पेट्रोलियम पदार्थको भाउ नबढ्ने, उद्योग मन्त्रीले दिए निर्देशन
काठमाडौ । उद्योग, वाणिज्य तथा आपूर्तिमन्त्री मात्रिकाप्रसाद यादवले चाडपर्वको अवसरमा पेट्रोलियम पदार्थको मूल्य नबढाउन नेपाल आयल निगम लिमिटेडलाई निर्देशन दिएका छन् । चाडपर्वको समयमा पेट्रोलियम पदार्थको मूल्य बढ्दा जनताको जीवनस्तर कष्टकर हुने भन्दै उनले तिहार र छठसम्म इन्धनको मूल्य नबढाउन निर्देशन दिएका हुन्। निगमलाई पेट्रोलियम पदार्थको कारोबारमा घाटा भएपनि उपभोक्ताको हितलाई ध्यान दिँदै सुलभ दरमा पेट्रोलियम पदार्थ उपलब्ध गराउन निर्देशन दिइएको उद्योग मन्त्रालयका सहसचिव नवराज ढकालले जानकारी दिए। हाल निगमलाई पेट्रोलमा प्रतिलिटर ८ रुपैयाँ ५० पैसा, डिजेलमा ९ रुपैयाँ ३२ पैसा र खाना पकाउने ग्यासमा प्रतिसिलिण्डर ४०४ रुपैयाँ ७३ पैसा घाटा रहेको छ । सीमावर्ती भारतीय बजारमा नेपालको भन्दा पेट्रोलको मूल्य प्रतिलिटर २१ रुपैया ८७ पैसा र डिजेलमा २४ रुपैयाँ २८ पैसा बढी रहेको निगमले जनाएको छ । निगमले पेट्रोल प्रतिलिटर ११४, डिजेल १०१ र खाना पकाउने ग्यास प्रतिसिलिण्डर १ हजार ४०० रुपैयाँ तोकेको छ । अन्तर्राष्ट्रिय बजारमा कच्चा तेलको मूल्य बढेकाले निगमले मूल्य समायोजन नगर्दा मासिक २ अर्ब ८ करोड रुपैयाँ घाटा हुने निगमले जनाएको छ । रासस
पूर्वअर्थमन्त्री बद्रीप्रसाद श्रेष्ठको निधन
काठमाडौ । पूर्वअर्थमन्त्री डा. बद्रीप्रसाद श्रेष्ठको गए राति पुल्चोकस्थित निदान अस्पतालमा निधन भएको छ । पिसाबसम्बन्धी समस्याबाट पीडित ८७ वर्षीय डा श्रेष्ठको उपचारका क्रममा मृत्यु भएको उनका भानिज दिनेश श्रेष्ठले जानकारी दिए । अर्थशास्त्री डा. श्रेष्ठले राष्ट्रिय योजना आयोगको सदस्य, उपाध्यक्ष, राष्ट्रिय पञ्चायत सदस्य तथा जापानका लागि नेपाली राजदूतका रुपमा सेवा गरेका थिए । उनका श्रीमती, एक छोरा र दुई छोरी छन् । उनका भानिज श्रेष्ठका अनुसार स्वर्गीय श्रेष्ठको दाहसंस्कार बुधबार पशुपति आर्यघाटमा गरिनेछ । रासस
स्याङ्जाको लल्याङमा नेपाल टेलिकमको सेवा विस्तार, ५० घरधुरी लाभान्वित
काठमाडौं । नेपाल टेलिकम, दूरसञ्चार कार्यालय गल्याङले स्याङ्जाको लल्याङमा आफ्नो पिएसटिएन तथा एडिएसएल सेवाको विस्तार गरेको छ । विस्तार पश्चात अब लल्याङका करिब ५० घरधुरी प्रत्यक्ष रुपमा पिएसटिएन तथा एडिएसएल सेवाको उपभोगबाट लाभान्वित हुन सक्ने नेपाल टेलिकम गल्याङ्का कार्यालय प्रमुख रामराज उपाध्यायले जानकारी दिए । गल्याङस्थित नेपाल टेलिकमबाट मात्र करिब दुई किलोमिटरको दुरीमा रहेको लल्याङमा करिब पाँच वर्ष अघिदेखि उक्त सेवा विस्तारको प्रयास गरिएको थियो तथापी हाल आएर नयाँ नेटवर्किङ गरि सम्पन्न भएकोमा त्यहाँका वडा अध्यक्ष महेश भट्टराइले खुसी व्यक्त गरेका छन् । नेपाल टेलिकमको पिएसटिएन (पब्लिक स्विच्ड टेलिफोन नेटवर्क) फिक्ड ल्याण्डलाइन हो जस्बाट पाँच एमबीपिएससम्म स्पिड क्षमता भएको ब्रोडव्याण्ड एडिएसएल इन्टरनेट सस्तो दरमा चलाउन सकिन्छ ।
