महानगरपालिकाभित्र दर्ता नभएका टिकट बुकिङ कार्यालय हटाइने
काठमाडौं । काठमाडौं महानगरपालिकाले जथाभावीरुपमा सञ्चालनमा आएका र महानगरपालिकाभित्र दर्ता नभएका टिकट बुकिङ कार्यालय हटाउने भएको छ । महानगरपालिकाले आज एक सूचना जारी गर्दै काठमाडौंको ट्राफिक व्यवस्थापनलाई चुस्त, दुरुस्त र यात्रीमैत्री बनाउनका लागि दर्ता नभई सञ्चालनमा रहेका टिकट बुकिङ कार्यालय भदौ १ देखि हटाउने भएको हो । महानगरपालिकाले काठमाडौं उपत्यकाबाट बाहिर चल्ने यात्रुवाहक सार्वजनिक सवारी साधनका लागि तोकिएको मापदण्डअनुरुप टिकट बुकिङ कार्यालयसहित व्यावसायिक ठेगाना रहेको सम्बन्धित वडा कार्यालयमा अनिवार्यरुपमा दर्ता गर्नसमेत आग्रह गरेको छ । महानगरपालिकाले टिकट बुकिङ कार्यालय सडक चोकको सय मिटर वरपर खोल्न नपाउने, बुकिङ कार्यालयको मुख्य कार्यालय गोँगबुस्थित नयाँ बसपार्कभित्र अनिवार्यरुपमा हुनुपर्ने, नयाँ बसपार्कदेखि महाराजगञ्ज र वाफलसम्म कुनै पनि बुकिङ कार्यालय खोल्न नपाउने बताएको छ । यस्तै, बुकिङ कार्यालयमा अनिवार्य भाडादर उल्लेख गरिएको वोर्ड राख्नुपर्ने, बुकिङ कार्यालयमा टिकट काट्न आउने सेवाग्राहीका लागि अनिवार्य आधारभूत आवश्यकता ९पार्किङ, शौचालय, पानी, बत्ती बस्ने व्यवस्था० भएको हुनुपर्ने उल्लेख छ । यसैगरी, बुकिङ कार्यालयको कोठा कम्तीमा १० देखि १५ फिटको हुनुपर्ने, बुकिङ कार्यालयका कर्मचारीले पोशाक र परिचयपत्र अनिवार्यरुपमा लगाउनुपर्ने र बुकिङ कार्यालयमा बुकिङ हुने सवारी साधन लैजान नपाउने व्यवस्थासमेत गरेको छ । यसअघि महानगरपालिकाले काठमाडौंभित्र जथाभावी रुपमा टिकट बुकिङ कार्यालय खोल्ने तथा सडकमा यात्रुलाई चढाउने सवारी साधनलाई नयाँ बसपार्कभित्रबाट सञ्चालन गर्ने व्यवस्था गरेको थियो । सोही व्यवस्थाअनुसार अहिले अधिकांश सवारी साधन नयाँ बसपार्कभित्रबाट सञ्चालन हुँदै आएका छन् ।
ईभीलाई भ्याइनभ्याई, पेट्रोलबाट चल्ने ट्याक्सी पार्किङमा
फाइल फोटो । काठमाडौं । काठमाडौंको डिल्लीबजार बस्ने कुमार खड्काले विद्युतीय ट्याक्सी(ईभी) चलाउन थालेको तीन महिना भयो । ईभी ट्याक्सी चलाउन थालेपछि उनको आम्दानीमा ठूलो परिवर्तन देखिएको छ । विगतमा इन्धनबाट चल्ने ट्याक्सी चलाएर आजित बनेका कुमार आजभोली विद्युतीय ट्याक्सी चलाएर हर्षित बनेका छन् । इन्धनबाट चल्ने ट्याक्सी चलाउँदा उनलाई दिनभर आम्दानी हुने/नहुने ठेगान हुन्थेन । कहिले दिनभर ट्याक्सी पार्किङमा थन्काएर घर साँझ रित्तै घर फर्किनुपर्ने बाध्यता थियो भने कहिले दई/तीन हजार रुपैयाँ बोकेर गुजारा चलाउनु पर्ने अवस्था थियो । तर, अहिले ईभी ट्याक्सीले उनलाई निकै ब्यस्त बनाएको छ । आम्दानी पनि सोचेभन्दा बढी भएको उनी सुनाउँछन् । अहिले उनी बिहान घरबाट निस्केदेखि साँझ घर फर्किदासम्म निकै व्यस्त हुन्छन् । ‘पहिला प्रेट्रोलबाट चल्न आफ्नै गाडी चलाउँथे, त्यो गाडीलाई बेचेर विद्युतीय ट्याक्सी खरिद गरेँ, पहिले यात्रु पाउन निकै सकस हुन्थ्यो, अहिले सहज भएको छ,’ उनले भने, ‘आम्दानीमा पनि धेरै फरक आएको छ ।’ उनले पहिलको ट्याक्सी बिक्री गरेको ट्याक्सीको पैसा र केही पैसा बैंकबाट ऋण लिएर नयाँ विद्युतीय ट्याक्सी खरिद गरेका हुन् । अहिले उनलाई बैंकको किस्ता तिर्न पनि समस्या नभएको सुनाउँछन् । सरकारले पनि ईभीलाई प्रोत्साहन गरिरहेको बेला ईभीको भविष्य राम्रो भएको महसुस गरेर विद्युतीय ट्याक्सी रोजेको उनको भनाइ छ । इन्धनबाट चल्ने ट्याक्सीको तुलनामा विद्युतीय ट्याक्सीमा यात्रा गर्दा प्रतिकिलोमिटर पाँच रुपैयाँ फाइदा हुने उनको भनाइ छ । उनले खुसी हुँदैन भने, ‘पहिले कसैलाई सोध्दा पनि नजाने भन्थे, अहिले यात्रुहरु बसेकै ठाउँमा आएर जाने हो भनेर सोध्नुहुन्छ ।’ उनका अनुसार अहिले उनको मासिक आम्दानी एक लाख रुपैयाँ बढी छ । बैंकबाट ६० हजार किस्ता तिरेर ४० हजार घर खर्चमा प्रयोग गर्ने गरेको उनको भनाइ छ । पेट्रोलियम पदार्थको ट्याक्सीको तुलनामा विद्युतीय ट्याक्सीमा सञ्चालन लागत कम भएकोले पनि धेरैको रोजाइमा विद्युतीय ट्याक्सी परेको उनको भनाइ छ । यद्यपि कम्पनीले दिएको ग्यारेन्टी वारेन्टी सकिएपछि के गर्ने ? ट्याक्सीको कुनै पार्ट परिर्वतन गर्नु पर्यो भने खर्च ठूलो लाग्ने गरेको खड्काले सुनेका छन् । त्यसको जोहो भने कसरी गर्ने भन्ने चिन्तामा उनी छन् । तर, अहिलेसम्म उनी खुसी नै छन् । खड्का जस्तै विद्युतीय ट्याक्सी चलाउने अन्य चालकहरु प्नि पहिलेको तुलनामा धेरै खुसी छन् । उनीहरु विद्युतीय गाडी चलाउन थालेपछि यात्रुसँगै आम्दानी पनि बढेको अनुभव सुनाउँछन् । ‘यो गाडी हेर्दै कार जस्तो छ, कोहीले यसलाई कारै ठान्छन्, अन्य ट्याक्सीको भन्दा विद्युतीय ट्याक्सी बढी सुविधायुक्त छ, त्यसैले पनि धेरैको रोजाई विद्युतीय ट्याक्सी छ,’ अर्का एक विद्युतीय ट्याक्सी चालकले भने । पेट्रोलियम पदार्थका ट्याक्सी चालक भन्छन् : कमाई छैन ईभी ट्याक्सी चालक कमाई राम्रा भएको बताउँदा इन्धनबाट चल्ने ट्याक्सी चालक भने कमाइ भएको गुनासो गर्छन् । ट्याक्सी चालक बुद्ध नेही दैनिक कमाइ १५ सय रुपैयाँ मात्रै हुने गरेको सुनाउँछन् । यस हिसाबमा उनको मासिक ४५ हजार आम्दानी हुने गरेको छ । विगतमा दैनिक ३ हजार रुपैयाँसम्म कमाउने बुद्धको हाल कमाइ घटेको छ । उनलाई काठमाडौंमा ट्याक्सी चलाउन थालेको १८ वर्ष भयो । इन ड्राइभर, पठाओ र