प्रभु बैंकले रुकुममा शुरु गर्यो एटिएम सेवा, स्थानीयवासी खुशी
रुकुम । रुकुम जिल्लामै पहिलो पटक एटिएम सेवा सञ्चालनमा ल्याइएको छ । प्रभु बैंकको शाखाले रुकुमकोटमा एटिएम सेवा सञ्चालनमा ल्याएको हो । एटिएम सेवा सञ्चालनमा आएसँगै स्थानीय नागरिक खुशी भएका छन् । आवश्यक परेको खण्डमा जतिखेर पनी एटिएममार्फत पैसा निकाल्न सकिने भएकाले कारोवारमा सहज हुने स्थानीयवासी सुस्मिता कार्कीले बताइन् । बैंकले एटिएम सेवा सञ्चालनमा नल्याउँदासम्म कार्यालय समयमा मात्र सेवाग्राहीलाई सेवा दिने गरेकामा अब भने सेवाग्रहीलाई आवश्यक परेको खण्डमा शनिबारलगायत अन्य जुनसुकै समयमा पनी सेवासुविधा दिने शाखा प्रबन्धक भानु गौतमले बताए । यहाँका नागरिकको समस्या, आवश्यकता र मागलाई ध्यानमा राखी एटिएम सेवा सञ्चालनमा ल्याइएको उनको भनाइ छ । विसं २०७३ मङ्सिर १७ गतेबाट रुकुमकोटमा आफ्नो सेवा सञ्चालन गरेको बैंकको शाखाले दुई वर्षपछि एटिएम सेवा सञ्चालनमा ल्याएको हो ।
सामाजिक सञ्जालबाट हिंसात्मक दृश्य देखाइए जेल, पारित भयो कानून
क्यानबेरा । अस्ट्रेलियाको संसदले बिहीबार न्यूजील्यान्ड गोलीकाण्डको झैं सामाजिक सञ्जालमा वास्तविक हिंसात्मक घटनाहरु राखिए त्यस्ता सामाजिक सञ्जालका सञ्चालकलाई पक्राउ गरी जेलमा राख्न सकिने कानून पारित गरेको छ । लोकतान्त्रिक मुलुक अस्ट्रेलियामै अनलाइन सञ्चारका बारेमा कठोर कानुन पारित गरिएको भन्दै यसको आलोचना पनि हुन थालेको छ । आलोचकहरुले नयाँ कानुनका कारण अस्ट्रेलियामा मिडियामा सेन्सरसीप बढ्ने र लगानी पनि घट्ने दाबी गरेका छन् । न्यूजील्यान्डको क्राइस्टचर्चमा गत मार्च १५ मा मुस्लिम समुदायको मस्जिदमा भएको गोलीकाण्डको भिडियो फेसबुक लगायतका सामाजिक सञ्जालबाट प्रत्यक्ष प्रशारण गरिएपछि अस्ट्रेलिया सरकारले नयाँ कठोर विधेयक संसदमा प्रस्तुत गरेको थियो । उक्त भिडियोमा एकजना अस्ट्रेलियाली बन्दुकधारीले आफूले लगाएको हेल्मेटमा क्यामरा जडान गरी आफूले गरेको नरसंहार फेसबुकबाट प्रत्यक्ष प्रशारण गरेका थिए । आगामी मे महिनामा संसदको निर्वाचन हुने भएकाले पनि हतारमा नयाँ विधेयक संसदबाट पारित गरिएको हो । “कुनै पनि व्यक्तिले आफ्ना हिंसात्मक गतिविधि र प्रपोगान्डा सामग्री फैल्याउन अनलाइन माध्यमको प्रयोग गर्न नपाउन् भनेर यो विधेयक ल्याउनु परेको हो । गलत कार्यका लागि कुनै पनि किसिमका अनलाइन माध्यमलाई हतियारका रुपमा प्रयोग गर्न पाइन्न,” अस्ट्रेलियाका महान्यायाधीवक्ता क्रिस्टियन पोर्टरले बताए । विपक्षी लेबर पार्टीका प्रवक्ता मार्क ड्रेफसले विधेयकमा केही संदेह रहेपनि विधेयकमा सहमति जनाइएको बताउनुभयो । यदि आगामी निर्वाचनमा लेबर पार्टी विजयी भएमा विधेयकमा देखिएका कतिपय विवादास्पद कुरालाई सच्याइने उनले स्पष्ट पारे । नयाँ विधेयकमा सामाजिक सञ्जालका अनलाइन माध्यमहरुले कुनै पनि “विभत्स हिंसात्मक सामग्री” तत्काल नहटाएमा त्यसलाई फौजदारी