डिप्रोक्स लघुवित्तको २४औँ वार्षिक साधारण सभा सम्पन्न, १५ प्रतिशत लाभांश पारित
काठमाडौं । डिप्रोक्स लघुवित्त वित्तीय संस्था लिमिटेडको २४औँ वार्षिक साधारण सभा सोमबार चितवनको सौराहामा सम्पन्न भएको छ । कम्पनीको साधारण सभाबाट १५ प्रतिशत लाभांश पारित भएको हो । साधारण सभाले आर्थिक वर्ष २०८१/८२ को वार्षिक प्रतिवेदन पारित गर्नुका साथै सोही आर्थिक वर्षका लागि लेखापरीक्षक नियुक्त गर्ने प्रस्ताव स्वीकृत गरेको छ । साथै, सेयरधनीलाई १० प्रतिशत बोनस सेयर र ५ प्रतिशत नगद लाभांश (बोनस सेयर र नगद लाभांशमा लाग्ने करसमेत) वितरण गर्ने प्रस्ताव पनि सभाले पारित गरेको छ। बोनस सेयर वितरणपछि संस्थाको चुक्ता पुँजी २ अर्ब ५ करोड ५१ लाख १४ हजार रुपैयाँ पुगेको छ। संस्थाका सञ्चालक समितिका अध्यक्ष दीपक खनालको अध्यक्षतामा सम्पन्न सभामा आर्थिक वर्ष २०८१/८२ को वार्षिक प्रतिवेदनमाथि सेयरधनीहरूले उठाएका जिज्ञासाहरूको अध्यक्षले स्पष्टिकरण गरेका थिए । सभामा प्रमुख कार्यकारी अधिकृत शेषरमण आचार्यले स्वागत मन्तव्य राखेका थिए भने कार्यक्रम सञ्चालन कम्पनी सचिव ज्ञानेन्द्र अर्यालले गरेका थिए । सभाबाट संस्थापक समूहको तर्फबाट नेपाल बैंक लिमिटेडका प्रतिनिधि प्रदीप कुमार पाठक र सर्वसाधारण समूहको तर्फबाट शिवप्रसाद भट्टराई, आयुषी सापकोटा तथा पुष्करनाथ भण्डारी सञ्चालक पदमा निर्विरोध निर्वाचित भएका छन् ।
विशेष महाधिवेशन निर्वाचनतर्फ उन्मुख
काठमाडौं । नेपाली कांग्रेसको दोस्रो विशेष महाधिवेशन नयाँ नेतृत्व चयनतर्फ निर्णायक चरणमा प्रवेश गरेको छ । विशेष महाधिवेशनअन्तर्गत जारी बन्दसत्रले सभापति शेरबहादुर देउवा नेतृत्वको केन्द्रीय कार्यसमिति विघटन गरी नयाँ केन्द्रीय कार्यसमिति निर्वाचन गर्ने कार्यविधि पारित गरेपछि कांग्रेस औपचारिक रूपमा नेतृत्व परिवर्तनको प्रक्रियामा गएको हो । पारित कार्यविधिअनुसार १५औं महाधिवेशन सम्पन्न नहुन्जेलसम्मका लागि नयाँ केन्द्रीय कार्यसमिति गठन गरिनेछ । विशेष महाधिवेशनले पारित गरेको कार्यविधिमा १४औं महाधिवेशनबाट निर्वाचित केन्द्रीय कार्यसमितिको पदावधि समाप्त भइसकेकाले उक्त कार्यसमिति विघटन गर्ने व्यवस्था गरिएको छ । साथै पार्टी सञ्चालनका लागि अन्तरिम अवधिमा नयाँ केन्द्रीय कार्यसमिति निर्वाचनमार्फत चयन गर्ने उल्लेख छ । नेपाली कांग्रेसको १४औं महाधिवेशन २०७८ मंसिर २४ देखि २८ गतेसम्म सम्पन्न भएको थियो । उक्त महाधिवेशनबाट शेरबहादुर देउवा सभापतिमा निर्वाचित भएका थिए । तर, कार्यसमितिको कार्यकाल सकिएसँगै पार्टीभित्र नेतृत्वको वैधानिकताबारे प्रश्न उठ्दै आएका थिए । यसअघि मंसिर १५ गते बसेको केन्द्रीय समितिको बैठकले केन्द्रीय कार्यसमितिको म्याद माघ मसान्तसम्म थप गर्ने निर्णय गरेको थियो । पुस २० को कार्य सम्पादन समिति बैठकले केन्द्रीय कार्य समितिको म्याद आगामी जेठसम्म थपेको थियो । तर, विशेष महाधिवेशनले नयाँ कार्यविधि पारित गरेपछि अब पार्टी नेतृत्व चयन निर्वाचनमार्फत अघि बढ्ने निश्चित भएको छ । कार्यविधि पारितसँगै कांग्रेसभित्र नयाँ नेतृत्व, आन्तरिक शक्ति सन्तुलन र आगामी राजनीतिक दिशाबारे छलफल थप तीव्र बनेको छ ।
डा. ज्ञानेन्द्रमानसिंह कार्कीको ओपनहार्ट सर्जरी सफल
काठमाडौं । विराट नर्सिङहोम र विराट मेडिकल कलेजका सञ्चालक एवं डा. ज्ञानेन्द्रमानसिंह कार्कीको ओपनहार्ट सर्जरी सफल भएको छ । नियमित जाँचका क्रममा दिल्लीस्थित मेदान्त अस्पताल पुगेका कार्कीको मुटुको भल्ब बन्द भएको पाइएपछि ओपनहार्ट सर्जरी गरिएको हो। एक साताअघि स्वास्थ्य समस्या देखिएपछि भारत पुगेका डा. कार्कीले अहिले आफ्नो स्वास्थ्य अवस्था सामान्य रहेको सामाजिक सञ्जालमार्फत जानकारी गराएका छन् । उनले अस्पतालको बेडबाट भिडियो सेयर गर्दै भनेका छन्, ‘म अहिले स्वास्थ्यलाभ गरिरहेको छु, कसैलाई कुनै सन्देश नै दिन नपाइ दिल्ली आउनुपर्यो, हजुरहरूको कृपाले राम्रो हुँदैछ ।’ कार्कीले मुटुको भल्भको ब्लकेज जटिल शल्यक्रिया रहेको जनाउँदै अहिले आफ्नो अवस्था ठीक रहेको बताए । उनले अब आफू ठीक भएर चाँडै नागरिकको सेवाका लागि फर्किने समेत विश्वास दिलाएका छन् । ओपनहार्ट सर्जरी एक जटिल शल्यक्रिया हो, जसमा छाती खोलेर मुटुको उपचार वा शल्यक्रिया गरिन्छ । यो शल्यक्रिया कोरोनरी धमनी रोग, मुटुको भल्भ रोग, जन्मजात मुटुको दोष र अन्य गम्भीर मुटुसँग सम्बन्धित समस्याहरूका लागि गर्ने गरिन्छ । यसको लक्ष्य भनेको मुटुको सामान्य कार्य पुन: स्थापित गर्नु, रक्त प्रवाह सुधार गर्नु र मुटुको रोगबाट पीडित बिरामीहरूको जीवनको समग्र गुणस्तर बढाउनु हो ।
वित्तीय संस्था कर्मचारी संघ, राष्ट्रिय वाणिज्य बैंक लिमिटेडको नेतृत्वमा केसी
चितवन । नेपाल वित्तीय संस्था कर्मचारी संघ, राष्ट्रिय वाणिज्य बैंक लिमिटेडको १०औँ केन्द्रीय परिषद् तथा ११औँ केन्द्रीय महाधिवेशनले सुदन केसीको अध्यक्षतामा नयाँ कार्यसमिति गठन गरेको छ । चितवनको सौराहामा हालै सम्पन्न अधिवेशनले वरिष्ठ उपाध्यक्षमा गङ्गाधर भट्टराई, उपाध्यक्षहरूमा खुलातर्फ रजनिस फुलारा, महिलातर्फ लसता श्रेष्ठ र मधेसीतर्फ अमित भगतलाई चयन गरेको हो । महासचिवमा सञ्जिवकुमार भडेल, उपमहासचिवहरूमा खुलातर्फ अरमेन्द्रकुमार यादव, महिलातर्फ रश्मी श्रेष्ठ र आदिवासी