ब्रोडवे इन्फोसिसलाई बेस्ट आईटी लर्निङ सेन्टर अवार्ड
काठमाडौं । ब्रोडवे इन्फोसिसले नेपालको बेस्ट आईटी लर्निङ सेन्टर अवार्ड जितेको छ । ब्रोडवेले आईटिमा रुचि राख्नेहरुलाई जाभा, पाइथन, डिजिटल मार्केटिङ जस्ता विविध विषयमा तालिम प्रदान गर्दै आएको छ । बेलायतको विजनेस म्यागेजिन एप्याक इन्साइडरले प्रदान गर्ने यो प्रतिष्ठित अवार्ड हो । ‘अन्तर्राष्ट्रिय क्षेत्रमा सम्मानित हुन पाउादा हामीलाई गौरव लागेको छ । यसले थप मेहनत गरेर अगाडी बढ्न हौसला मिलेको छ ।’ कम्पनीका सीईओ राजु अधिकारीले अवार्ड हात पारेपछि प्रतिक्रिया दिदै भने । एप्याक इन्साइडरको तर्फबाट अवार्ड कोअर्डिनेटर क्याथरिन बेन्टनले ब्रोडवेलाई बधाई दिएकी छन् । सन् २००८ मा स्थापना भएको ब्रोडवे इन्फोसिस आईएसओ ९००१:२०१५ सर्टिफाइड आईटी लर्निङ सेन्टर हो ।
डिजिटल बन्दै टेक्सास कलेज, गुरूचेला सफ्टवेयर प्रयोग गर्ने
काठमाडाैं । टेक्सास कलेज अफ म्यानेजमेन्ट एण्ड आइटीले कलेजलाई डिजिटल बनाउन गुरूचेला सफ्टवेयर प्रयोग गर्ने भएको छ । एक्सटेन्ड बिजनेस सलुशन्स (एक्सविएस) ले विकास गरेको उक्त सफ्टवेयर प्रयोग गर्न टेक्सास कलेजले सम्झौता गरेको हाे । सम्झौतामा टेक्सास कलेज अफ म्यानेजमेन्ट एण्ड आइटीका प्रमुख कार्यकारी अधिकृत भेषराज पोखरेल र एक्सटेन्ड बिजनेस सलुशन्सका प्रबन्ध निर्देशक चिरञ्जिवी अधिकारीले हस्ताक्षर गरे । गुरुचेला सफ्टवेयरमार्फत पूर्ण डिजिटल स्कूलु संचालन गर्न सकिन्छ । एक्सबीएसले यसको राष्ट्रिय नेटवर्कमार्फत नेपालका विश्वविद्यालय, कलेज र स्कूलहरूको लागि लागत(प्रभावी र पूर्ण रूपले कार्यात्मक शैक्षिक ईआरपी सफ्टवेयर प्रदान गर्नेछ । एक्सविएसले आफ्नो कर्पोरेट सामाजिक उत्तरदायित्वको एक भागको रूपमा नेपालका मोडेल स्कूलहरूलाइ सफ्टवेयरको मूल्यमा अनुदान दिने योजना बनाएको छ। कम्पनीका अनुसार स्कूल व्यवस्थापन सफ्टवेयर माध्यमिक र उच्च माध्यमिक विद्यालयहरूको व्यवस्थापन गर्न सघाउने छ । जारी महामारीका कारण नेपालमा विद्यालय र कलेजहरूले पूर्ण क्षमताले सञ्चालनमा कठिनाइ भोगिरहेका छन्। गुरुचेलाले अभिभावकलाइ आफ्ना छोरा-छोरीको दिनचर्या, विद्यालयका गतिविधि, सूचना प्रणाली, शैक्षिक क्यालेन्डर, पुस्तकालय, पुस्तक उपलब्धता, सूचनालगायतका जानकारी उपलब्ध गराउँछ । यस्तै शुल्क, परीक्षा रिपोर्ट, उपस्थिति रिपोर्ट, प्रगति रिपोर्ट ,व्यवस्थापन रिपोर्ट, होस्टल शुल्क, मासिक शुल्क, यातायात शुल्क, अनलाइन कक्षा, विद्यार्थी र शिक्षकको उपस्थिति, अभिभावक( शिक्षक कुराकानी, शिक्षण सामग्री, विषयहरु, पाठ, ई-पुस्तकहरू, अडियो, भिडियो, असाइनमेन्ट, गृहकार्य, परियोजना कामलगायतका सबै कुराहरूको ब्यवस्थापनमा यस सफ्टवेयरले सघाउँछ । एक्सटेन्ड बिजनेस सलुशन्सले २० भन्दा बढी विद्यालयमा गुरूचेला सफ्टवेयर उपलब्ध गराइसकेको छ । टेक्सस कलेज भने यो सफ्टवेयर प्रयोग गर्ने पहिलो सूचना प्रविधि अध्यापन हुने कलेज हो ।
