नाडा र उपत्यका ट्राफिक प्रहरीबीच सहकार्य हुने, ट्राफिक व्यवस्थापन सुधारमा जोड
काठमाडौं । नाडा अटोमोबाइल्स एशोसिएशन अफ नेपाल (नाडा) र काठमाडौं उपत्यका ट्राफिक प्रहरी कार्यालयबीच ट्राफिक व्यवस्थापन सुधारका लागि सहकार्य गर्ने सहमति भएको छ । साेमबार नाडाका अध्यक्ष सुरेन्द्रकुमार उप्रेतीको नेतृत्वमा गएको प्रतिनिधिमण्डलले उपत्यका ट्राफिक प्रहरी कार्यालयका नवनियुक्त प्रमुख सुरेशप्रसाद काफ्लेसँग भेटगरी ट्राफिक व्यवस्थापनसँग सम्बन्धित विविध विषयमा छलफल गरेको हो । छलफलका क्रममा प्रमुख काफ्लेले ट्राफिक व्यवस्थापनलाई प्रभावकारी बनाउन नाडासँग दीर्घकालीन र सृजनात्मक सहकार्य आवश्यक रहेको बताए । उनले काठमाडौं उपत्यकामा ठूला सिसीका मोटरसाइकल सञ्चालन, सवारी दुर्घटना तथा ट्राफिक अनुशासनका विषयमा ध्यान दिनुपर्ने उल्लेख गर्दै स्कुटरको तुलनामा मोटरसाइकल दुर्घटना बढी हुने तथ्य औंल्याए । त्यस्तै उनले ट्राफिक सचेतनामूलक कार्यक्रम सञ्चालन गर्न नाडालाई आग्रह गर्दै एआई (कृत्रिम बुद्धिमत्ता) प्रविधियुक्त ट्राफिक लाइट व्यवस्थापनका लागि पहल गर्नुपर्ने बताए । सवारी साधन खरिद गर्ने, सर्भिस सेन्टर जाने तथा नयाँ लाइसेन्स लिने व्यक्तिहरूका लागि करिब एक घण्टाको ट्राफिक प्रशिक्षण अनिवार्य गर्नुपर्ने प्रस्ताव पनि उनले राखे । छलफलमा नाडाका अध्यक्ष उप्रेतीले विगतदेखि ट्राफिक प्रहरीसँग हुँदै आएको सहकार्यको चर्चा गर्दै आगामी असार १३ देखि १९ गतेसम्म मनाइने नाडाको ५०औँ वार्षिक साधारणसभा (स्वर्ण उत्सव) कार्यक्रमलाई सफल बनाउन ट्राफिक प्रहरीको सहयोग आवश्यक हुने बताए । उनले ट्राफिक जनचेतना अभिवृद्धिका लागि स्टिकरमार्फत कार्यक्रम सञ्चालन गर्ने जानकारी पनि दिए । नाडाका महासचिव मिलनबाबु मल्लले पनि ट्राफिक प्रहरीसँगको सहकार्यलाई निरन्तरता दिने प्रतिबद्धता जनाए । छलफलमा नाडाका उपाध्यक्ष विक्रम सिंहानिया, सचिव मेघराज पौडेल र कोषाध्यक्ष पंकज अग्रवाललगायतले आ–आफ्ना धारणा राखेका थिए ।
टीभीएस जुपीटर किन्दा ९ महिना पेट्रोल फ्री, सहज फाइनान्स सुविधा
काठमाडौं । जगदम्बा मोटर्सले नेपालका लागि टीभीएस को ‘अल न्यू टीभीएस जुपीटर बीएस–६’ स्कुटरमा नयाँ ग्राहक केन्द्रित योजना सार्वजनिक गरेको छ । दैनिक यात्रामा बढ्दो पेट्रोल खर्चलाई मध्यनजर गर्दै कम्पनीले ‘पेट्रोल टेन्सन? अब जुपिटर सोलुसन’ भन्ने नारासहित अभियान ल्याएको हो । यस योजनाअन्तर्गत टीभीएस जुपीटर खरिद गर्दा ग्राहकले ९ महिनासम्म निःशुल्क पेट्रोल सुविधा पाउनेछन् । कम्पनीका अनुसार उक्त स्कुटरले ६० किलोमिटर प्रतिलिटर (केएमपीएल) सम्मको परीक्षण गरिएको माइलेज दिने भएकाले दैनिक प्रयोगका लागि किफायती विकल्प बन्ने विश्वास लिइएको छ । यससँगै ग्राहकको सहज पहुँचका लागि मासिक किस्ता (इएमआई) सुविधा पनि उपलब्ध गराइएको छ, जसअन्तर्गत केवल २,८९९ रुपैयाँ प्रतिमहिनाबाट स्कुटर खरिद गर्न सकिने कम्पनीले जनाएको छ । अभियानबारे जगदम्बा मोटर्सका दीपक रौनियारले भने, 'हामीले सधैं नेपाली ग्राहकको आवश्यकतालाई ध्यानमा राख्दै भरपर्दो र किफायती मोबिलिटी समाधान ल्याउँदै आएका छौं । बढ्दो पेट्रोल खर्चका बीच जुपिटरले उत्कृष्ट माइलेज र सहज फाइनान्सिङमार्फत ग्राहकलाई राहत दिनेछ ।' टीभीएस जुपीटर बीएस–६ स्कुटर आधुनिक नेपाली परिवार, कार्यालय जाने यात्रु तथा दैनिक कम्युटरका लागि उपयुक्त रहेको कम्पनीको दाबी छ। यसको स्टाइलिस डिजाइन, आरामदायी राइडिङ अनुभव, किफायती माइलेज र लाइफटाइम वारेन्टी जस्ता सुविधाले यसलाई दैनिक प्रयोगका लागि भरपर्दो विकल्प बनाएको छ। यो अफर देशभर रहेका टीभीएसका आधिकारिक शोरुमहरूमा सीमित अवधिका लागि उपलब्ध रहने कम्पनीले जनाएको छ ।