अभियोगमा कारबाही गरिने व्यवस्था गरिएको छ । विधेयकमा दोषी ठहरिएका व्यक्तिलाई तीन वर्षको जेल सजायका साथै ७५ लाख अमेरिकी डलर वा त्यस्ता अनलाइन वा सामाजिक सञ्जालको वार्षिका कारोबारको १० प्रतिशतमध्ये जुन बढी हुन्छ त्यति क्षतिपूर्ति तिर्नु पर्नेछ । विभत्स हिंसात्मक सामग्रीभित्र आतङ्कवाद, हत्या, हत्याको योजना, यातना, बलात्कार र अपहरणलाई समेटिएको छ । साथै विश्वका जुनसुकै स्थानबाट सञ्चालित अनलाइन माध्यमले अस्ट्रेलियामा हुने विभत्स हिंसात्मक अपराधको प्रशारण गरेमा अस्ट्रेलियाली संघीय प्रहरीलाई जानकारी गराउनु पर्नेछ । तर अस्ट्रेलिया प्रहरीलाई त्यस्ता हिंसात्मक विवरण जानकारी नगराउने सामाजिक सञ्जालका प्लेटफर्ममाथि पनि करिब ६ लाख अमेरिकी डलर क्षतिपूर्ति भराइनेछ । रासस/एपी
साझाले थप २० नयाँ शहरी बस ल्याउँदै, रक्सौल आइपुगे नयाँ बस
काठमाडौँ । साझा यातायातले काठमाडौँ उपत्यकामा २० वटा नयाँ शहरी (सिटी) बस थपेको छ । केही महिना पहिले बस खरिदका लागि भएको ठेक्का सम्झौताबमोजिम छिमेकी भारतबाट ती बस मगाइएको हो । साझाका प्रबन्धक महेन्द्रराज पाण्डेयले काठमाडौँ महानगरपालिका र ललितपुर महानगरपालिकाले संस्थाको शेयर खरीद गरेबापत प्राप्त रकमबाट नयाँ बस खरिद भएकोे हो । उनले भने, “अहिले ती नयाँ बस रक्सौलमा आइपुगेको छ । भन्सार प्रक्रिया पूरा गरेर अब केही समयभित्रै काठमाडौँ आइपुग्नेछ ।” बस काठमाडौँ आइपुगे पछि उपत्यकामा माग भएका ठाउँ र आवश्यकता हेरेर सरकारसँग रुट माग गरिने उनले जानकारी दिए । काठमाडौँ महानगरपालिकाले रु पाँच करोड र ललितपुर महानगरपालिकाले रु एक करोड शेयर खरिद गरेका छन् । विसं २०१९ मा बस सेवा शुरु गरेको साझा पहिले लोकप्रिय सार्वजनिक सवारी थियो । विभिन्न समस्याका कारण दुई दशकसम्म साझाका सेवा ठप्प भयो । विसं २०७० वैशाखदेखि साझाले नयाँ बस खरिद गरेर पुनः सेवा सञ्चालन गरेको थियो । पहिले उपत्यकाको शहरी क्षेत्रमा सीमित साझाका बस अहिले काठमाडौँ उपत्यकाका ग्रामीण क्षेत्रसम्म फैलिएको छ । साझा यातायातले उपत्यकाका स्थानीय तहसँगको समन्वयमा बस खरीद गरेर सेवा फैलाइरहेको जनाएको छ । साझा यातायातले गत वर्षदेखि ज्येष्ठ नागरिक र अपाङ्गता भएका व्यक्तिलाई लक्षित गरेर ‘सेमी लो स्टेप बस’ समेत सञ्चालनमा छ । साझाले काठमाडौँदेखि बागलुङ र काठमाडौँदेखि कुश्मासम्मको लामो दूरीका दुईदुई बस समेत सञ्चालन गरिरहेको छ ।
साताको अन्तिम दिन झिनो अंकले घट्यो नेप्से, ४२ करोडको कारोबार
