भारतीय कम्पनी मेडेन फार्मास्युटिकल्सको कफ सिरप प्रयोग नगर्न डब्ल्यूएचओको चेतावनी
एजेन्सी । विश्व स्वास्थ्य सङ्गठनले भारतमा बनेका चारवटा कफ सिरपलाई गाम्बियामा ६६ बालबालिकाको मृत्युसँग जोडेर उत्पादन चेतावनी जारी गरेको छ। यो पश्चिम अफ्रिकी देशमा मृगौलामा चोटपटक लागेका बालबालिकाको मृत्युको अनुसन्धानपछि आएको हो। डब्लुएचओले मेडेन फार्मास्यूटिकल्स र भारतीय अधिकारीहरूसँग थप अनुसन्धान गरिरहेको छ जनाएको छ । साथै डब्लुएचओले नियामक निकायहरुलाई उक्त औषधीको बिक्री वितरणमा रोक लगाउन सुझाव दिएको छ । भारतको औषधि सम्बन्धी नियामक निकायले सेप्टेम्बर २९ मा सो औषधीको विषयमा जानकारी पाएपछि अुनुसन्धान शुरु गरेको जनाइएको छ । बुधवार विश्व स्वास्थ्य सङ्गठनका महानिर्देशक टेड्रोस अधानोम गेब्रेयससले चार कफ सिरपको नमूना परीक्षण गरेपछि प्राप्त नतिजालाई लिएर मेडेनको उत्पादनको विषयमा जानकारी गराएकाहुन् । प्रोमेथाजिन ओरल सोल्युसन, कोफेक्समालिन बेबी कफ सिरप, मकोफ बेबी कफ सिरप र मग्रिप एन कोल्ड सिरप नामका औषधीहरु माथि डब्लुएचओले अनुसन्धान गरेको थियो । प्रयोगशाला विश्लेषणले सिरपमा डाइथिलिन ग्लाइकोल र इथिलिन ग्लाइकोलको अस्वीकार्य मात्रा रहेको पुष्टि गरेको छ, जुन मानिसका लागि विषाक्त हुन्छ र सेवन गर्दा घातक साबित हुन सक्छ। डब्ल्यूएचओका अनुसार अहिलेसम्म, गाम्बियामा उत्पादनहरू पहिचान गरिएको छ, तर तिनीहरू अनौपचारिक बजारहरू मार्फत अन्य देशहरूमा पनि वितरण गरिएको हुन सक्छ। मेडेन फार्मास्यूटिकल्सले गरेका उत्पादनहरूका सबै ब्याचहरूलाई प्रासंगिक राष्ट्रिय नियामक प्राधिकरणहरूले विश्लेषण नगरेसम्म असुरक्षित मान्नु पर्ने डब्लुएचओले जनाएको छ । यद्यपी सो औषधी अहिलेसम्म गाम्बियामा मात्र निर्यात गरेको पाइएको छ । प्रायः जेनेरिक औषधीको रुपमा भारतले विश्वको एक तिहाइ औषधि उत्पादन गर्दै आएको छ । दर्जनौं बालबालिकामा मृगौलाको गम्भीर समस्या भएको पत्ता लागेपछि गाम्बियाका मेडिकल अफिसरहरूले जुलाईमा पहिलोपटक चेतावनी दिएका थिए। गाम्बियाका स्वास्थ्य सेवाका निर्देशक मुस्ताफा बिट्टेले रोयटर्सलाई हालका हप्ताहरूमा मृत्युको संख्या घटेको र देशले उत्पादनहरूको बिक्रीमा प्रतिबन्ध लगाएको बताएका छन्। यद्यपि, हालसम्म, केहि सिरपहरू निजी क्लिनिक र अस्पतालहरूमा बिक्री भइरहेको थियो ।
काठमाडौं महानगरले निःशुल्क एम्बुलेन्स सेवा दिने
