सडक अवरूद्ध हुँदा कोरलाबाट हुने आयात-निर्यात रोकियो, खुलाउन ६ दिन लाग्ने
काठमाडौं । अविरल वर्षाका कारण कालीगण्डकी कोरिडोरअन्तर्गत मालढुङ्गा-बेनी-जोमसोम-कोरला सडकखण्डका विभिन्न स्थानमा पहिरो, सडक कटान तथा पुलको पहुँचमार्ग बगाउँदा सडक अवरुद्ध भएको छ । भन्सार विभागका अनुसार असोज ८ गतेदेखि परेको अविरल वर्षाका कारण राष्ट्रिय राजमार्ग-४८ अन्तर्गत पर्ने उक्त सडकखण्डका विभिन्न स्थानमा सडक अवरुद्ध भएको हो । लाटीखोला, फर्से, जुकेखोला, केराबारी, गलेश्वर, रघुगंगा पुल, बैसरीका विभिन्न स्थान, बेगखोला, महभिर, नैनीबगर, जलथले, सुकेबगर, दाना र लाटोखोलामा सडक माथिबाट लेदोसहितको पहिरो खस्दा यातायात अवरुद्ध भएको विभागले जनाएको छ । त्यसैगरी पोखरेबगर पुलको बायाँतर्फको पहुँचमार्ग बगाएको छ । तातोपानी कुण्ड, नार्च्याङ र खामभित्ता क्षेत्रमा नदीको उच्च बहावका कारण सडक कटान भएपछि आवागमन प्रभावित भएको छ । सडक अवरुद्ध भएपछि सडक विभाग तथा मातहतका निकायले सडक सञ्चालनका लागि तीव्र गतिमा काम गरिरहेका छन् । केही स्थानमा सडक सञ्चालनमा आइसकेको र बाँकी अवरोध हटाउने काम भइरहेको विभागले जनाएको छ । वर्षा रोकिएर सडक मर्मत तथा अवरोध हटाउने काममा थप समस्या नआएमा ३ देखि ६ दिनभित्र कालीगण्डकी कोरिडोर सडक पूर्ण रूपमा सञ्चालनमा ल्याउने जानकारी सडक विभागबाट प्राप्त भएको भन्सार विभागले जनाएको छ । सडक अवरुद्ध हुँदा कोरला नाकाबाट हुने सामानको आयात-निर्यातमा तत्काल समस्या परेको भए पनि सडक विभाग तथा मातहतका निकायको निरन्तर प्रयासबाट सडक छिट्टै सञ्चालनमा आउने विश्वास रहेको भन्सार विभागले जनाएको छ । कोरला नाका हुँदै हुने व्यापार प्रभावित भएकाले सडक सञ्चालनलाई प्राथमिकताका साथ अघि बढाउनुपर्ने अवस्था रहेको छ । सडक सञ्चालनमा आएपछि नाकाबाट हुने आयात-निर्यातसमेत सहज हुने अपेक्षा गरिएको छ ।
एनआईसी एशिया इक्विटी अपोर्चुनिटी फण्डमा आवेदन दिने आज अन्तिम दिन
काठमाडौं । एनआईसी एशिया क्यापिटलको ‘एनआईसी एशिया इक्विटी अपोर्चुनिटी फण्ड’मा आवेदन दिने आज असोज १३ गते अन्तिम दिन रहेको छ । असोज ७ गतेदेखि बिक्री खुला गरेको उक्त फण्डमा लगानीकर्ताहरुले आजसम्म आवेदन दिन सक्नेछन् । एनआईसी एशिया बैंक कोष प्रवद्र्धक र एनआईसी एशिया क्यापिटल योजना व्यवस्थापक रहेको एनआईसी एशिया बैंक म्युचुअल फण्डअन्तर्गत सञ्चालित यस योजनाले प्रतिइकाई १० रुपैयाँ अंकित मूल्यका कुल ८ करोड इकाई निष्काशन गरेको हो । कुल निष्काशित इकाईमध्ये १५ प्रतिशत अर्थात् १ करोड २० लाख इकाई कोष प्रवद्र्धक एनआईसी एशिया बैंकका लागि सुरक्षित गरिएको छ । बाँकी ६ करोड ८० लाख इकाई सर्वसाधारणका लागि बिक्री खुला गरिएके कम्पनीले जनाएको छ । उक्त फण्डमा न्यूनतम १०० इकाईदेखि अधिकतम १ करोड इकाईसम्मका लागि आवेदन दिन सकिनेछ । इकाई खरिदका लागि धितोपत्र बोर्डबाट आस्बा अनुमति प्राप्त सम्पूर्ण बैंक तथा वित्तीय संस्था तथा मेरो सेयरमार्फत आवेदन दिन सकिनेछ । यस योजनाको निष्काशन तथा बिक्री प्रबन्धक एनआईसी एशिया क्यापिटल रहेको छ ।
नेपाल एसियाली पूर्वाधार लगानी बैंकको बन्यो उपाध्यक्ष
काठमाडौं । नेपाल एसियाली पूर्वाधार लगानी बैंक (एआईआईबी) को उपाध्यक्ष पदमा चयन भएको छ । कतारको राजधानी दोहामा जारी बैंकको गभर्नर परिषद्को ११औं वार्षिक बैठकको अवसरमा नेपाललाई आगामी वर्षका लागि गैर-क्षेत्रीय सदस्य मुलुकतर्फको उपाध्यक्ष पदमा चयन गरिएको हो । एआईआईबीको संगठनात्मक संरचनाअनुसार एक जना अध्यक्ष तथा क्षेत्रीय र गैर-क्षेत्रीय सदस्य मुलुकबाट एक/एक जना उपाध्यक्ष रहने प्रावधान छ । यसपटक गैर-क्षेत्रीय सदस्य समूहबाट नेपालसँगै आयरल्याण्ड पनि उपाध्यक्षको रूपमा चयन भएको छ । वार्षिक बैठकका अवसरमा अर्थमन्त्री एवं एआईआईबीका लागि नेपालका गभर्नर डा. स्वर्णिम वाग्लेले उक्त जिम्मेवारी औपचारिक रूपमा ग्रहण गरे । बैठकको दोस्रो दिन आयोजित गभर्नर्स बिजनेस राउण्टेबललाई सम्बोधन गर्दै अर्थमन्त्री डा. वाग्लेले पूर्वाधारमार्फत हुने पुँजी निर्माण कम विकसित मुलुकहरूको आर्थिक वृद्धिको प्रमुख स्रोत रहेकोमा जोड दिए । उनले सडक, विद्युत्, सञ्चार तथा सूचना प्रविधिजस्ता उत्पादनका प्रमुख साधनहरूमा लगानी विस्तार गर्नुपर्ने आवश्यकता औंल्याउँदै, नेपालजस्ता विकासशील मुलुकहरूको आवश्यकतासँग मेल खाने गरी बैंकको लगानीलाई अधिकतम सहुलियतपूर्ण बनाउनुपर्ने बताए । उनले स्वदेशी तथा विदेशी निजी पुँजीलाई आकर्षित गर्ने किसिमले वित्त उपलब्ध गराउनुपर्ने विचार पनि व्यक्त गरे ।
बाढीले पुरेको घरको भग्नावशेष खन्दा सशस्त्र प्रहरीले भेटायो १५ तोला सुन
काठमाडौं । गत भदौ १० गते रसुवाको भोटेकोशी नदीमा आएको विनाशकारी बाढीपछि निरन्तर खोज तथा उद्धारमा खटिएको सशस्त्र प्रहरीले नुवाकोट जिल्लाको विदुर नगरपालिका-१ त्रिशुली बजारस्थित स्थानीय अनुज जोशीको घरबाट सुन, चाँदी र नगद फेला पारेको छ । सशस्त्र प्रहरी बल, नेपाल नं. १९ गुल्म नुवाकोटबाट खटिएको टोलीले बाढीमा पुरिएको घरबाट अन्दाजी १५ तोला सुन, ६ तोला चाँदी र नगद चार लाख रुपैयाँ फेला पारेको हो । असोज १२ गते सशस्त्र प्रहरी निरीक्षक केदार खत्रीको कमाण्डमा खटिएको खोज तथा उद्धार टोलीले निज जोशीको घरको भग्नावशेष खन्दा फेला पारेको उक्त नगद, सुन तथा चाँदी सम्बन्धित घरधनी अनुज जोशीलाई स्थानीय रोहवरमा हस्तान्तर गरिएको हो । बाढीका कारण भौतिक संरचना तथा सम्पत्तिमा ठूलो क्षति पुगेपछि सशस्त्र प्रहरी बल, नेपालले सो क्षेत्रमा खोज, उद्धार तथा राहत वितरण र नागरिकको जीउधन सुरक्षाका लागि निरन्तर खटिइदै आईरहेको छ ।
पूर्वप्रधानन्यायाधीश जबरालाई नियन्त्रणमा लिइएको घटनाप्रति सर्वोच्च अदालतको गम्भीर ध्यानाकर्षण
काठमाडौं । पूर्वप्रधानन्यायाधीश चोलेन्द्र शमशेर जबरालाई पक्राउ गरी १० घण्टासम्म प्रहरी कार्यालयमा राखिएको विषयमा सर्वोच्च अदालतको पूर्ण बैठकले गम्भीर ध्यानाकर्षण गराएको छ । सोमबार बसेको आकस्मिक पूर्ण बैठकले मध्यरातमा पूर्वप्रधानन्यायाधीश जबरालाई घरमा सुतिरहेको अवस्थामा उठाई नियन्त्रणमा लिइएको घटनाप्रति चासो र ध्यानाकर्षण जनाएको हो । असोज १० गते राति सुरक्षा थ्रेटको कारण देखाउँदै अपराध अनुसन्धान कार्यालयको टोलीले उनलाई नियन्त्रणमा लिएर १० घण्टापछि मात्र परिवारको जिम्मा लगाएको थियो । बैठकपछि सर्वोच्च अदालतका प्रवक्ता अर्जुन कोइरालाद्वारा जारी विज्ञप्ति अनुसार प्रत्येक नेपाली नागरिकको वैयक्तिक स्वतन्त्रता र सम्मानपूर्वक बाँच्न पाउने मौलिक हकको संरक्षणका लागि कानुनले तोकेको उचित प्रक्रिया अपनाएर मात्र कसैलाई नियन्त्रणमा लिन सकिने स्पष्ट पारिएको छ । कानुनको उचित प्रक्रिया पूरा नगरी गरिने कामकारबाहीमा स्वेच्छाचारिता रहने र यस्ता कदमलाई लोकतान्त्रिक शासन प्रणालीले स्वीकार गर्न नसक्ने पूर्ण बैठकले ठहर गरेको छ । साथै, न्यायिक जनशक्तिप्रति राज्यका निकायहरूले गर्ने व्यवहार सदैव संवेदनशील र गम्भीर हुनुपर्नेमा फुलकोर्टले जोड दिएको छ ।
हर्मुज खोल्ने इरानको प्रस्ताव, ट्रम्पले गरे ठाडै अस्वीकार
काठमाडौं । इरानले सात दिनको प्रस्तावित योजनाअन्तर्गत छैटौं दिनमा हर्मुज जलडमरूमध्य पुनः खोल्ने र सातौं दिनमा अमेरिकासँग आणविक वार्ता पुनः सुरु गर्ने प्रस्ताव गरेको छ । तर, सुरुमा नै प्रतिबन्ध हटाउनुपर्ने र रोक्का गरिएका आफ्ना सम्पत्तिमा पहुँच दिनुपर्ने शर्त राखेपछि अमेरिकाले उक्त प्रस्ताव अस्वीकार गरेको छ । इरानका विदेशमन्त्री अब्बास अराग्चीले अमेरिकाले संघर्ष अन्त्य गर्ने, नाकाबन्दी हटाउने, रोक्का गरिएका इरानी सम्पत्ति