उखु किसानको आन्दोलनप्रति घरेलु महासंघको ऐक्यबद्धता
काठमाडौं । केही दिन यता उखु किसानहरु राजधानीमै भेला भएर आन्दोलित हुनुपर्ने अवस्था र उनीहरुको मागप्रति नेपाल घरेलु तथा साना उद्योग महासंघको ध्यानाकर्षण भएको जनाएको छ । विगत चार वर्षदेखि चिनी मिललाई उखु बिक्री गरेका किसानले हालसम्म पनि उखुको भुक्तानी नपाएकोले देशको विभिन्न भागबाट चिनी मिल पीडित उखु किसान काठमाडौंमा भेला भई आन्दोलित हुनुपर्ने अवस्था र उखु किसानहरुको मागप्रति महासंघको ध्यानाकर्षण भएको जनाएको छ । एकवर्ष अघि नै किसानहरुको उखुको भुक्तानी दिने सम्बन्धमा निजी क्षेत्र समेतको सहभागीतामा उद्योग मन्त्रालयमा सहमति भइसकेको विषयमा हालसम्म पनि किसानहरुले भुक्तानी नपाउनु दुःखद कुरा भएको महासंघको ठहर छ । उखु किसानहरु महासंघका पनि सदस्य रहेको हुँदा उनीहरुको आन्दोलनप्रति नेपाल घरेलु तथा साना उद्योग महासंघको ऐक्यवद्धता रहेको अध्यक्ष श्याम प्रसाद गिरीले बताए । तसर्थ लघु, घरेलु तथा साना उद्योगीहरुको छाता संस्थाको हैसियतमा यस महासंघ चिनी उद्योगीहरुलाई उखु किसानहरुको रकम अविलम्ब भुक्तानी दिन आग्रह गर्दै यस सम्बन्धमा थप केही विषय भए महासंघसँग समन्वय गर्न उनको आग्रह छ ।
गरिमा विकास बैंकको सिमरा शाखा उद्घाटन, ओद्योगिक तथा व्यावसायिक विकासमा महत्वपूर्ण भूमिका खेल्ने
काठमाडौं । गरिमा विकास बैंकले जितपुर सिमरा उप-महानगरपालिकावडानं.-२, सिमरामा स्थापित सिमरा शाखा कार्यालयको औपचारिक उद्घाटन गरेको छ । उक्त शाखा कार्यालयको उद्घाटन सोमबार(पुस १४ गते) नेपाल राष्ट्र बैंक बीरगञ्जका निर्देशक राजन विक्रम थापाले गरेका हुन् । कार्यक्रममा बोल्दै विकास बैंकका सञ्चालक भुपेन्द्र बहादुर खड्काले बारा जिल्लाको ओद्योगिकरण गरी सिमरामा खोलेको विकास बैंकको सिमरा शाखाले त्यस क्षेत्रको ओद्योगिक तथा व्यावसायिक विकासमा महत्वपूर्ण भूमिका खेल्ने विश्वास रहेको बताएका छन् । विकास बैंकका प्रमुख कार्यकारी अधिकृत गोविन्द प्रसाद ढकालले सम्पूर्ण आधुनिक सुविधासहित स्थापना गरिएको सिमरा शाखाबाट विकास बैंकले ग्राहकहलाई उत्कृष्ट सेवा प्रवाह गर्ने बताएका छन् । गरिमा विकास बैंकले काठमाण्डौं उपत्यकाभित्र १० वटा शाखा सहित देशभर ९० शाखा, ५१ एटीएम र गरिमा रेमिटका करिब १० हजार एजेण्टमार्फत ग्राहकहरुलाई सेवा प्रदान गर्दै आईरहेको छ । विकास बैंकले २०७६ पौष १३ गतेसम्म ३७ अर्ब निक्षेप संकलन गरी करिब ३३ अर्ब कर्जा लगानी गरेको छ ।
ग्रील तथा स्टील व्यवसाय संघ ललितपुरद्वारा टिटि खोप र रक्तदान कार्यक्रम सम्पन्न
काठमाडौं । ग्रील तथा स्टील व्यवसाय संघले ललितपुरमा टिटि खोप र रक्तदान कार्यक्रमको सम्पन्न गरेको छ । शनिबार आयोजित उक्त कार्यक्रममा जिल्ला भित्र रहेका ग्रील उद्योगी र उद्योगमा कार्यरत श्रमिकहरुलाई निःशुल्क टिटि खोप लगाएको थियाे । ग्रील उद्योगमा काम गर्ने मजदुरहरुलाई फलाम काट्दा जोड्दा चिल्याउदा चोटपटक लाग्ने खिया लागेको फलामबाट काटेको ठाउँमा टिटानस लाग्ने भएकाले सघले टिटि खोप लगाउने काम गरेको हो । झण्डै ३०० जनालाई टिटि खोप लगाइएको थियो भने सोही अवसरमा ग्रील तथा स्टील व्यवसायी कर्मचारी आश्रित परिवारलाई पनि उपचारको क्रममा रगतको आवश्यकता पर्ने हुदा रक्तसन्चार केन्द्रमा देखिएको रगत अभावलाई कम गर्ने उद्देश्यले रक्तदानको समेत आयोजना गरिएको थियो । ग्रील तथा स्टील। व्यवसाय महासघ नेपालमा आबद्ध ६८ वटै जिल्लामा व्यवसाय जन्य सुरक्षा तथा स्वास्थ्य सम्बन्धी तालिम र शिविरहरु सन्चालन गर्ने महासंघका अध्यक्ष मोहन कटुवालले जानकारी गराएका छन् ।