काठमाडौ । साताको अन्तिम दिन बिहीबार नेपाल स्टक एक्सचेञ्ज (नेप्से) परिसूचक झिनो अंकले घटेको छ । नेप्से परिसूचक ०.६४ अंकले घटेको हो । साताको पहिलो दिन आइतबार झिनो अंकले घटेको नेप्से परिसूचक बाँकी ३ दिन बढेपनि अन्तिम दिन पुनः ओरोलो झरेको हो । बिहीबार ०.०५ प्रतिशतले घट्दा नेप्से परिसूचक ११६५.२० बिन्दुमा पुगेको छ । नेपाल स्टक एक्सचेञ्जका अनुसार सेयर बजारमा १७२ कम्पनीले सेयर कारोबार गरेका छन् । १७ लाख ६९ हजार ७ सय कित्ता सेयर खरिद बिक्री हुँदा ४२ करोड ३४ लाख ९२ हजार ६ सय ६३ रुपैयाँको कारोबार भएको छ । बजार बढेपनि नेप्सको ४ समूह मात्र हरिया भए भने अन्य सूचक राताम्मे भए । बैंक समूह ०.९५, वित्त समूह ०.५१, निर्जीवन बीमा समूह १.०५, उत्पादनमूलक समूह ६.०५ अंकले बढेको छ । होटल समूह २३.४८, विकास बैक ४.५९, जलविद्युत समूह ०.८३, अन्य समूह ०.३४, माईक्रोफाईनान्स समूह ८.७७ र जीवन बीमा समूह २०.०८ अंकले घटेका छन् । साताको अन्तिम दिन बिहीबार सिन्धु विकास बैंकका लगानीकर्ताले ५.१९ प्रतिशतले सबैभन्दा धेरै नाफा आर्जन गरेका छन् भने यूनिर्भसल पावर कम्पनी लिमिटेडका लगानीकर्ताले ९.२४ प्रतिशतले सबैभन्दा धेरै घाटा व्यहोरेका छन् ।
कामना सेवाको ८१औंं शाखा मोरङको विराटचोकमा
काठमाडौं । कामना सेवा विकास बैंकले मोरङको विराटचोकमा नयाँ शाखा विस्तार गरेको छ । मोरङ जिल्लाको सुन्दर हरैचा नगरपालिकाको वडा नं १२, विराटचोकमा आफ्नो ८१औंशाखा कार्यालय स्थापना गरि कारोबार शुभारम्भ गरेको हाे । बैंकका संचालक बलराम बराल र प्रमुख कार्यकारी अधिकृत प्रविण बस्नेतको उपस्थितिमा उक्त शाखाले कारोबार शुरु गरेका हुन्र । प्रमुख कार्यकारी अधिकृत बस्नेतले उक्त शाखाको उद्घाटन कार्यक्रममा बैंकको कम शाखा सञ्जाल भएको पूर्वी नेपालमा व्यापार प्रवर्धनलाई अझ तीव्रताका साथ अघि बढाउन वृहत शाखा विस्तार गरेको तथा बैंकको भावी रणनीतिर कार्यक्रमहरुको बारेमा जानकारी दिएको छ । देशका विभिन्न भागहरुमा ८०वटा शाखा तथा ३५ वटा एटिएम मार्फत ग्राहकहरुलाई आफ्नो सेवाहरु प्रदान गर्दै आएको छ । साथै, बैंकले एविविएस्, इन्टरनेट व्याकिङ्ग, मोबाइल व्याकिङ्ग, सि एएस्विए लगायतका माध्यमबाट समेत सम्पूर्ण बैंकिंग सेवाहरु उपलब्ध गराउंदै आएको छ ।
हावाहुरी पीडितलाई स्वावलम्बन लघुवित्तको ४ लाख ६० हजार नगद सहयोग
काठमाडौँ । स्वावलम्बन लघुवत्ति वित्तीय संस्था लि.ले बारा जिल्ला स्थित फेटा गाउँपालिकाको पुरैनिया र भर्वलिया तथा प्रसौनी गाउँपालिकाको खुटुवा जब्दी गाउँमा आएको विनासकारी हावाहुरी पीडित घरपरिवारलाई रु.४ लाख ६० हजार नगद सहयोग गरेको छ । संस्थाले हावाहुरीका पिडितलाई पहिचान गरी थप राहत तथा सहयोग गर्ने बताएको छ । वित्तीय संस्थाले हावाहुरीबाट घर भत्किएर हाल सार्वजनिक स्थानमा बस्दै आएका, घरमा रहेको खाद्यान्न तथा लत्ता, कपडा साथै पशुपंक्षीको समेत नोक्सान भएको प्रारम्भिक तथ्यांकको आधारमा शाखा कार्यालय कलैया, बारा मार्फत उक्त रकम उपलब्ध गराएको हो । संस्थाले संस्थागत सामाजिक उत्तरदायित्व अन्तरगत विभिन्न समयमा आउने प्राकृतिक प्रकोपबाट पिडित घरपरिवारलाई पटक पटक राहत तथा विभिन्न सहयोग कार्यक्रम निरन्तर रुपमा गर्दै आएको प्रबन्धक राजेन्द्र धितालले बताए ।
एसईईपछिका फुर्सदिला विद्यार्थीका लागि ब्रिजकोर्स, आवश्यकता कि फेशन ?