जनजातितर्फ सुरेश अवाल निर्वाचित भएका छन् । सचिवमा अतिन्द्र राउत, गोविन्दप्रसाद बस्तोला र विश्वबन्धु भण्डारी निर्वाचित भएको अध्यक्ष केसीले जानकारी दिए । कोषाध्यक्षमा प्रतिज्ञा भट्ट र सहकोषाध्यक्षमा राहुल कर्ण चयन भएका छन् । केन्द्रीय सदस्यतर्फ खुलाबाट प्रेम तिमिल्सिना, मुकेश तिवारी, राजु भट्टराई, सरोज न्यौपाने, सुजन पौडेल, सुरेशकुमार खत्री र शैलेस रिजाल चयन भएका छन् । भौगोलिक प्रतिनिधित्वअनुसार कोशी प्रदेशबाट मनोज चापागाईं, मधेस प्रदेशबाट बित्टु गुप्ता, बागमती प्रदेशबाट अनिलराज पाण्डे, गण्डकी प्रदेशबाट कृष्णप्रसाद सुवेदी, लुम्बिनी प्रदेशबाट प्रीतम राना, कर्णाली प्रदेशबाट रमेश खड्का र सुदूरपश्चिम प्रदेशबाट चन्द्रबहादुर बोगटी चयन भएका छन् । महिला आरक्षणतर्फ रमा पौडेल, कविता ज्ञवाली, जानकी कुमारी न्यौपाने र निलम शर्मा चयन हुनुभएको छ भने मधेसी आरक्षणतर्फ अजय प्रताप यादव र भवनाथ यादव चयन भएका छन् । आदिवासी जनजातितर्फ सुजन जोशी, अपाङ्गतर्फ विदुर दाहाल, दलिततर्फ नवल किशोर राम तथा पदेन सदस्य (युवा समिति अध्यक्ष) का रूपमा अङ्कित रावल चयन भएका छन् । संघमा एक हजार ३०० भन्दा बढी सदस्य आबद्ध छन् ।
नेपाल बैंकको डीसीईओ बने खड्का, एसीईओमा काफ्ले नियुक्त
काठमाडौं । नेपाल बैंकको नायव प्रमुख कार्यकारी अधिकृत (डीसीईओ) मा होमबहादुर खड्का र सहायक प्रमुख कार्यकारी अधिकृत (एसीईओ)मा दीपेन्द्रराज काफ्ले नियुक्त भएका छन् । बैंक सञ्चालक समितिको बैठकले खड्कालाई डीसीईओ र काफ्लेलाई एसीईओ पदमा बढुवा गर्ने निर्णय गरेको हो । कार्यसम्पादन र अन्य मूल्याङ्कनका आधारमा दुवै जनालाई बढुवा गरेको बैंकले जनाएको छ । नुवाकोट स्थायी घर भएका खड्का यसअघि सहायक प्रमुख कार्यकारी अधिकृत (एसीईओ) पदमा कार्यरत थिए । खड्का भन्दा सिनियर रहेका एसीईओ विश्वराज बराल र प्रकाश अधिकारीलाई पछि पार्दै डीसीईओ पदमा बाजी मारेका हुन् । बराल, अधिकारी र खड्का तीनै जना विसं २०६१ भदौ १ गते एकै दिन नेपाल बैंक प्रवेश गरेका थिए । तर, कार्यसम्पादन लगायत मूल्याङ्कनका आधारमा बराल र अधिकारी खड्का भन्दा सिनियर थिए । बराल र अधिकारी आगामी फागुन २१ गते अनिवार्य अवकाशमा जाँदैछन् । साथै खड्का डीसीईओमा बढुवा भएपछि एसीईओमा एक पद रिक्त हुनेछ । रिक्त रहेको सहायक प्रमुख कार्यकारी अधिकृत (एसीईओ) पदमा बैंक सञ्चालक समितिले काफ्लेलाई नियुक्त गरेको हो । यअसघि निमित्त एसीईओ रहेका काफ्लेलाई सञ्चालक समितिले एसीईओमा बढुवा गरेको हो । स्याङ्जाका काफ्ले २०६१ कात्तिक १६ गते नेपाल बैंक प्रवेश गरेका थिए ।
