समाज : खेलकुद

काठमाडौं । सरकारले अन्तर्राष्ट्रिय प्रतियोगितामा देशको प्रतिनिधित्व गर्ने खेलाडीहरूलाई आजीवन स्वास्थ्य उपचार सुविधा प्रदान गर्ने घोषणा गरेको छ। अर्थमन्त्री डा. स्वर्णिम वाग्लेले आर्थिक वर्ष २०८३/८४ को बजेट प्रस्तुत गर्दै खेलकुद क्षेत्रलाई प्रोत्साहन गर्न र राष्ट्रिय गौरव बढाउने खेलाडीहरूको सम्मानस्वरूप यो व्यवस्था गरिएको बताए । सरकारका अनुसार ओलम्पिक, एसियाली खेलकुद तथा अन्य अन्तर्राष्ट्रिय प्रतियोगितामा नेपालका तर्फबाट सहभागिता जनाएका खेलाडीहरूलाई दीर्घकालीन स्वास्थ्य सुरक्षा उपलब्ध गराइनेछ। यो कार्यक्रममार्फत खेलाडीहरूको चोटपटक उपचार, नियमित स्वास्थ्य परीक्षण र आवश्यक औषधोपचारमा सहुलियत तथा निःशुल्क सेवा उपलब्ध गराइनेछ। सरकारले खेलकुद पूर्वाधार विकास, प्रशिक्षण कार्यक्रम विस्तार र युवा प्रतिभा पहिचानलाई पनि बजेटमा प्राथमिकता दिएको जनाएको छ।

काठमाडौं । नेपालका रवीन्द्र ढाँटले यूएफसीको छनोट प्रतियोगिता रोड टु युएफसी ५ मा विजयी हासिल गरेका छन् । चीनको मकाउमा भएको प्रतिस्पर्धामा उनले फिलिपिन्सका विपक्षी फाइटर किम्बर्ट अलिन्टोजोन दोस्रो राउन्डमै पराजित गरेका हुन् । ब्यान्टमवेट विधाको क्वाटरफाइनलमा उनले विपक्षीलाई नकआउट गरेका हुन् । यससँगै ढाँटले सेमिफाइनल यात्रा तय गरे । पहिलो राउन्डमा फिलिपिनी फाइटर अलिन्टोजोन हावी भए पनि दोस्रो राउन्डमा ढाँट शक्तिशाली देखिए ।  

काठमाडौं । महालक्ष्मी विकास बैंकले ३२ औँ वार्षिकोत्सवको अवसरमा 'महालक्ष्मी कर्पोरेट क्रिकेट लिग २०२६ (संस्करण–५)' आयोजना गर्ने भएको छ । प्रतियोगिता जेठ १७ देखि जेठ २० गतेसम्म काठमाडौंको चुनिखेलस्थित रोयल स्पोर्ट्स पार्कमा सञ्चालन हुनेछ । हरेक वर्षझैँ यस वर्ष पनि वार्षिक उत्सवको अवसरमा बैंकले उक्त क्रिकेट लिग आयोजना गर्न लागेको हो । नेपाल राष्ट्र बैंकबाट इजाजत प्राप्त बैंक तथा वित्तीय संस्था, बीमा कम्पनी र मर्चेन्ट बैंकहरूको सहभागिता रहने यो लिग कर्पोरेट क्षेत्रमा प्रतिष्ठित प्रतियोगिताको रूपमा स्थापित हुँदै आएको छ । चार दिनसम्म चल्ने प्रतियोगितामा कुल ४५ खेल खेलिनेछन् भने करिब २४० खेलाडी सहभागी हुनेछन् । प्रतियोगितामा ९ वाणिज्य बैंक, ७ विकास बैंक, ३ वित्त कम्पनी, १ लघुवित्त, ३ बीमा कम्पनी र १ मर्चेन्ट बैंक गरी २४ टिम सहभागी हुनेछन् । लिग 'कम नकआउट' ढाँचामा खेलाइनेछ । सहभागी टिमलाई ६ समूहमा विभाजन गरिनेछ र प्रत्येक समूहबाट उत्कृष्ट एक टिम 'सुपर सिक्स' मा प्रवेश गर्नेछ । खेल १०–१० ओभरको हुनेछ । प्रतियोगिताको उद्घाटन जेठ १७ गते हुनेछ भने समापन तथा पुरस्कार वितरण जेठ २२ गते आयोजना गरिनेछ । यसअघि आयोजित टाई–सिट कार्यक्रममा विजेता तथा उपविजेता ट्रफी र टिम जर्सी सार्वजनिक गरिएको थियो । सो अवसरमा टिम कप्तानहरूलाई जर्सी वितरण गरिएको बैंकले जनाएको छ । प्रतियोगितामा विभिन्न विधामा उत्कृष्ट प्रदर्शन गर्ने खेलाडीलाई पुरस्कार प्रदान गरिनेछ, जसमा म्यान अफ द सिरिज, उत्कृष्ट ब्याट्सम्यान, बलर, विकेटकिपर, फिल्डर र फेयर प्ले अवार्ड समावेश छन् । प्रतियोगिताका सबै खेलहरू बैंकको आधिकारिक युट्युब च्यानल तथा नेवा टेलिभिजनमार्फत प्रत्यक्ष प्रसारण गरिनेछ ।