फाइल तस्बिर काठमाडौं । प्रदेश २ बाहेकका अन्य सबै प्रदेशमा एसईईको परीक्षा भर्खरै सकिएको छ । परीक्षा सकिएसँगै ४ लाख भन्दा बढी विद्यार्थी ३ महिनाको लागि फुर्सदिला भएका छन् । परीक्षा सकिएको र परीक्षाको नतिजा आउने समयसम्म फुर्सदिला भएका विद्यार्थीहरुले ब्रिजकोर्स गर्ने योजना बनाइरहेका छन् । कोही साथीको लहैलहैमा त कोही केही सिक्ने आशयको साथ ब्रिजकोर्स कक्षा लिने तयारी गर्दैछन् । परीक्षा र नतिजाबीचको तीन महिना समयको सदुपयोग कसरी गर्ने भन्ने कुरामा अझै पनि धेरै जना अन्योल मै देखिन्छन् । ब्रिजकोर्स नगर्दा आगामी पढाई पो बिग्रिने हो कि भन्ने डर धेरै विद्यार्थीहरुमा छ, यसकारण ईच्छा नभए पनि उनिहरु ब्रिजकोर्स कक्षाहरु लिने गर्छन् । ब्रिज कोर्सलाई आवश्यकता भन्ने कि फेशन, यसबारेमा विभिन्न व्यक्तित्वहरुको मत फरक फरक रहेको छ । के भन्छन् ब्रिजकोर्स संचालकहरु ? ब्रिजकोर्स गर्नु महत्वपूर्ण छ कि छैन, यो विद्यार्थीले छनोट गर्ने बिषयको आधारमा निर्धारण हुन्छ । विभिन्न बिषयमा ब्रिजकोर्स कक्षाहरु संचालन हुने गर्दछन्, जस्तै विज्ञान संकाय, मानविक संकाय र प्राविधिक संकाय । सिटिइभिटी जस्तो प्राविधिक शिक्षा लिनेका लागि भने ब्रिजकोर्स पढ्नु एकदमै आवश्यक रहेको व्हाईट हाउसका प्रमुख कार्यकारी अध्यक्ष रोशन ओझा बताउँछन् । सिटिइभिटीका कलेजहरुमा ४० जनाको लागि मात्र सिट हुने भएकोले पनि ब्रिजकोर्सको आवश्यक रहेको उनी बताउँछन् । त्यस्तै स्टाफ नर्स अध्ययन गर्ने विद्यार्थीहरुले पनि ब्रिजकोर्स अध्ययन गर्न जरुरी छ। कक्षा १० र कक्षा ११ को पाठ्यक्रम हेर्ने हो भने कक्षा ११ मा ५० प्रतिशत नयाँ कोर्स रहेका छन् । कक्षा ११ का कक्षाहरु ६–७ महिनामात्र संचालन हुने र यो समयमा धेरै विद्यार्थीलाई कसरी पास हुने भन्ने कुराले पिरोल्ने भएर पनि अध्ययनलाई सजिलो बनाउन ब्रिजकोर्सको आवश्यक रहेको ओझाको भनाइ छ । फाइल तस्बिर परीक्षा र नतिजाबीचको तीन महिनाको समय हरेक विद्यार्थीको लागि सुनौलो अवसर भएको उनी बताउँछन् । एसईईपछिको खाली समयलाई विद्यार्थीहरुले खेलेरै कटाइरहेका हुन्छन् तर त्यही समयलाई विद्यार्थीहरुले सदुपयोग गर्न सके उनीहरुको भविष्यमा धेरै ठूलो परिवर्तन आउन सक्छ। यसको लागि ब्रिजकोर्स नै गर्नु पर्छ भन्ने नभएको र यस समयमा विद्यार्थीहरुले आफ्नो रुचीको बिषयहरुमा तालिम पनि लिन सक्ने ओझाले बताए। अभिभावक र विधार्थीहरु