गोदावरीमा चार दिने पुष्प मेला हुने, ६० लाख रुपैयाँको कारोबार हुने अनुमान
काठमाडौं । ललितपुरको जावलाखेल मैदानमा चार दिने १२ औँ गोदावरी पुष्प मेला हुने भएको छ । कात्तिक १५ देखि १८ गतेसम्म आयोजना हुने सो प्रदर्शनी पुष्प व्यवसाय प्रवद्र्धन गर्ने र व्यवसायीबीच प्रतिस्पर्धात्मक भावनाको विकास गरी गुणस्तरीय उत्पादनमा टेवा पुर्याउने रहेको छ । ‘रोपेर फूल गोदावरी, सजाऔँ घर आँगन वरिपरि’ भन्ने अभियानसाथ हुने प्रदर्शनीमा व्यावसायिक ४४, सूचनामूलक तीन र गोदावरी फूलको प्रतिस्पर्धात्मक प्रदर्शनी ९ सहित ५६ कक्ष रहने फ्लोरिकल्चर एशोसिएशन नेपाल (फ्यान) ले बताएको छ । नजीक आइरहेको तिहार तथा छठलाई लक्ष्य गरी आयोजना हुन लागेको सो प्रतिस्पर्धात्मक प्रदर्शनीमा ४५ प्रजातिका फूल तथा विरुवाको प्रदर्शनीसहित बिक्री वितरण गरिने फ्यानका अध्यक्ष कुमार कसजुले सोमबार काठमाडौँमा आयोजित पत्रकार सम्मेलनमा जानकारी दिए । प्रदेश सरकार प्रदेश नं. ३, भूमि व्यवस्था, कृषि तथा सहकारी मन्त्रालय र पुष्प विकास केन्द्रको सहयोगमा हुने उक्त मेलाअन्तर्गतको प्रतिस्पर्धामा गोदावरी फूलका विभिन्न प्रकारमध्ये मुख्यतः स्पाइडर, मिनियचर, इन्क्रर्भ, रिफ्लेक्स तथा कट फ्लावर विधालाई समावेश गरिने छ । मेलामा ६० लाख रुपैयाँको कारोबार हुने अनुमान गरिएको छ । नेपाल फूलमा आत्मनिर्भर छैन । गत वर्ष नेपालले ११ करोड रुपैयाँको फूल आयात गरेको थियो । तिहारमा झण्डै तीन लाख माला भारतबाट आयात भएको थियो । नेपालमा फूलखेती व्यावसायिक ढङ्गले शुरुआत भएको २५ वर्ष पुगिसकेको छ । विसं २०११ देखि नेपाल प्राइभेट नर्सरीको स्थापनासँगै सामान्यस्तरमा शुरु भएको फूल व्यवसाय आर्थिक वर्ष २०७४/०७५ सम्म आइपुग्दा ४३ जिल्लामा विस्तार भएको छ । नेपालमा करीब ७०० व्यक्ति र संस्थाले फूल व्यवसाय गरेका छन् । करीब दुई हजार ९६० रोपनीमा लगाइएको फूल खेतीबाट ४२ हजारभन्दा बढी व्यक्ति प्रत्यक्ष तथा अप्रत्यक्ष रुपमा लाभान्वित भएका छन् ।
अब टोयोटाको शोरुम धनगढीमा
काठमाडौं । टोयोटाको नेपालको लागि एक मात्र अधिकृत बिक्रेता युनाइटेड ट्रेडर्स सिन्डिकेट प्रा. लि. (युटीएस) ले प्रदेश ७ धनगढीमा नयाँ शोरुम उद्घाटन गरेको छ । साथै, कम्पनीले बसन्त क्लासिक अटोमोबाइल्सलाई औपचारिक रुपमा टोयोटाको ३ एस सेवा दिने गरि बिक्रेता नियुक्त गरेको छ । टोयोटाद्धारा उत्पादित गाडी अब धनगढिमा पनि सहज रुपमा उपलब्ध हुनेछ । प्रदेश ७ को धनगढिमा खोलिएको यस नयाँ ३ एस सेवा टोयोटाको अन्तराष्ट्रिय गुणस्तरलाइ ध्यानमा राखी संचालनमा ल्याइएको हो । बजारको आवश्यकता र क्षमतालाई मध्यनजर गर्दै बसन्त क्लासिक अटोमोबाइल्सले टोयोटामा समावेश हुने निर्णय गरि यस नयाँ शोरुम खोलेको हो । यस नयाँ शोरुमको उद्घाटन युटीएसका बरिष्ट निर्देशक कैलाश भक्त राजभण्डारी एवं बसन्त क्लासिकका भुवन भट्ट, बसन्त भट्ट र देवीदत्त भट्टले गरेका हुन् ।
थानकोटमा प्रभु बैंकको नयाँ शाखा, नेपाल आयल निगमको डिपोलाई सजिलो
