हुवावे नेपालद्वारा ‘सीड्स फर द फ्युचर २०२४’ समापन
काठमाडौं । हुवावे नेपालले हुवावे टावर, हट्टिसारमा हुवावे नेपाल प्रदर्शनी केन्द्रको उद्घाटन गर्दै महत्त्वपूर्ण माइलस्टोन तय गरेको छ । सञ्चार तथा सूचना प्रविधिमन्त्री पृथ्वीसुब्बा गुरूङले प्रदर्शनी केन्द्रको उद्घाटन गरेका थिए । यो प्रदर्शनी केन्द्रले सूचना तथा सञ्चार प्रविधि (आईसीटी) क्षेत्रमा पछिल्ला प्रवृत्तिहरू र अभ्यासहरूलाई प्रदर्शित गर्ने एक महत्त्वपूर्ण केन्द्रको रूपमा काम गर्नेछ। उद्घाटन समारोहपछि हुवावेके प्रमुख सामाजिक पहल ‘सीड्स फर द फ्युचर २०२४’ को समापन समारोह आयोजना गरिएको थियो, जसको उद्देश्य नेपालका युवाहरूलाई आईसीटी शिक्षा र नवप्रवर्तनमार्फत सशक्त बनाउनु हो । कार्यक्रमको उद्घाटन हुवावे नेपालका प्रमुख कार्यकारी अधिकृत ह्वांगजुनको स्वागत मन्तव्यबाट सुरू भएको थियो। कार्यक्रममा अन्य सरकारी अधिकारीहरू, विभिन्न विश्वविद्यालयका डीन तथा प्राध्यापकहरू र विभिन्न संस्थाका अध्यक्ष तथा प्रमुख कार्यकारी अधिकृतहरूको उपस्थिति रहेको थियो । नेपालको डिजिटल रूपान्तरणमा हुवावे नेपालको योगदानको २५ वर्ष पूरा भएको अवसरले पनि विशेष महत्त्व राखेको छ । बितेको २५ वर्षमा हुवावेले देशको प्राविधिक परिदृश्यलाई आकार दिन, दूरसञ्चार पूर्वाधारको उन्नतिदेखि आईसीटी समाधानहरूमा नवप्रवर्तन गर्नका लागि महत्त्वपूर्ण भूमिका खेलेको छ । प्रदर्शनी केन्द्रको उद्घाटन हुवावे नेपालको डिजिटल भविष्यलाई समर्थन गर्ने र प्राविधिक नेताहरूको नयाँ पुस्ताका लागि प्लाटफर्म उपलब्ध गराउने निरन्तर प्रतिबद्धताको प्रमाण हाे । यसका साथै हुवावेले यस वर्षको ‘सीड्स फर द फ्युचर’ कार्यक्रमको समापन घोषणा गरेको छ, जसमा ‘टेक फोर गूड २०२४’ प्रतियोगितामा सहभागी नेपाली विद्यार्थी टोलीले ‘पिपल्स च्वाइस अवार्ड’ जितेका थिए । यस परियोजनाले ग्रामीण नेपालका गर्भवती महिलाहरूको स्वास्थ्य अनुगमन गर्नका लागि पोर्टेबल अल्ट्रासाउण्ड मेसिनको स्थापना गर्ने प्रस्ताव गरेको हो। यस परियोजनाले आईसीटीमार्फत सामाजिक प्रभाव सिर्जना गर्नका लागि ती विद्यार्थिहरूलाई सम्मानित गरेको हो। कार्यक्रममा सञ्चार र सूचना प्रविधिमन्त्री गुरूङले भने, ‘हुवावेले हाम्रा युवाहरूका लागि एउटा प्लाटफर्म सिर्जना गरेको देख्दा प्रेरणा मिल्छ र तिनीहरूले नेपालका सामाजिक र आर्थिक वृद्धिमा महत्त्वपूर्ण प्रभाव पार्न सक्ने नवप्रवर्तनात्मक समाधानहरू विकास गर्न प्रोत्साहित गरेको देखिन्छ । म हुवावे र हाम्रा विद्यार्थीहरूलाई नेपालको प्रतिष्ठा वैश्विक मञ्चमा पुर्याएकोमा धन्यवाद दिन चाहन्छु । यसका साथै हुवावेले नेपालका आईसीटी र टेलिकम क्षेत्रका एक जिम्मेवार सदस्यको रूपमा आफूलाई प्रमाणित गरेको छ र विभिन्न तरिकामा योगदान दिएको छ। मलाई विश्वास छ कि आजको उद्घाटनले सम्पूर्ण पारिस्थितिकी तन्त्रका सरोकारवालाहरूसँग साझा बुझाइ बनाउन मद्दत गर्नेछ र डिजिटल नेपालको साझा लक्ष्य स्थापना गर्नेछ ।’ यस्तै, हुवावे नेपालका सीईओ ह्वांगजुनले भने, ‘पछिल्लो २५ वर्षदेखि हाम्रो मार्गदर्शनको नारा ‘नेपालमा, नेपालका लागि’ भएको छ । हामीले नेपालका आईसीटी विकासमा महत्त्वपूर्ण प्रभाव पार्न कुनै कसर बाँकी राखेका छैनौं । जस्तो कि हामी सबैलाई थाहा छ, युवाहरू हाम्रो डिजिटल भविष्यका बीउ हुन् र हामीले उनीहरूको आईसीटी सीप र क्षमता विकास गर्न कडा मेहनत गरेका छौं। यसका साथै हामी विश्वास गर्छौं कि डिजिटल नेपालको लक्ष्य केवल सामूहिक प्रयासमार्फत मात्र पूरा गर्न सकिन्छ। त्यसैले हामीले आज प्रदर्शनी केन्द्र सुरू गरेका छौं, ज्ञान साझेदारीका लागि। हामीले २५ वर्षसम्म नेपाललाई पूर्ण रूपमा जडान गरिएको, बौद्धिक नेपाल बनाउनका लागि काम गरेका छौं र यो प्रयास निरन्तर रहनेछ ।’ हुवावे दक्षिण एसियाका बोर्ड निर्देशक लिनहाईले भने, ‘आज हुवावेका लागि दुई महत्त्वपूर्ण माइलस्टोनहरू छन्, हाम्रो नयाँ हुवावे प्रदर्शनी केन्द्रको उद्घाटन र ‘सीड्स फर द फ्युचर नेपाल २०२४’ कार्यक्रमको सफल समापन नेपालमा २५ वर्षको प्रभावशाली उपस्थिति मनाउँदै हामी आगामी डिजिटल नेताहरूलाई सशक्त बनाउन र देशको प्रविधिगत वृद्धिमा योगदान गर्न प्रतिबद्धता दोहोर्याउँछौं ।’
रास्वपा सभापति लामिछानेसहितका प्रतिवादीका अदालतमा बयान सुरु हुँदै
गण्डकी । सहकारी ठगीका आरोपित राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछानेसहित पाँच प्रतिवादीको सोमबारदेखि जिल्ला अदालत कास्कीमा बयान सुरु हुँदैछ । यसअघि आइतबार जिल्ला सरकारी वकिलको कार्यालय, कास्कीले लामिछानेसहित ३१ जनाविरुद्ध सहकारी ठगीमा मुद्दा दायर गरेको थियो । लामिछानेमाथि सहकारी ठगीसँगै सङ्गठित अपराध र सम्पत्ति शुद्धीकरण कसुरमासमेत मुद्दा दायर भएको छ । जिल्ला अदालत कास्कीका सूचना अधिकारी सुरज अधिकारीले लामिछाने, छविलाल जोशीसहित अदालतमा उपस्थित गराइएका पाँच जना प्रतिवादीको बयान सुरु जानकारी दिए । ‘गोलामार्फत इजलासको टुङ्गो लागेपछि प्रतिवादीहरुको बयान सुरु हुन्छ, बयान सकिएपछि मात्र थुनछेकको आदेश हुन्छ’, उनले भने । सरकारी वकिलको कार्यालयले पोखराको सूर्यदर्शन सहकारीको रकम ठगी प्रकरणमा अहिलेसम्म ६३ जनाविरुद्ध जिल्ला अदालत कास्कीमा मुद्दा दायर गरिएको जनाएको छ । लामिछानेसहित १९ जनाविरुद्ध सङ्गठित अपराधमासमेत मुद्दा चलाइएको जिल्ला सरकारी वकिलको कार्यालय, कास्कीका सहायक जिल्ला न्यायाधिवक्ता शान्तिदेवी शर्माले जानकारी दिइन् । यस्तै