यसो भन्छन् ? बानेश्वरमा बस्दै आएकी मिना डंगोल भर्खरै एसईई दिएर बसेको छोरालाई केही सिपको कुरा सिकाउने बताउँछिन् । उनलाई लाग्छ यो समय पाठ्यक्रम अध्ययनको भन्दा पनि आफ्नो भित्री लुकेर बसेको क्षमतालाई अध्ययन गर्ने समय हो । त्यस्तै, धोविघाटमा बस्दै आएकी पुष्पा थापाले आफ्नो छोरालाई एसईई पछी कुनै पार्ट टाइम काममा लगाउने बिचार गरेकी छिन् । उनी आफ्नो छोराले काम, पैसा र समयको महत्व बुझोस् भन्ने चाहन्छिन् । समयसँगै धेरै अभिभावकहरु ब्रिज कोर्स जानै पर्छ भन्ने मान्यता राख्दैनन् । काठमाडौंमै जन्मिएर हुर्किएका, भर्खर एसईई परीक्षा सकाएका चिराग लिम्बुले भने यो खाली समयमा आफ्नो पुर्ख्यौली घर तेह्रथुम जाने विचार गरेका छन् । आफुले यस ३ महिनाको बिदामा आफ्नो ठाउँ, संस्कृतिको बारेमा बुझ्ने उनको योजना छ। त्यस्तै, कक्षा ११ मा अध्ययनरत समीक्षा गिरी भने ब्रिजकोर्स कक्षाले आफुलाई धेरै सहयोग गरेको बताउँछिन् । युनाईटेड कलेजमा विज्ञान बिषय पढिरहेकी उनी कक्षा ११ मा आउँदा ब्रिजकोर्स कक्षाले गर्दा अरुले भनेको जस्तो धेरै बोझ महसुस नगरेको बताउँछिन् । के ब्रिजकोर्स जरुरी हो ? जीवन एउटा निरन्तर सिकाईको प्रकृया हो । पढ्ने र सिक्ने कुरा कहिले पनि सकिदैन । त्यसैले पनि ३ महिनामा ब्रिजकोर्स कक्षा गएर त्यही पाठ्यक्रमको बिषयलाई निरन्तर अध्ययन गर्नुभन्दा पनि विद्यार्थीले आफ्नो रुचीको क्षेत्रमा संलग्न हुँदा यो समय अझ बढी अर्थपूर्ण हुन्छ । यसको मतलब पढेको कुरा पनि बिर्सिने गरी अन्य कुरामा ध्यान दिनु पर्छ भन्ने होइन । यो अवधिमा पढाईमा खासै समस्या नभएका विद्यार्थीले दिनको १-२ घण्टा पढाईमा खर्चन सक्छन् । त्यस्तै पढाईमा कमजोर बिधार्थीले बिहान २ घण्टा र साँझ २ घण्टा आफुलाई बिषयगत अध्ययनमा संलग्न गराए पढाई पछि गएर बोझ बन्ने सम्भावना घटेर जान्छ । किशोर अवस्थामा विद्यार्थीहरु आफुलाई नआएको कुराहरु कक्षामा सोध्न अफ्ठयारो मान्छन् र आफुलाई अरुले के भन्ला भन्ने कुराले पनि उनीहरु पछाडि पर्ने गर्छन् । उनीहरुलाई नजानेको कुरा सोध्न कहिले पनि लाज मानु हुँदैन भन्ने कुरा कसैले सिकाएको हुँदैन । समाजले जहिले पनि अरुलाई जित्नुपर्छ मात्र भन्छ, तर आफुले आफुलाई जित्नुपर्छ भन्ने कुरा कहिले पनि सिकाउँदैन। परीक्षामा राम्रो नम्बर/श्रेणी ल्याउनुपर्छ भन्ने छाप हरेक विद्यार्थीको दिमागमा परेको हुन्छ। जिन्दगी सर्टिफिकेटको मार्क्सको भरमा चल्छ भन्ने गलत धारणाबाट हरेक मानिस माथि उठ्न जरुरी छ। त्यसैले एसईई दिएर बसेका भाई बहिनीहरुले अति आवश्यक छ भने मात्र ब्रिजकोर्स कक्षा लिनुहोस् नभए अन्य नयाँ गतिविधीमा संलग्न भई आफुलाई व्यावहारिक रुपले निखार्ने प्रयास गर्नुहोस्।
