सिंगटी हाइड्रोको आईपीओ सूचीकृत, भोलिदेखि कारोबार हुने, मूल्य रेञ्ज कति ?
काठमाडौं । सिंगटी हाइड्रो इनर्जीको १ करोड ४५ लाख कित्ता साधारण सेयर (आईपीओ) नेप्सेमा सूचीकृत भएको छ । हालै सर्वसाधारणमा निष्काशन गरी बाँडफाँड पश्चात कम्पनीको सो मात्राको सेयर बैशाख १४ गते मंगलबार नेप्सेमा सूचीकृत भएको हो । यससँगै कम्पनीको उक्त सेयर बुधबार (बैशाख १५ गते) देखि दोश्रो बजारमा किनबेच हुने छ । जसको लागि कम्पनीको सिम्बोल ‘एसएचईएल’ दिइएको छ । नेप्सेले कम्पनीको पहिलो कारोबारको लागि न्युनतम प्रतिकित्ता १०० रुपैयाँ र अधिकतम ३०० रुपैयाँ तोकेको छ । साथै, कम्पनीले सेयर सम्बन्धी कारोबारको अभिलेख राख्ने, दाखिल खारेज, नामसारी, रोक्का राख्ने लगायत सेयरधनीहरुको लगत अद्यावधिक गरी राख्ने सम्पूर्ण कार्यको लागि काठमाडौंको त्रिपुरेश्वरस्थित मेगा क्यापिटल मार्केटस्लाई सेयर रजिष्ट्रार नियुक्त गरेको छ ।
९ महिनामै मेरो माइक्रोफाइनान्सको खुद नाफा २०९ प्रतिशतले बढ्यो, १३ अर्ब कर्जा लगानी गर्न सफल
काठमाडौं । मेरो माइक्रोफाइनान्स वित्तीय संस्थाले चालु आर्थिक वर्षको पहिलो ९ महिनामै २०९.४१ प्रतिशतले खुद नाफा बढाएको वित्तीय विवरण सार्वजनिक गरेको छ । गत आर्थिक वर्षको चैत मसान्तसम्म ९ करोड ५८ लाख रुपैयाँ मात्र खुद नाफा आर्जन गरेको संस्थाले चालु आवको सो अवधिमा २९ करोड ६५ लाख रुपैयाँ नाफा कमाएको हो । समिक्षा अवधिमा संस्थाकाे खुद ब्याज आम्दानी ८१.८९ प्रतिशतले बढेर ५७ करोड १४ लाख रुपैयाँ पुगेको छ । त्यस्तै, सञ्चालन नाफा २१८ प्रतिशतले बढेर ३८ करोड ७३ लाख रुपैयाँ पुगेको छ । हाल संस्थाको चुक्ता पुँजी एक अर्ब रुपैयाँ रहेको छ । जगेडा कोषको रकम ६८ प्रतिशतले बढेर ४८ करोड १ लाख रुपैयाँ पुगेको छ । गत चैत मसान्तसम्म २ अर्ब ३९ करोड रुपैयाँ निक्षेप संकलन गरेको संस्थाले १२ अर्ब ९९ करोड रुपैयाँ कर्जा लगानी गरेको छ । जुन अघिल्लो वर्षको तुलनामा क्रमशः ५१.८१ र १३१.८५ प्रतिशतले बढी हो । संस्थाको निष्कृय कर्जा (एनपीएल) १.९ प्रतिशतबाट घटेर १.७ प्रतिशतमा पुगेको छ । त्यस्तै, संस्थाको प्रतिसेयर आम्दानी (वार्षिक) बढेर ३९.५३ रुपैयाँ पुगेको छ भने प्रतिसेयर नेटवर्थ पनि बढेर १४८ रुपैयाँ पुगेको छ ।
निषेधाज्ञाको बेलामा सेयर बजार खुल्छ कि खुल्दैन ?
काठमाडौं । काठमाडौं उपत्यकामा बैशाख १६ गतेदेखि निषेधाज्ञा जारी हुने भएको छ । उपत्यकाका तीनवटै जिल्लाका प्रमुख जिल्ला अधिकारीहरुको बैठकले बैशाख १६ गतेदेखि निषेधाज्ञा लगाउने निर्णय गरेको स्रोतहरुले पुष्टी गरेपनि औपचारिक रुपमा निर्णय सार्वजनिक भएको छैन । निषेधाज्ञा जारी भएको समयमा सरकारले तोकेका बाहेक पेशा व्यवसाय संचालन गर्न पाइदैन । सरकारले सामान्यतः औषधी पसल र खाद्यान्न पसल बाहेक अन्य व्यवसाय रोक्न सक्ने सम्भावना रहन्छ । निषेधाज्ञाको समयमा सरकारले अत्यावश्यक भनेको सेवा पनि सुचारु हुनेछन् । तर, २०७६ साल चैत ११ गतेदेखि गरिएको देशव्यापी लकडाउन घोषणा गर्दा सेयर बजार पनि बन्द भएको थियो । लकडाउन घोषणा भएको दिनदेखि नै बन्द भएको सेयर बजार २०७७ सालको असार १५ गतेदेखि मात्रै खुलेको थियो । कोरोना भाइरस संक्रमणको दोस्रो लहर चलेसँगै सुरु भएको निषेधाज्ञाको समयमा सेयर बजार बन्द हुन्छ कि खुल्छ भन्ने चासो बढेको छ । तर, अहिले बजार बन्द गर्नुपर्ने अवस्था नरहेको पुँजी बजारको नियामक निकाय धितोपत्र बोर्डका अध्यक्ष भिष्मराज ढुंगाना बताउँछन् । ‘यसअघिको लकडाउनको समयमा अनलाइन कारोबार गराउन सक्ने अवस्था देखिएको थिएन, त्यसैले बजार बन्द थियो, अहिले अनलाइन कारोबारको लागि सबै संयन्त्र तयार छन्, निषेधाज्ञा जारी भएपनि बजार बन्द हुँदैन, स्वाभाविक रुपमा सेयर बजार खुल्ला रहन्छ,’ अध्यक्ष ढुंगानाले विकासन्युजसँग भने । सम्बन्धित समाचार धितोपत्र बोर्डले भन्यो- सेयर बजार बन्द नगर्नु, सुरक्षित कारोबारको लागि विभिन्न ६ व्यवस्था अपनाउनु