मतदाताले ‘ग्रिन सिग्नल’ दिएपछि ओलीसँग चुनाव लड्न बालेन तयार, माघ ५ गतेभित्र मेयरबाट राजीनामा दिँदै
काठमाडौं । काठमाडौं महानगरपालिकाका मेयर बालेन्द्र शाह (बालेन)ले आगामी माघ ५ गतेभित्र राजीनामा दिएर चुनावको तयारी गर्ने योजनामा रहेको बुझिएको छ । राष्ट्रिय स्वतन्त्र पार्टी (रास्वपा) मा समाहित भएर वरिष्ठ नेता बनेका उनले मेयर पदबाट राजीनामा दिएर फागुन २१ गते हुने प्रतिनिधिसभा निर्वाचनका लागि उम्मेदवारका रूपमा प्रचारप्रसारमा जाने तयारी गरेका हुन् । बालेनको सचिवालयका एक सदस्यका अनुसार प्रतिनिधिसभा निर्वाचनका लागि मनोनयन दर्ता गर्ने योजनाका साथ उनले मेयर पदबाट राजीनामा दिँदैछन् । निवर्तमान आयोगले उम्मेदवारी मनोनयनको मिति माघ ६ गते तोकेको छ । त्यसअघि नै मेयरबाट राजीनामा दिएर उनी उम्मेदवार बन्न लागेका हुन् । बालेनलाई रास्वपाले प्रधानमन्त्रीको उम्मेदवारको रूपमा अघि सारेको छ । रास्वपासँग सम्झौता गर्दै उनी पार्टी प्रवेश गरेका हुन् । तथापि रास्वपा र उनीबीच औपचारिक एकता तथा समाहित सभा भने भएको छैन । रास्वपा र बालेनबीच मेयर पदबाट राजीनामा दिएपछि समाहित सभा घोषणा गरेर औपचारिक जानकारी दिने तयारी भइरहेको बालेनको सचिवालयले जानकारी दिएको छ । बालेनले नेकपा एमालेका अध्यक्ष केपी शर्मा ओलीसँग चुनावी प्रतिस्पर्धा गर्ने योजना बनाएका छन् । बालेन पनि झापा–५ बाट उम्मेदवारी दिने तयारी गरिरहेका छन् । यसका लागि उनले आइतबार झापाका रास्वपाका नेताहरूसँग डेढ घण्टा छलफल गरेका थिए । उनले ललितपुरको ज्वागलस्थित आफ्नो सचिवालय सदस्य कुमार बेनको घरमा रास्वपा झापा अध्यक्ष प्रकाश पाठक, सचिव शम्भु सुस्केरासहितको टोलीसँग छलफल गरेको बुझिएको छ । उनीहरूसँग बालेनले झापा–५ को वस्तुस्थिति, त्यहाँका मतदाताको अपेक्षा र मनस्थिति र पुराना पार्टीप्रतिको बुझाइ लगायत विषयमा कुराकानी गरेका थिए । बालेनले पार्टीका नेताहरूसँग छलफल गरेपछि आइतबार साँझ त्यसको संकेत पनि दिएका छन् । उनले भनेका छन्, ‘शुभकामना सबैलाई, हामी आउँदैछौं ।’ बालेनले झापा–५ का लागि आफूले जित्ने नजित्ने विषयमा सर्वेक्षण पनि गर्न लगाएका छन् । सर्वेक्षण केही सकारात्मक देखिएपछि उनी त्यहीँबाट चुनाव लड्ने तयारीमा जुटेका हुन् ।
पार्टी विभाजनको आशंका बढेपछि कोइरालाको परामर्श तीव्र, एकताका लागि नेतृत्वदायी भूमिका खेल्न आग्रह
