वित्त : विविध

काठमाडौं । सिटिजन्स क्यापिटल लिमिटेडद्वारा प्रवर्द्धन गरिएको सिटिजन्स सन्तुलित योजनाको इकाइ बाँडफाँड सम्पन्न भएको छ । सिटिजन्स बैंक इन्टरनेशनल लिमिटेड कोष प्रवर्द्धक रहेको यस सामूहिक लगानी कोषअन्तर्गत सञ्चालन हुने योजनाको इकाइ बाँडफाँड माघ ४ गते सम्पन्न गरिएको हो । सिटिजन्स म्युचुअल फन्ड अन्तर्गत सञ्चालन हुने बन्दमुखी योजनाअनुसार प्रतिइकाइ १० रुपैयाँका दरले कुल १० करोड इकाइ निष्कासन गरिएको थियो । जसमध्ये बीज पुँजी वापत न्यूनतम १ करोड ५० लाख इकाइ अर्थात् १५ करोड रुपैयाँ बराबरको इकाइ कोष प्रवर्द्धक सिटिजन्स बैंक इन्टरनेसनल लिमिटेडलाई सुरक्षित राखी बाँकी ८ करोड ५० लाख इकाइ सर्वसाधारणका लागि निष्कासन गरिएको थियो । उक्त योजनाको इकाइ पुस ४ गतेदेखि पुस १८ गतेसम्म निष्कासन तथा बिक्री खुला गरिएको थियो । सो अवधिमा मागभन्दा बढी आवेदन प्राप्त भएपछि प्रचलित कानुन बमोजिम योजनाको आकार २५ प्रतिशतले वृद्धि गरी कुल १ अर्ब २५ करोड रुपैयाँ बराबरको १२ करोड ५० लाख इकाइ कायम गरिएको क्यापिटलले जनाएको छ । बढाइएको आकारअनुसार योग्य ६७ हजार ७२० आवेदकलाई (बीज पुँजीसहित) इकाइ बाँडफाँड गरिएको छ। इकाइ निष्कासन तथा बिक्री प्रक्रियामा सहयोग र सद्भाव प्रदान गर्ने सम्पूर्ण लगानीकर्ता, सि–आस्वा सदस्य बैंक तथा वित्तीय संस्था, नेपाल धितोपत्र बोर्ड, नेपाल स्टक एक्सचेन्ज, सिडिएस एण्ड क्लियरिङ, सञ्चार माध्यम तथा सम्बन्धित सबै निकायप्रति सिटिजन्स क्यापिटलले धन्यवाद तथा कृतज्ञता व्यक्त गरेको छ। सिटिजन्स क्यापिटलले योजना व्यवस्थापन तथा डिपोजिटरी, लगानी व्यवस्थापन सेवा, धितोपत्र प्रत्याभूति, धितोपत्र निष्कासन तथा बिक्री प्रबन्ध, सेयर रजिस्ट्रार तथा संस्थागत परामर्श सेवाजस्ता विभिन्न वित्तीय सेवाहरू प्रदान गर्दै आएको छ। कम्पनीले आगामी दिनमा पनि पारदर्शिता, सुशासन र लगानी जोखिम व्यवस्थापनलाई प्राथमिकतामा राख्दै प्रविधिमैत्री तथा लगानीमैत्री सेवा विस्तार गर्ने जनाएको छ । सिटिजन्स बैंक इन्टरनेसनल लिमिटेडको सहायक कम्पनीका रूपमा रहेको सिटिजन्स क्यापिटलमा कर्मचारी सञ्चय कोष तथा प्रतिष्ठित उद्योगी–व्यवसायीहरूको समेत लगानी रहेको छ । कम्पनीका अध्यक्ष राजेन्द्रलाल श्रेष्ठ तथा प्रमुख कार्यकारी अधिकृत सबिर बादे श्रेष्ठ रहेका छन् ।  

काठमाडौं । एनएमबि बैंकले ग्राहकलाई थप सुविधा र अझ उत्कृष्ट बैंकिङ अनुभव प्रदान गर्ने उद्देश्यले दुईवटा नयाँ भिसा प्लाटिनम डेबिट कार्ड सार्वजनिक गरेको छ । बैंकले ग्राहकहरूको बदलिँदो जीवनशैली र आवश्यकता अनुसार ‘प्लाटिनम डेबिट डिलाइट’ र ‘प्लाटिनम डेबिट’ कार्ड बजारमा ल्याएको हो । बैंकका अनुसार यी कार्डहरूले ग्राहकको दैनिक बैंकिङ अनुभवलाई अझ सहज र प्रिमियम बनाउने अपेक्षा गरिएको छ । नयाँ प्लाटिनम कार्डधारकहरूले विभिन्न प्रिमियम आउटलेटहरूमा आकर्षक छुटका साथै विमानस्थल लाउन्जको सुविधा पनि प्राप्त गर्नेछन् (सर्तहरू लागू हुने) । विशेषगरी धेरै यात्रा गर्ने तथा बैंकिङ सेवामा लचकता खोज्ने ग्राहकहरूका लागि ‘प्लाटिनम डेबिट डिलाइट’ कार्ड उपयोगी हुने बैंकको विश्वास छ । यस कार्डमार्फत ग्राहकहरूले नेपालभरका जुनसुकै बैंकका एटिएमबाट निःशुल्क नगद झिक्न सक्नेछन् भने भारतमा नगद झिक्दा पनि विशेष सहुलियत पाउनेछन् । डिजिटल बैंकिङमा अग्रणी रहने लक्ष्यसहित एनएमबि बैंकले आफ्ना ग्राहकलाई विशेष अनुभव दिन यी अत्याधुनिक सुविधाहरू ल्याएको जनाएको छ । बैंकका अनुसार नयाँ कार्डका विशेषताहरूले ग्राहकलाई उत्कृष्ट डिजिटल बैंकिङ अनुभव र विशिष्ट पहिचान प्रदान गर्नेछन् । यी नयाँ कार्डबारे थप जानकारी लिन वा सेवा लिन चाहने ग्राहकहरूले नजिकको एनएमबि बैंक शाखामा सम्पर्क गर्न वा बैंकको कल सेन्टरमार्फत जानकारी लिन सक्नेछन् । हाल एनएमबि बैंकले देशभर २०२ शाखा, १८४ एटिएम र ९ वटा एक्सटेन्सन काउन्टरमार्फत आफ्ना ग्राहकलाई वित्तीय सेवा प्रदान गर्दै आएको छ । 

