इन्भेष्टमेण्ट बैंकको कार्यक्रममा ११९ जनाले गरे रक्तदान
काठमाडौँ । नेपाल इन्भेष्टमेण्ट बैंक लि.ले आफ्नो ३३ औं वार्षिकोत्सवको अवसरमा मंगलबार रक्तदान कार्याक्रमको आयोजना गरेको छ ।दरबारमार्गस्थित प्रधानकार्यालयमा विहान ९ बजेदेखि २ बजेसम्म आयोजित कार्याक्रममा ११९ जनाले रक्तदान गरे । ग्रान्डी इन्टरनेशनल अस्पतालको सहयोगमा आयोजित रक्तदान कार्यक्रममा बैंकका अध्यक्ष पृथ्वीबहादुर पाँडे, प्रमुख कार्यकारी अधिकृत ज्योतिप्रकाश पाण्डे, कर्मचारी तथा सहयोगीहरुले उत्साहजनक रुपमा सहभागिता जनाएका थिए । बार्षिकोत्सवकै दिन पारेर बैंकका कार्यकारी अधिकृत पाण्डेले क्रमिक मुद्यती खाता तथा बालबालिकाहरुमा वित्तिय साक्षरता विस्तार गर्ने उदेश्यले प्रकाशित बैंकसँगको नाता, मेरो आफ्नै बचत खाता नामको चित्रकथा सार्बजनिक गर्नु भएको थियो । नेपाल इन्भेष्टमेण्ट बैंकको केटाकेटी बचत खाता खोल्ने जुनसुकै नाबालक ग्राहकहरुलाई खाता खोल्दा ५०० रुपैयाँ नगद र प्रत्येक वर्ष जन्मदिनको खुशीयालीमा केक प्रदानगरिने छ तर यसका लागि सीमित सर्तहरु भने लागु हुने बैंकले जनाएको छ ।
अध्यक्ष प्रचण्ड भन्छन्-बीआरआई परियोजनाबाट दक्षिण एशियाका जनता लाभान्वित हुन्छन्
काठमाडौँ । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले ‘बेल्ट एण्ड रोड इनिसेटिभ (बिआरआई)’ परियोजनाबाट नेपाललगायत दक्षिण एशियाका जनता लाभान्वित हुने बताएका छन् । ‘बेल्ट एण्ड रोड इनिसेटिभ’ अन्तर्राष्ट्रिय यातायात सङ्घ र नेपाल अटोमोबाइल एशोसिएशन (नासा)को संयुक्त आयोजनामा आजदेखि शुरु भएको बिआरआइसम्बन्धी अन्तर्राष्ट्रिय सम्मेलनको उद्घाटन गर्दै उनले अहिलेको समय ‘कनेक्टिभिटी’को भएको बताए । आफू प्रधानमन्त्री हुँदा यो परियोजनामा हस्ताक्षर भएकाले आफूलाई गर्वको महसुस भइरहेको उनले बताए । उनका अनुसार नेपालमा अहिले शान्ति स्थापना भइसकेको र राजनीतिक रुपमा स्थिरता कायम भएकाले देश अहिले विकासको पथमा रहेको छ । उनले भने, “हामी दुई दशकसम्म राजनीतिक उथलपुथलमा बिताए पनि अबको हाम्रो लक्ष्य भनेको विकास नै हो ।” यो परियोजना चीनका राष्ट्रपति सी जिन पिङको महत्वकाङ्क्षी लक्ष्य भएको उनले बताए । नेपालले यसबाट फाइदा लिने प्रशस्त सम्भावना रहेकामा उनको जोड छ । उनले भने, “सरकारको ‘समृद्ध नेपाल सुखी नेपाली’ नारालाई साकार बनाउन पनि परियोजनाले पनि थप सहयोग गर्नेछ ।” नेपालका लागि चिनियाँ राजदूत