फुकुवा गर्ने र इरानलाई तेल बिक्री गर्न अनुमति दिने हो भने तेहरान होर्मुज जलडमरूमध्य खोल्न तयार रहेको बताएका छन् । अराघचीले आइतबार एनबीसीको ‘मिट द प्रेस’ कार्यक्रममा इरानको प्रस्ताव स्पष्ट रहेको बताएका हुन्। उनका अनुसार अमेरिकाले आवश्यक केही कदम चाल्ने हो भने इरान हर्मुज जलडमरूमध्य खोल्न तयार छ । ‘गैरकानुनी रूपमा रोक्का गरिएका हाम्रो पैसा र सम्पत्ति फुकुवा गरिनुपर्छ । हामीलाई तेल बिक्री गर्न पनि अनुमति दिनुपर्छ,’ उनले भने । आफूहरूले माग गरेका कदम चारदेखि पाँच दिनमै पूरा गर्न सकिने उनको दाबी छ । अराग्चीका अनुसार इरानले सात दिनको योजना अघि सारेको हो। योजनाअनुसार छैटौं दिनमा होर्मुज जलडमरूमध्य खोल्ने र सातौं दिनमा बृहत् सम्झौताका लागि वार्ता सुरु गर्ने प्रस्ताव गरिएको छ । अमेरिकी राष्ट्रपति डोनाल्ड ट्रम्पले भने इरानको प्रस्ताव अस्वीकार गरेका छन् । उनले जलडमरूमध्य तत्काल खोलिनुपर्ने बताएका छन् । ट्रम्पले इरानले आफूहरू नराम्रोसँग पराजित भइरहेको अवस्थामा सम्झौता गर्न खोजेको दाबी गर्दै अमेरिकाले ठूलो सफलता हासिल गरिरहेको बताएका छन् । उनले हर्मुज जलडमरूमध्यमा अमेरिकाको पूर्ण नियन्त्रण रहेको दाबीसमेत गरेका छन् । संयुक्त राष्ट्रसंघका लागि अमेरिकी राजदूत माइक वाल्ट्जले पनि इरानको प्रस्तावमा वास्तविक वार्ता सुरु हुनुअघि नै अमेरिकासँग धेरै ठूला सहुलियत मागिएको बताएका छन् । सीएनएनको ‘स्टेट अफ द युनियन’ कार्यक्रममा वाल्ट्जले इरानले सुरुमै अमेरिका र संयुक्त राष्ट्रसंघका प्रतिबन्धमा राहत तथा अर्बौं डलर बराबरका रोक्का गरिएका इरानी सम्पत्तिमा पुनः पहुँच मागेको बताए । उनका अनुसार इरानले सुरुमै सबै कुरा मागेर त्यसपछि मात्र वार्ता गर्ने प्रस्ताव गरेको थियो । वाल्ट्जले इरानमाथि अन्तर्राष्ट्रिय पानीजहाजमा आक्रमण गरेर यसअघि भएको समझदारीको उल्लंघन गरेको आरोपसमेत लगाए । तेहरानले भने अमेरिकी आरोप अस्वीकार गर्दै यसअघि भएका सम्झौता अमेरिकाले नै उल्लंघन गरेको दाबी गरेको छ । वाल्ट्जले अमेरिकी राष्ट्रपति ट्रम्पलाई इरान वास्तविक नियतका साथ वार्तामा आउँछ भन्ने विश्वास नरहेको बताएका छन् । उनका अनुसार इरानको आणविक कार्यक्रम अन्त्य गर्ने विषयमा सार्थक वार्ता गर्न सकिनेमा पनि अमेरिकालाई आशंका छ । तर, अराग्चीले ट्रम्पले सार्वजनिक रूपमा प्रस्ताव अस्वीकार गरे पनि इरानले मध्यस्थमार्फत अमेरिकाको औपचारिक जवाफ अझै पर्खिरहेको बताएका छन् । ‘हामी कूटनीतिका लागि तयार छौं । अहिले