विद्युतीय ट्याक्सी बढ्दा आफुहरुको कमाइमा कमी आएको उनको भनाइ छ । ‘पहिला आम्दानी पनि राम्रो थियो, मासिक ६०/७० हजार रुपैयाँ कमाई हुन्थ्यो, यात्रु पनि पाइन्थे, अहिले विभिन्न एपहरु आउँदा पनि कमाइ घटेको छ, विद्युतीय ट्याक्सीले पनि केही आम्दानी खोस्यो,’ उनले अनुभव सुनाए । अर्का ट्याक्सी चालक आनन्द कुमार माझी यात्रु पाइनै छाडेको बताउँछन् । विगत लामो समयदेखि ट्याक्सी कुदाएरै जीविकोपार्जन गर्दै आएका माझीको अहिले आम्दानी खस्किएको छ । उनी मासिक २५/३० हजार रुपैयाँ आम्दानी हुने गरेको बताउँछन् । उनले पनि ईभी ट्याक्सीका कारण आम्दानीमा गिरावट आएको बताए । केही समयअघि निजी विद्युतीय गाडीहरू मात्रै गुड्दै आएको काठमाडौं उपत्यकाभित्र अहिले विद्युतीय ट्याक्सी पनि देखिन थालेका छन् । ईभी गाडीको मूल्य महँगो भएता पनि सञ्चालन खर्च भने कम छ । जसका कारण ईभी ट्याक्सी प्रतिको क्रेज बढ्दै गएको छ । यात्रुको गुनासो : भाडा महँगो भयो बजारमा विद्युतीय ट्याक्सी बढ्दै गर्दा ट्याक्सीले लिने भाडा भने महँगो भएको गुनासो यात्रुहरुले गरेका छन् । यात्रु विशाल खत्रीले इन्धनबाट चल्ने सवारीभन्दा विद्युतीय ट्याक्सीको भाडा महँगो भएको बताउँछन् । ‘म मैतीदेवीदेखि एयरपोर्ट जानु थियो, म हतारमा थिएँ, सोही बेला विद्युतीय ट्याक्सी आयो, कुनै बार्गेनिङ नगरेर ट्याक्सीमा बसेँ, बिचमा भाडा कति हो भनेर सोध्दा भाडा एक हजार भनियो, म तिर्न बाध्य भएँ, त्यो धेरै महँगो भाडा भयो,’ उनले गुनासो गर्दै भने । अर्का यात्रु राम अधिकारी पनि ईभीको ट्याक्सी भाडामा केही सहुलियत हुनुपर्ने बताउँछन् । विद्युतीय ट्याक्सी सुविधायुक्त भएपनि केही भाडा घटाउँदा यात्रुलाई सहज हुने उनको भनाइ छ । पछिल्लो समय बजारमा विद्युतीय ट्याक्सीको संख्या बढेको छ । चालकहरु प्नि इन्धनबाट चल्ने ट्याक्सीबाट विद्युतीय ट्याक्सीमा सिफ्ट हुँदै गएका छन् । हाल एक सय बढी विद्युतीय ट्याक्सी दर्ता भएर सडकमा गुडिरहेका छन् । बागमती प्रदेश सरकारले सट्टा दर्तामा विद्युतीय ट्याक्सी दर्तागर्न दिने निर्णय गरे सँगै सडकमा विद्युतीय ट्याक्सीहरुको उपस्थिति बढ्न थालेको हो । सम्बन्धित सामग्री : काठमाडौंका सडकमा गुड्दैछन् १०३ विद्युतीय ट्याक्सी, लागत कम देखिएपछि आकर्षण बढ्दै
चौराह हस्पिटलमा सिटिजन्स बैंकका ग्राहकलाई १० प्रतिशत छुट