हउ यान्चीले विकासन्मुख देशका लागि बेल्ट एण्ड रोड इनिसेटिभ परियोजना महत्वपूर्ण हुने बताए । नेपाल र चीनबीचमा शताब्दीऔँदेखि हार्दिकतापूर्ण सम्बन्ध रहेको उनले औँल्याए । उनले भने, “यो परियोजनाले नेपाल र चीनको सम्बन्ध थप मजबुत बनाउन सहयोग गर्नेछ ।” कार्यक्रमको सहआयोजक संस्था युथ कम्युनिटी फर नेपाली कन्ट्र्याक्टरका अध्यक्ष आनन्द सुवेदीले सम्मेलनले सडक, यातायात र पूर्वाधार विकासका विषयमा विस्तृत रुपमा छलफल हुने बताए । बुधबारसम्म चल्ने सम्मेलनमा झण्डै १२ देशका १४० जना सहभागी रहेकोे आयोजकले बताएको छ । सम्मेलनमा छलफलका लागि नेपाल र बिआरआई अभियान, पूर्वाधार र विकास, पर्यटन र व्यापार, सुरक्षित यातायातलगायत विषय तय भएका छन् । आयोजकका अनुसार सम्मेलनमा यातायात क्षेत्रमा कार्यरत सरकारी तथा गैरसरकारी संस्थाका प्रतिनिधि र स्थानीय तहका जनप्रतिनिधिको सहभागी छन् । सम्मेलनमा नेपाल, चीन, भारत, संयुक्त अधिराज्य, दक्षिण अफ्रिका, श्रीलङ्का, मलेशियालगायत देशका प्रतिनिधि सहभागी हुने आयोजकले जनाएको छ ।
सञ्चय कोषले २१ दिनभित्र ‘काठमाडौं मल’ खाली गर्न सूचना टाँसेपछि अर्बौँ रुपैयाँ जोखिममा
काठमाडौँ । काठमाडौं मल खाली गर्न सञ्चय कोषले सूचना जारी गरेसँगै व्यवसायीहरु ४ अर्ब जोखिममा परेको भन्दै विरोधमा उत्रिएका छन् । संगठन द काठमाडौं मल व्यापार संघले मंगलबार पत्रकार सम्मेलन गर्दै विरोध जनाएको छ । द काठमाडौं मल व्यापार संघकी अध्यक्ष सुषमा महराले ‘मल सञ्चालनका लागि सञ्चय कोषले स्पष्ट नीति नलिँदा सधैं अन्योलको अवस्था सिर्जना हुने गरेको बताउँदै विस्तृत योजना, व्यवसाय पुनव्र्यवस्थापनलाई ध्यान नै नदिई २१ दिनभित्र खाली गर भन्नु न्यायसंगत नभएको बताइन् ।’ ३ सय व्यापारीहरुले व्यवसाय गर्दै आएका र उनिहरुमा ४ अर्ब रुपैंया जोखिममा परेको भन्दै अब सञ्चय कोषमा गएर भोक हडताल गर्ने बताइन् । संघका सल्लाहकार उज्जलजङ शाहले भने ‘हामीलाई थाहानै नदिही दोस्रो तलामा कर कार्यालयको स्थापनाको काम भहिरहेको छ ।’ यसका लागि हामीले टेन्डर आव्हान गरेको पनि थाहापाएको छैन । अब यो मललाई कर्पाेरेट हाउस बनाउने हल्लाले व्यवसायीहरुलाई होलसेलले समान नै दिन छाडेको शाहले बताए । संघले कोषले ०६२ देखि व्यवसाय गरिआएका व्यवसायीको हितलाई मध्यनजर गरेर काम गर्न आग्रह गरेको छ ।
बेइजिङमा लगानी सम्मेलन, काठमाडौँमा चिनियाँ लगानीकर्ताको सहभागिता कस्तो रहला ?