काठमाडौं । दशैँ बिदाको अवधिभरमा काठमाडौँ महानगरपालिकाले निःशुल्क एम्बुलेन्स सेवा दिने भएको छ । दशैँ बिदामा प्राय एम्बुसेन्स सेवा बन्द हुने र सो अवधिमा नागरिक बिरामी पर्दा एम्बुलेन्स नपाउने समस्या नपरोस् भन्दै महानगरले नागरिकको सेवाका लागि निःशुल्क एम्बुलेन्स सेवा दिनथालेको हो । महानगरले एक सूचना प्रकाशित गरी एम्बुलेन्स सेवाका लागि १०२ तथा डेङ्गु समस्याबारे जानकारी लिन ११८० मा फोन गरेर सेवा लिन सकिने जनाएको छ । यसैगरी महानगरले हाल काठमाडौँसहित देशैभरिमा डेङ्गु रोग महामारीकै रुपमा फैलिरहेकाले नागरिकको उपचारका लागि स्वास्थ्य सेवा पनि उपलब्ध गराउने जनाएको छ । महानगरले आफ्ना स्वास्थ्य स्वयंसेवक खटाई डेङ्गुबारे जानकारी लिने र बिरामीलाई निःशुल्क एम्बुलेन्स सेवा उपलब्ध गराइने जनाएको हो । यतिमात्र नभई दशैँ बिदा अवधिभरमा महानगर पालिकाले पाँच सय ५८ स्वयंसेवक खटाउने भएको छ । उनीहरुले महानगरका नागरिकलाई सिटामोल र जीवनजल वितरण गर्ने योजना बनाइएको छ ।
निःशुल्क वितरणका लागि सरकारले स्थानीय तह र १६ अस्पताललाई साढे ५ लाख थान सिटामोल
काठमाडौं । डेङ्गुको सङ्क्रमण बढेपछि सरकारले काठमाडौं र ललितपुरका १४ स्थानीय तह तथा उपत्यकाका १६ अस्पताललाई पाँच लाख ५० हजार थान सिटामोल उपलब्ध गराएको छ । डेङ्गु सङ्क्रमितको उपचारमा सहयोग पु¥याउने उद्देश्यले स्वास्थ्य मन्त्रालयले ती निकाय तथा अस्पताललाई निःशुल्क वितरणका लागि पारासिटामोल उपलब्ध गराएको हो । काठमाडाैं महानगरपालिका र ललितपुर महानगरपालिकालाई एक/एक लाख थान, कागेश्वरी मनोहरा, कीर्तिपुर, गोकर्णेश्वर, टोखा, तारकेश्वर, दक्षिणकाली, नागार्जुन, बूढानीलकण्ठ, शङ्खरापुर, महालक्ष्मी र गोदावरी नगरपालिकालाई २०/२० हजार थान सिटामोल उपलब्ध गराइएको स्वास्थ्य सेवा विभागले जनाएको छ । सशस्त्र प्रहरी बल अस्पताल, भक्तपुर अस्पताल, सिभिल अस्पताल, कान्ति बाल अस्पताल, सहिद गङ्गलाल राष्ट्रिय हृदयरोग केन्द्र, प्रसूतिगृह, वीर अस्पताल, नरदेवी आयुर्वेद अस्पताल, राष्ट्रिय ट्रमा सेन्टर, नेपाल प्रहरी अस्पताल, पाटन अस्पताल, सहिद शुक्रराज ट्रपिकल तथा सरुवा रोग अस्पताल, वीरेन्द्र सैनिक अस्पताल र त्रिवि शिक्षण अस्पताललाई निःशुल्क वितरणका लागि सिटामोल उपलब्ध गराइएको छ । डेङ्गु सङ्क्रमणको विद्यमान अवस्थालाई मध्यनजर गर्दै विभिन्न औषधि तथा भण्डारण केन्द्रमा औषधि भण्डारण गरी राखिएको र आवश्यकताअनुसार आपूर्तिको व्यवस्था मिलाइएको स्वास्थ्य मन्त्रालयका प्रवक्ता समीरकुमार अधिकारीले जानकारी दिए । स्वास्थ्य संस्था, फार्मेसी, औषधि उद्योगलाई सिटामोलको उत्पादन तथा आपूर्ति व्यवस्था सहज बनाउन सहजीकरण भइरहेको मन्त्रालयले जनाएको छ । काठमाडौं उपत्यकामा डेङ्गुको सङ्क्रमण अन्य स्थानको तुलनामा बढी रहेको मन्त्रालयको भनाइ छ । डेङ्गु एडिज जातका पोथी लामखुट्टेको टोकाइबाट सर्दछ । डेङ्गु सङ्क्रमण भएमा उच्च ज्वरो आउने, शरीर दुख्ने जस्ता लक्षण देखापर्ने चिकित्सकको भनाइ छ । रासस