लामिछानेसँगै रामबहादुर खनाल, छविलाल जोशी र लीला पछाइविरुद्ध सम्पत्ति शुद्धीकरणमा मुद्दा दायर गरिएको उनले बताइन् । लामिछानेमाथि सम्पत्ति शुद्धीकरणमा २७ करोड ८९ लाख ४४ हजार सात सय रुपैयाँ बिगो दाबीसहित मुद्दा दर्ता गरिएको हो । ७४ करोड ३४ लाख ७१ हजार रुपैयाँ बढी बिगो दाबी गरी छविलाल जोशीविरुद्ध सम्पत्ति शुद्धीकरण कसुरमा मुद्दा दायर गरिएको हो । प्रतिवादी खनालसँग १४ करोड ३० लाख ९१ हजार नौ सय ११ रुपैयाँ र पछाइसँग २४ करोड ६७ लाख सात हजार २४ रुपैयाँ बिगो दाबी गरिएको सहायक जिल्ला न्यायाधिवक्ता शर्माले जानकारी दिइन् । सहकारी ठगीतर्फ लामिछानेलाई तीन करोड ३७ लाख ६५ हजार रुपैयाँ र जोशीविरुद्ध पाँच करोड २६ लाख ६५ हजार रुपैयाँ र दीपेश पुनसँग दुई करोड १४ लाख आठ हजार आठ सय ४३ रुपैयाँ बिगो माग गरिएको छ । सहकारी ठगीका आरोपित अन्य व्यक्तिलाई पनि कसुरअनुसारको बिगो र सजायको मागसहित मुद्दा दर्ता गरिएको सरकारी वकिलको कार्यालयले जनामएको छ । सहकारीको बचत रकम अपचलन गरेको आरोपमा सभापति लामिछाने गत कात्तिक २ गते काठमाडौंबाट पक्राउ परेका थिए । उनीमाथि कास्कीसहित अन्य जिल्लामासमेत सहकारी ठगीको आरोपमा अनुसन्धान भइरहेको छ । सूर्यदर्शन सहकारी ठगीका मुख्य योजनाकार जीबी राईलगायत अन्य आरोपी भने अझै पनि फरार छन् ।
नबिल बैंकद्वारा जाजरकोट र रुकुम पश्चिमका भूकम्प पीडिलाई अस्थायी आवास हस्तान्तरण
काठमाडौं । नबिल बैंकले जाजरकोट र रुकुम पश्चिमका भूकम्प प्रभावितलाई अस्थायी आवास हस्तान्तरण गरेको छ । आइतबार एक कार्यक्रम बीच नबिल बैंकका अध्यक्ष उपेन्द्रप्रसाद पौडेलले नलगाड नगरपालिकाका मेयर डम्बरबहादुर रावत र चौरजहारी नगरपालिकाका मेयर पुष्प वादीलाई ९६ वटा अस्थायी आवास हस्तान्तरण गरेका हुन् । बैंकले निर्माण गरिदिएको अस्थायी आवास हस्तान्तरण कार्यक्रममा नबिल बैंकका अध्यक्ष पौडेलले बैंक समाजमा सकारात्मक प्रभाव पार्न सधैं प्रतिबद्ध रहेको बताए । प्राकृतिक प्रकोपबाट प्रभावितलाई सहयोग पुर्याउने उद्देश्यले सामाजिक उत्तरदायित्व अन्तर्गत बैंकले यो परियोजना अघि बढाएको उनले बताए । नबिलले आफ्नो संस्थागत सामाजिक उत्तरदायित्व अन्तर्गत अस्थायी आवास निर्माण गरेको हो । बैंकले स्थानीय सरकारसँगको साझेदारीमा जाजरकोटको नलगाड नगरपालिका- १ मा ४७ र रुकुम पश्चिमको चौरजहारी नगरपालिका- १ मा ४९ अस्थायी आवास निर्माण गरेको थियो । बैंकले अस्थायी आवास बनाउन आवश्यक जस्तापाता, बाँस, सिमेन्ट, रंगरोगन, किल्लाकाँटीजस्ता निर्माण सामग्री उपलब्ध गराएको थियो । कार्यक्रममा नलगाड नगरपालिकाका मेयर डम्बरबहादुर रावत र चौरजहारी नगरपालिकाका मेयर वादीले भूकम्प प्रभावितलाई सुरक्षित ओत लाग्ने ठाउँ उपलब्ध गराएकोमा नबिल बैंकलाई धन्यवाद दिए । कार्यक्रममा बैंकका प्रमुख कार्यकारी अधिकृत ज्ञानेन्द्रप्रसाद ढुंगाना, बैंकका सञ्चालक निर्वाण चौधरी लगायत उपस्थिति थिए । १७ कात्तिक २०८० मा जाजरकोटको बारेकोट गाउँपालिका-१, रामीडाँडा केन्द्रबिन्दु भएर गएको ६.