बेइजिङ । आगामी महिना काठमाडौँमा आयोजना हुने लगानी सम्मेलनमा चिनियाँ लगानीकर्तालाई सहभागी हुन आह्वान गर्दै चीनस्थित नेपाली दूतावासले बेइजिङमा लगानी सम्मेलन आयोजना गरेको छ । झण्डै १२० भन्दा धेरै लगानीकर्ता, व्यावसायिक प्रतिष्ठान, प्राज्ञिक समुदाय तथा अन्यको उपस्थिति रहेको उक्त कार्यक्रममा लगानी बोर्डका प्रमुख कार्यकारी अधिकृत महाप्रसाद अधिकारी, चीनका लागि नेपाली राजदूत लीलामणि पौड्याल, नेपाली दूतावासका मिनिस्टर सुशिलकुमार लम्साल लगायतले चिनियाँ लगानीकर्ता एवं व्यवसायीलाई नेपालमा लगानी गर्न आग्रह गर्दै लगानीको सुरक्षा र लगानीकर्तालाई सहजीकरण गर्न नेपाल सरकार सबै प्रकारले तत्पर रहेको बताए । सो अवसरमा लगानी बोर्डका प्रमुख कार्यकारी अधिकृत अधिकारीले नेपालमा अहिले स्थिर र बलियो सरकार रहेको भन्दै लगानीकर्ताका लागि नेपालमा लगानी गर्ने उत्तम समय भएको धारणा व्यक्त गरे । “लगानीको सुरक्षा, लगानीमैत्री कानूनको व्यवस्था तथा प्रतिफल लैजान पाउने जस्ता विषयमा सरकारले स्पष्ट व्यवस्था गरेको छ । लगानीकर्ताले नेपालमा व्यवसाय गर्दा अब कुनै असहज वातावरण भोग्नुपर्दैन”, चिनियाँ लगानीकर्तालाई ढुक्क भएर लगानी गर्न आह्वान गर्दै अधिकारीले भने । अधिकारीले चिनियाँ लगानीकर्तालाई नेपाल सरकारले कम्पनी ऐन, विषेश आर्थिक क्षेत्र तथा अन्य केही कानूनहरु संशोधन गरिसकेको तथा अन्य केही कानूनहरु संशोधन गर्ने चरणमा भएको बताउँदै सबै कानूनहरु लगानी प्रर्वद्धनमा सहयोगी रहनेमा आश्वस्त तुल्याए । कृषि, बैंकिङ, शिक्षा, स्वास्थ्य, पर्यटन तथा खनिजलगायतका क्षेत्रमा लगानीको प्रतिफल उच्च रहेको बताउँदै अधिकारीले लगानीकर्तालाई उनीहरुको लगानी सुरक्षा र व्यवसायमा सहजीकरण गर्न सबै प्रकारको सहयोगको प्रतिबद्धता जनाए । “तपाईँहरुले लगानीमात्र गर्नुहुने छैन, बरु नेपालको समृद्धिको मार्गमा सहायता गर्नुहुनेछ र आफ्नो लगानीवापत केही नाफा पनि प्राप्त गर्नुहुनेछ । तसर्थ, चिनियाँ लगानीकर्तालाई आगामी महीना नेपालमा हुने लगानी सम्मेलनमा सहभागी बन्न र नेपालमा लगानी गर्न तत्पर रहन आग्रह गर्दछु”, उनले भने । कार्यक्रममा राजदूत पौड्यालले नेपालमा बैदेशिक लगानी प्रवद्र्धनका लागि अर्को महिना लगानी सम्मेलन गर्न लागिएको बताए । नेपालमा राजनीति स्थिरता रहेको र राजनीतिक समस्याहरु प्रजातान्त्रिक तबरले सबै समस्या हल गरेको जानकारी दिँदै राजदूत पौड्यालले नेपालमा लगानीका लागि निर्णय गर्ने यो सबैभन्दा सही समय हो भने । उक्त कार्यक्रममा विभिन्न व्यावसायिक प्रतिष्ठानका प्रतिनिधिहरुले नेपालमा लगानीका अवसर, चुनौती, सरकारी तहबाट हुने सहजीकरण, कानूनी व्यवस्था लगायतका पक्षमा चासो व्यक्त गरेका थिए । उपस्थित लगानीकर्ता तथा प्राज्ञिक समुदायले चीनमा आयोजना गरिएको यस प्रकारको पूर्वतयारीको प्रशंसा गर्दै नेपालमा ठूलो मात्रामा चिनियाँ लगानी हुने बताएका छन् । रासस
