सिभिल बैंकको हकप्रद सेयरमा वृद्धि, ३० प्रतिशत निष्काशन गर्ने प्रस्ताव
काठमाडौं । सिभिल बैंकको हकप्रद सेयरमा वृद्धि भएको छ । बैंकले पूँजी योजना अनुसार ३० प्रतिशत हकप्रद सेयर निष्काशन गर्ने निर्णय गरेको छ । उक्त हकप्रद वृद्धि सम्बन्धि निर्णय बैंकको बुधबार बसेको बैंक सञ्चालक समितिको बैठकले गरेको हो । यस अघि बैंकले सेयरधनीहरुलाई २० प्रतिशत हकप्रद सेयर जारी गर्ने निर्णय गरेको थियो । सो निर्णयलाई पुनरावलोकन गरि बैंकले युनिक फाइनान्स लि. र हामा मर्चेन्ट एण्ड फाइनान्स लि.लाई प्राप्ति गर्ने भएको छ । उक्त दुई कम्पनी प्राप्ति पश्चात बैंकले गत आर्थिक वर्षको मुनाफाबाट सेयरधनीलाई बोनस सेयर वितरण गर्ने भएको छ । साथै, बैंकले बोनस सेयर वितरण पश्चात कायम हुने चुक्ता पूँजीमा सो मात्राको(अर्थात ३० प्रतिशत) हकप्रद सेयर जारी गर्न लागेको हो ।
हल्ला र अनुमानको भरमा लगानी नगर्न धितोपत्र बोर्डको आग्रह
काठमाडौं । नेपाल धितोपत्र बोर्डले सेयर बजारमा चलेको/चलाइएको हल्ला र आधारहीन अनुमानको भरमा लगानी नगर्न लगानीकर्तालाई आग्रह गरेको छ । बोर्डले धितोपत्र बजारमा लगानी गर्दा देशका विद्यमान आर्थिक परिदृष्य, सूचिकृत संगठित संस्थाहरुको आधारभूत विश्लेषण गरि लगानी गर्न आग्रह गरेको हो । साथै, लगानीकर्ता स्वयंको जोखिम बहन गर्न सक्ने क्षमता आदिलाई दृष्टिगत गरी सत्य तथ्य बुझी धितोपत्रमा लगानी गर्न बोर्डको अनुरोध छ । हाल विभिन्न संचार माध्यम तथा सामाजिक संजालहरुमा गरिएको धितोपत्र बजारको विभिन्न हल्लाका पछि लाग्दा कतिपय लगानीकर्ताहरु मारमा पर्ने भएकाले बार्डले यस विषयमा ध्यानाकर्षण गराएको हो । धितोपत्रको मूल्य सम्बन्धित कम्पनीको कार्य सम्पादन स्थिति, संवेदनशील सूचनाहरु र भावी योजनाहरुका साथै देशको समग्र आर्थिक अवस्था तथा लगानीकर्ताहरुको बजार प्रतिको विश्वास आदिले समेत प्रभाव पार्ने बोर्डले जनाएको छ । साथै, बोर्डले विभिन्न संचार माध्यम तथा सामाजिक संजालहरुमा गरिएको अडकल तथा अनुमान अनुरुप शेयरको मूल्य तथा नेप्से परिसूचकको अवस्था नरहने कुराको पनि जानकारी गराएको छ ।
सेयर बजारमा २ अर्ब रुपैयाँको सेयर कारोबार, सबैभन्दा बढी सुर्या लाइफको
काठमाडौं । बुधबार सेयर बजारमा २ अर्ब ७ करोड रुपैयाँको सेयर कारोबार भएको छ । सो दिन १४५ कम्पनीको ३८ लाख ९६ हजार कित्ता सेयर किनबेच भएको छ । अघिल्लो दिनको तुलनामा कारोबार रकममा वृद्धि भएको छ । मंगलबारको तुलनामा कारोबार रकममा करिब १० करोड रुपैयाँ बढी हो । बजारमा सबैभन्दा बढी सुर्या लाइफ इन्स्योरेन्स कम्पनीको सेयर कारोबार भएको छ । कम्पनीको एकै दिन १० करोड ३६ लाख रुपैयाँ बराबरको सेयर किनबेच भएको हो । सो दिन कम्पनीको सेयर मूल्य पतिकत्ता १२८४ रुपैयाँ रहेको छ । सो दिन कारोबार रकममा सुधार आएता पनि नेप्से परिसूचकमा भने गिरावट आएको छ । बुधबार परिसूचक ६ दशमलब ७५ अंकले घटेर १७०३ दशमलब ०७ अंकमा झरेको छ । कारोबार भएका होटल, विकास बैंक, फाइनान्स, उत्पादन मूलक , फाइनान्स र अन्य समूहको परिसूचक उकालो लागेका छन् । त्यस्तै, बीमा, हाइड्रोपावर र बैंकिङ समस्हका परिसुचक राताम्मे भएका छन् ।