वार्ताको टेबलमा अत्यन्तै उचित योजना छ । यदि उनीहरूले कुनै कारणबिना यसलाई अस्वीकार गर्छन् भने त्यसको जिम्मेवारी उनीहरूकै हुनेछ,’ उनले भने । इरानी राष्ट्रपति मसुद पेजेस्कियनले पनि सीबीएसको ‘फेस द नेसन’ कार्यक्रममा तेहरान यसअघि भएको समझदारीको आधारमा चरणबद्ध रूपमा अघि बढ्न तयार रहेको बताएका छन् । उनले इरानले गर्ने प्रतिबद्धता पूरा गर्ने दाबी गर्दै आणविक कार्यक्रममाथि केही सीमा र अन्तर्राष्ट्रिय निरीक्षणका विषयमा समेत वार्ता गर्न सकिने संकेत दिएका छन् । पेजेस्कियनका अनुसार आणविक अप्रसार सन्धि (एनपीटी) र अन्य विद्यमान अन्तर्राष्ट्रिय नियमको दायराभित्र रहेर यी विषयमा सहमति गर्न सकिन्छ । अराग्चीले इरान पुनः सैन्य संघर्ष सुरु भए त्यसको सामना गर्न तयार रहेको बताएका छन् । यद्यपि, उनले कूटनीतिक बाटो भने खुला रहेको स्पष्ट पारेका छन् । ‘यदि युद्ध पुनः सुरु भयो भने हामी त्यसका लागि पूर्ण रूपमा तयार छौं तर, हामी कूटनीतिका लागि पनि तयार छौं । अब राष्ट्रपति ट्रम्पले निर्णय गर्नुपर्छ,’ उनले भने ।
लोडसेडिङ हुन नदिन भारतबाट ११५४ मेगावाट बिजुली आयात गरिने
काठमाडौं । नेपाल विद्युत प्राधिकरणले आगामी सुख्खा सिजनमा सम्भावित लोडसेडिङ रोक्न र माग–आपूर्ति बीच सन्तुलन कायम राख्न भारतबाट बिजुली आयात बढाउने तयारी गरेको छ । प्राधिकरणका कार्यकारी निर्देशक दीर्घायूकुमार श्रेष्ठका अनुसार यस अवधिमा कुल ११५४ मेगावाट बिजुली भारतबाट आयात गर्ने योजना बनाइएको छ । जसअन्तर्गत ढल्केबर-मुजफ्फरपुर अन्तरदेशीय प्रसारण लाइनबाट ६०० मेगावाट, टनकपुर-महेन्द्रनगरबाट ५४ मेगावाट, बिहारका विभिन्न बिन्दुहरूबाट ३५० मेगावाट र आरटिसको माध्यमबाट १५० मेगावाट बिजुली आयात गरिनेछ । अघिल्लो वर्षको सुख्खायाममा पनि पिक आवरमा ८०० मेगावाटसम्म बिजुली आयात गरिएको थियो । यस वर्षको सुख्खायाममा आन्तरिक उत्पादनबाट करिब १२१८ मेगावाट विद्युत उपलब्ध हुने अनुमान छ। आयातित र आन्तरिक उत्पादन गरी कुल विद्युत उपलब्धता २३७२ मेगावाट पुग्ने प्राधिकरणको प्रक्षेपण छ । अघिल्लो वर्षको सुख्खायाममा राष्ट्रिय विद्युतको उच्चतम माग २२९२ मेगावाट रहेको र यस वर्ष पनि माग खासै नबढ्ने अनुमान गरिएको छ । हालै असोजमा आएको बाढी-पहिरोले ३१७ मेगावाट र गत भदौ १० गते भोटेकोशी तथा त्रिशूली नदीमा आएको बाढीले थप ४३० मेगावाट विद्युत प्रणालीबाट बाहिरिएका कारण पनि सुख्खायाममा भारतबाट बिजुली आयात गर्नुपर्ने बाध्यता सिर्जना भएको हो ।
