चितवनमा रगतको अभाव, काठमाडौं र पोखराबाट ल्याइँदै
चितवन । जिल्लामा रगतको अभावपछि आज काठमाडौं र पोखराबाट ल्याइँदैछ । पोखराबाट ४०० र काठमाडौंबाट ४५ युनिट रगत ल्याउन लागिएको हो । क्षेत्रीय रक्तसञ्चार केन्द्र भरतपुरमार्फत विगत १० दिनदेखि रक्तदान कार्यक्रम नभएपछि यहाँ रगतको चरम अभाव भएको हो । केन्द्रका प्रमुख रमेशकान्त पौडेलका अनुसार खेतीपाती मौसम र गर्मीका कारण सङ्घसंस्थाले रक्तदान कार्यक्रम नगरेका हुन् । यहाँ दैनिक १५० युनिट रगतको माग हुने गर्दछ । रगतको अभावमा बिरामीको उपचार नै कठिन हुन थालेपछि प्रादेशिक रक्तसञ्चार केन्द्र पोखराबाट ओ, ए र बी समूहका चार सय युनिट रगत ल्याउन लागिएको हो । रगत लिनका लागि गाडी पठाइएको उनले जानकारी दिए । साँझसम्ममा पोखराबाट ल्याउने रगत आइपुग्नेछ । त्यस्तै बिहीबार यहाँको चितवन मेडिकल कलेजमा एकजना बिरामीको कलेजो प्रत्यारोपण हुँदैछ । त्यसका लागि केन्द्रीय रक्तसञ्चार सेवा काठमाडौंबाट ४५ युनिट रगत ल्याइँदैछ । एउटै बिरामीका लागि त्यो रगत जगेडामा राख्ने गरी ल्याउन लागिएको हो । काठमाडौंबाट जहाजमार्फत रगत ल्याउन लागिएको पौडेलले जानकारी दिए । रगत अभाव पूर्तिका लागि बिरामीका आफन्त र केन्द्रले जिल्लाका रक्तदातालाई डाकेर रगतको व्यवस्थापन गर्दै आएको छ । केन्द्रले बोलाएपछि रगत दिनेहरु तीन हजार हाराहारी रक्तदाता रहेको पौडेलको भनाइ छ । जिल्लामा सबैभन्दा बढी रगतको माग क्यान्सर अस्पतालमा हुने गर्दछ । रक्तक्यान्सर भएका एउटै बिरामीलाई ४०० युनिटसम्म रगत दिएको कार्यालयमा तथ्याङ्क रहेको पौडेलले बताए । यहाँको आधा रगत क्यान्सरका बिरामीका लागि जाने गर्दछ । क्यान्सरका अतिरिक्त यहाँ रहेका दुई मेडिकल कलेज, भरतपुर अस्पताल र दुई दर्जन निजी अस्पतालमा रगतको माग हुने गर्दछ । मेडिकल कलेजहरुमा अङ्ग प्रत्यारोपणसम्मका उपचार हुने हुँदा रगतको माग उच्च हुने गर्दछ । राजधानी काठमाडौंपछि धेरै प्रसूति भरतपुरमा हुने गर्दछन् । दुर्घटनाका बिरामीको सङ्ख्या पनि यहाँका अस्पतालहरुमा धेरै हुने गर्दछ । प्रसूति र दुर्घटनाका घाइतेहरुलाई पनि रगतको माग बढी हुने गर्दछ ।
बन्दाबन्दी नभए कोभिड-१९ संक्रमण दैनिक ११ हजार नाघ्ने
काठमाडौं । कोभिड-१९ को संक्रमण दैनिक ११ हजार ६०० को हाराहारीमा पुग्न सक्ने अनुमान गरिएको छ । कोरोना संक्रमण बढ्दै जाँदा बन्दाबन्दी नभएमा, सरकारले तोकेका स्वास्थ्य मापदण्डहरुको पालना पूर्ण रुपमा नभए यस्तो अवस्था आउन सक्ने अनुमान गरिएको छ । कोरोना महामारीको पहिलो र दोस्रो लहरको तथ्याङ्क विश्लेषण र पछिल्लो समयमा देखिएको संक्रमणको ट्रेनका आधारमा यस्तो अनुमान गरिएको नीति अनुसन्धान प्रतिष्ठानले जनाएको छ । यो पूर्ण सरकारी स्वामित्वको सरकारी थिङ ट्याङ्क हो । विभिन्न मुलुकमा कोभिड-१९ महामारीको अवस्था, व्यवस्थापनको अनुभव र सिकाइहरूबारे गरिएको अनुसन्धान प्रतिवेदनमा आगामी डिसेम्बरसम्म खराव, मध्यम र राम्रो हुँदा कस्तो असरपर्ला भनेर व्याख्या गरिएको छ । यसअघिको महामारीमा दैनिक ८ हजार भन्दा बढी नेपालीलाई कोरोना संक्रमण पुष्टि भएको थियो । कोभिड-१९ सङ्क्रमणको विगत १८ महिनाभन्दा बढी अवधिको शृङ्खलाबद्ध तथ्याङ्क हेर्दा सङ्क्रमण बिस्तारै सुरु भएर निश्चित बिन्दुमा पुगेपछि ह्वात्तै बढ्न थाल्ने र करिब ४५ देखि ५० दिनको अवधिमा सङ्क्रमणदर उच्च रहने प्रवृत्ति देखिएको प्रतिष्ठानले जनाएको छ । ‘कोभिड-१९ को सङ्क्रमण दर कम गर्न आवागमन, बन्दाबन्दी तथा अन्य कार्यमा गरिएको कडाइ, बढ्दो सङ्क्रमण र मृत्युदरको सूचना प्रसारणसँगै मानिसहरूले अपनाउने संयम र सतर्कताले कोभिड-१९ को सङ्क्रमण फैलावटको साङ्लो तोडिने भएको हुँदा सङ्क्रमण दर मत्थर हुँदै जाने प्रवृत्ति देखिएको छ । कोभिड-१९ को सङ्क्रमणको सम्बन्धमा हामीले ध्यान दिनुपर्ने पक्ष भनेको पहिलो लहरमा सङ्क्रमण बढ्ने र घट्ने दर उस्तैउस्तै रहे पनि दोस्रो लहरमा भने सङ्क्रमणको वृद्धिदर तीव्र भयो र घट्ने दर बढ्ने दरभन्दा ढिलो देखियो । यस प्रवृत्तिको विश्लेषण गर्दा एक पटक कोभिड-१९ सङ्क्रमणमा ह्रास आएपछि पुनः अर्को लहर आउन केही समय लाग्ने देखिन्छ’ प्रतिस्ठानको प्रतिवेदनमा भनिएको छ ।
मंगलबार ३५७ जनामा कोरोना संक्रमण पुष्टि
काठमाडौं । मंगलबार एकैदिन ३५७ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयको अनुसार ३ हजार ३५७ वटा नमूना परीक्षण गर्दा ३५७ जनामा कोरोना संक्रमण पुष्टि भएका हो । यस्तै आज ६२ जना संक्रमणमुक्त भएका छन् । योसँगै देशभर सक्रिय संक्रमितको संख्या १ हजार ९८२ पुगेको छ ।