४ रेक्टर स्केलको भूकम्पले जाजरकोट र रुकुम पश्चिममा ठूलो क्षति पुर्याएको थियो । नबिल बैंकले प्रभावित क्षेत्रको जनताको सहयोगका लागि एक करोड रुपैयाँको बराबरको सहयोगको घोषणा गरेको थियो । सोही अनुरूप तत्काल राहत सामाग्री वितरण गर्नुका साथै अस्थायी आवास निर्माण गरिदिने घोषणा बैंकले गरेको थियो ।
नेपाल बैंकर्स एसोसिएसन लुम्बिनी प्रदेश समिति गठन, संयोजकमा नेपाल बैंकका कँडेल
काठमाडौं । नेपाल बैंकर्स एसोसिएसन लुम्बिनी प्रदेश समिति गठन भएको छ । लुम्बिनी प्रदेशमा रहेका वाणिज्य बैंकहरुमा आबद्ध प्रदेश प्रमुखहरुको भेलाले नेपाल बैंक लिमिटेडका प्रदेश प्रमुख अर्जुन कँडेलको संयोजकत्वमा समिति गठन गरेको हो । नवगठित समितिमा एक संयोजक, दुई सह–संयोजक र १७ जना सदस्य रहने गरी समिति बनाइएको छ । समितिको सह–संयोजकमा प्राइम कमर्सियल बैंक लिमिटेडका प्रदेश प्रमुख कुश सुदन सिंह र नबिल बैंकका प्रदेश प्रमुख अमित केसी चयन भएका छन् । वित्तीय साक्षरता, सामाजिक उत्तरदायित्व तथा सेवामूलक कार्यहरु गर्ने उद्देश्यले गठन भएको बैंकर्स एसोसिएसन लुम्बिनी प्रदेश समितिले वित्तीय क्षेत्रमा काम गर्ने सेवारत कर्मचारीहरूको क्षमता विकासका कार्यक्रम गर्ने सह–संयोजक कुश सुदन सिंहले बताए । उनका अनुसार समितिमा प्रदेशका २० वटा वाणिज्य बैंकहरुका प्रदेश प्रमुखहरू सदस्य छन् । समितिले वित्तीय अनुशासन, वित्तीय साक्षरता र सामाजिक उत्तरदायित्व लगायतका विषयलाई विशेष जोड दिने प्रदेश संयोजक अर्जुन कँडेलले बताए । उनले वित्तीय क्षेत्रमा काम गर्नेहरूको क्षमता, दक्षता विकाससँगै अवसर र चुनौतीका विषयमा कार्यक्रम गर्ने जानकारी दिए ।
लायन्स क्लबले डोलभन्ञ्याङ माध्यमिक विद्यालयलाई गर्यो २ लाख सहयोग
काठमाडौं । लायन्स क्लब अफ काठमाडौं सिद्धार्थ एभरग्रीनले धादिङको गजुरी–५, च्याङ्गलीस्थित डोलभन्ज्याङ माध्यमिक विद्यालयलाई २ लाख रुपैयाँ आर्थिक सहयोग गरेको छ । विद्यालयको भौतिक संरचना र शैक्षिक गुणस्तर सुधारका लागि प्रदान गरिएको यो सहयोगले विद्यालयलाई नयाँ उचाइमा पुर्याउने विश्वास गरिएको छ । यस विद्यालयमा करिब ५०० विद्यार्थी अध्ययनरत छन् । विद्यालयमा आयोजित विशेष कार्यक्रममा प्रमुख अतिथि लायन्स इन्टरनेशनल डिस्ट्रिक्ट ३२५ आई का फस्ट भाइस डिस्ट्रिक्ट गभर्नर पार्वती खरेलले विद्यालयलाई प्रदान गरिएको सहयोगले शैक्षिक सुधारमा ठूलो भूमिका खेल्ने बताइन् । उनले भनिन्, ‘विद्यार्थीहरूले उज्ज्वल भविष्य निर्माण गर्न सजिलो होस् भन्ने हाम्रो प्रयास हो ।’ लायन्स क्लब अफ काठमाडौं सिद्धार्थ एभरग्रीनकी अध्यक्ष कल्पना बस्नेतले विद्यालयप्रति आफ्नो क्लबको प्रतिबद्धता प्रस्ट्याउँदै भनिन्, ‘विकट क्षेत्रका विद्यालयमा अध्ययनरत विद्यार्थीहरूलाई सहयोग गर्नु हाम्रो प्राथमिकता हो । यस विद्यालयलाई प्रदान गरिएको यो सहयोगले शैक्षिक वातावरणलाई सुधार्नेछ ।’ विद्यालयका प्रधानाध्यापक अशोक कुमार घिमिरेले विद्यालयको समग्र विकासका लागि लायन्स क्लबले गरेको योगदानलाई धन्यवाद दिए । उनले भने, ‘यो सहयोगले विद्यार्थीहरूको शैक्षिक गतिविधिमा नयाँ उत्साह थप्नेछ। विद्यालयको भौतिक सुधारका लागि यो सहयोग अति नै आवश्यक थियो ।’ कार्यक्रमका विशेष अतिथि जोन २६ का जोन अध्यक्ष इन्जिनियर गणेश बहादुर सुनाम र लायन्स क्लब अफ काठमाडौं बिष्णुमतीका अध्यक्ष डा. रोमन बोगटीको अतिथिको रूपमा उपस्थिति थियो । कार्यक्रम विद्यालय व्यवस्थापन समितिका अध्यक्ष प्रमोद रुपाखेतीको अध्यक्षतामा सम्पन्न भएको थियो । कार्यक्रममा लायन्स क्लब अफ काठमाडौं सिद्धार्थ एभरग्रीनका सचिव सुष्मा आचार्य र कोषाध्यक्ष निरुपमा महर्जनको सक्रिय सहभागिता रहेको थियो ।
राष्ट्रिय सहकारी बैंकको ब्याजदर १ प्रतिशत, ६.७५ प्रतिशतमै कर्जा
काठमाडौं । राष्ट्रिय सहकारी बैंकले नयाँ ब्याजदर सार्वजनिक गरेको छ । सहकारी बैंकले पुस ८ गतेदेखि लागू हुने गरी बचत तथा कर्जामा नयाँ ब्याजदर निर्धारण गरेको हो । बैंकले बचततर्फ न्यूनतम १ प्रतिशतदेखि अधिकतम ५ प्रतिशतसम्म ब्याजदर तोकेको छ । जसमा साधारण बचत खातामा १ प्रतिशत, विशेष बचतमा १.२५ प्रतिशत, सुपर बचतमा १.५० प्रतिशतदेखि १.७५ प्रतिशत तोकिएको छ । यस्तै, एनसिबिएल समुन्नत बचच खातामा न्यूनतम १.२५ प्रतिशतदेखि अधिकतम १.७५ प्रतिशत, एनसिबिएल प्रिमियम बचतमा १.७५ प्रतिशत, अनिवार्य नियमित बचतमा ५.५० प्रतिशत र क्रमिक बचतमा ५ प्रतिशतदेखि ५.२५ प्रतिशतसम्म ब्याजदर निर्धारण गरेको बैंकले जनाएको छ । यस्तै, बैंकको मुद्दती निक्षेपमा न्यूनतम २.७५ प्रतिशतदेखि अधिकतम ४ प्रतिशतसम्म ब्याजदर तोकिएको छ । बैंकका अनुसार कर्जा तर्फ विभिन्न विभिन्न शिर्षकमा ६.२५ प्रतिशतदेखि ८.९९ प्रतिशतसम्म ब्याजदर निर्धारण गरिएको छ । बैंकका अनुसार घर घडेरी खरिद तथा भवन निर्माण कर्जाको स्वः लगानी नियमानुसार हुनेछ । मुद्दती निक्षेपको बिड रेट ४ प्रतिशतसम्म प्रस्ताव गर्न सकिने बैंकले जनाएको छ । अपाङ्ग, दलित र महिलाद्वारा संचालित संस्थालाई प्रकाशित ब्याजदरमा ०.५ प्रतिशतसम्म थपघट गर्न सकिने छ । यस्तो सुविधा दोहोरो हुनेगरी प्रदान गरिने छैन ।
