संस्थापक सेयर किन्न सहज गर्दै मेगा क्यापिटल
काठमाडौं । मेगा क्यापिटल मार्केट्सले संस्थापक सेयरहरु खरिद तथा बिक्रीका लागि सहजीकरण सेवाको सुरुवात गरेकाे छ । क्यापिटलले नेप्सेमा सूचीकृत बैंक तथा वित्तीय संस्था, बीमा, लघुवित्त, जलविद्युत, तथा उत्पादनमूलक कम्पनीहरुको संस्थापक सेयरहरु खरिद-बिक्रीका लागि सहजीकरण सेवाको सुरुवात गरेकाे हाे । धेरै लगानीकर्ताहरुले प्रमोटर सेयर, साधारण सेयर जस्तो दोस्रो बजारमा सजिलै बिक्री गर्न असहजताले शेयर सम्पत्ति बन्धक भएकाे र आवश्यकता अनुसार बिक्री गरेर आर्थिक आवश्यकता पुरा गर्न नसकेकाे विषयलाई मध्यनजर गर्दै क्यापिटलले सेयर बजारमा यो नयाँ सेवाको सुरुवात गरेको जनाएकाे छ । यसका लागि इच्छुक लगानीकर्ताले घरैमा बसी मेगा क्यापिटल मार्केट्समा फोन वा इमेल वा मार्केट्सको फेसबुकमा म्यासेन्जर मार्फत् म्यासेज पठाउन सक्ने क्यापिटलले जनाएकाे छ ।
नेशनल लाईफ इन्स्योरेन्सले घोषणा गर्यो लाभांश, चुक्ता पुँजी ४ अर्ब नाघ्ने
काठमाडौं । नेशनल लाईफ इन्स्योरेन्सले लाभांश घोषणा गरेको छ । इन्स्योरेन्सले सेयरधनीलाई २० प्रतिशत लाभांश वितरण गर्ने घोषणा गरेको हो । कम्पनीले आर्थिक वर्ष २०७६/७७ को नाफाबाट सेयरधनीलाई चुक्ता पुँजीको १९ प्रतिशत बोनस र बोनस सेयरमा लाग्ने कर प्रयोजनको लागि १ प्रतिशत नगद लाभांश वितरण गर्ने प्रस्ताव गरेको हो । उक्त प्रस्ताव माघ १२ गते बसेको इन्स्योरेन्स सञ्चालक समितिको बैठकले गरेको हो । प्रस्तावित लाभांशलाई बीमा समितिले स्वीकृत तथा इन्स्योरेन्सको आगामी वार्षिक साधारण सभाले पारित गर्नुपर्ने छ । हाल इन्स्योरेन्सको चुक्ता पुँजी ३ अर्ब ३९ करोड रुपैयाँ छ । १९ प्रतिशत बोनस पारित पछि इन्स्योरेन्सको चुक्ता पुँजी ४ अर्ब रुपैयाँ नाघ्ने छ । तीन वर्षयताकै उच्च लाभांश प्रस्तावित २० प्रतिशत लाभांश अघिल्लो तीन वर्षयताकै उच्च हो । इन्स्योरेन्सले आर्थिक वर्ष २०७३/७४ देखि आर्थिक वर्ष २०७५/७६ को नाफाबाट सो मात्राको लाभांश वितरण गरेको थिएन । आर्थिक वर्ष २०७२/७३ को नाफाबाट २६.३२ प्रतिशत (२५ प्रतिशत बोनस) लाभांश वितरण गरेको इन्स्योरेन्सले त्यसपछि क्रमशः १३.५, १४.५ र १०.५३ प्रतिशत लाभांश वितरण गरेको थियो ।
हकप्रदको लागि शिखर इन्स्योरेन्सले तोक्यो बुक क्लोजको मिति
काठमाडौं । शिखर इन्स्योरेन्स कम्पनीले आगामी माघ २१ गते बुक क्लोज गर्ने भएको छ । इन्स्योरेन्सले ३० प्र्रतिशत हकप्रद सेयर जारी गर्न उक्त एक दिन बुक क्लोज गर्ने निर्णय गरेको हो । यससँगै बुक क्लोजको अघिल्लो दिनसम्म अर्थात माघ २० गतेसम्म कायम सेयरधनीले उक्त हकप्रदमा आवेदन दिनसक्ने छन् । २०७७ चैत ९ गते सम्पन्न इन्स्योरेन्सको पन्ध्रौं तथा सोह्रौं वार्षिक साधारण सभाले सेयरधनीहरुलाई एक कित्ता सेयर बराबर नयाँ ०.३ कित्ता सेयर निष्काशन गर्ने प्रस्ताव पारित गरेको थियो । इन्स्योरेन्सले एक सय अंकित दरको ५२ करोड ७५ लाख ५७ हजार २०० रुपैयाँ बराबरको ५२ लाख ७५ हजार ५७२ कित्ता सेयर निष्काशन गर्न लागेको हो । जसको बिक्री प्रबन्धकमा एनआईबिएल एस क्यापिटल रहेको छ । सम्बन्धित सामाग्रीः दुई निर्जीवन बीमा कम्पनीले ९९ कराेड रूपैयाँकाे हकप्रद जारी गर्ने
