एनएमबि लघुवित्तको २० प्रतिशत लाभांश पारित, चुक्ता पुँजी ५४ करोड नजिक
पोखरा । एनएमबि लघुवित्त वित्तीय संस्थाको प्रस्तावित २० प्रतिशत लाभांश पारित भएको छ । पुस २७ गते सम्पन्न संस्थाको आठौं वार्षिक साधारण सभाले सञ्चालक समितिको उक्त प्रस्तावलाई पारित गरेको हो । सभाले सञ्चालक समितिले प्रस्ताव गरे बमोजिम हाल कायम चुक्ता पुँजीको १ (एक) प्रतिशतका दरले हुन आउने रकम ४५ लाख ३६ हजार १७५ रुपैयाँ नगद लाभांश वापत (वोनस सेयरको कर प्रयोजनको लागि मात्र) वितरण गर्ने प्रस्ताव पारित गरेको हो । साथै, १९ प्रतिशतले हुन आउने ८ करोड ६१ लाख ८७ हजार ३२५ रुपैयाँं बराबरको बोनस सेयर जारी गर्ने प्रस्ताव समेत सभाले पारित गरेको हो । हाल संस्थाको चुक्ता पुँजी ४५ करोड ३६ लाख रुपैयाँ रहेको छ । १९ प्रतिशत बोनस पश्चात लघुवित्तको चुक्ता पुँजी ५३ करोड ९८ लाख रुपैयाँ पुग्ने छ । सोमबार संस्थाका सञ्चालक समिति अध्यक्ष सजिव सुब्वाको सभापतित्व तथा नेपाल राष्ट्र बैकका प्रदेश प्रमुख ईश्वरी प्रसाद भट्टराईको प्रमुख आतिथ्यतामा साधारणसभा सम्पन्न भएको हो । कम्पनी सचिव गोविन्द बाँस्तोलाले सञ्चालन गरेको सभामा एनएमबि बैंकको तर्फवाट प्रतिनिधित्व गरेका सञ्चालक गोविन्द घिमिरेले समेत सेयरधनी समक्ष आफ्नाे धारण राखेका थिए । सम्बन्धित समाचार एनएमबि लघुवित्तले घोषणा गर्यो दुई वर्ष यताकै उच्च लाभांश, बोनस कति ?
चन्द्रागिरी हिल्सकाे आईपीओः साढे १० लाख बढीले भरे, भाेलिसम्म आवेदन दिन पाइने
काठमाडौं । चन्द्रागिरी हिल्स लिमिटेडले जारी गरेको प्राथमिक सेयर (आईपीओ) मा हालसम्म दुई अर्ब १० करोड रुपैयाँ बराबरको आवेदन परेको छ । बिक्री प्रबन्धक ग्लोबल आईएमई क्यापिटलका अनुसार सोमबार(पुस २७ गते) साँझ ५ बजेसम्ममा १० लाख ६७ हजार ८९३ जना आवेदकले २ करोड १० लाख ५२ हजार ३२० कित्ता सेयरको लागि आवेदन दिएका छन् । जुन संस्थाले सर्वसाधारणमा माग गरेको भन्दा १५ गुणा बढी आवेदन हो । कम्पनीले सर्वसाधारणमा १३ लाख ९६ हजार २२ कित्ता सेयर निष्काशन गरिरहेको छ । कम्पनीले गत पुस २४ गतेदेखि १५ करोड ३४ लाख ९ हजार १०० रुपैयाँ बराबरको १५ लाख ३४ हजार ९१ कित्ता आईपीओ बिक्रीमा राखेको हो । जसमध्ये ४ प्रतिशत अर्थात ६१ हजार ३६४ कित्ता सेयर कर्मचारीहरुको लागि र ५ प्रतिशत अर्थात ७६ हजार ७०५ कित्ता सामूहिक लगानी कोषहरुका लागि सुरक्षित गरेको छ । र, बाँकी रहेको १३ लाख ९६ हजार २२ कित्ता सेयरमा सर्वसाधारणमा निष्काशन गरेकाे हाे । चन्द्रागिरी हिल्समा लगानी गर्दा उचित प्रतिफल पाइने, यस्ता छन् कम्पनीका भावी योजना यससँगै इच्छुक आवेदकले १० कित्तादेखि अधिकतम १३ हजार ९६० कित्तासम्म आवेदन दिन सक्नेछन् । उनीहरुले पुस २४ गतेदेखि छिटोमा आगामी पुस २८ गतेसम्म आवेदन दिन सक्नेछन् । यससँगै इच्छुकले भाेलि बैंकिङ्ग समय भित्रमा कम्पनीकाे सेयरकाे लागि आवेदन दिइसक्नु पर्ने छ । कम्पनीको सेयर निष्काशन तथा बिक्री प्रबन्धकमा ग्लोबल आईएमई क्यापिटल रहेको छ । इच्छुक आवेदकले सि(आस्वा सदस्य बैंक तथा वित्तीय संस्था र मेरोसेयर मार्फत आवेदन दिन सक्नेछन् । उक्त आईपीओ जारी पश्चात कम्पनीको चुक्ता पुँजी १ अर्ब ५३ करोड रुपैयाँ पुग्नेछ । कम्पनीले यसअघि आयोजना प्रभावित स्थानीयलाई प्रतिसेयर एक सय रुपैयाँको ३ लाख ६ हजार ८१९ कित्ता सेयर निष्काशन गरी बाँडफाँड समेत गरिसकेको छ । साथै, उक्त सेयर बाँडफाँड गर्दा सेयर हात पारेका स्थानीयले भने कम्पनीले जारी गर्न लागेको दोश्रो चरणको सेयरको लागि आवेदन दिन पाउने छैनन् ।
बैंकको सस्तो सेयर खोज्दै हुनुहुन्छ ? यी हुन् ३ सयभन्दा कम मूल्यमा पाइने ९ वाणिज्य बैंक
काठमाडौं । बढी प्रतिफल दिने कम्पनीको सस्तो मूल्यमा सेयर किन्ने चाहना सबैलाई हुने गर्छ । तर, राम्रा कम्पनीको सेयर सस्तो मूल्यमा भने पाइदैन । अल्पकालिन लगानीकर्ताले कम्पनीले दिने प्रतिफललाई ध्यानमा राखेर सेयर किन्ने गरेका हुँदैनन् । अल्पकालिन लगानीकर्ताको ध्यान भने बजारमा तत्काल आउने उतारचढावप्रति बढी हुने गर्छ । तर, आफूले सेयर किनिसकेपछि सो कम्पनीको मूल्य घट्यो भने सेयर होल्ड गर्नुपर्ने बाध्यता आउन सक्छ । सेयर होल्ड गर्दा भने कम्पनीले प्रदान गर्ने प्रतिफल प्रमुख विषय बन्न सक्छ । नेपालका वाणिज्य बैंकहरुको औसत प्रतिफल १० प्रतिशतभन्दा बढी नै छ । अर्थात एक कित्ता सेयर हुनेले वार्षिक १० प्रतिशतभन्दा बढी प्रतिफल पाउन सक्ने अवस्था छ । लागतका आधारमा पाउने प्रतिफललाई मात्रै ध्यान दिने हो भने कतिपय अवस्थामा सस्तो मूल्यमा पाइने सेयरले बढी मूल्यमा पाइने कम्पनीको भन्दा बढी प्रतिफल पनि दिन सक्छ । हामीले यहाँ ३ सय रुपैयाँभन्दा सस्तो मूल्यमा दोस्रो बजारमा सेयर पाइने वाणिज्य बैंक र उनीहरुले प्रदान गरेको प्रतिफलका बारेमा जानकारी दिँदैछौं । अहिले दोस्रो बजारमा ९ वटा वाणिज्य बैंकको सेयर मूल्य प्रतिकित्ता ३ सय रुपैयाँभन्दा कम छ । प्रतिकित्ता ३ सय रुपैयाँभन्दा सस्तो मूल्यमा दोस्रो बजारमा सेयर पाइने बैंकहरुमा बैंक अफ काठमाण्डू, सेन्चुरी, सिभिल, कुमारी, लक्ष्मी, माछापुच्छ्रे, मेगा, नेपाल बंगलादेश (एनबी) र सनराइज हुन् । आज (२७ पुस) नेपाल स्टक एक्सचेन्जमा बैंक अफ काठमाण्डूको सेयर प्रतिकित्ता २ सय ८८ रुपैयाँमा कारोबार बन्द भयो । सो बैंकले गत वर्षको नाफाबाट प्रतिकित्ता ३ रुपैयाँ नगद र १३ प्रतिशत बोनस सेयर गरी १६ प्रतिशत प्रतिफल दिएको छ । यद्यपि, बैंक अफ काठमाण्डूको साधारणसभा सकिएको छ र यस्तो प्रतिफल यो वर्ष सेयर किन्नेले पाउँदैनन् । सेन्चुरी कमर्सियल बैंकको सेयर आज प्रतिकित्ता २ सय २० रुपैयाँमा कारोबार बन्द भएको छ । सेन्चुरीले २ वर्षको साधारणसभा गर्न बाँकी छ । उसले अघिल्लो वर्षको नाफाबाट २.