५ प्रतिशत ब्याजदरमा ५ अर्बको रिपो अक्सन गर्दै नेपाल राष्ट्र बैंक
काठमाडौं । नेपाल राष्ट्र बैंकले ५ अर्ब रुपैंया बराबरको रिपो बिक्री गरी बैंकिङ तरलता प्रशोचन गर्ने भएको छ । बैंकले दुई हप्ता अवधिको उक्त रिपो बुधबार ३ बजे अक्सन गर्ने भएको हो । उक्त रिपो फागुन २९ गते परिपक्व हुनेछ । उक्त अक्सनमा ५ प्रतिशतको निश्चित ब्याजदर तोकिएको छ । नेपाल राष्ट्र बैंकले ब्याजदर करिडोर लागु गरेसँगै ५ प्रतिशतको नीतिगत दरमा रिपो बिक्री गर्न लागेको हो । नेपाल राष्ट्र बैंकले हाल ३.५ प्रतिशत न्यूनतम र ६.५ प्रतिशत अधिकतम ब्याजदर सहितको स्थिर प्रकृतिको ब्याजदर करिडोर लागु गरेको छ । माथिल्लो सीमामा राष्ट्र बैंकले स्थायी तरलता सुविधा उपलब्ध गराउँछ भने तल्लो सीमामा बजारबाट तरलता खिच्ने काम गर्छ । हाल औसत भारित अन्तरबैंक ब्याजदर ५ प्रतिशतको निन्दुबाट उकालो लागेसँगै नेपाल राष्ट्र बैंकले तरलता प्रशोचन गर्न लागेको हो ।
ब्रोकरलाई आन्दोलन नगर्न बोर्डको आग्रह
काठमाडौं । नेपाल धितोपत्र बोर्डले हालको सेयर बजारको समस्यालाई लिएर आन्दोलन नगर्न दलाल व्यवसायी(ब्रोकर) हरुलाई आग्रह गरेको छ । बोर्डले मंगलबार एक विज्ञप्ति मार्फत पूँजीबजार सम्बन्धी कार्यदलको सुझाव अनुसार नेपाल सरकार र बोर्ड समस्या समाधान गरी बजारको सुधार गर्ने क्रममा रहेकोले यस विषयमा आन्दोलन गरेर ठूलो नबनाउन व्यवसायीहरुलाई आग्रह गरेको हो । साथै, व्यवसायीहरुले गर्नेे आन्दोलनले प्रत्यक्ष रुपमा लगानीकर्ताहरुलाई असुविधा भई बजारमा थप समस्या सिर्जना हुनुका साथै राष्ट्रिय विकासको काममा समेत अवरोध हुने बोर्डले जानकारी गराएको छ । यसकारण बोर्डले सम्वन्धित पक्षहरुलाई संयमित भई आफ्नो व्यवसायिक मर्यादा कायम राखी पूँजी बजारको विकास र विस्तारमा सहयोग गर्न आग्रह गरेको छ । नियामक निकायको तर्फबाट बोर्डका अध्यक्ष रेवतबहादुर कार्कीले धितोपत्र दलाल व्यवसायीहरु प्रतिस्पर्धी हुनुपर्ने, व्यवसायको पहुँच विस्तार गर्नुपर्ने लगायतका धितोपत्र व्यवसाय तथा बजार विकास तथा विस्तारका सम्वन्धमा दिएका अभिव्यक्तिलाई अन्यथा रुपमा नलिन बोर्डले बताएको छ । बोर्डका अध्यक्ष कार्कीले गत फागुन ७ मा प्रतिनिधि सभाको अर्थ समितिले आयोजना गरेको पूँजी बजारमा देखिएको समस्या सम्वन्धी छलफल कार्यक्रममा सो कुरा बताएका थिए । देशमा आएको राजनैतिक स्थायित्वसँगै ब्रोकरसहित बजार सहभागीहरुको सहयोगमा हाल पूँजीबजारका विविध पक्षहरुको सुधार र विकास भइरहको छ । साथै, बजार सुधारको लागि थप स्वायत्तता प्रदान गरी यसको काम कारवाहीलाई थप प्रभावकारी बनाउन नेपाल सरकारले धितोपत्र सम्वन्धी ऐन, २०६३ को संशोधन प्रक्रिया अगाडि बढाइसकेको बोर्डले जनाएको छ । साथै, बोर्डले मार्जिन कारोबार सुविधा उपलब्ध गराउने कार्र्य कार्यान्वयनमा ल्याउन नेप्से र ब्रोकरलाई निर्देशन दिइएको छ । सो कार्यान्वयनमा आउन लागेको, धितोपत्र दलाल व्यवसायी संस्थालाई सुदृढ गर्दै काठमाडौं उपत्यका बाहिर ४१ स्थानमा शाखा खोल्न स्वीकृत दिइएको तथा अन्य आठ ठाँउमा शाखा खोल्न पूर्व स्वीकृति दिइएको छ । त्यस्तै, अन्य जिल्ला र स्थानहरुमा नियामक निकायहरुको संस्थागत तथा प्राविधिक क्षमता, धितोपत्र दलाल व्यवसायीको क्षमता तथा आर्थिक सक्रियताको हिसावले प्रतिस्पर्धात्मक र गुणात्मक रुपमा अगाडि बढाइरहेको छ ।ब्रोकरलाई धितोपत्र व्यापारी (डिलर) को रुपमा कार्य गर्ने सम्वन्धमा नियमावली संशोधनको प्रक्रिया अगाडि बढाई सम्वद्घ पक्षहरुको राय सुझावको लागि अनुरोध समेत गरेको बोर्डले जनाएको छ । यसरी बजारको विकास र विस्तार तथा देखिएका व्यवसायिक समस्याहरुको समाधानको लागि विभिन्न छलफलबाट त्यसलाई निराकरण गर्न बोर्ड सधै तयार रहेको विज्ञप्तिमार्फत जानकारी गराएकाे छ ।
पाकिस्तानी सीमाभित्र हवाई आक्रमण, सीमा उल्लङ्घन भयोः पाकिस्तान
इस्लामावाद । भारतीय हवाई सैन्यले भारत-पाकिस्तान सीमा (लाइन अफ कन्ट्रोल) उल्लङ्घन गरी पाकिस्तान-अधीनस्थ काश्मिर क्षेत्रमा भारतीय सैनिक विमान प्रवेश गरेको पाकिस्तानले जनाएको छ । पाकिस्तानी सेनाका प्रवक्ता मेजर जनरल असिफ गफुरले भारतीय सैनिक विमानले मङ्गलबार बिहान बिना अनुमति पाकिस्तानी सीमाभित्र आएको जानकारी दिए । उनले पाकिस्तानी सैनिक विमानले तत्काल उक्त क्षेत्रमा उडान भर्नासाथ भारतीय सैनिक विमान फर्किएको पनि बताए । उनले ट्वीट गर्दै भने-भारतीय सैनिक विमानले भाग्नेक्रममा हतारमा बालाकोट नजिक केही बम खसालेको भेटिएको छ । तर यसबाट धनजनको क्षति भएको छैन । भारत र पाकिस्तानबीच हालैका दिनमा बढिरहेको विवादका बीच मङ्गलबार बिहान यो घटना भएको पाकिस्तानी सञ्चारमाध्यमले जनाएका छन् । यही फेब्रुअरीको १४ तारिखमा भारत प्रशासित काश्मिरमा भएको आत्मघाती हमलामा कम्तीमा ४० जना सशस्त्र प्रहरीको ज्यान गएपछि यी दुई देशबीच तनाव उत्पन्न भएको छ । सो आक्रमणमा भारतले पाकिस्तानी पक्षको हात रहेको बताएको छ । तर पाकिस्तानले भने त्यो आरोपको खण्डन गर्दै आएको छ । मङ्गलबार बिहानको सो विमान पाकिस्तानको मुजफ्फरावाद क्षेत्रबाट पाकिस्तानतर्फ प्रवेश गरेको थियो । मुजफ्फरावाद पाकिस्तान प्रशासित काश्मिरमा पर्दछ । तर सो विमान प्रवेश गरेर तुरुन्तै फर्किएको