बञ्चरे डाँडामा फोहर विसर्जनस्थल डिजाइनको काम सकियो, ३८ करोडमा कस्तो बन्ला ?
काठमाडौँ । शहरी विकास मन्त्रालयले बञ्चरे डाँडामा दीर्घकालीन फोहर सङ्कलन केन्द्र निर्माणका लागि डिजाइन तयारीको काम सम्पन्न गरेको छ । मन्त्रालयका प्रवक्ता कृष्णप्रसाद दवाडीका अनुसार काठमाडौँ उपत्यकाको फोहर विसर्जनस्थल निर्माणका लागि यही फागुन अन्तिम सातासम्ममा बोलपत्र आह्वान गर्ने गरी अहिले डिजाइनको काम सकिएको जानकारी दिए । बोलपत्रको समयसीमा ३५ दिनको रहने र त्यस लगतै काम शुरु हुने उनले बताए । प्रवक्ता दवाडीका अनुसार अहिलेसम्म डिजाइन र माटो परीक्षणको कामसँगै क्षेत्र निरीक्षणको काम पनि सकिएको छ । हाल फोहर व्यवस्थापन भइरहेको स्थान सिसडोलभन्दा दुई किलोमिटर पर निर्माण गर्न लागिएको दीर्घकालीन फोहर विसर्जनस्थलसम्म जान सडक विभागले बाटो निर्माणको काम गरिरहेको छ । निर्माणका लागि मन्त्रालयले ३८ करोड बजेट छुट्याएको छ । मन्त्रिपरिषद्को गत मङ्सिर १७ गतेको बैठकले सो निर्णय गरेको हो । करीब १५ मिटर अग्लो बाँध र अन्य पूर्वाधारसहितको फोहर विसर्जनस्थल निर्माण गर्ने जिम्मा सो मन्त्रालयलाई दिएएको थियो । निर्णयअनुसार बाँध निर्माणको काम शहरी विकास मन्त्रालयले गर्ने र विजर्सनस्थलसम्म जाने बाटो निर्माणको काम सडक विभागलाई दिइएको छ । तेह्र वर्षदेखि सिसडोलमा काठमाडौँ उपत्यकाका १८ स्थानीय तहको फोहर विसर्जन गरिँदै आएको छ । उपत्यकाबाट दैनिक करीब एक हजार मेट्रिक टन फोहर निस्कन्छ । काठमाडौँ उपत्यकाबाट दैनिक उत्सर्जन हुने फोहरमध्ये करीब ७५ प्रतिशत सिसडोलमा व्यवस्थापन गरिँदै आएको छ । रासस
नागबेली लघुवित्तको साधारणसभा चैत १५ गते, फागुन २९ देखि बुक क्लोज
काठमाडौं । नागबेली लघुवित्त वित्तीय संस्थाको आगामी नवौँ वार्षिक साधारणसभा चैत १५ गते बस्ने भएको छ । उक्त सभामा जाने प्रयोजनको लागि संस्थाले फागुन २९ गतेदेखि चैत १५ गतेसम्म बुक क्लोज गर्दै छ । उक्त सभाले सेयरधनीलाई गतबर्षको मुनाफाबाट हालको चुक्ता पुँजीको ९.३८ प्रतिशत बोनस र कर प्रयोजनका लागि ०.४९ प्रतिशत नगद लाभांश पारित गर्दै छ । हाल संस्थाको चुक्ता पुँजी १५ करोड ३२ लाख रुपैयाँ रहेका छ । बोनस वितरण पश्चात लघुवित्तको चुक्ता पूँजी १६ करोड ७६ लाख रुपैयाँ कायम हुनेछ । साथै, उक्त पुँजीको २५ प्रतिशत अर्थात ४ः१ को अनुपातमा हकप्रद जारी गर्ने संचालक समितिको प्रस्तावलाई साधारण सभाले पारित गर्ने भएको छ । संस्थाको सभा चैत १५ गते शुक्रबार बिहान ११ः३० बजे झापाको विर्तामोडमा अवस्थित आदर्श बैंकेटमा बस्दै छ ।