वर्ल्डलिंकले सातै प्रदेशका १४ सहरमा ३ अर्ब लगानीमा अन्तराष्ट्रिय स्तरकाे डेटा सेन्टर बनाउने
काठमाडौं । इन्टरनेट सेवा प्रदायक कम्पनी वर्ल्डलिंकले देशका सातै प्रदेशमा पर्ने गरी प्रमुख १४ सहरमा डेटा सेन्टर स्थापना गर्ने भएको छ । अहिले संचालनमा रहेका डेटा सेन्टर अधिकतम प्रयोगमा रहेको र विश्वस्तरीय डेटा सेन्टर नभएकोले नयाँ डेटा सेन्टर स्थापना गर्न लागिएको हो । सरकारले लिएको डिजिटल नेपाल सपना साकार पार्नको लागि पनि डेटा सेन्टर आवश्यक परेको कम्पनीका अध्यक्ष दिलिप अग्रवालले बताए । ‘सरकारले डिजिटल नेपाल बनाउने योजना अघि सारेको छ, डेटा सेन्टर विदेशमा राखेर डिजिटल नेपालको सपना पूरा गर्न सकिदैन, सरकारको सपना पूरा गर्नको लागि पनि हामीले यो प्रयास गरेका हौं,’ अध्यक्ष अग्रवालले भने । उनले डेटा सेन्टर बनाउनको लागि विज्ञदेखि प्रविधिसम्म आवश्यक पर्ने भएकोले विदेशी कम्पनीसँग सहकार्य गरेर अघि बढिने उनले जानकारी दिए । डेटा सेन्टरमा अन्य इन्टरनेट सेवा प्रदायक (आइएसपीहरु), टेलिकम सेवा प्रदायक कम्पनीहरु, बैंक वित्तीय संस्थाहरु, नेपाल सरकारका विभिन्न निकाय तथा कार्यालयहरु, गैरसरकारी संस्थालगायतले डेटा सेन्टर प्रयोग गर्न सक्ने कम्पनीका प्रमुख कार्यकारी अधिकृत केशव नेपालले जानकारी दिए । कम्पनीका चिफ टेक्निकल अफिसर (सीटीओ) समित जानाले दिएको जानकारी अनुसार कम्पनीले १४ सहरमा डेटा सेन्टर स्थापना गर्नको लागि करिब ३ अर्ब रुपैयाँ लगानी गर्ने योजना बनाएको जानकारी दिए । ‘नेपालमा अहिले भएका डेटा सेन्टर अधिकतम उपयोगमा पुगिसकेका छन्, विश्वस्तरीय डेटा सेन्टर अहिलेसम्म बनेका छैनन्, पछिल्लो समय नेपालका विभिन्न स्थानबाट कन्टेन्ट आउने भएकोले नयाँ डेटा सेन्टर स्थापना जरुरी देखियो,’ सीटीओ जानाले भने । कम्पनीले अबको २ देखि ३ वर्षभित्रमा डेटा सेन्टर निर्माण गरिसक्ने जानकारी दिएको छ । डेटा सेन्टर बनाउनको लागि ३ अर्ब रुपैयाँ लगानी आवश्यक पर्ने प्रारम्भिक अनुमान गरिएको छ । वल्र्डलिंकले काठमाडौं, भरतपुर, लेखनाथ, बुटबल, हेटौडा, दुहबी, भक्तपुर, बिरगन्ज, ढल्केबर, कोहलपुर, अत्तरिया, सुर्खेत, भैरहवा र काठमाडौंमा अर्काे डेटा सेन्टर बनाउन लागेको हो । यसरी डेटा सेन्टर बनाउनेमध्ये काठमाडौंमा बनाउन लागिएको पहिलो डेटा सेन्टर र भरतपुरको लागि जग्गा खरिद गरिसकिएको र भवन निर्माणको डिजाइन तयार भएको कम्पनीले जानकारी दिएको छ ।