काठमाडौं । सिटिजन्स बैंक र चौराह हस्पिटलबीच समझदारी भएको छ । बैंक र बुटवल स्थित चौराह हस्पिटलबीच सिटिजन्स बैंकका ग्राहकहरूलाई विशेष छुट दिने समझदारीपत्रमा हस्ताक्षर भएको हो । सो समझदारीपत्रमा हस्ताक्षर पश्चात् सिटिजन्स बैंकका कार्डबाहक ग्राहकहरूले चौराह हस्पिटलमा १० प्रतिशतसम्मको आकर्षक छुट पाउनेछन् । यस किसिमको सहकार्यबाट बैंकका ग्राहकहरु लाभान्वित हुनुका साथै नगद कारोबारबाट डिजिटल कारोबार तर्फ उत्प्रेरित हुने विश्वास बैंकले लिएको छ । बैंकले डिजिटल बैंकिङ्ग माध्यमहरुको प्रयोगलाई बढाउन र ग्राहकहरुलाई डिजिटल माध्यमबाट भुक्तानी गर्न प्रोत्साहन गर्न समय समयमा ग्राहकमैत्री सुविधाहरु सञ्चालनमा ल्याउँदै आएको छ । डिजिटल कारोबार गर्दा पाइने छुट सम्बन्धी विस्तृत विवरणहरू सिटिजन्स बैंकको वेबसाइटमा प्राप्त गर्न सकिनेछ । सिटिजन्स बैंकले देशैभरी फैलिएका आफ्ना १८८ वटा शाखा, १४७ वटा ए.टि.एम. ३ विस्तार काउन्टर र ९७ वटा शाखा रहित बैंकिङ्ग ईकाईहरुबाट १६ लाख २५ हजार भन्दा बढी ग्राहकवर्गलाई आधुनिक बैंकिङ्ग सेवाहरु प्रदान गर्दै आएको छ ।
बीवाईडीले ५० लाख गाडी सार्वजनिक गर्यो
काठमाडौं । बीवाईडीले ५० लाखौं गाडी सार्वजनिक गरेको छ । गत अगस्ट ९ तारिखका दिन बीवाईडीको डेन्जा एन७ गाडीले सो माइलस्टोन हासिल गरेको हो । यति धेरै न्यु इनर्जी भेइकल उत्पादनको लक्ष्य हासिल गर्ने बीवाईडी विश्वकै पहिलो कम्पनी समेत बनेको छ । बीवाईडीको ग्लोबल हेडक्वार्टरमा आयोजित एक कार्यक्रममा बीवाईडीका चेयरम्यान तथा प्रेसिडेन्ट वाङ चान्फुले ५० लाखौ सवारी साधन सार्वजनिक गर्न पाउनु कम्पनीका लागि ऐतिहासिक क्षण भएको बताए । सो अवसरमा उनले कम्पनीलाई विश्वास गरी सो लक्ष्य हासिल गर्न सफल बनाउने सम्पूर्ण ग्राहक तथा अटोमोबाइल उद्योगका सहकर्मी एवं कर्मचारीहरुप्रति हार्दिक आभार प्रकट गरे । बीवाईडीले १० लाखौ न्यु इनर्जी भेइकल उत्पादनका लागि १३ वर्ष कुर्नुपरेको थियो । अर्को १८ महिनामा त्यस्ता ३० लाख र त्यसपछिको ९ महिनामै ५० लाख सवारी साधन उत्पादन गर्न सफल भएको छ । कम्पनीका लागि सन् २०२२ निकै नै उल्लेख्य रह्यो । यो वर्ष १८ लाख ६० हजार न्यु इनर्जी भेइकल बिक्री गर्न सफल भयो । सो कार्यले सन् २०२३ मा पनि निरन्तरता पाएको छ । जनवरी देखि जुलाई सम्मको अवधिमा १५ लाख सवारी साधन बिक्री गर्न कम्पनी सफल भएको छ । ती मध्ये ९२ हजार ४६९ सवारी साधन अन्तर्राष्ट्रिय बजारमा बिक्री गर्न कम्पनी सफल भएको छ, जुन सन् २०२२ को पुरै वर्षमा बिक्री गरिएको भन्दा बढी संख्या हो । जुलाई महिना सम्ममा बीवाईडीले विश्वभर ४८ लाख भन्दा बढी न्यु इनर्जी भेइकल बिक्री गरिसकेको छ । सन् २०१० देखि बीवाईडीले विश्वभर आफ्नो उपस्थिति बढाउदै गएको छ र सार्वजनिक यातायातका लागि न्यु इनर्जी बस र ट्याक्सी समेत उपलब्ध गराइरहेको छ । विश्वका ७० भन्दा बढी देशका ४०० भन्दा बढी सहरमा बीवाईडीले सार्वजनिक यातायातका इलेक्ट्रिक सवारी साधन उपलब्ध गराइरहेको छ । हाल विश्वका ५४ भन्दा बढी देशमा बीवाईडीका एट्टो ३ लगायतका न्यु इनर्जी भेइकल उपलब्ध छन् ।