पुल्चोकमा माछापुच्छ्रे बैंकको एटिएम सञ्जाल विस्तार
काठमाडौँ । माछापुच्छ्रे बैंक लिमिटेडले ललितपुर महानगरपालिकाको पुल्चोक स्थित वडा कार्यालयमा २४ घण्टा नै रकम झिक्न सकिने एटिएमको औपचारिक सुरुवात गरेको छ । फागनु १४ गते ललितपुर महानगरपालिका स्थित ३. नं. वडा कार्यालय परिसरमा एटिएम सञ्चालनमा ल्याएको हो । २४ घण्टा नै रकम झिक्न सकिने उक्त एटिएमको ललितपुर महानगरपालिकाका मेयर चिरीबाबु महर्जनले उद्घाटन गरे । बैंकको कूल एटिएम सङ्ख्या ११५ पुगेको छ ।
कामना सेवाकोे ६८ औं शाखा जनकपुरमा
काठमाडौँ । कामना सेवा विकास बैंक लिमिटेडले धनुषा जिल्लाको जनकपुर उपमहानगरपालिका वडा नं ९ स्थित पिडारी चोकमा फागुन १४ गते ६८औं शाखा कार्यालय स्थापना गरी कारोबार शुभारम्भ गरेको छ । बैंकका संचालक बलराम बराल तथा प्रमुख कार्यकारी अधिकृत प्रविण बस्नेतले संयुक्त रुपमा कारोबार शुभारम्भ गरे । कार्यक्रममा प्रमुख कार्यकारी अधिकृत प्रविण बस्नेतले बैंकको संक्षिप्त जानकारी गराएका थिए । प्रदेश नं. २ मा योसँगै ४ वटा शाखा पुगिसकेको र व्यापार बिस्तारलाई तीव्रता दिने उद्देश्य सहित बैंकले थप शाखाहरु पनि शीघ्र सञ्चालनमा ल्याउने गरी निर्माण तथा सजावटको काम भईरहेको प्रमुख कार्यकारी अधिकृत बस्नेतले बताए ।
उपसचिव सञ्जेल भन्छन्-७० दिन मै सरुवा किन भो, अब सर्वोच्च जान्छु
काठमाडौँ । नेपाल सरकारका उपसचिव प्रेमप्रसाद सञ्जेलले आफूमाथि अन्यायपूर्ण व्यवहार गरी ईतिहासमै नभएको ७० दिने सरुवा गरिएको भन्दै त्यसको विरुद्धमा आज वा भोलिभित्रै सर्वोच्च अदालत जाने घोषणा गरेका छन् । मंगलबार रिपोर्टर्स क्लब नेपालमा पत्रकार सम्मेलन गर्दै सञ्जेलले यस्तो घोषणा गरेका हुन् । श्रम ऐन–२०७४, श्रम नियामावली-२०७५ ले निर्दिष्ट गरेको मजदुरको न्यूनतम पारिश्रमिक, महँगी भक्ता, उपचार विमा, दुर्घट्ना विमा, १० प्रतिशत सञ्जय कोष र ८.३३ प्रतिशत सामाजिक सुरक्षा कोष कट्टा नगरी श्रमिकको शोषण गर्ने उद्योगी र उनीहरुसँग साँठगाँठ गरी मजदुरको रगत कमिशन बनाएर पिउने ट्रेड युनियनका पदाधिकारीउपर कारबाही सुरु गर्दा ईतिहाँसमै कसैलाई नगरिएको ७० दिने सुरुवा गरेर हाजिर नै गर्न नदिएको र तलबसमेत रोक्का गरेपछि आफू त्यसको विरुद्धमा कानूनी उपचारको लागि अदालत जाने घोषणा गरेका हुन् । उनले भने,‘मलाई यस्तोसम्म गरेपछि बाध्य भएर जनतालाई जानकारी दिलाउने उद्देश्य र सूचनाको हकसम्बन्धी ऐन–२०६४ ले भ्रष्टाचारको विरुद्धमा सोही कार्यालयको कर्मचारीले पर्दाफास गर्नैपर्ने कानुनी दायित्व पूरा गर्नको लागि पनि मैले आज यो पत्रकार सम्मेलन गरेको हुँ ।’ निजामति सेवा ऐन–२०४९ को दफा (१८) को उपदफा (३) को खण्ड (ख) अनुसार आफूलाई मोरङमा दुई वर्ष काम गर्न दिनुपर्ने व्यवस्थाको उल्लंघन गर्दै ७० दिनमा सरुवा गर्ने श्रम, रोजगार तथा सामाजिक सुरक्षा मन्त्रालयका सचिव महेशप्रसाद दाहाल उपर सोही ऐनको उपदफा (१२) बमोजिम विभागीय कारबाही गर्नुपर्ने समेत सञ्जेलले माग गरेका छन् । उनले भने,‘मलाई गरिएको सरुवा नै गैरकानूनी छ । सो सरुवा बदर गरि पाउँ भनेर मैले तीन पटक आधिकारिक निकाय सामान्य प्रशासन मन्त्रालयमा लिखित अनुरोध गरिसकेको छु । यो कुरा मैले खुद प्रधानमन्त्रीलाई समेत जानकारी दिएको छु । तर, आज ६५ दिन बित्दासमेत अहिलेसम्म यसबारेमा कुनै सुुनुवाई भएको छैन् ।’ आफूमाथि सरकारले नै अन्यायपूर्ण व्यवहार गरेको पनि उनले आरोप लगाए । उनले थपे,‘ममाथि गरिएको अन्यायपूर्ण व्यवहारको विरुद्धमा म आज वा भोलिभित्रै सर्वोच्च अदालत जान्छु ।’ उत्प्रेषणको आदेशद्वारा आफूलाई गरिएको सरुवा बदर गरी सचिव महेशप्रसाद दाहाललाई विभागीय कारबाही गर्नु÷गराउनु भन्ने परमादेशको आदेशसमेत नेपाल सरकार, मन्त्रिपरिषद् समेतको नाममा जारी गरी पाउँ भन्ने आफ्नो मूल माग÷दाबी रहेको पनि उनले बताए । उनले नेपालमा भ्रष्टाचारले पछिल्लो संस्थागत रुप लिएको दाबी गरेका छन् । उनले भने,‘पछिल्लो समय हाम्रो देशमा भ्रष्टाचारले सस्थागत रुप लिईसकेको छ । अब देशको भविष्यको लागि पनि भ्रष्टाचार ठूलो चूनौति भयो । यसलाई अहिले नै हामीले न्यूनिकरणको प्रयास गरेनौं भने हाम्रो देश असफल राष्ट्र हुन्छ । यो कुरा म अहिल्यै नै ठोकुवा गर्न सक्छु ।’
समायोजन रोजेका एक हजार ७५५ उपसचिवलाई पत्र दिइँदै
काठमाडौँ । समायोजन रोजेका उपसचिवलाई सरकारले आज पत्र दिइने भएको छ । सङ्घ, प्रदेश र स्थानीय तहमा समायोजन रोजेका एक हजार ७५५ उपसचिवलाई आज समायोजनको पत्र दिइन थालिएको सङ्घीय मामिला तथा सामान्य प्रशासन मन्त्रालयका प्रवक्ता सुरेश अधिकारीले जानकारी दिए । उनका अनुसार सङ्घमा एक हजार ५१३, प्रदेशमा २३७ र स्थानीय तहमा पाँच रहेका छन् । ती कर्मचारीलाई मन्त्रालयका सहसचिव रुद्रसिंह तामाङले समायोजनको पत्र दिनेछन् । यसअघि मन्त्रालयले सचिव र सहसचिवलाई समायोजनको पत्र दिइसकेको छ । यसैगरी मन्त्रालयले अहिलेसम्म ३८ हजार ८१७ कर्मचारीलाई समायोजन गरेको छ । तीमध्ये सङ्घमा २८ हजार २५, प्रदेशमा चार