र त्यसबाट कुनै पनि मानवीय या भौतिक क्षति भने नभएको पनि उनको भनाई छ । यसैबीच, भारतले काश्मिरी पृथकतावादी र अरु लडाकू लुकेर बसेको आशङ्कामा लाइन अफ कन्ट्रोल पार गरी पाकिस्तान–अधीनस्थ क्षेत्रमा हवाई कारबाही गरिएको जनाएको छ । यो हमलाबाट कैयौं आतङ्ककारी शिविरहरु ध्वस्त भएको भारतका कृषि राज्यमन्त्री गजेन्द्रसिंह सिखावतले पुष्टी गर्नुभएको छ । भारत–अधीनस्थ काश्मिरमा आत्मघाती आक्रमणमा ४० जना भारतीय अर्धसैनिक बलको मृत्यु भएपछि पहिलो पटक भारतले पाकिस्तानी क्षेत्रमा आक्रमण गरेको पनि मन्त्री सिखावतले बताए । भारत सरकारले यसअघि नै भारतीय सुरक्षाफौजमाथि आत्मघाती आक्रमण गर्नेमाथि फौजी कारबाही गर्न भारतीय सेनालाई पूर्ण अख्तियारी दिइसकेको छ । काश्मिरमा सङ्घर्सरत मौलाना अजहरको नेतृत्वमा रहेको जैस ए–मोहम्मद समूहले आत्मघाती आक्रमणको जिम्मेवारी लिएको छ । मौलाना पाकिस्तानमै रहेकाले भारतले उनलाई भारतसमक्ष सुपुर्दगी गर्न आग्रह गर्नुका साथै पाकिस्तान विरुद्ध अन्तर्राष्ट्रिय कुटनीतिक दबाब सिर्जना गरिरहेको छ । रासस/सिन्ह्वा/एएफपी
हनुमानढोका दरबार क्षेत्रको रहेको आगम्छेको पुनर्निर्माण स्थानीय समुदायमार्फत
काठमाडौं । हनुमानढोका दरबार परिसरमा रहेको आगम्छे मन्दिरको पुनर्निर्माण स्थानीय समुदायमार्फत् गरिने भएको छ । राष्ट्रिय पुनर्निर्माण प्राधिकरणको पहलमा उपभोक्ता समितिमार्फत् मन्दिरको पुनर्निर्माण कार्य अघि बढाउन जनप्रतिनिधिहरु, स्थानीय समुदाय र जापान सरकार सहमत भएका छन् । राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले लामो पहलपछि सबैपक्षबीच सहमति जुटेको भन्दै अब मन्दिरको पुनर्निर्माण कार्य अघि बढ्ने विश्वास व्यक्त गरे । उनले निर्देशक समिति, प्राविधिक समिति र उपभोक्ता समिति गठन हुने जानकारी दिँदै धार्मिक मान्यताको सम्मान एवं परम्परागत शैली, प्रविधि र स्थानीय सामग्रीको प्रयोग गरि नेपाली कालिगढले नै मन्दिर पुनर्निर्माण गर्ने बताए । संघीय संसद्का सांसद कृष्णगोपाल श्रेष्ठले दीक्षित भएकाबाहेक मन्दिरमा कोही पनि प्रवेश गर्न नमिल्ने बताउँदै मन्दिरको पुनर्निर्माणमा आर्थिक पारदर्शिता कायम गर्नु पर्नेमा जोड दिए । प्रदेशसभाका सांसद राजेश शाक्यले स्थानीय समुदायलगायत सबैको साथ लिएर आगम्छे मन्दिरको पुनर्निर्माण कार्यलाई अघि बढाउने बताए । भूकम्पपछि क्षति भएका संरचनाहरु पुनर्निर्माण गर्ने क्रममा आगम्छे मन्दिरको पुनर्निर्माणको जिम्मा जापान सरकारलाई प्रदान गरिएको थियो । यसअघि, मन्दिरको पुनर्निर्माण जाइकामार्फत गरिने भएपछि जनप्रतिनिधि, स्थानीय समुदाय लगायतले त्यसप्रति असहमति जनाएकाले पुनर्निर्माण कार्य अवरुद्ध भएको थियो ।