विपद्ममा परी २७ जनाको ज्यान गयो, सम्हालिँदै देश
काठमाडौं । अविरल वर्षाका कारण प्रभावित नागरिकको सुरक्षित व्यवस्थापनसँगै क्षति पुगेका पूर्वाधार मर्मत गरी जनजीवनलाई सामान्य बनाउनतर्फ सरकार तदारुकताका साथ लागिरहेको छ । असोज ८ गतेदेखि वर्षासँगै आएको बाढी पहिरो, डुबान, हावाहुरी र चट्याङका कारण देशभर २७ जनाले ज्यान गुमाउनुभएको छ भने ७ जना घाइते र ४ जना सम्पर्कविहीन छन् । यस अवधिमा भएका ५१३ वटा मनसुनका घटनाबाट १,०६५ परिवार प्रभावित भएका छन् । यसैगरी, २२५ घरमा पूर्ण र १३७ घरमा आंशिक क्षति पुगेको छ भने २७ गोठ र ११४ पशुचौपायामा क्षति पुगेको छ । यस्तै, दैनिक जीवनसँग प्रत्यक्ष जोडिएका सडक, पुल, जलविद्युत् आयोजना र खानेपानी प्रणाली लगायतका पूर्वाधारहरूमा पनि क्षति पुगेको छ । बाढी पहिरोबाट देशभरका विभिन्न राजमार्ग र सडकखण्डका १४७ स्थानमा क्षति पुगेको थियो । तीमध्ये १२५ स्थानमा सरकारले अहोरात्र आफ्ना संयन्त्रहरू परिचालन गरी मर्मतपश्चात् सञ्चालनमा ल्याइसकेको छ । पृथ्वी राजमार्गअन्तर्गत विभिन्न ठाउँमा गएको पहिरो पन्छाइएको छ भने एकतर्फी सडक सञ्चालनमा आइसकेको छ । यसैगरी नारायणी-मुग्लिन खण्डको सिमलताल नजिक भासिएको स्थानमा मर्मत गरी एकतर्फी सञ्चालनमा ल्याइएको छ। बिपी राजमार्गको मात्ती, पिप्ले, दाउन्ने-कालोपुल, चारसयबेंसी, कटुन्जे, चौकीडाँडा लगायतका स्थानमा पहिरो तथा डाइभर्सन बगेका कारण अवरुद्ध सडक खुलाउने प्रयास जारी छ । थप क्षति नभएमा भोलि साँझसम्म सञ्चालनमा आइसक्नेछ । कालिगण्डकी कोरिडोरमा पनि यातायात अवरुद्ध छ । बेनी-जोमसोम, पाल्पा, बागलुङ तथा नवलपरासी खण्डका विभिन्न स्थानमा पहिरो, सडक भासिएको तथा पुलको एप्रोच बगेको छ । पहिरो पन्छाउने कार्य जारी छ भने सम्पूर्ण सडक सुचारु हुन ३ दिनभन्दा बढी समय लाग्ने प्रारम्भिक आकलन गरिएको छ । यस्तै, अवरुद्ध भालुवाङ-चकचके-लिवाङ सडकमा पनि पहिरो पन्छाएर यातायात सञ्चालन भइसकेका छन् । बेसिसहर-चामे सडकअन्तर्गत मनाङको नासों गाउँपालिका, खोत्रोलगायतका स्थानमा पहिरो हटाइ पूरै सडक सुचारु हुन ३ दिन लाग्ने देखिन्छ । त्रिभुवन राजपथमा पहिरो पन्छाएर सुरक्षा सतर्कता अपनाइ यातायात सञ्चालनमा ल्याइएको छ । सालझण्डी-सन्धिखर्क-ढोरपाटन सडकमा २१ स्थानमा पहिरो खसेको भए पनि सडक खुलाउने काम तीव्र ढंगले भइरहेकाले भोलिसम्म यातायात सञ्चालन हुनेछ । त्यसैगरी, बाढीका कारण कालीगण्डकी कोरिडोर, मस्र्याङ्दी र सेती-मादी कोरिडोर लगायत गरी राष्ट्रिय प्रसारण लाइनबाट १,०१३.