हजार ८४६ र स्थानीय तहमा पाँच हजार ८३५ छन् । प्रवक्ता अधिकारीले प्राविधिकतर्फका शाखा अधिकृत र स्वास्थ्य सेवा समूहका बाहेक अरु सबैको समायोजन क्रमशः हुँदै गइरहेको बताए । यसैगरी चार हजार ७९३ शाखा अधिकृतको समायोजन गरिएको छ । तीमध्ये सङ्घमा तीन हजार ६४२, प्रदेशमा ५९३ र स्थानीय तहमा ५५८ रहेका छन् । समायोजन रोजेका शाखा अधिकृतलाई यही हप्ता समायोजनका पत्र दिइने प्रवक्ता अधिकारीले बताए । पत्र पाइसकेपछि कर्मचारी समायोजन रोजेको ठाउँमा जानुपर्ने उहाँले बताउनुभयो । करीब ८७ कर्मचारीमध्ये ७७ हजारले समायोजन रोजेका थिए । सरकारले सङ्घमा ४७ हजार ९२०, प्रदेशमा २२ हजार ७५५ र स्थानीय तहमा ६७ हजार ५०३ कर्मचारी समायोजन गर्दैछ । रासस
नबिल बैंकको सेयर ११६ रुपैयाँले घट्यो, आज किन्नेले ३४ प्रतिशत लाभांश नपाउने
काठमाडौं । मंगलबार नबिल बैंकको सेयर मूल्य प्रतिकित्ता ११६ रुपैयाँले घटेको छ । सोमबार प्रतिकित्ता ७९४ रुपैयाँमा कारोबार बन्द भएको यस बैंकको सेयर मंगलबार प्रतिकित्ता ६७८ रुपैयाँमा झरेको छ । बैंकले गत वर्षको नाफा वितरणका लागि आज(मंगलबार)बाट बुक क्लोज गरेको छ । आज सेयर किन्नले गत वर्षको नाफाबाट बैंकले दिन लागेको १२ प्रतिशत बोनस र २२ प्रतिशत नगद गरी ३४ प्रतिशत लाभांश पाउने छैनन् । १२ प्रतिशत बोनस सेयरपछि नेप्सेले मूल्य समायोजन गरि यस बैंकको सेयर प्रतिकित्ता ७०८ रुपैयाँ तोकेको छ । जसको आधार मूल्य प्रतिकित्ता ११२१ रुपैयाँ रहेको थियो । त्यस्तै, नबिल बैंकको संस्थापक सेयरको मूल्य समायोजन भएर ६७० रुपैयाँ तोकिएको छ । सोमबार उक्त सेयरको मूल्य प्रतिकित्ता ७५० रुपैयाँ रहेको थियो ।
निर्जीवन बीमा कम्पनीले गरे ३० अर्ब लगानी, कुन कम्पनीको कति ?
काठमाडौ । चालु आर्थिक वर्षको ६ महिनामा निर्जीवन बीमा कम्पनीले ३० अर्ब २० करोड ३४ लाख ५ हजार रुपैयाँ बराबरको लगानी गरेका छन् । बीमा सम्बन्धी विद्यमान कानून अनुसार निर्जीवन बीमा कम्पनीहरुले क वर्गको लगानी अन्र्तगत सरकारी ऋणपत्रमा कम्तीमा २० प्रतिशत लगानी गर्नुपर्ने व्यवस्था गरिएको छ । त्यस्तै, ख वर्गको लगानी अन्र्तगत बाणिज्य बैकको मुद्दती खातामा कम्तीमा ३५ प्रतिशत, विकास बैकको मुद्दती खातामा बढीमा १५ प्रतिशत र सामूहिक लगानी कोषहरुमा बढीमा ५ प्रतिशत समेत गरी क र ख वर्गको लगानी कम्तीमा ६५ प्रतिशत लगानी गर्नुपर्ने प्रावधान छ । ग वर्गको लगानी अन्तर्गत भने बाणीज्य बैक, विकास बैक तथा वित्त कम्पनीहरुको अग्राधिकार सेयर वा ऋणपत्रमा बढीमा १० प्रतिशत