जीवन विकास लघुवित्तको २१.३० लाख कित्ता सेयर बिक्रीमा, मूल्य ५२५ देखि ६ सय रुपैयाँसम्म
काठमाडौं । जीवन विकास लघुवित्त वित्तीय संस्थाको संस्थापक सेयर बिक्रीमा राखिएको छ । लघुवित्तका केही संस्थापक समूहका सेयरधनीहरूले सेयर बिक्रीमा राखेका हुन् । लघुवित्तका अनुसार १२ लगानीकर्ताले २१ लाख ३० हजार ८०५ कित्ता सेयर बिक्रीमा राखेका हुन् । बिक्रीकर्ता नम्बर १ देखि १२ सम्म उल्लेख गरी कोड नम्बर एदेखि एलसम्म राखेर सेयर बिक्रीमा राखेको हो । लघुवित्तको उक्त सेयरको मूल्य न्यूनतम प्रतिकित्ता ५२५ रुपैयाँदेखि अधिकतम ६ सय रुपैयाँसम्म तोकिएको छ । उक्त सेयर संस्थापक सेयरधनीले मात्रै खरिद गर्न पाउनेछन् । यदि ३५ दिनभित्र सेयर खरिद नगरेमा सर्वसाधारण लगानीकर्ताका लागि बिक्री खुला गरिनेछ ।
मुक्तिनाथ विकास बैंकले पुँजी वृद्धि गर्दै, मर्जरका लागि जोडि खोज्दै
काठमाडौं । मुक्तिनाथ विकास बैंकले पुँजी वृद्धि गर्ने भएको छ । बैंकले अविमोच्य असञ्चिति अग्राधिकार सेयर जारी गरी पुँजी वृद्धि गर्ने भएको हो । बैंकले प्रतिकित्ता १ सय रुपैयाँ अंकित मूल्य दरका १ अर्बको मुक्तिनाथ ८.५ प्रतिशत अविमोच्य असञ्चिति अग्राधिकार सेयर जारी गर्ने भएको हो । बैंकको हाल कायम अधिकृत पुँजी ८ अर्ब रुपैयाँबाट वृद्धि गरी १० अर्ब रुपैयाँ पुर्याउने, अग्राधिकार सेयर जारीपश्चात बैंकको हाल कायम जारी तथा चुक्ता पुँजी ७ अर्ब ४ करोड ६९ लाख ३८ हजार रुपैयाँलाई वृद्धि गरी ८ अर्ब ४ करोड ६९ लाख ३८ हजार रुपैयाँ पुर्याइने भएको छ । अग्राधिकार सेयर तथा अविमोच्य ऋणपत्र जारी गर्न प्रबन्धपत्र तथा नियमावलीमा संशोधन गर्न बैंकले १८औँ वार्षिक साधारण सभा पुस २९ गते बोलाएको छ । बैंकको सभाले कुनै बैंक तथा वित्तीय संस्था एक आपसमा प्राप्ति तथा समाहितका लागि उपयुक्त बैंकको पहिचान गर्ने, सहमतिपत्रमा हस्ताक्षर गर्ने, सोको आधारमा सैद्धान्तिक स्वीकृतिका लागि नेपाल राष्ट्र बैंकमा निवेदन दिने, सम्पत्ति दायित्वको मूल्याङ्कन गर्न परामर्शदाता, मूल्याङ्कनकर्ता, लेखापरीक्षक नियुक्त गर्ने र निजको पारिश्रमिक तोक्ने लगायत आवश्यक कार्य गर्न सञ्चालक समितिलाई अख्तियारी दिनेछ । वार्षिक प्रतिवेदन, लेखापरीक्षकको प्रतिवेदन र आर्थिक वर्ष २०८१/८२ का लागि लेखापरीक्षक नियुक्ति गर्ने र निजको पारिश्रमिक निर्धारण गर्नेछ । हालका लेखापरीक्षक श्री एपीएण्ड एशोसिएट्स, चाटर्ड एकाउण्टेन्ट्स पुनः नियुक्ति हुनका लागि योग्य रहेको बैंकले जनाएको छ । सभाले काठमाडौं महानगरपालिका-२८ कमलादीस्थित केन्द्रीय कार्यालयलाई महानगरपालिका–३ लाजिम्पाटमा स्थानान्तरण गर्न प्रबन्धपत्र तथा नियमावलीमा आवश्यक संशोधन गर्ने र सञ्चालक समितिको बैठकबाट नियुक्त स्वतन्त्र सञ्चालकको नियुक्ति अनुमोदन गर्नेछ ।
