महिलाहरू समाज परिवर्तनका निर्णायक शक्ति हुन् : प्रचण्ड
काठमाडौँ । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले महिलाहरू समाज परिवर्तनका निर्णायक शक्ति रहेको बताएका छन्। अन्तर्राष्ट्रिय श्रमिक महिला दिवस ८ मार्चको अवसरमा प्रचण्डले सम्पूर्ण नेपाली दिदीबहिनीहरूमा शुभकामना व्यक्त गर्दै महिलाहरू समाज परिवर्तनका निर्णायक शक्ति रहेको बताए। उनले इतिहासका विभिन्न कालखण्डमा महिलाहरूले देखाएको अदम्य साहस, त्याग र बलिदानीपूर्ण संघर्षकै परिणामस्वरुप आजका महत्वपूर्ण अधिकारहरू प्राप्त हुन सकेको उल्लेख गरेका छन्। सन्देशमा प्रचण्डले व्यवहारिक जीवनमा अझै पनि महिलामाथि असमानता र हिंसा पूर्ण रूपमा अन्त्य नभएको औंल्याएका छन्। उनले भनेका छन्, 'स्वतन्त्रता र अधिकारका नाममा बजारवादी पूँजीवादी संरचनाले महिलामाथि नयाँ–नयाँ रूपका शोषण र असमानता पनि सिर्जना गरिरहेको यथार्थ हाम्रो सामु छ।' संयोजक प्रचण्डले अबका प्रयासहरू सबैखाले शोषण र विभेदको अन्त्य गर्दै महिलालाई साँचो अर्थमा अनुभूतिको तहसम्म समानता स्थापित गर्नमा केन्द्रित हुनुपर्ने बताएका छन्। संविधानमा प्राप्त अधिकारहरूको रक्षा गर्दै जनसङ्ख्याको अनुपातअनुसार राज्यका सबै तह र संरचनामा महिलाको समानुपातिक र अर्थपूर्ण सहभागिता सुनिश्चित गर्ने दिशामा दृढताका साथ अघि बढ्नुपर्नेमा उनले जोड दिएका छन्।
सोलुखुम्बुमा कांग्रेसका प्रकाशसिंह कार्की निर्वाचित
काठमाडौं । सोलुखुम्बुमा नेपाली कांग्रेसका प्रकाशसिंह कार्की निर्वाचित भएका छन्। १३ हजार १६६ मत प्राप्त गर्दै उनी निर्वाचित बनेका हुन् । उनका निकटतम प्रतिस्पर्धी नेपाली कम्युनिस्ट पार्टी नेकपाका असिम राईले ९ हजार ४१४ मत प्राप्त गरेका छन् । यस्तै, नेकपा एमालेकी कल्पना राईले ८ हजार २२८ मत प्राप्त गरेकी छिन् भने राष्ट्रिय स्वतन्त्र पार्टीका ऋषिधन थुलुङ राईले ३ हजार ६४२ मत प्राप्त गरेका छन् ।
हर्क साम्पाङको पार्टीले खोल्यो खाता, खोटाङमा आरेन राई विजयी
काठमाडौं । श्रम संस्कृति पार्टीले जितको खाता खोलेको छ । प्रतिनिधि सभा निर्वाचन २०८२ अन्तर्गत खोटाङ क्षेत्र नम्बर १ मा जित हात पादै जितको खाता खोलेको हो । सार्वजनिक नतिजा अनुसार श्रम संस्कृति पार्टी आरेन राई विजयी भएका छन्। राईले १६,६१२ मत प्राप्त गर्दै जित हासिल गरेका हुन् । उनले आफ्ना निकटतम प्रतिद्वन्द्वी नेकपा एमाले र नेपाली कांग्रेसका उम्मेदवारलाई फराकिलो अन्तरले पछाडि पारेका छन् । निकटतम प्रतिद्वन्द्वी नेकपा एमालेका उम्मेदवार देव विक्रम राईले १२,७१४ मत प्राप्त गरेका छन् । त्यस्तै, नेपाली कांग्रेसका उम्मेदवार वीर काजी राईले ११,९५७ मत प्राप्त गर्दै तेस्रो स्थान हासिल गरेका छन् । खोटाङ हर्कको गृह जिल्ला हो ।
