयारीमा छ ?
काठमाडौं । बैशाख २ गते (अप्रिल १५) २७ सय ३५.४ विन्दुमा रहेको पुँजी बजार मापक नेप्से परिसुचक बैशाख ७ गते (अप्रिल २०) २६ सय ६४.६२ विन्दुमा पुगेर कारोबार बन्द भयो । यो ४ करोबार दिनमा नेप्से परिसुचक ७०.७८ अंकले घट्यो । यसबीचका केही कारोबार दिनमा बजार सामान्य अंकले नबढेको भने होइन । यो ४ कारोबार दिनको नेप्सेको गतिविधि नियाल्ने हो भने बजारले केही सयम थकाई मारेको हो वा झर्ने चरणमा प्रवेश गरेको हो भन्ने दुविधा उत्पन्न हुन सक्छ । बजारले अहिले थकाई मात्रै मारेको हो भने बजार फेरि बढ्न सक्छ । बजार बढ्नु वा घट्नुमा बजारसँग सम्बन्धित खास कारणहरु हुने गर्छन् । पछिल्ला केही दिनयताका राजनीतिक गतिविधि र नेताहरुका भनाईलाई आधार मान्ने हो भने वर्तमान सरकारको निरन्तरतामाथि शंका गर्ने ठाउँ भेटिन्छ । बैंक तथा वित्तीय संस्थाहरुमा लगानीयोग्य रकम (तरलता) कम हुँदै गएको समाचारहरु सार्वजनिक भइरहेका छन् । कोरोना भाइरस (कोभिड–१९) संक्रमणको दोस्रो लहर चलेसँगै सरकारले मानवीय गतिविधिमा केही नियन्त्रण गर्ने पहल थालेको छ । यी कारणहरु बजार घट्नको लागि सहयोगी हुन सक्छन् । तर, बजार अब घट्छ वा फेरि बढ्छ भनेर यकिन गरिहाल्ने अवस्था भने छैन । बजार बढ्नको लागि चाहिने आधारभूत परिवेश पनि छ । जस्तो कि कोभिड महामारी बढ्दै जाने हो भने लगानीका अन्य क्षेत्र आकर्षक नहुन सक्छन् । अरु नै पेशा व्यवसायमा संलग्न व्यक्तिहरु पनि कोभिडका कारण आफ्नो पेशा व्यवसायबाट फुर्सदिला भएर सेयर बजारमा लगानी गर्न भित्रन सक्छन् । बजारमैत्री छवि बनाएका नेपाल राष्ट्र बैंकका गभर्नर महाप्रसाद अधिकारी अहिले नै सेयर बजारलाई नियन्त्रण गरिहाल्नुपर्छ भन्ने निक्र्योलमा पुगिसकेका छैनन् । यस्तै, पुँजी बजारले हरदम स्वागत गरेका अर्थमन्त्री विष्णुप्रसाद पौडेल आगामी आर्थिक वर्षको बजेट तयारीको चटारोमा छन् । उनले आगामी आर्थिक वर्षको बजेट मार्फत पुँजी बजारले अपेक्षा गरेअनुसारका केही सकारात्मक कार्यक्रमहरु ल्याउने आशामा लगानीकर्ता छन् । यी आधारहरु भनेको बजार अझै बढ्छ भन्ने अपेक्षा गर्नको लागि सहयोगी हुन् । नेपाल इन्भेष्टर्स फोरमका पूर्वअध्यक्ष तथा भेट्रान लगानीकर्ता अम्बिका प्रसाद पौडेल बजार अहिल केही समयको लागि थकाई मारेको भएपनि छिट्टै नै नयाँ गतिका साथ माथि चढ्ने विश्लेषणमा छन् । ‘नेपाली पुँजी बजार जुन उच्चतम विन्दु चुम्नको लागि अघि बढेको थियो, त्यो विन्दु प्राप्त गरिसकेको छैन, पछिल्लो समय ३ सय रुपैयाँमा पहिलो कारोबार भएको निफ्रा (नेपाल इन्फ्रास्टक्चर बैंक), थपिएका यति धेरै बीमा कम्पनीहरु र चन्द्रागिरी हिल्स जस्ता कम्पनी नेप्सेमा थपिएपछि बजारको उच्चतम बिन्दु अझै निकै माथि हो भन्ने सहजै आकलन गर्न सकिन्छ, बजारले फेरि उकालो चढ्नको लागि केही समय थकाई मारेको मात्रै हो,’ नेपाल उद्योग वाणिज्य महासंघको पुँजी बजार समितिका संयोजक समेत रहेका पौडेलले भने । पौडेलले यस्तो बताइरहे पनि पछिल्ला दिनका केही गतिविधिले बजार घट्ने त होइन भन्ने संसय उत्पन्न गरेको छ । जस्तो कि मन्जुश्री फाइनान्सले सार्वजनिक गरेको चैत मसान्तसम्मको वित्तीय विवरणमा उसले पछिल्लो तीन महिनामा ३७ करोड ३१ लाख रुपैयाँ ‘अदर अपरेटिङ इनकम’ गरेको छ । यो भनेको करिब सेयर कारोबारबाट कमाएको रकम हो । मन्जुश्री फाइनान्सको वित्तीय विवरणलाई आधार मान्ने हो भने बैंक तथा वित्तीय संस्थाहरु सेयर बजारबाट बाहिर निस्किएका हुन् कि भन्ने संकेत मिल्छ । चालु आर्थिक वर्षको तेस्रो त्रैमासमा बैंक वित्तीय संस्थाले प्रसस्त लगानी गरेका र पछिल्ला केही दिनयता बजारबाट बाहिरिएका हुन सक्ने संकेत सो विवरणले गर्छ । तर, अर्का एक लगानीकर्ता भने बैंक वित्तीय संस्थाहरु अहिले नै सेयर बजारबाट बाहिरिएका छन् भन्ने मान्न तयार छैनन् । ‘मन्जुश्री फाइनान्सले तेस्रो त्रैमासमा खुद व्याज आम्दानी ९ करोड ३१ लाख रुपैयाँ गरेछ, जुन उसको कोर विजनेस हो, उसले अदर अपरेटिङ इनकम भनेपनि सेयर कारोबारबाट भने यही त्रैमासमा ३७ करोड ३१ लाख रुपैयाँ कमाएछ, यसको अर्थ चालु आर्थिक वर्षको तेस्रो त्रैमासमा सो फाइनान्सले सेयर बजारमा मज्जाले लगानी गरेर बाहिर आएछ भन्ने हुन्छ, अरु बैंक वित्तीय संस्थाहरुले पनि त्यसै गरेका छन् भन्ने आकलन गर्ने हो भने पनि अब उनीहरु फेरि लगानी गर्छन् कि गर्दैनन् भन्नेले बजार अब बढ्छ कि बढ्दैन भन्ने कुराको यकिन हुन्छ,’ अर्का एक लगानीकर्ताले भने ।