२ मेगावाट विद्युत् आपूर्ति बन्द भएको थियो । तीमध्ये सेती/मादी कोरिडोरमा रहेका कुल २६२ मेगावाट र मस्र्याङ्गदी कोरिडोरमा १९० मेगावाटका जलविद्युत् केन्द्रहरु सञ्चालनमा आएका छन् । बाढीका कारण अवरुद्ध १४४ मेगावाटको कालिगण्डकी जलविद्युत् केन्द्र सञ्चालनमा ल्याउने प्रयास भइरहेको छ । यसैगरी क्षतिग्रस्त राहुघाटको जलविद्युत् आयोजना पनि सञ्चालनमा ल्याउन करिब १० दिन लाग्नेछ । कुस्मा-दाना प्रसारण लाइनमा क्षति पुगेका कारण विद्युत् प्रसारण हुन नसकेका ७ वटा जलविद्युत् केन्द्रहरूको १९० मेगावाट क्षमता रहेको छ । राहुघाट सवस्टेशनमा जोडिएका र बाढीका कारण अवरुद्ध भएका राहुघाट जलविद्युत केन्द्र (४० मेगावाट) बाहेक १२७ मेगावाटको उत्पादन सञ्चालनमा आउनसक्ने अवस्था छ । यसैगरी कालिगण्डकी कोरिडोरको २२० केभी प्रसारण लाइन अन्तर्गत म्याग्दीको दाना-कुस्मा खण्डको टावर नं २१ र २२ मा क्षति पुगेको प्रारम्भिक विवरण प्राप्त भएको छ । यसैगरी क्षति पुगेको दूरसञ्चार सेवा पनि चाँडै सञ्चालनमा ल्याउने प्रयास भइरहेको छ । नेपाल टेलिकमका १,१३२ टावरको नेटवर्क विच्छेद भएकामा अहिले ७८२ वटालाई सञ्चालनमा ल्याइएको छ । यस्तै, एनसेलको १६२ वटा नेटवर्क विच्छेद भएकोमा १०५ वटालाई मर्मत गरिएको छ । नारायणी नदीमा आएको बाढीका कारण डुबानमा परेको सुस्ताबासीलाई उद्धार गरी सुरक्षित स्थानमा सारिएको छ । चितवनको देवघाट, बाह्रघरेलगायत तटीय क्षेत्रका स्थानीयलाई स्थानान्तरण गरिएको छ । यसैगरी, सप्तकोशी नदीमा पानीको बहाव उच्च भएपछि तिलाठी कोईलाडी गाउँपालिकामा डुबानमा परेका ५०० घरपरिवारलाई सुरक्षित स्थानमा प्रतिस्थापन गरिएको छ । सर्लाहीको लखनदेई खोलामा आएको बाढीले भाडसर खुटौनाको बस्ती डुबानमा पारेको छ । यस्तै, रौतहटमा लालबकैया र बागमती नदीको तटीय क्षेत्रहरू प्रभावित भएका छन्। तिनाउ नदीको किनारमा रहेका मझुवा, प्रगतिनगर, हात्तीसुँढ र युद्धनगर लगायतका डुबानमा परेका तटीय क्षेत्रका बस्तीहरुबाट सुरक्षाकर्मीले करिब २०० घरपरिवारका एक हजारभन्दा बढी मानिसहरूलाई सुरक्षित स्थानमा सारेका थिए । बाढी र पहिरोका कारण मुस्ताङ, मनाङ, पाल्पा, बागलुङ, म्याग्दीलगायत पहाडी तथा हिमाली जिल्लाहरू पनि प्रभावित भएका छन् । यहाँका प्रभावित नागरिकलाई सम्बन्धित स्थानीय तहहरूसँग समन्वय गरी राहत तथा अस्थायी बसोबासको प्रबन्ध मिलाइएको छ । प्रधानमन्त्री वालेन्द्र शाहले अझै मौसमजन्य खतरा नटरेको र जोखिम कायमै रहेकाले सबैलाई सतर्क रहन आग्रह गरेका छन् ।