२५ प्रतिशत नगद र ५.२५ प्रतिशत बोनस सेयर गरी ७.५ प्रतिशत प्रतिफल दिदैछ । यस्तै, गत वर्षको नाफाबाट ४.७५ प्रतिशत नगद र २ प्रतिशत बोनस सेयर गरी ६.७५ प्रतिशत प्रतिफल दिदैछ । सेन्चुरीको साधारणसभा भइसकेको भने छैन । सिभिल बैंकको सेयर मूल्य प्रतिकित्ता २ सय ३ रुपैयाँ छ । सिभिलले वार्षिक साधारणसभा तय गरिसकेको छैन भने उसले प्रदान गर्ने प्रतिफल पनि घोषणा भएको छैन । कुमारी बैंकको सेयर मूल्य आज प्रतिकित्ता २ सय ८७ रुपैयाँमा कारोबार बन्द भएको छ । उसले गत वर्षको नाफाबाट सेयरधनीलाई ३.५ प्रतिशत नगद र १०.८५ प्रतिशत बोनस सेयर दिएको छ । कुमारीले गत वर्षको साधारणसभा गरिसकेकोले अहिले सेयर किन्नेले यस्तो प्रतिफल भने पाउने छैनन् । लक्ष्मी बैंकको सेयर आज दोस्रो बजारमा प्रतिकित्ता २ सय ७५ रुपैयाँका कारोबार बन्द भएको छ । लक्ष्मीले २.५ प्रतिशत नगद र ९ प्रतिशत बोनस सेयर गरी ११.५ प्रतिशत प्रतिफल प्रदान गर्दैछ । लक्ष्मीको गत वर्षको साधारणसभा भइसकेको छैन । माछापुच्छ्रे बैंकको सेयर मूल्य प्रतिकित्ता २ सय ७५ मा कारोबार बन्द भएको छ । उसले गत वर्षको नाफाबाट ३.३७ प्रतिशत नगद र ७.०३ प्रतिशत बोनस सेयर प्रदान गरेको छ । माछापुच्छ्रे बैंकले पनि गत वर्षको साधारणसभा गरिसकेको छ । मेगा बैंकको सेयर मूल्य प्रतिकित्ता २ सय ८७ रुपैयाँमा कारोबार बन्द भएको छ । मेगाले गत वर्षको नाफाबाट ३.०५ प्रतिशत नगद र १० प्रतिशत बोनस सेयर गरी १३ प्रतिशतभन्दा बढी प्रतिफल प्रदान गर्दैछ । मेगाले गत वर्षको साधारणसभा गरिसकेको छैन । एनबी बैंकको सेयर आज प्रतिकित्ता २ सय ८० रुपैयाँमा कारोबार बन्द भएको छ । एनबीले गत वर्षको नाफाबाट २.४२ प्रतिशत नगद र ६ प्रतिशत बोनस सेयर गरी ८.४२ प्रतिशत प्रतिफल दिएको छ । एनबीले गत वर्षको साधारणसभा गरिसकेको छ । आज सनराइज बैंकको सेयर मूल्य प्रतिकित्ता २ सय ७० रुपैयाँमा कारोबार बन्द भएको छ । उसले गत वर्षको नाफाबाट सेयरधनीलाई प्रतिकित्ता २.४८ प्रतिशत नगद र ५.८ प्रतिशत बोनस सेयर प्रदान गरेको छ । सनराइजले पनि गत वर्षको साधारणसभा गरिसकेको छ । यद्यपि, सेयर बजारमा लगानी गर्नु जोखिमपूर्ण हुन्छ । कुनै पनि कम्पनीको सेयर किन्ने वा बेच्ने निर्णय लगानीकर्ताले आफै बिचार गरेर गर्नुपर्छ ।