अल्फा बिटामा ब्रिज कोर्सको तयारी, चैत २४ देखि कक्षा सञ्चालन
काठमाडौँ । नयाँ बानेश्वर स्थित अल्फा बिटाले यसवर्षको पनि ब्रिज कोर्स सञ्चालन गर्दैछ । एसईई दिएर बसेका विधार्थीहरुको लागि चैत २४ गतेदेखि ब्रिज कोर्स सञ्चालन हुने अल्फा बिटाका प्रेसिडेन्ट तथा सिइओ द्विराज शर्माले बताए । साइन्स, म्यानेजमेन्ट, नर्सिङ्ग तथा ए–लेभलका ब्रिज कोर्स कक्षाहरु सञ्चालन हुने प्रेसिडेन्ट तथा सिइओ शर्माले बताए । ब्रिज कोर्समा विभिन्न क्षेत्रमा सफल व्यक्तित्वहरुद्वारा करियर काउन्सिलिङ्ग गरिने छ । यसका साथै अल्फा बिटाले हरेक वर्ष ब्रिज कोर्समा विभिन्न अतिरिक्त क्रियाकलाप तथा व्यावहारिक कक्षाहरुमा ध्यान दिने गरेको जानकारी शमाले जानकारी दिए । गत वर्ष अल्फा बिटाबाट ब्रिज कोर्स कक्षा पढेर सेन्ट जेभियर्स गोदावारीमा नाम निकाल्न सफल आर्शिवाद झाका अभिभावकले भने–’ब्रिजकोर्स सुरु गर्नु अघि र पछिमा मैले आफ्नो बाबुमा धेरै भिन्नता पाएँ । पहिले राम्रो पढ्नुपर्छ, मेहेनत गर्नुपर्छ भन्ने भावना त थियो, तर कसरी राम्रो भन्ने हामीलाई पनि खासै थाहा थिएन ।’ अल्फा बिटामा ब्रिज कोर्स गर्दा, विभिन्न व्यक्तित्वहरुको अनुभव र भोगाई सुन्दा, नेपालका विभिन्न ठाउँहरुबाट आएका विद्यार्थीहरुसँग भेट्दा तथा व्यावहारिक शिक्षाले उत्प्रेरित भएर आफ्नो बाबुमा सकारात्मक सोचको विकास भएको पाएँ–ती अभिभावनले भने । अल्फा बिटा ब्रिज कोर्सबारे बताउँदै शर्माले भने-“अल्फा बिटा ब्रिज कोर्सभनको उत्कृष्ट तयारी कक्षा, सेन्ट जेभियर्स, बुढानिलकण्ठ, एसओएस, ट्रिनिटी, हिमालयन ह्वाईट जस्ता कलेजको नमुना प्रश्नहरुमा आधारित साप्ताहिक परीक्षाका साथै आफ्नो अतिरिक्त क्रियाकलापमा रहेको प्रतिभा प्रस्तुत गर्ने प्लेटफार्म हो । साप्ताहिक परीक्षा, अतिरिक्त क्रियाकलाप, कलेज भ्रमण, अन्तक्रिया र रोबोट, रोबोटिक्सको बारेमा शिक्षा,आत्मनिर्भर हुने गतिविधिहरु जस्तै सामाजिक बोल, व्यक्तित्व विकास र विभिन्न सफल व्यक्तित्वहरुसँगको अन्तरक्रियाले गर्दा यो १० हप्ताको समयमा विद्यार्थीले नौलो एक्सपोजर पाउने कुरा शर्माले जानकारी गराए ।