काठमाडौं । नेपालको सबैभन्दा ठूलो यात्रा बजार ट्रिप टर्बोले बैंक नबिल बैंक लिमिटेडसँग साझेदारी गरेको छ । यस साझेदारीले नबिल बैंकको एनबैंक मोबाइल एपमार्फत प्रयोगकर्तालाई यात्रा बुकिङ अझ सहज र पहुँचयोग्य बनाउने लक्ष्य राखेको छ । सम्झौता नबिल बैंकका उपमुख्य कार्यकारी अधिकृत आदर्श बजगाईं र ट्रिप टर्बोका वृद्धि तथा बजार समन्वय प्रमुख बिमलराज पौडेलले औपचारिक रूपमा हस्ताक्षर गरेका छन् । यस साझेदारीअनुसार नबिल बैंकका ग्राहकहरूले अब एनबैंक एपमार्फत सिधै ट्रिप टर्बोले उपलब्ध गराउने बस टिकट, आन्तरिक तथा अन्तर्राष्ट्रिय उडान, र यात्रा गतिविधिहरू बुक गर्न सक्नेछन् । यसले बैंकिङ र यात्रा सेवाहरूलाई एउटै स्थानमा जोड्दै सहज डिजिटल अनुभव प्रदान गर्नेछ । प्रयोगकर्ताले एनबैंक एपमा घर- थप - बजारभाग (मार्केटप्लेस) मा गएर ट्रिप टर्बोलाई चयन गर्न सक्नेछन् । ट्रिप टर्बो चयन गरेपछि उनीहरू ट्रिप टर्बोको बुकिङ प्रणालीमा पुग्नेछन् र सजिलै यात्रा सेवाहरू खोजी, चयन र बुक गर्न सक्नेछन् । भुक्तानी पनि एनबैंक मार्फत सुरक्षित रूपमा सम्पन्न गर्न सकिनेछ । यस एकीकरणले ग्राहकहरूलाई विश्वासिलो बैंकिङ प्रणाली भित्रै यात्रा सेवा बुक तथा भुक्तानी गर्न सक्षम बनाएको छ, जसले विभिन्न एपहरू बीच सर्छ/स्विच गर्नुपर्ने झन्झट हटाउँदै समग्र सुविधा बढाउनेछ । ट्रिप टर्बोका संस्थापक शिखर प्रसाईंले भने, 'ट्रिप टर्बोमा हाम्रो लक्ष्य प्रविधिको माध्यमबाट यात्रा सरल बनाउनु हो । नबिल बैंकसँगको साझेदारीले ग्राहकहरूलाई एनबैंक एपबाट सिधै यात्रा योजना र बुकिङ गर्न अझ सहज र सुरक्षित तरीका उपलब्ध गराउने हाम्रो दृष्टिलाई अगाडि बढाएको छ ।' नबिल बैंकका उपमुख्य कार्यकारी अधिकृत आदर्श बजगाईंले भने, 'हामी एनबैंक एपको बजारभागमा अर्को साझेदार थप्न पाउँदा खुसी छौं । यस साझेदारीले हाम्रा ग्राहकहरूलाई एनबैंक एपमार्फत यात्रा योजना बनाउन अझ सजिलो बनाउनेमा हामी विश्वस्त छौं । बैंकले एनबैंकलाई दैनिक आवश्यकताका लागि एकल प्लेटफर्म बनाउन निरन्तर विस्तार गर्दै आएको छ । यस साझेदारीले ग्राहकहरूलाई एपभित्रै यात्रा बुकिङ र भुक्तानी गर्न सहज बनाउँछ ।' यो एकीकरण अहिले सबै एनबैंक प्रयोगकर्ताका लागि सक्रिय भइसकेको छ, जसले ग्राहकहरूलाई एनबैंक मोबाइल एपमार्फतै ट्रिप टर्बोका सम्पूर्ण यात्रा सेवाहरू पत्ता लगाएर बुक गर्न सजिलो र सुविधाजनक तरिका प्रदान गर्दछ ।