काठमाडौं । नेपाली कांग्रेसका नेता डा. शेखर कोइराला अहिले पछिल्ला राजनीतिक घटनाक्रम र पार्टीभित्र देखिएको आन्तरिक तनावबारे आफू निकटका नेता तथा कानुन व्यवसायीहरूसँग निरन्तर छलफलमा रहेका छन्। पार्टी विभाजनको आशंका बढिरहेका बेला कोइरालाले परामर्शलाई तीव्र बनाएको उनी निकट एक नेताले जानकारी दिए । डा. कोइरालासँग छलफलमा वरिष्ठ अधिवक्ता उपेन्द्र न्यौपाने, शेरबहादुर केसी, योगेन्द्र अधिकारीका साथै उपसभापति धनराज गुरुङ, सहमहामन्त्री बद्री पाण्डे, जीवन परियार, नेताहरु शुक्रराज शर्मा, बलबहादुर केसी, मिनेन्द्र रिजाल, गोविन्द भट्टराई, किरण यादव, डा. चन्द्रमोहन यादव, कृष्ण पोखरेल, सरिता प्रसाईं, टेकबहादुर गुरुङ, राजीव कोइराला, उमेश रायमाझी, दिनेश कोइराला, दिलेन्द्र बडु, दीपक दाहाल, डा.गोविन्द पोखरेल, राम यादव, डा. सुनिल शर्मा, सुरेन्द्र आचार्यलगायत सहभागी रहेको बैठकमा सहभागी एक नेताले जानकारी दिए। छलफलमा कपिलवस्तु, बाजुरा, बैतडी, चितवन, दोलखा, खोटाङ, धादिङ, रुपन्देही, सप्तरीलगायत जिल्लाका सभापति र वरिष्ठ नेताहरू पनि सहभागी रहेका छन् । सबैले डा. कोइरालासँग प्रत्यक्ष भेट गरी पार्टीलाई विभाजनबाट जोगाउन नेतृत्वदायी भूमिका खेल्न आग्रह गरेका छन् । डा. कोइरालालाई विशेष महाधिवेशनको पक्षमा हस्ताक्षर गरेका ३ सय महाधिवेशन प्रतिनिधिले पनि भेटेर पार्टी एकताका लागि पहल गर्न कोइरालालाई अनुरोध गरेका ती नेताले जानकारी दिए । उनका अनुसार भेटमा सहभागी नेताहरूले पार्टीभित्रको असन्तुष्टि, विधान संशोधन, नेतृत्व व्यवस्थापन र आगामी राजनीतिक रणनीतिका विषयमा खुला छलफल भएको बताएका छन्। डा. कोइरालाले आफू पार्टी एकता र लोकतान्त्रिक मूल्यको पक्षमा रहेको उल्लेख गर्दै सबै पक्षसँग संवाद जारी राख्ने संकेत देखाएका छन् । बैठकमा सहभागी एक नेताका अनुसार कांग्रेसभित्र देखिएको मतभेद समाधानका लागि आगामी दिनमा थप राजनीतिक तथा संस्थागत पहल डा. कोइरालाबाट हुने अपेक्षा गरिएको छ ।
देउवाले आफू निकटका नेताहरूसँग भने - पार्टी फुटाउने प्रयास हुँदैछ, अब उचित कदम चाल्छु
काठमाडौं । नेपाली कांग्रेसका सभापति शेरबहादुर देउवाले पार्टी फुटाउने प्रयास भइरहेको बताएका छन् । उनले सोमबार बिहान आफू निकटका नेता तथा कार्यकर्तासँग विशेष महाधिवेशन पक्षले पार्टी फुटाउन प्रयास गरेको बताएका हुन् । उनले पार्टी फुटाउने प्रयास भए पनि त्यो सम्भव नहुने बताएका हुन् । ‘पार्टी फोड्ने प्रयास भइरहेको छ । तर, त्यो सम्भव हुँदैन । पार्टी फुट्दैन,’ देउवाले नेताहरूसँग भनेका छन् । उनले बन्दसत्रबाट हुने निर्णयपछि आफूले पनि उचित कदम चाल्ने बताएका छन् । उनले विशेष महाधिवेशन वैधानिक नभएको पनि बताएका छन् । कांगेसका महामन्त्रीद्वय गगन थापा र विश्वप्रकाश शर्माको नेतृत्वमा विशेष महाधिवेशन आइतबारदेखि सुरु भएको छ । सोमबार बन्दसत्रका कार्यक्रम सुरु हुँदैछन् ।