नाइमा मोबिलिटी एक्सपो २०२६ का लागि ४९ स्टल बाँडफाँड सम्पन्न
काठमाडौं । नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएसन (नाइमा) ले ‘नाइमा नेपाल मोबिलिटी एक्सपो २०२६’ का लागि स्टल बाँडफाँड सम्पन्न गरेको छ । नेपालकै सबैभन्दा ठूलो मोबिलिटी तथा अटोमोबाइल प्रदर्शनीका रूपमा आयोजना हुन लागेको उक्त एक्सपो आगामी २०८३ साउन २६ गतेदेखि ३१ गतेसम्म काठमाडौंको भृकुटीमण्डपमा सञ्चालन हुनेछ । नाइमाका अनुसार एक्सपोमा सहभागी चारपांग्रे, दुईपांग्रे तथा कमर्सियल सवारी साधन क्षेत्रका ४९ ब्रान्डका लागि पूर्वनिर्धारित तथा पारदर्शी चिठ्ठा प्रक्रियामार्फत कुल ४९ वटा स्टल बाँडफाँड गरिएको हो । जसमध्ये २६ वटा स्टल चारपांग्रे सवारी साधन ब्रान्डहरूलाई तथा २३ वटा स्टल दुईपांग्रे र व्यावसायिक सवारी साधन ब्रान्डहरूलाई प्रदान गरिएको छ । स्टल बाँडफाँड कार्यक्रममा बोल्दै नाइमा अध्यक्ष रितु सिंह वैद्यले एक्सपोप्रति उद्योग क्षेत्रबाट प्राप्त उत्साहजनक सहभागिताले यसको महत्व थप पुष्टि गरेको बताइन् । उनले एक्सपोलाई केवल प्रदर्शनीमा सीमित नराखी आधुनिक, दिगो र सर्वसुलभ गतिशीलता प्रवर्द्धन गर्ने साझा मञ्चका रूपमा विकास गर्ने उद्देश्य रहेको उल्लेख गरिन् । उनले प्रारम्भिक चरणका सबै स्टल सुनिश्चित भइसकेको जानकारी दिँदै निर्धारित समयसीमा समाप्त भएपछि पनि केही कम्पनीहरूबाट सहभागिताका लागि अनुरोध आइरहेको र उपलब्ध स्थान तथा सम्भावनाका आधारमा ती अनुरोधहरू सम्बोधन गर्ने प्रयास गरिने बताइन् । नाइमा नेपाल मोबिलिटी एक्सपो योजना समितिका अध्यक्ष गौरव शारडाले ४९ ब्रान्डको सहभागितासहित स्टल बाँडफाँड सम्पन्न हुनु उद्योग क्षेत्रको विश्वास, उत्साह र बढ्दो आकर्षणको प्रतिविम्ब भएको बताए । उनले एक्सपोले अन्तर्राष्ट्रिय मापदण्डअनुरूपको अनुभव प्रदान गर्ने विश्वास व्यक्त गरे । नाइमाका कार्यकारी निर्देशक राजकुमार दुलालले स्टल बाँडफाँड प्रक्रिया पूर्ण रूपमा पारदर्शी र निष्पक्ष ढंगले सम्पन्न गरिएको बताए । उनका अनुसार प्रमुख सवारी साधन ब्रान्डहरूको सहभागितासहित एक्सपोको तयारी उच्च मापदण्डअनुसार अघि बढिरहेको छ । एक्सपोमा चारपांग्रे, दुईपांग्रे तथा कमर्सियल सवारी साधनका विभिन्न अन्तर्राष्ट्रिय तथा स्वदेशी ब्रान्डहरूको सहभागिता रहनेछ । प्रदर्शनीमा नवीनतम सवारी साधन, मोबिलिटी समाधान, प्रविधि तथा नवप्रवर्तनका प्रवृत्तिहरू प्रदर्शन गरिनेछन् । साथै, नयाँ उत्पादन सार्वजनिकरण, अत्याधुनिक प्रविधिको प्रदर्शन तथा ज्ञानमूलक सत्रहरू पनि समावेश हुनेछन् । यसले उपभोक्ता, व्यवसायी तथा उद्योगका सरोकारवालाहरूलाई एकै स्थानमा जोड्दै नेपालको मोबिलिटी क्षेत्रको भविष्य बुझ्ने अवसर प्रदान गर्ने अपेक्षा गरिएको छ । नाइमा मोबिलिटी तथा अटोमोबाइल क्षेत्रको प्रतिनिधि संस्था हो, जसले ‘मोबिलिटी फर अल’ अवधारणालाई अघि बढाउँदै उद्योग विकास, नवप्रवर्तन प्रवर्द्धन तथा नीतिगत सहकार्यमा सक्रिय भूमिका खेल्दै आएको छ । प्रदर्शनीको समग्र व्यवस्थापन मिडिया स्पेस सोलुसन्स (एमएसएस) ले गर्नेछ भने डिजिटल मिडिया साझेदारका रूपमा डिजिटल सोलुसन्स र पब्लिकेसन्स साझेदारका रूपमा प्रोफिट मिडिया आबद्ध रहनेछन् ।