बालेनले भनेः नारी जननी, अभिभावक अनि साथी
काठमाडौं । रास्वपाका वरिष्ठ नेता बालेन्द्र शाहले शाहले समुन्नत समाज निर्माणको जग नारीको सम्मान, समानता र सशक्तीकरणमा उभिने बताएका बताएका छन् । उनले अन्तर्राष्ट्रिय नारी दिवसको अवसरमा शुभकामना दिएका हुन् । ’नारी जननी, अभिभावक अनि साथी,’ उनले सामाजिक सञ्जालमा लेखेका छन्,’ अन्तर्राष्ट्रिय नारी दिवसको अवसरमा सम्पूर्ण नारीहरूको अधिकार, आत्मसम्मान र उज्ज्वल भविष्यको कामना गर्दछु। उनले सामाजिक सञ्जालमा तीन महिलाको फोटो राख्दै अन्तर्राष्ट्रिय नारी दिवसको शुभकामना दिएका हुन् । प्रधानमन्त्री सुशीला कार्की, श्रीमती सबिना काफ्ले र अर्की महिलाको फोटोसमेत राखेका छन् । शाह झापा ५ बाट प्रतिनिधि सभाको निर्वाचनमा ६८ हजार ३४८ मत प्राप्त गरी विजयी भएका छन् । उनले एमालेका अध्यक्ष तथा पूर्व प्रधानमन्त्री केपी शर्मा ओलीलाई पराजित गरेका हुन् ।
सुदूरपश्चिम प्रदेशका १६ निर्वाचन क्षेत्रमध्ये हालसम्म ११ निर्वाचन क्षेत्रको नतिजा सार्वजनिक, ७ ठाउँमा रास्वपा विजयी
काठमाडौं । सुदूरपश्चिम प्रदेशका प्रतिनिधिसभाका १६ निर्वाचन क्षेत्रमध्ये हालसम्म ११ निर्वाचन क्षेत्रको नतिजा सार्वजनिक भएको छ । केही क्षेत्रमा मतगणना जारी छ । हालसम्म सार्वजनिक नतिजाअनुसार राष्ट्रिय स्वतन्त्र पार्टीले उल्लेखनीय सफलता हासिल गरेको छ। जसमा राष्ट्रिय स्वतन्त्र पार्टीले ७ सिट जितेको छ । यस्तै नेपाली कांग्रेसले २, नेकपा एमालेले २ सिट जितेको छ । बझाङ, दार्चुला र अछाम-१ मा भने रास्वपाका उम्मेदवार पराजित भएका छन् । अछाम-२ मा पनि रास्वपाका उम्मेदवार पछि परेका छन् । सार्वजनिक नतिजा अनुसार कैलाली क्षेत्र नम्बर १ मा रास्वपाकी कोमल ज्ञवाली १७ हजार ८२६ मत प्राप्त गर्दै विजयी भएकी छन् भने कैलाली- ५ मा पनि रास्वपाका आनन्द चन्द ३१ हजार ९५३ मतसहित विजयी भएका छन् । कञ्चनपुर क्षेत्र नम्बर २ मा रास्वपाका दीपक बोहरा ३३ हजार ९५२ मत प्राप्त गर्दै निर्वाचित भएका छन् । डोटीमा भने नेपाली कांग्रेसका भरत खड्का १४ हजार ८९७ मत ल्याएर विजयी भएका छन् भने अछाम-१ मा नेपाली कांग्रेसका भरत स्वाँर १० हजार ७५९ मत प्राप्त गर्दै विजयी भएका छन् । बझाङमा नेकपा एमालेका ऐन महर १८ हजार ५४३ मतसहित निर्वाचित भएका छन्। डडेल्धुरामा भने ३४ वर्षपछि नेपाली कांग्रेसको किल्ला ढलेको छ । उक्त क्षेत्रमा रास्वपाका उम्मेदवार डा.