३० प्रतिशत लाभांश बाँड्ने सनराइजको घोषणा
काठमाडौं । सनराइज क्यापिटलले लाभांश घोषणा गरेको छ । क्यापिटलले गत आर्थिक वर्ष २०७९/८० को नाफाबाट ३० प्रतिशत लाभांश वितरण गर्ने प्रस्ताव गरेको हो । क्यापिटलको बिहीबार बसेको सञ्चालक समितिको बैठकले आफ्ना सेयरधनीहरुलाई ३० प्रतिशत (करसहित) का दरले नगद लाभांश वितरण गर्ने निर्णय गरेको हो । क्यापिटलले प्रस्ताव गरेको लाभांश आगामी १३ औं वार्षिक साधारण सभाले पारित गरेपछि वितरण गरिनेछ । सनराइज क्यापिटल लक्ष्मी सनराइज बैंकको पूर्ण स्वामित्व रहेको सहायक कम्पनी हो ।
रियलमीको सर्भिस सेन्टर अब पोखरामा
पोखरा । रियलमीले पोखरामा चौथो सर्भिस सेन्टर खोलेको छ । पोखरामा बढ्दै गइरहेको आफ्नो ग्राहक संख्यालाई ध्यानमा राख्दै उनीहरुलाई गुणस्तरीय आफ्टर सेल्स सर्भिस प्रदान गर्ने उद्देश्यले यस सेवा केन्द्र खोलिएको रियलमीले जनाएको छ । रियलमी नेपालका कन्ट्री हेड मुनिश गिरीले भने, ‘पोखरामा पनि हाम्रो आफ्नै सेवा केन्द्र स्थापना गर्न पाउँदा हामी अत्यन्तै उत्सहित छौं । नेपालभरी छरिएर रहनुभएका हाम्रा समस्त ग्राहक वर्गहरुलाइ राम्रो स्तरको सेवा प्रदान गर्ने हाम्रो प्रतिवद्धता अनुरुप हामीले पोखरामा चौँथो सेवा केन्द्र स्थापना गरेका छौं । हामीलाई आशा छ यो सेवा केन्द्र मार्फत हाम्रा ग्राहकहरुले स्मार्टफोन सम्बन्धि हरेक समस्याहरुको सहज रुपमा समाधान पाउन सक्नुहुनेछ।’ रियलमी नेपालको आधिकारिक वितरक जगदम्बा मोबाइल्स र शंकर ग्रुपका एग्जिक्युटिभ डिरेक्टर, सक्षम जाटियाले भने , ‘हाम्रो निरन्तर रुपमा वृद्धि भइरहेको लोकप्रियताले रियलमीप्रतिको नेपाली ग्राहकहरुको विश्वासलाई झल्काएको छ । यो साथ र विश्वासको लागि हामी सम्पूर्ण नेपाली ग्राहकवर्गहरु प्रति आभारी छौ ।’ यस नयाँ सेवा केन्द्रको उद्घाटनसँगै आफ्ना ग्राहकहरुलाई राम्रो स्तरको सेवा र सुविधा प्रदान गर्ने रियलमीको प्रयासलाई नयाँ उचाईमा पुर्यारएकोछ । यस सेवा केन्द्रमा ग्राहकहरुले अत्याधुनिक प्राविधिक सहयोग र असली पार्ट–पुर्जाहरु लगयत सफ्टवेयर सम्बन्धि मर्मत सेवाहरु प्राप्त गर्न सक्नेछन् । त्यस्तै यस सेवा केन्द्रमा दक्ष र तालिमप्राप्त कर्मचारीहरु छन् । ग्राहकको सेवा सुविधालाई ध्यानमा राख्दै फोनमा आईपर्नसक्ने जुनैपनि समस्याहरुको चुस्त र सहज रुपमा समाधान गर्ने उद्देश्यको साथ यस सेवा केन्द्रको स्थापना गरिएको कम्पनिले जनाएको छ । रियलमीले कम मूल्यमा फ्ल्यागशिप स्तरका सुविधाहरू प्रदान गर्दै आएको छ जसका कारण यो ब्रान्ड नेपालमा चाँडै लोकप्रिय बन्न सफल भएको छ । पोखराको चिप्लेढुङ्गास्थित मोबाईल टावरमा खोलिएको यो नयाँ रियलमी सर्भिस सेन्टर बिहान १० बजेदेखी बेलुका ५ बजेसम्म खुल्छ । ग्राहकहरूले आधिकारिक रियलमी वेबसाइट र एप मार्फत अनलाइन पनि सपोर्ट पाउन सक्नेछन् ।