काठमाडौं । पभ्रु बैंक लिमिटेडले चन्द्रागिरी नगरपालिका स्थित थानकोटमा नयाँ शाखा कार्यालय स्थापना गरी सञ्चालनमा ल्याएको छ । उक्त शाखाको उद्घाटन बागमती डिलर्स एशोसिएसनका अध्यक्ष अच्युतबहादुर खडकाले गरेका छन् । थानकोटमा रहेको नेपाल आयल निगमको डिपोलाई मध्येनजर गरी बैंकले थानकोट शाखा कार्यालय सञ्चालनमा ल्याएको हो । कार्यक्रममा प्रमुख अतिथि बागमती पेट्रोलियम डिलर्स एशोसिएसनका अध्यक्ष खडकाले पेट्रोलियम पदार्थको कारोबार गर्ने डिलर्सहरुले आयल निगमलाई दिनुपर्ने रकम प्रभु बैंकको थानकोट शाखामा रहेको नेपाल आयल निगमको खातामा प्रभु बैंकको जुनसुकै शाखा कायालयबाट निशुल्क रुपमा जम्मा गर्न सक्नेछन् । यसका साथै, पेट्रोलियम पदार्थको कारोबार गर्ने व्यवसायीहरुलाई कारोबारमा सजिलो हुने बैंकले बताएको छ । सोमबारदेखि सञ्चालनमा आएको बैंकको थानकोट शाखा कार्यालयबाट बागमती अञ्चल भरीका पेट्रोलियम पदार्थको कारोबार गर्ने व्यवसायीहरु, अन्य सर्वसाधारणहरु र उद्यमी व्यवसायीहरुले प्रभु बैंकको बैंकिङ्ग सेवा लिन सक्नेछन् । बैंकको थानकोट शाखा कार्यालयबाट स्थानीय सेवाग्राही, सर्वसाधारणहरु, फर्म, कम्पनी तथा संघ संस्थाहरु, उद्यमी व्यवसायहरु लगायतले प्रभु बैंकको गुणस्तरीय सेवा उपभोग गरी लाभान्वित हुनेछन् भन्ने बैंकले विश्वास लिएको छ ।
मेलम्ची आयोजनाको गाडी दुरुपयोग गरेपछि खानेपानी मन्त्रालय हस्तक्षेप, गाडी आयोजनामै फर्काइने
मेलम्ची खानेपानी आोजनाको नाममा खरिद गरिएको महँगा सवारी साधनहरु विभिन्न मन्त्रालयदेखि प्रधानमन्त्री कार्यालयसम्मले दुरुपयोग समाचार सार्वजनिक भएपछि खानेपानी मन्त्रालय सवारी फिर्ता गराउन हस्तक्षेप गरेकाे छ । मन्त्रालयले सोमबार विज्ञप्ती जारी गरी मन्त्रालयले प्रयोग गरेको भनिएका गाडी फर्काउने तयारी थालेको जानकारी दिएको छ । मेलम्चीको नाममा रहेको दुई गाडी प्रधानमन्त्री कार्यालयमा, एउटा गाडी एउटा, काठमाडौं उपत्यका विकास प्राधिकरणले एउटा, सहरी विकास मन्त्रालयमा एउटा र क्षेत्रीय प्रशासन कार्यालय हेटौंडामा एउटा गाडी प्रयोग भइरहेको समाचार बाहिर आएको थियो । ती सबै गाडीहरु आयोजनामै फिर्ता पठाउन मन्त्रालय अघि बढेको हो । खानेपानीमन्त्री विना मगरको ध्यानाकर्षणपछि मन्त्रालय अघि बढेको विज्ञप्तीमा उल्लेख छ ।
सिद्धार्थ बैंकले २ अर्ब २५ करोडको ऋणपत्र ल्याउदै, वार्षिक १०.५ प्रतिशत ब्याज दिने
काठमाडौं । सिद्धार्थ बैंकले पनि ऋणपत्र (डिवेन्चर) निष्कासन गर्ने भएको छ । बैंकले २ अर्ब २५ करोड रुपैयाँ बराबरको २२ लाख ५० हजार इकाई निष्कासन गर्न लागेको हो । बैंकको प्रतिईकाई १ हजार रुपैयाँ छ । ऋणपत्र निष्कासन गर्न बैंकले नेपाल धितोपत्र बोर्डमा निवेदन दिएको छ । बैंकले वार्षिक १०.५ प्रतिशत ब्याजमा एसबीएल डिबेञ्चर २०८२ रहेको छ । डिवेञ्चरको अवधि ७ वर्ष रहेको छ । बैंकले एनआईबीएल एस क्यापिटल लिमिटेड रहेको छ । चालु आर्थिक वर्षमा एनआईसी एसिया बैंकले ऋणपत्र निष्कासन गरिसकेको छ भने सानिमा बैंकले ल्याउन अनुमति पाएको छ ।