ताराप्रसाद जोशी १९ हजार १३१ मत प्राप्त गर्दै निर्वाचित भएका छन् । उनका निकटतम प्रतिद्वन्द्वी कांग्रेसका नैनसिंह महरले १२ हजार १२१ मत प्राप्त गरेका थिए । जोशीले ७ हजार १० मतान्तरले महरलाई पराजित गरेका हुन् । कैलाली क्षेत्र नम्बर ३ मा राष्ट्रिय स्वतन्त्र पार्टीका जगतप्रसाद जोशी भारी मतान्तरसहित विजयी भएका छन् । उनले २० हजार ३५९ मत प्राप्त गरेका छन् । कञ्चनपुर क्षेत्र नम्बर ३ मा ज्ञानेन्द्रसिंह महता विजयी भएका छन् । उनले कांग्रेसका उम्मेदवार हरिप्रसाद बोहरालाई १७ हजार ६७५ मतान्तरले पराजित गरेका हुन्। कञ्चनपुर-१ मा रास्वपाका जनकसिंह धामी २४ हजार ३३२ मतसहित निर्वाचित भएका छन् । दार्चुलामा नेकपा एमालेका गणेश ठगुन्ना १८ हजार ८९१ मत प्राप्त गर्दै विजयी भएका छन् । यसैबिच बैतडी, अछाम-२, कैलाली-४, कैलाली-२ र बाजुरामा मतगणना जारी छ । बैतडीमा रास्वपाले अग्रता लिएको छ भने अछाम-२ मा एमाले अगाडि रहेको छ । कैलाली-४ मा रास्वपाको जित लगभग सुनिश्चित भएको छ। बाजुरामा भने नेपाली कांग्रेसले अग्रता लिएको छ ।
आजदेखि काठमाडौंमा मदिरा सेवन गर्न पाइने, रात्रीकालीन व्यवसाय सञ्चालन हुने
काठमाडौं। काठमाडौंमा आजदेखि मदिरा व्यापार तथा रात्रीकालीन व्यवसाय गर्न पाइने भएको छ । आइतबारदेखि काठमाडौंमा मदिरा बिक्री, सेवन र रात्रीकालीन व्यवसाय गर्न पाइने भएको हो । मादक पदार्थ विक्री वितरण, ओसारपसार तथा सेवन र रात्रीकालीन व्यवसाय सञ्चालन गर्न पाइने काठमाडौं जिल्ला प्रशासन कार्यालयका सहायक प्रमुख जिल्ला अधिकारी मुक्तिराम रिजालले बताए । प्रतिनिधि सभा सदस्य निर्वाचन, २०८२ स्वच्छ र मर्यादित बनाउन १४ गतेको जिल्ला सुरक्षा समितिको बैठकबाट काठमाडौं जिल्लाभित्र मादक पदार्थ बिक्री वितरण, ओसारपसार तथा सेवन र रात्रिकालीन व्यवसायहरू सञ्चालनमा लगाइएको प्रतिबन्ध लगाएको थियो ।
विक्रम खनाल विजयी, विनोद चौधरी संसदीय यात्रामा रोकिए
काठमाडौं । नवलपरासी पश्चिममा रास्वपा उम्मेदवार विक्रम खनाल विजयी भएका छन्। उनी नेपाली कांग्रेसका उम्मेदवार विनोदकुमार चौधरीलाई ठूलो मतान्तरले पछि पार्दै विजयी भएका हुन्। खनालले ४५ हजार २ सय ४१ मत प्राप्त गरे। चौधरीले ९ हजार ५ सय २ मत मात्र प्राप्त गरेका छन् । त्यस्तै, नेकपा एमालेका रामप्रसाद पाण्डेयले ७ हजार ९ सय ५६ मत प्राप्त गरे। जनता समाजवादी पार्टीका हृदयेश त्रिपाठीले ७ हजार ८ सय ३२ मत पाए।
अमरेशकुमार सिंहको ह्याट्रिक, गगनको संसदीय यात्रामा ब्रेक
काठमाडौं । सर्लाही–४ मा रास्वपाका अमरेशकुमार सिंह विजयी भएका छन् । ३५ हजार ६८८ मत ल्याउँदै सिंह प्रतिनिधि सभा सदस्य निर्वाचित भएका हुन् । उनका निकटतम प्रतिद्वन्द्वी नेपाली कांग्रेसका सभापति गगनकुमार थापाले २२ हजार ८३१ मत ल्याए । यो जितसँगै अमरेशसिंहले ह्याट्रिक पूरा गरे भने यसपटक मधेश झरेर चुनाव लडेका गगनको संसदीय यात्रामा ब्रेक लागेको छ । गगन २०६४ सालदेखि संसदीय यात्रामा थिए । पहिलोपटक समानुपातिक प्रणालीबाट सांसद बनेका उनी पछिल्लो ३ पटक काठमाडौं-४ बाट निर्वाचित भएका थिए ।