सांग्रिला डेभलपमेन्ट बैंकमा रोजगारीको सुनौलो अवसर
काठमाडौं । बैंकमा जागिर खोज्नेहरुको लागि खुसिको खबर छ । सांग्रिला डेभलपमेन्ट बैंकले विभिन्न पदहरुका लागि कर्मचारी माग गरेको छ । बैंकले ब्रान्च म्यानेजरमा सुपरभाइजरदेखि सिनियर अफिसरका लागि र क्रेडिट रिभ्युवरका लागि असिस्टेन्ट र अफिसरका लागि कर्मचारी माग गरेको हो । उक्त पदहरुमा आवेदन दिनको लागि स्नातक तह उत्तिर्ण गरेको हुनुपर्ने छ । बैंकले आफ्नो विभिन्न शाखा कायाृलयका लागि कर्मचारी माग गरेको हो । बैंकका अनुसार इच्छुक तथा योग्यता पुगेकाले भदौ १८ गतेसम्म आवेदन दिनुपर्नेछ ।
१० अर्बको विकास ऋणपत्र बिक्री गर्दै राष्ट्र बैंक
काठमाडौं । आइतबार आठ वर्ष अवधिको १० अर्ब रूपैयाँ बराबरको विकास ऋणपत्र–२०८८ बोलकबोल माध्यमबाट बिक्री हुने भएको छ । सरकारकोतर्फबाट नेपाल राष्ट्र बैंकले विकास ऋणपत्रमार्फत ऋण उठाइदिन लागेको हो । विकास ऋणपत्र साउन २८ गते आइतबार अपराह्न ३ बजेसम्म बोलकबोल हुनेछ भने साउने २९ गते निष्काशन हुनेछ । यो विकास ऋणपत्र बैंक तथा वित्तीय संस्था, गैर–बैंक वित्तीय संस्था, बीमा कम्पनी, सङ्गठित संस्था तथा सर्वसाधारण व्यक्तिले पनि खरिद गर्न सक्नेछन् । यो ऋणपत्र धितो राखी कर्जासमेत लिन पाइने राष्ट्र बैंकले जनाएको छ । विसं २०८८ साउन २९ गते साँवा भुक्तानी हुने यो ऋणपत्रको ब्याज अर्धवार्षिकरुपमा भुक्तानी हुनेछ । आर्जित ब्याजमा ब्याजकर लाग्नेछ । प्रतिस्पर्धी र अप्रतिस्पर्धी बोलवालालाई क्रमशः निष्काशित रकमको ८५ र १५ प्रतिशत अर्थात् आठ अर्ब ५० करोड र एक अर्ब ५० करोड रूपैयाँ छुट्याइएको छ । अप्रतिस्पर्धी बोलवालालाई छुट्याइएको रकमका लागि पूरा बोल प्राप्त नभएमा बाँकी हुन आउने रकम प्रतिस्पर्धी बोलवालालाई बिक्री गरिने राष्ट्र बैंकले जनाएको छ । बोलवालाले कबोल गरेको ब्याजदरलाई सानोदेखि ठूलो क्रममा मिलाएर राखी बाँडफाँट गरिने रकमसम्ममा कायम भएको ब्याजदरको सीमालाई एकल ब्याजदर कायम गरी सो ब्याजदर र सो ब्याजदरभन्दा तलका सबै बोलवालालाई सोही एकल ब्याजदरमा ऋणपत्र उपलब्ध गराइनेछ । घटीमा ५० हजार रुपैयाँ र बढीमा कूल निष्काशित रकमको सीमा नबढाइ ५० हजार रुपैयाँले भाग लिँदा निशेष भाग जाने अङ्कमा खरिद गर्न पाइनेछ । यो ऋणपत्रको दोस्रो बजार कारोकार नेपाल स्टक एक्सचेञ्जबाट हुनेछ ।
