थ्रीस्टारको आईपीओ बाँडफाँट, यसरी हेर्न सकिन्छ रिजल्ट
काठमाण्डौ । थ्रीस्टार हाइड्रोपारको आईपीओ बाँडफाँट सम्पन्न भएको छ । कम्पनीले आयोजना प्रभावित स्थानीय वासिन्दाहरुलाई बिक्री खुला गरेको आईपीओ बाँडफाँट गरिएको जनाएको छ । कम्पनीको आईपीओमा २ हजार ६०६ जना आवेदकले आवेदन दिएका थिए । रितपूर्वक आवेदन दिएका सबै आवेदकलाई आइतबार ४ लाख ९२ हजार ५ सय कित्ता सेयर वितरण गरेको कम्पनीले बताएको छ । कम्पनीले वैशाख ११ गतेदेखि जेठ ९ गतेसम्म स्थानीय वासिन्दालाई जारी पुँजी ४९ करोड २५ लाख रुपैयाँको १० प्रतिशत अर्थात् ४ करोड ९२ लाख ५० हजार रुपैयाँ बराबरको ४ लाख ९२ हजार ५ सय कित्ता सेयर बिक्री गरेको थियो । कम्पनीको आईपीओमा आयोजना प्रभावित क्षेत्र खोटाङ हलेसी तुवाचुङ नगरपालिका वडा नम्बर १ देखि ११ सम्म र दिप्रुङ चुईचुम्मा गाउँपालिका वडा नम्बर १ देखि ७ सम्मका बासिन्दाले आवेदन दिएका थिए । कम्पनीको आईपीओ निष्काशन तथा बिक्री प्रबन्धकमा हिमालयन क्यापिटल रहेको छ । आईपीओको नतिजा बिक्री प्रबन्धक हिमालयन क्यापिटल र सिडिएस एण्ड क्लियरिङ्गले सञ्चालन गरिरहेको आईपीओ रिजल्टबाट हेर्न सकिनेछ ।
४० अंकले बढ्यो नेप्से, साढे तीन अर्बको कारोबार
काठमाडौं । आइतबार सेयर बजार ४०.४८ अंकले वृद्धि भएको छ । नेपाल स्टक एक्सचेन्जको अनुसार आज सेयर बजार बढेर १९८०.९० विन्दुमा पुगेको छ । नेप्सेको अनुसार आज ९५ लाख २८ हजार कित्ता सेयर किनबेच हुँदा तीन अर्ब ४५ करोड रुपैयाँको कारोबार भएको छ । जसमा सबैभन्दा बढी नागरिक लगानी कोषको ११ करोड १४ लाख रुपैयाँको सेयर किनबेच भएको छ । यस्तै, आज दुई कम्पनीको सेयरमा सकारात्मक सर्किट लागेको छ । सकारात्मक सर्किट लाग्नेमा भुगोल इनर्जी डेभलपमेन्ट कम्पनी र सिटी होटल्स रहेको छ ।
रिलायन्स फाइनान्सको लाभांश घोषणा
काठमाडौं । रिलायन्स फाइनान्सले गत वर्षको नाफाबाट सेयरधनीलाई लाभांश वितरण गर्ने घोषणा गरेको छ । फाइनान्स कम्पनीको जेठ २६ गते बसेको सञ्चालक समितिको बैठकले ६.८४ प्रतिशत लाघांश वितरण गर्ने प्रस्ताव गरेको हो । फाइनान्सले गत आर्थिक वर्ष २०७८/७९ को नाफाबाट सेयरधनीहरुलाई हाल कायम चुक्ता पूँजीको ६.५० प्रतिशत बोनस सेयर र ०.३४ प्रतिशत नगद गरी कूल ६.८४ प्रतिशत लाघांश वितरण गर्ने प्रस्ताव गरेको हो । फाइनान्स कम्पनीले प्रस्ताव गरेको लाभांश नेपाल राष्ट्र बैंकको स्वीकृति पश्चात् आगामी साधारण सभाले पारित गरेपछि सेयरधनीहरुलाई वितरण गरिनेछ ।