तथा कुनैपनि पब्लिक कम्पनीको सेयर बढीमा १० प्रतिशत, उत्पादनशील वा राष्ट्रिय महत्वका क्षेत्रमा ५ प्रतिशत लगानी गर्नु पर्ने व्यवस्था छ । हालसम्म निर्जीवन कम्पनीको संख्या २० रहेको छ । कुन कम्पनीको लगानी कति ? नेपाल ईन्स्योरेन्स कम्पनीले लिमिटेडले चालु आर्थिक बर्षको पुस मसान्तसम्ममा १ अर्ब ६२ करोड ५६ लाख २७ हजार रुपैयाँ लगानी गरेको छ । द ओरेन्टल ईन्स्योरेन्स कम्पनी लिमिटेडले १ अर्ब ८२ करोड ६४ लाख ११ हजार रुपैया लगानी गरेको छ भने नेशनल ईन्स्योरेन्स कम्पनी लिमिटेडले १ अर्ब ७९ करोड ६४ लाख ५७ हजार रुपैयाँ लगानी गरेको छ । यता, हिमालयन जेनेरल ईन्स्योरेन्स कम्पनी लिमिटेडले १ अर्ब ८५ करोड ५० लाख ३६ हजार रुपैयाँको लगानी गर्दा यूनाईटेड ईन्स्योरेन्स कम्पनी नेपालले ६९ करोड ४६ लाख ३८ हजार रुपैयाँको लगानी गरेको छ । यसैगरी प्रिमियर ईन्स्योरेन्स कम्पनी(नेपाल) लिमिटेडले २ अर्ब २३ करोड ६१ लाख ८८ हजार रुपैयाँ लगानी गरेको छ भने एभरेष्ट ईन्स्योरेन्स कम्पनी लिमिटेडले ५३ करोड ६ लाख ९५ हजार रुपैयाँको लगानी गरेको छ । यस्तै नेको ईन्स्योरेन्स लिमिटेडले २ अर्ब ६६ करोड ६७ लाख ३२ हजार रुपैयाँको लगानी गर्दा सगरमाथा ईन्स्योरेन्स कम्पनी लिमिटेडले २ अर्ब ५ करोड ७६ लाख ५७ हजार रुपैयाँ लगानी गरेको छ । त्यसैगरी, प्रभु ईन्स्योरेन्स कम्पनी लिमिटेडले १ अर्ब ३० करोड ५५ लाख ६६ हजार रुपैयाँ लगानी गरेको छ भने आईएमई ईन्स्योरेन्स कम्पनी लिमिटेडले १ अर्ब ४ करोड ७७ लाख ६८ हजार रुपैयाँ लगानी गरेको छ । प्रुडेन्सियल ईन्स्योरेन्स कम्पनी लिमिटेडले १ अर्ब ४७ करोड ३१ लाख २५ हजार रुपैया लगानी गर्दा शिखर ईन्स्योरेन्स कम्पनी लिमिटेडको लगानीको हिस्सा २ अर्ब ८० करोड ५७ लाख ९४ हजार रुपैयाँ रहेको छ । बीमा समितिले उपलब्ध गराएको तथ्याङ्क अनुसार लुम्बिनी ईन्स्योरेन्स कम्पनी लिमिटेडले १ अर्ब ८४ करोड ४४ लाख ६३ हजार रुपैयाको लगानी गरेको छ भने एनएलजि ईन्स्योरेन्स कम्पनी लिमिटेडले २ अर्ब १० करोड ४७ लाख ११ हजार रुपैयाँ लगानी गरेको छ । यसैगरी सिद्धार्थ ईन्स्योरेन्स लिमिटेडले २ अर्ब १५ करोड ८० लाख ८० हजार रुपैयाको लगानी गर्दा सानिमा ईन्स्योरेन्स कम्पनीले ६५ करोड ६५ लाख रुपैयाँ लगानी गरेको छ । त्यसैगरी जेनेरल ईन्स्योरेन्स कम्पनीले ७६ करोड ६० लाख रुपैया, अजोड ईन्स्योरेन्स कम्पनीले ७५ करोड १९ लाख ४७ हजार रुपैयाँ लगानी गरेको छ भने राष्ट्रिय बीमा कम्पनीले गरेको लगानी भने बीमा समितिको तथ्याङ्क सूचीमा देखिदैन ।
